LYASI LYA KUSAMBILILA LYA 19
LWIMBO 22 Bukolo Butendekele Kuteeka—Ale Bwize!
Ni Biki Bitumanine Palua Bupinguzi Bwakue Yehova bwa mu Musita Uli Waiza?
“Yehova . . . tatonene muntu ata umo akenoonue.”—2 PET. 3:9, NWT.
KIKATA KIINE
Tusininkiziizie nangue bupinguzi bwakue Yehova bwa mu musita uli waiza bwakaba kuya bwali bwa nsambu kabili bwapalile.
1. Juu ya ki kunti twalanda nangue twikeele mu kipindi kya kusansamusia sana?
TWIKEELE mu kipindi kya kusansamusia sana! Tuli mukwimwena bukabika bwa Bibilia bwafikiliziiwa kila busiku. Kwa mufuano, tuli mukumona “likolo wa ku nkungua” ao wa ku kaskazini pamo ni “likolo wa ku nkungulua” ao wa kusini bali mukulwila kuteeka kyalo kyonse. (Dan. 11:40, bulondolozi bwa pensina) Tuli mukumona mpunda iweme ya Bukolo Bwakue Leeza yasimikilua sana mwaya kyalo. Kabili, ma milioni a bantu ali mukusaakula kumubombela Yehova. (Is. 60:22; Mat. 24:14) Kukila pa kako, tuli mukupokelela byakulia bingi bya kimupasi “pa musita upalile.”—Mat. 24:45-47.
2. Ni kiki kitusininkiziizie, kabili ni kiki kitupalile kuya twainikile?
2 Yehova atwaliliile kutukwasia evi tuye twaunvwisia bwino bintu bikata belia byakaba kukitika ku ntanzi. (Tus Maf. 4:18; Dan. 2:28) Tuye twasininkiziizie nangue musita wakaba kutendeka lyemo likata, twakaba kumana byonse bitwakaba kuya twakabiile kumana evi kutwalilila kusipikizia twali ba kisinka ni kusyala twakwateene pa ozo musita wakaba waaviizie. Anzia evio, tupalile kuya twainikile nangue kuli bintu binge bitusimanine palua musita uli waiza. Mu leli lyasi tuli kumona juu ya ki twaakyalululako bintu bimo pakati ka belia bitwaalandile palua bintu binge bya kukitika musita uli waiza. Kisia, tuli kubwela kumona bintu paleepale belia bitumanine palua musita uli waiza, ni Baba wetu wa ku muulu vyali wakakita.
BINTU BITUSIMANINE
3. Lwa kale, twaalandile syani palua bantu kumuketekela Yehova ni kupusuka kisia lyemo likata kutendeka, kabili juu ya ki twaalandile evio?
3 Lwa kale, twaalandile nangue kine lyemo likata lyatendeka, baalia bonse basizumiine te bakapata kabili fwasi ya kumuketekela Yehova ni kupusuka pa Armagedoni. Twaalandile evio pantu twaatontonkaniizie nangue bintu byaakitikile musita wa Kibunda kya menda kya mu nsiku yakue Noa bibanga byali bukabika palua bintu bya kukitika musita uli mukwiza. Kwa mufuano, twaatontonkaniizie nangue pantu te kuli muntu ata umo waavindile kwingila mu safina kisia Yehova kwizala mulyango, tekukaba muntu ata umo wakapata fwasi ya kumuzumina Yehova ni kupusuka, kine lyemo likata lyatendeka.—Mat. 24:37-39.
4. Eba, lonu tumwene nangue bintu byaakitikile musita wa Kibunda kya menda bibanga byali bukabika palua bintu bya kukitika musita uli mukwiza? Londolola.
4 Eba, tupalile kumona nangue bintu byaakitikile musita wa Kibunda kya menda kya mu nsiku yakue Noa bibanga byali bukabika palua bintu bya kukitika musita uli mukwiza? Ata. Juu ya ki? Pantu Bibilia te ilandile evio. a Yesu waapalaniizie “nsiku yakue Noa” na nsita ya kubaapo kwakue. Inzi, taalandile nangue bintu belia byaakitikile musita wa Kibunda kya menda kya mu nsiku yakue Noa bibanga byali bukabika palua bintu bya kukitika musita uli mukwiza. Kabili, taalandile nangue kwizalua kwa mulyango wa safina kubanga kwali bukabika bwa kwiza kufikiliziiwa musita uli waiza. Anzia evio, kekio te kilangiliile nangue tetuvinda kusambilila kantu ata kamo kupitila lyasi lyakue Noa ni Kibunda kya menda.
5. (a) Ni kiki kyaakitile Noa ntanzi ya Kibunda kya menda? (Baebrania 11:7; 1 Petro 3:20) (b) Palua miilo ya kusimikila, aali yetu ipaleene syani ni aali ya mu nsiku yakue Noa?
