LYASI LYA KUSAMBILILA LYA 20
LWIMBO 67 “Simikila Mulandu”
Twalilila Kusimikila Wasonseziiziwe na Ntono!
“Nsimiko yakasimikiluanke ku ntundu yonse.”—MARK. 13:10.
KIKATA KIINE
Tuli kumona ntono viili yatusonsezia kubomba miilo ya kusimikila kwa mute kabili kwa mweo wetu onse.
1. Ni biki bitwaakisambilila ku kulonghaana kwa kila mwaka kwa 2023?
KU KULONGHAANA kwa kila mwaka a kwa mu 2023 twaakipata bulondolozi bunvwikile bwino palua bintu paleepale bituzumiine. Kabili ku kulonghaana koko, twaakyunvua mpunda ya nsansa elia yaakipundua palua miilo ya kusimikila. Kwa mufuano, twaakisambilila nangue bantu bange kunti bapata fwasi ya kwiunga pamo ni bantu bakue Yehova ata sie kisia Babiloni Mukulu kwinoonua. Kabili, twaakibwilua nangue kubambila mu Mwezi wa 11, 2023, bakasimika ba Bukolo, te bakaba kuya baripoti kabili bintu byonse bibali bakita mu kusimikila. Eba, kekio kyalangilila nangue miilo yetu ya kusimikila te ikili ya mana sana, kabili nangue te ikili ya kubombua lubilo nga viyakiba yali lwa ntanzi? Ata, te evio!
2. Juu ya ki kila busiku, miilo ya kusimikila ili mukukila kwaluka ya kubombua lubilo? (Marko 13:10)
2 Kila busiku, miilo ya kusimikila ili mukukila kwaluka ya kubombua lubilo sana. Juu ya ki? Pantu kwasyala sie musita unini mpela ikabe kufika. Mona vyaalandile Yesu palua miilo ya kusimikila mu nsiku ya mpeleezio. (Soma Marko 13:10.) Kukonkana ni mpunda yakue Mateo, Yesu waalandile nangue mpunda iweme yakasimikilua mu kyalo kyonse ntanzi “mpeleezio” teinaize. (Mat. 24:14) Bobo bulanzi bulangiliile nangue kyalo kibipile kyakue Sataana kyakaba kupwililila. Yehova apangile “busiku ni musita” palua bintu byakaba kukitika lenu sie mu musita uli mukwiza. (Mat. 24:36; 25:13; Miil Bat. 1:7) Kila busiku, tuli mukukila kupalama ku ozo musita. (Bar. 13:11) Pa kako, tupalile kutwalilila kusimikila mpaka kyalo kyakue Sataana kikabe kupwililila.
3. Ni kiki kili kyatusonsezia kusimikila?
3 Kuli kipuzio kimo kya mana kitupalile kwiipuzia fwe bonse. Tupalile kwiipuzia evi: Juu ya ki tuli twasimikila mpunda iweme? Ntono i ili yatusonsezia kusimikila. Musita utuli twasimikila tuli twalangilila nangue tutonene mpunda iweme, tubatonene bantu. Kabili, kikilile pa byonse tuli twalangilila nangue tumutonene Yehova ni liina lyakue. Kansi, tulondololenke kila kintu pa lwakue.
TULI TWASIMIKILA PANTU TUTONENE MPUNDA IWEME
4. Bantu bali bakita syani musita ubali bapata mpunda iweme?
4 Eba kunti waalanguluka viwaaiunvwile musita luwaapatile mpunda iweme, nga evelia kuvyalua kwa mwana mu lupua lwenu, ao kupata miilo elia yutonene? Kulanda kisinka, wewe waali watonene sana kubabwilako ezio mpunda iweme bantu ba mu lupua lobe ni barafiki. Eba, waaiunvwile enka evio ni musita luwaaunvwile mpunda iweme sana kupita mpunda yonse, i kulanda, mpunda iweme ya Bukolo Bwakue Leeza?
