1. Mu miaka mia ya ku ntendeko, basambi bakue Yesu baalandile libumba likata lya bantu likite ki?

LIBUMBA likata lya balalume ni banakazi lyaaile ku Yerusalemu. Babo bantu baafumine mu byalo bipusene-puseene, kabili baali balanda ndimi ilekenkeene. Bobo busiku, kwaakitikile kintu kya kupapia. Kikundi kya Bayuda basyaali na buikazi bwa kupapia, kyaatendekele kulanda mu ndimi ya kavyalilo ya babo baeni! Keekio kyaapapiizie saana leelio libumba. Inzi, beelia byaali byalanda babo Bayuda pamo ni beelia byaalandile mutumua Petro ku babo bantu bonse, i byaakilile kupapia. Bantu babo baasambiliile nangue kunti bapusuka kine bamuketekela Yesu Kristu. Ezio mpunda yaakumiizie saana mitima ya babo bantu. Paantu bantu baakumiiziwe saana, keekio kyaalengele bepuzie eevi: “Tupalile kukita ki?” Petro waabaasukile eevi: “Kila umo weenu abatiziiwe.”​—Miil Bat. 2:37, 38, NWT.

2. Tuli kulondoluela ki mu leeli lyasi? (Mona foto ili ku ntendeko ya kazeeti.)

² Kintu kyaakitikile kisia paapo kyaali kya kupapia. Bantu elufu itatu (3 000) eevi, baabatiziiziwe bobo busiku ni kwaluka basambi bakue Kristu. Ezio i yaali ntendeko ya miilo ikata ya kukita basambi, yaalaiziizie Yesu basambi bakue bakite. Mpaka leenu, basambi bakue batwaliliile kubomba ezio miilo. Mu enu nsiku, tetuviinda kumukwasia muntu mu nsa iniinisie ni kisia abatiziiwe penka palia. Eevi musambi afikiile kubatiziiwa, kunti kyatwama miezi, muaka ao kukila paapo. Iloombele kukita maka eevi kumukwasia muntu aaluke musambi wakue Kristu. Mu leeli lyasi, tuli kulondoluela bintu byupalile kukita eevi uviinde kumukwasia musambi obe wa Bibilia afikiile kubatiziiwa.

3. Nga vilandile lileembo lya Mateo 28:19, 20, musambi wa Bibilia apalile kukita ki eevi afikiile kubatiziiwa?

³ Ntaanzi ya kubatiziiwa, musambi wa Bibilia apalile kubombia beelia byali mukusambilila mu Bibilia. (Soma Mateo 28:19, 20 *.) Kine musambi wa Bibilia ali mukubombia beelia byali mukusambilila ali kwaluka nga “muntu wa maano” azimbwilue mu mufuano wakue Yesu, waaimbile kapato eevi emike nsesi pa lyalaala ao pa libue. (Mat. 7:24, 25; Luk. 6:47, 48) Kunti twamukwasia siani musambi aye wabombia beelia byali mukusambilila? Kansi, tumone bintu bitatu bituli kuviinda kukita.

4. Kunti twamukwasia siani musambi wa Bibilia akite buyantanzi ni kufikiila kubatiziiwa? (Mona ni kisanduku kilandile “ Mukwasie Musambi obe Ebiikile Mipaango ni Kuifikilizia.”)

 ⁴ Mukwasie musambi obe ebiikile mipaango. Juu ya ki upalile kukita evio? Mona ozu mufuano: Kine uli wakukita bulendo buleepele, kunti wapingula kuya watuuzia mu nkeende paleepale iweeme. Kine wakita evio, teumona bulendo kuya bwakolele saana. Evio vyenka, kine musambi wa Bibilia ali waibiikila mipaango ya musita uniini ni kuifikilizia, ali kufikiila kumona nangue kunti waviinda kufikilizia mupaango wakue wa kubatiziiwa. Bombia kisanduku kilandile nangue, “Ezianke Kukita Eevi” kili mu kitabu Sekelela Buikazi Loonse! eevi umukwasie musambi obe kukita buyantanzi. Ku mpela ya kila lisomo, londolola pamo ni musambi obe eevi amane kwibiikila mupaango vikuli kumukwasia abombie beelia byali mukusambilila. Kine ukebele musambi obe afikilizie mupaango unge, leemba mupaango ozo pa nkeende ilandile nangue, “Paangako ni Kange.” Lingi, uye wabombia nkeende eezi yakue musambi eevi kubueluluka pamo nakue palua mipaango yakue ya musita uniini ni ya musita uleepele.

