1. Bengi pakati keetu bali bapata maavia ki palua mipaango ibali baibiikila?

 EBA, weewe waaibiikiilepo kale mupaango wa kimupasi inzi waandua kuufikilizia? b Kine i evio, mana nangue te uli bunke. Kwa mufuano, Philip waatonene kuwaamia mapepo akue, kabili waali wakebele kuya wapepa lingi, inzi waali waandua kupata musita wa kupepa. Erika waaibiikiile mupaango wa kufika mbele ku bulondolozi bwa kuya mu miilo ya kusimikila. Inzi, lingi waali wafikasie nyuma. Tomáš waaibiikiile lingi mupaango wa kusoma Bibilia yonse. Walanda eevi: “Nsyaali naunvua kusoma Bibilia kwaweeme. Naaeziizie mara itatu, inzi lyonse naali napeleelasie mu kitabu kya Balawi.”

2. Juu ya ki te tupalile kutioka mutima kine tuli ni mupaango wa kimupasi utuli mukwandua kufikilizia?

² Loonu kine uli ni mupaango olia uusinafikilizie, te kutioka mutima. Paantu atasie kine ukebele kufikilizia mupaango uleengele, lingi ili yaloomba musita ni kwikwinda saana. Kuya watonene kufikilizia mupaango obe, kulangiliile nangue weewe umwene bukibuza bobe pamo ni Yehova kuya bwali bwa mana, kabili kulangiliile nangue utonene kumupeela kintu kiweeme saana. Yehova ali watasia kwikwinda kobe. Kulanda kisinka, taketekeele ukite bintu bingi saana bipitile buviinde bobe. (Malum. 103:14; Mik. 6:8) Pakaako, upalile kusaakula mupaango upateene ni aali yobe. Kisia kusaakula mupaango upateene ni aali yobe, kunti wakita siani eevi ufikilizie ozo mupaango? Kansi tumoneko masoke paleepale.

3. Juu ya ki kukosia nkulu ni kwa mana?

³ Kukosia nkulu ni kwa mana eevi kufikilizia mipaango ya kimupasi.  Muntu olia ali ni nkulu ya kufikilizia mupaango wakue, ali wasaangua watonene saana kukita maka eevi aufikilizie. Nkulu ya kufikilizia mipaango ili nga mwela uli wasukuma buato mpaka koolia kubuli mukuya. Kine mwela watwalilila kupuupa, kipalile olia ali mukwenzia buato ali kufika koolia kwali mukuya. Kabili kine kuli mwela ukata, olia ali mukwenzia buato kunti wafikasie lubilo. Enka evio, kine tuli ni nkulu ikata, keekio kunti kyatukwasia saana tufikilizie mipaango yeetu ya kimupasi. Lupua David, wa mu kyalo kya El Salvador walanda eevi: “Nkulu ili yakwasia muntu ekwinde saana. Kine muntu ali ni nkulu, ali kuya waikwinda eevi te kunti alekelele kintu kyonse kimwanzie kufikilizia mupaango wakue.” Eevi ukile kwaluka ni nkulu ikata, kunti wakita siani?

4. kunti twamuloomba ki Leeza mu lipepo? (Bafilipi 2:13) (Mona ni foto.)

⁴ Muloombe Leeza akupeele nkulu ikata. Kupitila mupasi wakue, Yehova kunti wakupeela nkulu eevi ufikilizie mupaango obe. (Soma Bafilipi 2:13.) Nsita inge, tuli twaibiikila mipaango paantu tumanine nangue tupalile kukita evio, kabili keekio kili buino. Inzi paange kunti twaandua kunvua nkulu ya kufikilizia ozo mupaango. Evio, i vyaaiunvuile ni nkazi Norina wa mu kyalo kya Uganda. Waaibiikiile mupaango wa kupata lisambililo lya Bibilia lya kutungulula. Inzi tabanga wali na nkulu ikata ya kufikilizia ozo mupaango, paantu waatontonkaniizie nangue taali na buviinde bwa kutungulula. Ni kiki kyaamukwasiizie ozu nkazi? Walanda eevi: “Kila busiku naatendekele kumuloomba Yehova ankwasie kongezia nkulu yane ya kutungulula lisambililo lya Bibilia. Kukoonkana ni mapepo ane, naakitile maka a kuwaamia bufundi bwane bwa kusambilizia. Kisia miezi iniini, naainikile nangue nkulu yane yaakilile kutana. Mu ozo wenka muaka, naatendekele kutungulula masambililo abili a Bibilia.”