5. Wewe waaiunvwile syani musita luwatendekele kusambilila kisinka kili mu Mulandu Wakue Leeza? (Mona ni ma foto.)
5 Tontonkania viwaaiunvwile musita luwatendekele kusambilila kisinka kili mu Mulandu Wakue Leeza. Wewe waavumbwile nangue Baba obe wa ku muulu akutonene, nangue atonene uye wali mu lupua lwakue lwa bantu bali bamupupa. Kabili, waasambiliile nangue wene alaile kupwisia misa ni lyemo, nangue wewe kunti waaluka ni kiswapilo kya kubamona kabili batonua bobe baalia baafwile musita ubakatuntumunua mu kyalo kya lenu. Kabili wewe waavumbwile ni bintu binge bingi. (Mark. 10:29, 30; Yoan. 5:28, 29; Bar. 8:38, 39; Nfy. 21:3, 4) Bebio bintu biwaasambiliile byaakulengiizie usansamuke sana. (Luk. 24:32) Wewe waatonene sana bintu biwaasambiliile, kabili waatonene kubabwilako ni bange palua bebio bintu!—Palania ni Yeremia 20:9.
Musita utwaasambiliile lwa kwanza bisinka bili mu Bibilia, twaaunvwile sana nsansa, kabili twaatonene kubabwilako ni bange! (Mona lifungu lya 5)
6. Mufuano wakue Ernest ni Rose wakusambilizia ki wewe?
6 Tumone mufuano wakue lupua Ernest. b Baba wakue waafwile musita wene lwabanga wakili sie na myaka likumi. Ernest walanda evi: “Naali naiipuzia evi: ‘Baba wane waakiya ku muulu? Ao waakifua sie lonse?’ Naali nabonvwila bwivu baana bange baalia baali bakwete ba baba wabo bakosele.” Kila musita Ernest waali waya ku mankabuli, ni kufukama palia paaziikilue baba wakue, kisia waali wapepa evi: “We Leeza napapaata, ntonene kumana kine baba wane ali kupi.” Lupaapitile myaka 17 evi, kisia baba kufua, Ernest waatendekele kusambilila Bibilia. Waapapile musita lwaasambiliile nangue baalia bafwile te bamanine kantu ata kamo, bali nga evelia muntu onene sana. Kabili waapapile lwaamanine nangue Bibilia ilaile nangue kwakaba kwali ni kutuntumunua musita uli waiza. (Kas. 9:5, 10; Miil Bat. 24:15) Kupwako, Ernest waafikiile kupata byasuko bya bipuzio belia bibanga byamwemia musita waleepele! Ernest waatonene sana bisinka bya Bibilia belia byaali wasambilila. Rose, mukazi wakue, ni wene waatendekele kusambilila, kabili waatonene sana mpunda ya Bukolo. Bonse babili baabatiziiziwe mu mwaka wa 1978. Baatonene sana kubabwilako bantu ba mu lupua lwabo, ba rafiki, ni bonse baali batona kutwilizia bintu bya mana bibaasambiliile. Kekio kyaakilengia ba Ernest ni Rose bafikiile kukwasia bantu bakilile pa 70 bamumane Yehova ni kubatiziiwa.
7. Tuli twakita syani musita utuli twafikiila kutona sana masambilizio a Bibilia? (Luka 6:45)
7 Kulanda kisinka kine twafikiila kutona sana masambilizio a Bibilia, tetuvinda kutalala bila kubwilako bange. (Soma Luka 6:45.) Tuli twaiunvua nga evelia vyaaiunvuile basambi bakue Yesu ba mu myaka mia ya ku ntendeko. Baalandile evi: “Tetuvinda kulekela kulanda pa bintu bitwaaimweneene ni kwiunvwila.” (Miil Bat. 4:20) Tutonene sana kisinka kya Bibilia, pa kako tutonene kubabwilako bantu bengi kukonkana ni buvinde bwetu.