5 Musita Noa lwaaunvwile mpunda ya kusoka yakue Yehova, waalangiliile nangue abanga wali ni kiketekelo kupitila kukuula safina. (Soma Baebrania 11:7; 1 Petro 3:20.) Enka evio ni bantu baalia bali mukunvua mpunda iweme ya Bukolo lonu, bapalile kulangilila kiketekelo kupitila bikitua byabo. (Miil Bat. 3:17-20) Petro waamukuutile Noa nangue “kasimika wa nsambu.” (2 Pet. 2:5, NWT) Inzi, nga vitwaakilondolola mu lyasi lyaakipita, te tumanine kine Noa waamusimikiile kila muntu ntanzi Kibunda kya menda tekinatendeke. Lonu, ni fwefue tuli mukwikwinda kubomba miilo ya kusimikila kwa mute mwaya kyalo. Inzi, ata sie kine twikwinde syani, tetukaba kuvinda kumusimikila kila muntu pa kyalo ntanzi mpela teinafike. Juu ya ki?
6-7. Juu ya ki kunti twalanda nangue tetukaba kuvinda kumusimikila kila muntu mpunda iweme ntanzi mpela teinafike? Londolola.
6 Tontonkania bintu byaalandile Yesu palua miilo ya kusimikila. Waalandile nangue mpunda iweme yakasimikilua ‘mu kyalo kyonse kuba kisininkizio ku ntundu yonse.’ (Mat. 24:14) Bobo bukabika buli mukufikiliziiwa sana lonu kuliko lwa ntanzi. Mpunda ya Bukolo ili mukusimikilua mu ndimi ikilile pa 1 000. Kabili, bantu bengi sana bali mukupata mpunda iweme ya Bukolo kupitila kitente kyetu kya Enternete kya jw.org.
7 Inzi kabili, Yesu waabalandile basambi bakue nangue te bakasangua ‘bapwile . . . mizi yonse,’ ao kumusimikila kila muntu ntanzi ya wene kwiza. (Mat. 10:23; 25:31-33) Milandu yakue Yesu yakaba kufikiliziiwa ni mu onu musita wetu. Lonu, kuli ma milioni a bantu baalia bekeele mu fwasi molia mukaaniiziwe sana miilo yetu ya kusimikila. Kukila pa kako, baana bengi bali mukuvyalua mu kila dakika. Tuli mukwikwinda sana kubasimikila mpunda iweme bantu ba mu “ntundu yonse, ni mikoa yonse, ni bantu ba mu ndimi yonse.” (Nfy. 14:6) Inzi, kisinka ni keki: tetukaba kuvinda kumusimikila kila muntu mpunda iweme ntanzi mpela teinafike.
8. Kunti twaiipuzia kipuzio ki palua Yehova vyali wakaba kupingula bantu musita uli waiza? (Mona ni ma foto.)
8 Inzi, kunti twaiipuzia evi: Eba, kyakaba syani palua bantu baalia basikapata fwasi ya kunvua mpunda iweme ntanzi lyemo likata telinatendeke? Yehova ni Mwana wakue, olia apeelue miilo ya kupingula, bakakita syani palua babo bantu? (Yoan. 5:19, 22, 27; Miil Bat. 17:31) Lilembo limaniine leli lyasi lilandile nangue Yehova “tatonene muntu ata umo akenoonue.” Inzi, atonene “bonse balapile bibalo byabo.” (2 Pet. 3:9; 1 Tim. 2:4) I kulanda, tupalile kuya twainikile nangue Yehova tanatubwile vyali wakaba kupingula bantu baalia basikapata fwasi ya kunvua mpunda iweme. Kabili, kulanda kisinka, wene tapatikiziiziwe kutubwila kila kantu palua belia byaakitile ao palua belia byali wakaba kukita.
Pange bange te bakapata fwasi ya kunvua mpunda iweme ntanzi lyemo likata telinatendeke. Eba, Yehova wakakita syani palua babo bantu? (Mona lifungu lya 8) c
9. Ni biki bili byatubwila Yehova mu Mulandu wakue?
9 Mu Mulandu wakue, Yehova ali watubwila bintu binge byali wakaba kukita mu musita uli waiza. Kwa mufuano, Bibilia ili yatubwila nangue Yehova wakabatuntumuna “bantu basili ba nsambu” baalia baasyapatile fwasi ya kusambilila mpunda iweme ni kwalulula lwendo lwabo. (Miil Bat. 24:15; Luk. 23:42, 43) Kekio kyalengia twiipuzie bipuzio binge bya mana.