5. Kunti twatontonkania palua ki eevi tukosie nkulu yeetu ya kufikilizia mupaango weetu?

⁵ Tontonkania palua bintu bili byakukitila Yehova. (Malum. 143:5) Mutumua Paulo waatontonkaniizie Yehova vyaamulangiliile buwaame busipalilue. Kabili kutontonkania evio, kwaamukwasiizie amubombele saana Yehova. (1 Bakor. 15:9, 10; 1 Tim. 1:12-14) Enka evio, kine weewe wakila kutontonkania palua beelia bili byakukitila Yehova, uli kukila kukinkiziiwa kufikilizia mipaango yobe. (Malum. 116:12) Mona keelia kyaamukwasiizie nkazi umo wa mu kyalo kya Honduras eevi afikilizie mupaango wakue wa kwaluka painia wa loonse. Walanda eevi: “Naatontonkaniizie saana Yehova vyali wandangilila ntono. Waankwasiizie ngie nali pakati ka bantu bakue. Ali wangemena ni kunsuunga. Musita undi natontonkania palua kaako, ndi nakila kumutona Yehova, kabili keekio kili kyakila kukinkizia nkulu yane ya kumubombela Yehova.”

6. Ni kiki kinge kili kutukwasia kukosia nkulu yeetu ya kufikilizia mupaango?

⁶ Tontonkania mpaalo yuli kupata kine weewe wafikilizia mupaango obe. Nkazi Erika, olia utwazimbulanga ntaanzi, waaibiikiile mupaango wa kufika mbele ku bulondolozi bwa kuya mu miilo ya kusimikila. Ni kiki kyamukwasiizie afikilizie ozo mupaango? Walanda eevi: “Kufika nyuma ku bulondolozi bwa kuya mu miilo ya kusimikila  kwaali kwalengia ngie napitua bintu bingi saana. Inzi, kuya nafika mbele nga kwaampeele fuasi ya kupozia balupua ni bankazi ni kulondolola naabo. Kabili nga natendekele kutuilizia masoke a mana a kunkwasia nsekelele ni kuwaamia bufundi bwane mu miilo ya kusimikila.” Nkazi Erika waapoozele maano ku mpaalo elia yaasiile kupata, kupitila kufika mbele ku bulondolozi bwa kuya mu miilo ya kusimikila, kabili waafikiliziizie mupaango wakue. Kine weewe uli ni mupaango wa kuwaamia mibeele yobe ya kusoma Bibilia ao kuwaamia mapepo obe, kunti watontonkania palua mpaalo ki? Tontonkania vyuli kukosia bukibuza bobe pamo ni Yehova kine weewe wafikilizia ozo mupaango. (Malum. 145:18, 19) Kine weewe uli ni mupaango wa kukuzia mibeele ya Kikristu, tontonkania mibeele ezio viyakaba kuwaamia bukibuza bobe pamo ni bange. (Bakol. 3:14) Weewe, wamona siani kine waleemba liste iliko mpaalo yonse, elia ikusonseziizie utone kufikilizia mupaango obe? Lyonse, uye wabuela kutoosia ezio liste. Tomáš, olia utwazimbulanga ntaanzi walanda eevi: “Musita umanine nangue kuli mpaalo ingi impembeele kine nafikilizia mupaango wane, keekio kili kyankwasia ngikwinde saana kufikilizia ozo mupaango.”

7. Ni kiki kyabakwasiizie ba Julio ni mukazi wakue eevi bafikilizie mupaango wabo?

⁷ Pisia musita pamo ni baalia bali kukusonsezia eevi ufikilizie mupaango obe. (Tus Maf. 13:20) Mona keelia kyaabakwasiizie ba Julio ni mukazi wakue, eevi bafikilizie mupaango wabo wa kubomba saana mu miilo ya kusimikila. Julio walanda eevi: “Twaasaakuile ba bibuza ba kutusonsezia twikwinde kufikilizia mupaango weetu, kabili twaali twalondolola naabo palua ozo mupaango. Bengi pakati kaabo baali basyafikiliziizie mipaango ipaleene ni yeetu. Pakaako, baatupeele masoke apalile. Kabili babibuza betu baali batwipuzia vyaali vyaya mipaango yeetu ni kutukinkizia musita utwaali twakabiile.”