TULI TWASIMIKILA PANTU TUBATONENE BANTU
8. Ni kiki kili kyatusonsezia tubasimikile bange mpunda iweme? (Mona kisanduku kilandile “ Tona Bantu Eevi Ukite Basambi.”) (Mona ni foto.)
8 Nga Yehova ni Mwana wakue, ni fwefue tubatonene bantu. (Tus Maf. 8:31; Yoan. 3:16) Tuli twabonvwila sana nkumbu baalia ‘basili na Leeza,’ kabili “basili na kiswapilo.” (Baef. 2:12) Maavia kunti abalengia beyunvue nga evelia bali mu kiina kizikile sana. Inzi, fwefue tukwete lukamba lwa kukwasia kubakulila panze, i kulanda, mpunda iweme ya Bukolo Bwakue Leeza. Kubatona ni kubonvwila nkumbu babo bantu i kuli kwatusonsezia twikwinde sana kubasimikila mpunda iweme. Ezio mpunda ikindeeme, kunti yabakwasia baaluke ni kiswapilo, baaluke ni bwikazi buweme sana lonu, ni kubapeela kiswapilo kya kupata “bukose bwine bwine,” i kulanda, bukose bwa lonse mu kyalo kya lenu kyakue Leeza.—1 Tim. 6:19.
Kubatona bantu ni kubonvwila nkumbu kuli kwatusonsezia twikwinde sana kubasimikila mpunda iweme (Mona lifungu lya 8)
9. Ni mpunda ki ya musoko ituli mukubapeela bantu palua musita uli waiza, kabili juu ya ki? (Ezekieli 33:7, 8)
9 Kabili, kubatona bantu kuli kwatusonsezia tubasoke nangue mpela ya kenu kyalo kibipile yapalama. (Soma Ezekieli 33:7, 8.) Tuli twabonvwila nkumbu bekazi netu pamo ni bantu ba mu lupua lwetu basizumiine. Bantu bengi bapobeele mu bintu bibali bakita kila busiku bila bamanine kelia kili mukwiza ku ntanzi yabo, i kulanda “bwavia bukata [ao, lyemo likata] businabeeko kutula kulengua kwa kyalo mpaka bonu busiku. Kabili tekukaba bunge bwavia nga bobo.” (Mat. 24:21) Tutonene bamane bintu byakakitika pa ozo musita wa bupinguzi, i kulanda, kwinoonua kwa dini ya bufi, ni kwinoonua kwa kyalo kibipile kyakue Sataana pa Armagedoni. (Nfy. 16:14, 16; 17:16, 17; 19:11, 19, 20) Tuswapiile nangue bantu bengi bakaba kufikiila kwitabila mpunda ya musoko ituli twabasimikila ni kupingula kutendeka kumubombela Yehova pamo netu lonu. Ale kyakaba syani palua baalia bali mukukaana kutwilizia ezio mpunda ya musoko lonu, kubiika mukati ni bantu ba mu lupua lwetu baalia batutonene?
10. Juu ya ki ni kintu kya mana sana kutwalilila kubabwilako bange mpunda ya musoko palua kelia kyakaba kukitika musita uli mukwiza?
10 Nga vitwakisambilila mu lyasi lyaakipita, Yehova kunti watona kubapususia bantu baalia bakatendeka kumuketekela wene musita ubakamona Babiloni Mukulu wainoonua. Kansi, ni kintu kya mana sana tukile kubabwilako ezio mpunda ya musoko lonu. Languluka nangue: Belia bituli kubabwila lonu, kunti babilanguluka pa ozo musita. (Palania ni Ezekieli 33:33.) Pange bakalanguluka mpunda ya musoko itwaali twababwila, kisia ni kusonseziiwa kutendeka kumubombela Yehova pamo netu ntanzi tebanaaluke nyuma sana. Mukulu umo wa buloko mu Filipi, waalulwile mutima wakue kisia sie “ntensi ikata kukitika.” Pange ni bange pakati ka baalia bali mukukaana kutwilizia mpunda iweme lonu kunti baalulula mutima wabo kisia kumona Babiloni Mukulu wainoonua mu kusitukila.—Miil Bat. 16:25-34.