5. Nga vilandile lileembo lya Marko 10:17-22, Yesu waamulandile munoonsi umo akite ki, kabili juu ya ki?

⁵ Mukwasie musambi obe aalulule buikazi bwakue. (Soma Marko 10:17-22.) Yesu waali wamanine nangue kikolele ku muntu munoonsi kwitabila kusisia bintu byakue byonse. (Mark. 10:23) Inzi, Yesu waamulandile muntu umo akite bobo bupilibuko bwaviizie mu buikazi  bwakue. Juu ya ki? Paantu Yesu waali wamutonene. Nsita inge, kunti twaandua kumukinkizia musambi abombie beelia byali mukusambilila, paantu tumwene nangue tanaiteanie eevi kukita buyantanzi bupalile. Kunti kyatwama musita waleepele eevi bantu balekele mibeele ya kale ni kuvuala bumuntu bwa leenu. (Bakol. 3:9, 10) Inzi, kine wakita lubilo kulondolola nakue bila kumufiika palua kukita bupilibuko, musambi obe takaba kukokola kutendeka kukita bupilibuko. Kine walondolola nakue evio, wamulangilila nangue wamwemena.​—Malum. 141:5; Tus Maf. 27:17.

6. Juu ya ki tupalile kubombia biipuzio bya kukwasia kumana malanga a muntu?

⁶ Kiipuzio kya kukwasia kumana malanga a muntu, i kiipuzio kituli twamwipuzia musambi eevi tumane bintu byali mukutontonkania, ao malanga akue palua lyasi lituli mukulondoluela. Bombia biipuzio bya ozo musango, eevi umane kine musambi obe waunvua siani, ao kine wazumina beelia byuli mukusambilila pamo nakue. Lingi kine uli wakita evio, kunti wamona kyaleengele kulondolola pamo nakue bintu byumwene nangue, paange musambi kunti wamona byakolele kuzumina. Kitabu Sekelela Buikazi Loonse! kilimo biipuzio bingi byakukwasia kumana malanga a muntu. Kwa mufuano, mu lisomo lya 04 muli kiipuzio keeki: “Tontonkanianke, ati kine weewe wabombia liina lyakue, Yehova ali kwiunvua siani?” Mu lisomo lya 09 muli kiipuzio keeki: “Ni bintu ki paleepale byuli kutona kubiika mu lipepo lyobe?” Ku ntendeko, musambi obe kunti wamona kyakolele kwasuka ku bebio biipuzio. Kunti wamukwasia kupitila kumubeelezia aye watontonkania palua maleembo ni ma foto ali mu kitabu.

7. Kunti twabombia siani mu nzila ipalile bintu byaaimweneene bange mu buikazi bwabo?

⁷ Musita musambi lwainika beelia byapalile kukita, bombia bintu bya kisinka byaaimweneene bantu mu buikazi bwabo, eevi kumusonsezia ni weene akite keelia kyapalile kukita. Kwa mufuano, kine musambi obe amwene kyakolele kwiza ku kulonghaana, mulangilile viideo ilandile nangue Yehova Waangemeene ili mu seemu ilandile nangue “Manako ni Binge” ya mu lisomo lya 14. Mu masomo engi ali mu kitabu Sekelela Buikazi Loonse! wakaba kusaanga bintu bya evio byaaimweneene bange, bili mu seemu ilandile “Tukebe Saana” ao mu seemu ilandile “Manako ni Binge.” * Uye wakengeele, te kumupalania musambi obe na muntu unge kupitila kumulanda eevi: “Paantu weene waaviindile kukita eevi, ni weewe wakaba kuviinda.” Mulekele musambi obe epinguile ye muine. Kuliko kukita evio, langilila bintu bikata byaamukwasiizie ozo muntu ali mu viideo eevi abombie masambilizio a Bibilia. Paange kunti wakonkomena lileembo lya mana ao kintu kya mana kyaakitikile. Kine fuasi yamoneka, konkomena saana Yehova vyaamukwasiizie ozo muntu.