8. Kine tuli twaikwindasie kufikilizia mupaango weetu musita utukinkiziiziwe na nkulu, kunti kwaaluka ki? (Mona ni foto.)

⁸ Kulanda kisinka, fwe bonse tuli twasaangua ni nsiku itusiizi kwikala na nkulu ya kukita kintu. Eba, keekio kyalangilila nangue tetuviinda kwikwinda eevi tufikilizie mupaango weetu? Ata, te evio. Kwa mufuano, mwela kunti waya wali ni maka akata a kusukuma buato mpaka koolia kubuli mukuya. Inzi mwela uli wasaangua wapuseene maka, kabili nsiku inge tewiizi kusaanguako. Eba, keekio kilangiliile nangue olia ali mukwenzia buato taviinda kutwalilila kuya? Tekiizi kusaangua evio lyonse. Kwa mufuano, ange maato, ali asaangua ni motere; ni ange ali asoozua na nkafi. Wakwenzia buato, kunti wabombia motere ao nkafi eevi afike koolia kwali mukuya. Nkulu yeetu kunti yapalaniiwa na mwela; lunge kunti yasaangua yatanine, ni nsiku inge yakeepele. Kabili nsiku inge, kunti twasaangua twali ni nkulu ya kwikwinda kufikilizia mupaango weetu. Pakaako, kine tuli twaikwindasie kufikilizia mupaango weetu musita utukinkiziiziwe na nkulu, paange te  tukafikiliziapo ozo mupaango. Nga eveliasie wa kwenzia buato vyali wapata nzila inge eevi afike koolia kwali mukuya, ni fwefue kunti twaikwinda eevi kufikilizia mupaango weetu atasie kine tetuli na nkulu. Kulanda kisinka, kukita evio te kuleengele. Inzi kine wafikilizia mupaango obe uli kwaluka ni nsaansa. Ntaanzi tulondoluele keelia kituli kukita, twasukenke kiipuzio kili mu lifungu likoonkelepo.

9. Eba, kine te tunvuile nkulu ya kufikilizia mupaango weetu wa kimupasi, tupalilesie kutwalilila kwikwinda? Londolola.

⁹ Yehova atonene tumubombele twali ni nsaansa, kabili mukwitonena. (Malum. 100:2; 2 Bakor. 9:7) Eba, kine te tunvuile nkulu ya kufikilizia mupaango weetu wa kimupasi, tupalilesie kutwalilila kwikwinda eevi kufikilizia ozo mupaango? Tumone mufuano wakue mutumua Paulo. Waalandile eevi: “Ndi naemia mubili wane, kuti nguteeke.” (1 Bakor. 9:25-27) Paulo waali waikwinda kukita beelia bitonene Yehova, atasie musita lwasyali wali na nkulu ya kukita evio. Eba, Yehova waasekeleele miilo yaabombele Paulo? Een, waasekeleele! Kabili Yehova waamupaalile paantu waaikwindile.​—2 Tim. 4:7, 8.

10. Ni mpaalo ki ituli kupata kine twaikwinda kufikilizia mupaango weetu atasie musita utusili na nkulu ya kukita evio?

¹⁰ Enka evio, Yehova ali wasekelela kutumona twatwaliliile kwikwinda eevi tufikilizie mupaango weetu, anzia kine te tunvuile nkulu ya kufikilizia ozo mupaango. Ali wasekelela anzia kine paange lunge kunti twakita evio bila twali na nkulu palua miilo itupaangile kufikilizia. Weene ali wasaangua wamanine nangue tuli mukwikwinda kufikilizia mupaango weetu paantu tumutonene weene. Nga evelia Yehova vyaamupaalile mutumua Paulo, ni fwefue wakaba kutupaala paantu tuli mukwikwinda. (Malum. 126:5) Kabili, kine twaimwena mpaalo yakue Yehova, tuli kwaluka ni nkulu ya kufikilizia ezio miilo. Nkazi Lucyna, wa mu kyalo kya Polandi walanda eevi: “Nsita inge nsiizi kutona kuya mu miilo ya kusimikila, asa kine ntopele. Anzia evio, nsaansa indi napata kisia kufuma mu miilo ya kusimikila ili yasaangua yali bupe bwa kupapia.” Loonu, tumone keelia kituli kukita kine tetuli na nkulu ya kufikilizia mupaango weetu.