TULI TWASIMIKILA PANTU TUMUTONENE YEHOVA NI LIINA LYAKUE
11. Tuli twamupeela syani Yehova bulumba, mukinzi ni maka? (Nfyulo 4:11) (Mona ni ma foto.)
11 Kumutona Yehova Leeza pamo ni liina lyakue litakatifu i nsambu ikata sana ili yatusonsezia kusimikila. Tuli twamona kusimikila kuya kwali nzila ya kumutasiiziamo Leeza, olia ututonene. (Soma Nfyulo 4:11.) Twitabiile kwa mutima onse nangue Yehova Leeza, apalile kupeelua bulumba, mukinzi ni maka kufuma ku bantu bakue bali bamupupa. Tuli twamupeela Yehova bulumba ni mukinzi musita utuli twababwilako bantu bintu bisininkiziizie nangue wene i ‘waalengele [ao, waabumbile bintu] byonse,’ kabili nangue fwefue tuli ni bukose pantu wene i waatubumbile. Tuli twamupeela Yehova maka etu musita utuli twabombia musita wetu, maka etu, pamo ni bintu byetu evi kusimikila sana kukonkana ni aali yetu. (Mat. 6:33; Luk. 13:24; Bakol. 3:23) Kulanda kisinka, tuli twatona kulandila pa lwakue Leeza, olia ututonene. Kabili tuli twasonseziiwa kubabwilako bange palua liina lyakue ni kubabwila Leeza vyali wasangua. Juu ya ki?
Tuli twamupeela Yehova maka etu musita utuli twabombia musita wetu, maka etu ni bintu byetu evi kubomba miilo ya kusimikila kukonkana ni aali yetu (Mona lifungu lya 11)
12. Tuli twaswesia syani liina lyakue Yehova mu miilo ya kusimikila?
12 Kumutona Yehova kuli twatusonsezia tuswesie liina lyakue. (Mat. 6:9) Kekio kilangiliile nangue tuli twatona kubabwilako bange bamane nangue belia bintu bibipile byaalandile Sataana pa lwakue Yehova, ni bya bufi. (Kut. 3:1-5; Yob. 2:4; Yoan. 8:44) Mu miilo ya kusimikila, tuli twatona sana kumusakila Leeza wetu, kupitila kubabwila bantu bonse baalia bali batona kutwilizia kisinka pa lwakue. Tuli twatona kila muntu amane nangue ntono i mibele ikata sana yakue Leeza, kabili nangue nzila yakue ya kuteeka i ya nsambu kabili ipalile. Kukila pa kako, tuli twatona kubabwila nangue, lenu sie Bukolo bwakue bwakaba kupwisia maavia ni kuleta mutende pamo ni nsansa ku bantu bonse. (Malum. 37:10, 11, 29; 1 Yoan. 4:8) Musita utuli twababwila bantu bebio bintu pa lwakue Yehova, tuli twaswesia liina lyakue. Kabili tuli ni nsansa pantu tuli mukukita belia bitupalile kukita fwe Bakasininkizia Bakue Yehova. Juu ya ki twalanda evio?