10. Kunti twaiipuzia bipuzio ki binge?
10 Eba, baalia bonse bakafua mu kipindi kya lyemo likata bakafua lonse bila kiswapilo kya kutuntumunua? Bibilia ili yalanda nangue Yehova pamo ni kisepe kyakue bakabenoona pa Armagedoni baalia bonse bali bamupinga wene, kabili te bakatuntumunua. (2 Bat. 1:6-10) Inzi, eba kyakaba syani kine bantu bange bafua, kwa mufuano, kine bafua na masanzo a kiasili, na ma aksida, ao kine baipaiwa sie na bantu bange? (Kas. 9:11; Zek. 14:13) Eba, bamo pakati ka babo bantu kunti basangua pa “bantu basili ba nsambu” baalia bakatuntumunua mu kyalo kya lenu? Te tumanine.
BINTU BITUMANINE
11. Pa Armagedoni, bantu bakapingulua kukonkana ni kiki?
11 Te tumanine bintu bingi sana byakakitika mu musita uli waiza. Kwa mufuano, tumanine nangue pa Armagedoni, bantu bakapingulua kukonkana ni bintu bibali babakitila ba lupua bakue Kristu. (Mat. 25:40) Baalia bakalangilila nangue bali babakwasia ba lupua babiikilue mafuta ni Kristu, bakapingulua kuya bali mikooko. Kabili, tumanine nangue ba lupua bamo bakue Kristu bakaba bakili panu pa kyalo kisia lyemo likata kutendeka, kabili bakaya ku muulu musita unini ntanzi ya kutendeka kwa Armagedoni. Mu kipindi kyonse kyakaba kyakili ba lupua bakue Kristu panu pa kyalo, kunti kyakitika bantu bange bakapate fwasi ya kubakwasia bene pamo ni miilo ibali babomba. (Mat. 25:31, 32; Nfy. 12:17) Juu ya ki bebio bintu ni bya mana?
12-13. Kisia “Babiloni Mukulu” kwinoonua, bange kunti bakita syani? (Mona ni ma foto.)
12 Ata sie kisia lyemo likata kutendeka, bamo pakati ka baalia bakamona kwinoonua kwa “Babiloni Mukulu” kunti balanguluka nangue mu myaka ingi, Bakasininkizia Bakue Yehova baalandile palua kukitika kwa kekio kintu. Eba kunti kyakitika bamo pakati ka baalia bakamona Babiloni Mukulu wainoonua bakatendeke kumuketekela Yehova?—Nfy. 17:5; Ezek. 33:33.
13 Kine kyakakitika evio, pange kunti kyaaluka nga evelia vikyaakitikile mu Misri, mu nsiku yakue Musa. Languluka nangue “kikundi kikata sana kya bantu bachangeene” kyaaiungile ni Baisraeli musita ubaafumine mu Misri. Pange, bamo pakati ka babo, baatendekele kumuketekela Yehova musita ubaamwene Bimina Likumi bya Maavia byakitika, nga vyaalandile Musa. (Kuf. 12:38) Kine bantu bange bakakita evio kisia Babiloni Mukulu kwinoonua, eba, twakafipua pantu babo bantu baiunga pamo ni fwefue kwasyasyele sie musita unini mpela ifike? Ata, te tukafipua! Tutonene kupala mibele yakue Baba wetu wa ku muulu pantu wene ni “Leeza wa luse ni nkumbu, asizi kuleenga kufiitua kabili ali ni ntono ingi ilamatiliile ni kisinka.” b—Kuf. 34:6.
Bantu bamo baalia bakamona “Babiloni Mukulu” wainoonua bakalanguluka nangue Bakasininkizia Bakue Yehova baali basyalandile palua kukitika kwa kekio kintu (Mona lifungu lya 12-13) d
14-15. Eba, kupata bukose bwa lonse kuswapiile musita waafwiliilepo muntu ao ku fwasi kwaali waikala? Londolola. (Malumbo 33:4, 5)
14 Nsita inge, pange ba lupua ni ba nkazi bange kunti balanda evi palua muntu umo wa mu lupua lwabo asizi kumubombela Yehova: “Kunti kyawama kine wene wafua ntanzi lyemo likata telinatendeke, pantu kine kyaaluka evio, wakatuntumunua.” Kulanda kisinka, te kilubo kutontonkania evio. Inzi, kupata bukose bwa lonse te kuswapiile musita wakafwilapo muntu ao ku fwasi kwabanga waikala ntanzi ya kufua. Yehova, wene ni Mupinguzi apwililikile, kabili lyonse bupinguzi bwakue ni bwa nsambu kabili bupalile. (Soma Malumbo 33:4, 5.) Tuswapiile nangue “Mupinguzi wa kyalo kyonse” wakakita bintu bya nsambu.—Kut. 18:25.