11. Yehova kunti watukwasia siani kukosia mibeele yeetu ya kwitiinia?

¹¹ Muloombe Yehova akupeele mibeele ya kwitiinia. Mibeele ya kwitiinia i buviinde bwa kutungulula namuna vyuli waiunvua ni beelia byuli wakita. Lingi ozu mulandu uli waleeta malanga a kwiseeluka ku bintu bibiipile. Inzi, iloombele kabili kuya twali ni ezio mibeele eevi itukinkizie kukita biweeme, asa kine keelia kituli twakita kikolele ao kine te tuli na nkulu ya kukikita. Languluka nangue, mibeele ya kwitiinia ni seemu ya lizabo lya mupasi. Pakaako, muloombe Yehova mupasi utakatiifu eevi ukukwasie kukosia ezio mibeele ya mana. (Luk. 11:13; Bag. 5:22, 23) David, utwazimbulanga lwa ntaanzi, walanda lipepo vilyaamukwasiizie. Waali ni mupaango wa kuya wakita lisambililo lya bunke mara ingi. Walanda eevi: “Naamuloombele Yehova eevi ankwasie nkosie mibeele ya kwitiinia. Kupitila kukwasiiwa na weene, naatendekele kukoonka ntantiko iweeme ya lisambililo lya Bibilia ni kukindika ezio ntantiko.”

12. Lifunde lili mu Kasimika 11:4, lyatukwasia siani eevi tufikilizie mipaango ya kimupasi?

¹² Te kupembelela aali iwaame saana. Mu keenu kyalo, kikolele kwisaanga twali mu aali iweeme saana. Kine twapembelela tukabe kwaluka mu aali iweeme saana, paange tetuviinda kufikilizia mupaango weetu. (Soma Kasimika 11:4.) Lupua umo ali wakuutua Dayniel walanda eevi: “Tekwizi kusaangua aali iweeme saana. Pakaako, te tupalile kupembelela mpaka aali iwaame saana, tupalilesie kutendeka mupaango weetu.” Lupua Paul wa mu kyalo kya Uganda walanda nsaambu inge ipalile kutulengia tutiine kupembelela palua kutendeka mupaango weetu: “Kine twatendeka mupaango weetu atasie kine aali teili buino, Yehova kunti watukwasia.”​—Mal. 3:10.

13. Juu ya ki kili buino kutendeka na mipaango iniini-iniini?

¹³ Tendeka na mipaango iniini-niini. Paange  kunti twaandua kunvua nkulu ya kufikilizia mupaango weetu paantu tumwene ozo mupaango kuya wakolele saana kufikilizia. Kine ni weewe umwene mupaango obe kuya wakolele kufikilizia, wamona siani kine wakasania mupaango ozo mu seemu iniini-iniini? Kine weewe uli ni mupaango wa kukuzia mibeele imo ya Kikristu, wamona siani kine watendekanke kulangilila mibeele ezio mu tuntu tuniini-tuniini? Kine uli ni mupaango wa kusoma Bibilia yonse, wamona siani kine watendekanke kusoma seemu iniini-iniini? Tomáš, utwazimbulanga ku ntendeko, waandilue kufikilizia mupaango wakue wa kusoma Bibilia mu muaka umo. Walanda eevi: “Naainikile nangue naali nasoma Bibilia lubilo-lubilo. Pakaako, naapinguile kubambulula kusoma Bibilia, inzi mu ozo musita, naapaangile kusoma milongo iniini-iniini kila busiku ni kutontonkania palua beelia binaali nasoma. Keekio, kyaalengiizie ntendeke kusekelela kusoma Bibilia.” Paantu Tomáš’ waatendekele kusekelela kusoma Bibilia, keekio kyalengiizie abambe kutona kuisoma mu musita waleepele. Kupuako, waafikiile kupua kusoma Bibilia yonse. c

14. Ni biki paange bili byalengia kikole kufikilizia mupaango weetu?

¹⁴ Atasie kine tuli ni nkulu, kabili twikwindile saana, nsita inge kunti kwaaluka ni bintu bya kutuvulunghania. Kwa mufuano, “bintu bisiketekeelue” kunti byatutwamina musita utukabiile eevi tufikilizie mupaango weetu. (Kas. 9:11) Paange kunti twasaakaana ni buavia bwa kutulengia tutioke mutima ni kulengia maka etu akeepa. (Tus Maf. 24:10) Paantu te tupuililikile, kunti twakita bilubo beelia bili kulengia kikole saana kufikilizia mupaango weetu. (Bar. 7:23) Ao paange kunti twaiunvuasie kutopa. (Mat. 26:43) Ni kiki kili kutukwasia kine kuli kintu kyavulunghania mupaango weetu?