13. Juu ya ki kukuutua nangue Bakasininkizia Bakue Yehova kuli kwatulengia twiunvue kuya twakindikilue? (Isaya 43:10-12)
13 Yehova waatusaakwile evi tuye twali “bakasininkizia” bakue. (Soma Isaya 43:10-12.) Mu myaka yaapitile, mukanda umo kufuma ku Kabungue Kali Katungulula waalandile evi: “Kukuutua nangue Kasininkizia Wakue Yehova i kintu kimo kikindeeme sana kipalile kusekelela kila umo wetu.” Juu ya ki? Kwa mufuano: Tontonkania muntu umo wakusitaka ku tribinali nangue wewe waakikita kintu kimo kibipile. Pa kako, wewe ukabiile muntu wakukulandilako nangue olia muntu wakikusitaka, waakikubepela. Eba, kunti wasaakula muntu wa syani? Kulanda kisinka, uli kusaakula muntu olia uumanine kabili uuswapiile, olia ali ni sifa iweme ili kulengia belia byali kulanda bitabilue. Evio vyenka ni fwefue, Yehova atusaakwile evi twaluke Bakasininkizia bakue. Kekio kilangiliile nangue atumanine bwino, kabili nangue atuswapiile evi tubabwile bange nangue wene i Leeza bunke wa kisinka. Kuya twali Bakasininkizia bakue, kuli kwatulengia twimone kuya twakindikilue sana. Kekio kili kyalengia tuye twabombia kila fwasi ili yamoneka evi kubabwilako bantu liina lyakue, ni kubabwila nangue bintu byonse bibipile, belia byaalandilue pa lwakue Yehova, ni bya bufi. Kupitila kukita evio, tuli twalangilila nangue twikeele kukonkana ni liina lituli twatona sana, i kulanda, Bakasininkizia Bakue Yehova!—Malum. 83:18; Bar. 10:13-15.
TWAKABA KUTWALILILA KUSIMIKILA MPAKA MPELA IKABE KUFIKA
14. Pange ni bintu ki bya kusansamusia byakaba kukitika lenu sie?
14 Kakiine, tutonene sana kumona bintu byakaba kukitika pange lenu sie mu musita uli mukwiza! Kupitila kukwasiiwa na Yehova, tuswapiile nangue bantu bange bengi bakaba kwitabila kisinka kya Bibilia ntanzi lyemo likata telinatendeke. Kabili, ata sie mu musita olia wakaba kuya waaviizie sana, i kulanda musita wa lyemo likata, twakaba kusansamuka sana kine twamona bantu bafuma mu kyalo kyakue Sataana ni kwiunga pamo ni fwefue mu kumutasia Yehova!—Miil Bat. 13:48.
15-16. Twapingula kutwalilila kukita ki, kabili mpaka musita ki?
15 Mu kupembelela ozo musita ufike, tuli ni miilo itupalile kubomba lonu. Tuli ni lisyuko lya kusimikila mpunda isikasimikiluapo kabili, i kulanda, kusimikila mpunda iweme ya Bukolo Bwakue Leeza mwaya kyalo. Mu wenka ozo musita, tupalile kutwalilila kubasoka bantu palua bintu byakaba kukita lenu sie. Bantu bapalile kumana nangue mpela ya kenu kyalo kibipile ili mukukila kupalama. Kisia, ozo musita wa bupinguzi luwakaba kufika, bakaba kumana nangue mpunda itwaali twabasimikila yaali yafuma kuli Yehova Leeza.—Ezek. 38:23.
16 Pa kako, twapingula kukita ki? Kutona mpunda iweme, kubatona bantu, ni kumutona Yehova Leeza pamo ni liina lyakue, bitusonsezie kutwalilila kusimikila kwa nsansa, lubilo, kabili kwa mute mpaka Yehova akabe kulanda nangue, “miilo ya kusimikila yakumana!”
LWIMBO 54 “Ezi I Nzila”
a Kulonghaana kwa kila mwaka kwaakikitua pa nsiku 07, Mwezi wa 10, 2023, ku Kipaka kya Kulonghaaninamo kya Bakasininkizia Bakue Yehova kya mu Newburgh mu New York, ku Amerika. Kisia musita, ntantiko ya koko kulonghaana konse yaakibiikua ku ntantiko ya JW Télédiffusion—Semu ya 1 mu Mwezi wa 11, 2023, ni Semu ya 2 mu Mwezi wa 01, 2024.
b Mona lyasi lilandile, “Biblia Inabadilisha Maisha ya Watu—Nilifurahia Majibu ya Biblia Yenye Kuwa Wazi na Yenye Kueleweka,” lelia lili mu Lupungu Lwakue Kamwenenena, lwa pa busiku 01, Mwezi wa 02, 2015.