15 Kabili, kili bwino kulanda nangue kupata bukose bwa lonse te kuswapiile fwasi kwaali kwaikala muntu. Yehova tavinda ata kanini kupingula ma milioni a bantu nangue ni “ ba mbuzi” pantu sie babanga baikala mu tuzonga molia mubaasyapatile fwasi ya kunvua mpunda ya Bukolo. (Mat. 25:46) Mupinguzi wa nsambu kabili wa kyalo kyonse ali waemena sana babo bantu kupita ni fwefue vituli twabeemena. Te tumanine Yehova vyali wakatungulula bintu musita wa lyemo likata. Pange bamo pakati ka babo bantu bakapata fwasi ya kusambilila pa lwakue Yehova, kumuketekela wene, ni kwaluka ku lubali lwakue musita wene lwali wakaswesia liina lyakue ntanzi ya ntundu yonse.—Ezek. 38:16.
Kisia lyemo likata kutendeka, . . . eba, kunti kyakitika bamo pakati ka baalia bakamona Babiloni Mukulu wainoonua bakatendeke kumuketekela Yehova?
16. Twaakifikiila kumana ki pa lwakue Yehova? (Mona ni foto.)
16 Kupitila lisambililo lyetu lya Bibilia, twaakifikiila kumana nangue Yehova amwene bukose bwa bantu kuya bwali bwa mana sana. Waafumiizie bukose bwakue Mwana wakue evi fwe bonse twaluke ni kiswapilo kya kupata bukose bwa lonse. (Yoan. 3:16) Fwe bonse tuli twaimwena Yehova vyatutonene sana. (Is. 49:15) Amanine liina lya kila umo wetu. Kulanda kisinka, wene atumanine bwino sana. Pa kako, ata sie kine twafua, wakatutuntumuna pantu alangulukile kila kantu pa lwetu ni palua kila kantu katubanga twamanine! (Mat. 10:29-31) Tusininkiziizie kakiine nangue Baba wetu wa ku muulu, kabili wa ntono, wakamupingula kila muntu mu nzila ipwililikile pantu wene ni wa nsambu, wa luse, kabili pantu ali ni mulangue.—Yak. 2:13.
Tuswapiile kakiine nangue Yehova wakamupingula kila muntu mu nzila ipwililikile, ya nsambu, kabili ya luse (Mona lifungu lya 16)
17. Twakaba kusambilila ki mu lyasi likonkelepo?
17 Bobu bupilibuko bonse butwasambilila mu kunvua kwetu, bwalengia tumone nangue miilo ya kusimikila ipalile kubombua lubilo sana kuliko lwa ntanzi. Juu ya ki twalanda evio? Kabili, ni kiki kili kyatusonsezia kutwalilila kusimikila kwa mute? Twakaba kupata byasuko bya bebio bipuzio mu lyasi likonkelepo.
LWIMBO 76 Wewe Waiunvua Syani?
a Evi upate bulondolozi palua nsambu yaakilengia bobu bupilibuko bukitue, mona lyasi lilandile, “Ndiyo Njia Iliyokubaliwa Nawe,” mu Lupungu Lwakue Kamwenenena lwa pa Nsiku 15, Mwezi wa 03, 2015 lub. 7-11.
b Kisia kwinoonua kwa Babiloni Mukulu, babombi bonse bakue Yehova bakeziiwa musita lubakalwisiiwa na Gogu wa Magogu. Olia onse wakaba ku lubali lwa bantu bakue Leeza, kisia kwinoonua kwa Babiloni Mukulu, ni wene wakeziiwa.
c BULONDOLOZI BWA FOTO: Aali itatu ilangiliile juu ya ki pange bantu bamo te bakapata fwasi ya kunvua mpunda iweme: (1) Mwanakazi umo ali waikala mu fwasi molia muli dini imo ikata, elia ili yalengia muntu engile mu bwavia kine waitabila kusimikilua, (2) ba mulume ni mukazi bamo bali baikala mu fwasi molia muli buteeko bolia buli bwalanda nangue kine muntu waitabila kusimikilua, i kulanda watyona mizilo ya kyalo, kabili nangue waiingizia mu bwavia, ni (3) mwalalume umo ali waikala kule sana, kolia kusivinda kufika ba kasimika.
d BULONDOLOZI BWA FOTO: Mukazyana umo olia waalekeele kumubombela Yehova walanguluka bintu byaasambiliile palua kwinoonua kwa “Babiloni Mukulu.” Wapingula kumubwelela Yehova ni kubwela kwikala ni bavyazi bakue Bakasininkizia. Kine bintu bya evio byakitika, tupalile kumupala Baba wetu wa ku muulu, olia ali ni luse ni nkumbu. Kabili tupalile kunvua makola pantu mubifi waaluluka ni kubwela.