15. Kine kuli kintu kyakitika kya kuvulunghania mupaango weetu, eba keekio kilangiliile nangue twaandua kufikilizia ozo mupaango? Londolola. (Malumbo 145:14)

¹⁵ Languluka nangue kine kintu kyavulunghania mupaango obe, keekio te kilangiliile nangue waandua kufikilizia ozo mupaango. Bibilia ili yalanda  nangue kunti twasaakaana ni maavia lingi. Inzi kabili, ili yalanda paswetele nangue kupitila kukwasiiwa na Yehova, kunti twabuela kwikwinda eevi tufikilizie mupaango weetu. (Soma Malumbo 145:14.) Lupua Philip utwazimbulanga lwa ntaanzi, walanda eevi: “Nsiizi kupooza maano ku nsita indi naandua kufikilizia mupaango wane. Inzi ndi napooza maano ku nsita indi nabuela kabili kutendeka kwikwinda eevi nfikilizie ozo mupaango.” David, olia utwazimbulanga lwa ntaanzi, walanda eevi: “Ndi naikwinda kumona bintu bili byanvulunghania kuya yali fuasi ya kumulangilila Yehova nangue mutonene saana, inzi apana kuya byali bintu bya kunganzia.” Kakiine, kine waikwinda eevi ufikilizie mupaango obe anzia binvulunghania, uli kulangilila nangue utonene kumusaansamusia Yehova. Kakiine, Yehova ali kusekelela kine wamona weewe wali mukutwalilila kwikwinda eevi ufikilizie mupaango obe!

16. Kine kintu kimo kyavulunghania mupaango obe, kunti wasambililapo ki?

¹⁶ Sambililapo lisomo musita luuli wasaakaana ni kintu kya kuvulunghania mupaango obe. Tontonkania palua kintu kyalengianga, kisia iipuzie eevi, ‘Kunti nakita ki eevi keeki kintu te kunti kikitike kabili?’ (Tus Maf. 27:12) Inzi, lunge, kine mupaango obe ukolele saana kufikilizia, keekio kunti kyalangilila nangue paange waakiibiikila mupaango uusili na buviinde bwa kufikilizia. Kine wamona nangue mu aali yobe teuviinda kuufikilizia, toosia kabili ozo mupaango eevi umone kine upalile kuli weewe. d Yehova taviinda kutontonkania nangue uli wa bule kine weewe waandua kufikilizia mupaango upitile buviinde bobe.​—2 Bakor. 8:12.

17. Juu ya ki tupalile kuya twalangulukile mipaango elia itwakifikilizia kale?

¹⁷ Languluka bintu biwakifikilizia kale. Bibilia ili yalanda nangue “Leeza teezi kubula nsaambu eevi alabe miilo imwabomba.” (Baeb. 6:10, NWT) Pakaako, ni weewe te upalile kulaba beelia biwakifikilizia kale. Tontonkania palua mipaango yobe elia iwakifikilizia kale, nga evelia kukosia bukibuza bobe pamo ni Yehova, kusimikilako bantu bange, ao kubatiziiwa. Kunti watwalilila kwikwinda kukita buyantanzi eevi kufikilizia mupaango obe wa leenu, nga evelia viwaikwindile pa kufikilizia mipaango yaapitile.​—Baf. 3:16.

18. Tupalile kumona ki musita utuli mukwikwinda eevi tufikilizie mupaango weetu? (Mona ni foto.)

¹⁸ Nga evelia olia ali waenzia buato vyali wasekelela kufika koolia kwali mukuya, enka evio ni weewe, kunti wafikilizia mupaango obe kupitila kukwasiiwa na Yehova. Inzi, languluka kabili nangue baalia bali baenzia maato, bengi bali basekelela bulendo bwabo. Enka evio ni weewe, musita luutwaliliile kwikwinda eevi ufikilizie mupaango obe wa kimupasi, ikwinde kumona Yehova vyali mukuya wakukwasia ni kukupaala. (2 Bakor. 4:7) Kine te utopele, weewe wakaba kupata mpaalo ingi saana.​—Bag. 6:9.