8. Kunti twamukwasia siani musambi weetu afikiile kumutona Yehova?

⁸ Mukwasie musambi obe afikiile kumutona Yehova. Kumukwasia siani? Keba mu nkeende mupalile kumukwasia musambi obe eevi asambilile palua mibeele yakue Yehova. Mukwasie musambi obe amumone Yehova kuya wali Leeza wansaansa kabili ali wakwasia baalia bamutonenene. (1 Tim. 1:11; Baeb. 11:6) Mulangilile musambi obe nangue wakaba kunoonkelamo kine wabombia beelia byali mukusambilila. Kabili mubuile nangue kunoonkelamo kooko, kulangiliile nangue Yehova amutonene. (Is. 48:17, 18) Kine musambi obe wakila kukosia ntono yakue kuli Yehova, keekio kyakaba kumukinkizia saana kukita bupilibuko bupalile.​—1 Yoan. 5:3.

9. Kukoonkana ni lileembo lya Marko 10:29, 30, ni kiki kili kumukwasia musambi wa Bibilia etane bintu paleepale ni kufikiila kubatiziiwa?

⁹ Eevi musambi wa Bibilia afikiile kukita buyantanzi ni kubatiziiwa, apalile kwitana bintu paleepale. Nga olia munoonsi utwazimbulanga kale, kunti kyaloomba basambi bange betane bintu binge bya kimubili. Kine miilo yabo te ipateene na mafunde a Bibilia, kunti kyapala baalulule. Kunti kyapala bengi batione bukibuza pamo ni bantu basimutonene Yehova. Bange kunti basuuluwa na bantu ba mu lupua lwabo basiizi kubatona Bakasininkizia Bakue Yehova. Yesu waali wamanine nangue bantu bange kunti bamona kyakolele kwitana bintu nga bebio. Waalaile nangue baalia bali bamukoonka weene te bakationua mutima. Yehova wakabalambula kupitila kubapeela lupua lwakue lwa kimupasi luli ni ntono. (Soma Marko 10:29, 30.) Kunti wamukwasia siani musambi obe wa Bibilia eevi anoonkelemo mu bobo bupe buweeme saana?

10. Weewe, wasambilila ki kupitila bintu byaaimweneene Manuel?

¹⁰ Kosia bukibuza pamo ni musambi obe. Ni kintu kya mana kumulangilila musambi obe nangue uli mukumwemena. Juu ya ki? Manuel, ali waikala ku Mexico, walanguluka musita lwabanga wali musambi wa Bibilia. Walanda eevi: “Kila musita ntaanzi ya kutendeka kusambilila, mwalimu wane wa Bibilia, waali wangipuzia kine bukose bwane buli siani. Waali wankwasia ngiunvue buino saana ni keekio kyaali kyandengia mubuile ni mpunda inge bila kumufiika. Naali naiunvua nangue kakiine waali wangemena.”

11. Basambi betu ba Bibilia kunti banoonkelamo siani kine twapisia musita pamo naabo?

¹¹ Yesu waali wapisia musita pamo ni basambi bakue. Ni weewe uye wapisia musita pamo ni basambi bobe. (Yoan. 3:22) Kine kyapala, mukupe ku nsesi yobe musambi wa Bibilia ali mukukita buyantanzi eevi mumine nakue kafe, ao mulie nakue kyakulia ao mumone pamo nakue viideo imo ifumine mu ntantiko ya kila muezi ya JW Télédiffusion. Musita babibuza ni bantu ba mu lupua lwakue lubali basekelela nsiku nkulu ya kidiini ao nsiku nkulu inge, musambi wa Bibilia kunti waisaanga kuya wali bunke. Inzi, kine weewe wamukupa musambi obe bobo busiku, kunti wasekelela saana. Kazibwe, ali waikala mu  kyalo kya Uganda, walanda eevi: “Naasambiliile bintu bingi palwakue Yehova kupitila kupisia musita pamo ni mwalimu wane nga vinaali nakita musita wa kusambilila. Naamwene Yehova vyali waemena bantu bakue, ni nsaansa ibali bapata. Keekio, i kinaali nakebele mu buikazi bwane.”

12. Juu ya ki tupalile kuya twaya ni bakasimika paleepale musita utuli twaya kutungulula lisambililo lya Bibilia?

¹² Uye wakupa bakasimika paleepale baye bakutwala ku lisambililo lyobe lya Bibilia. Nsita inge, kunti twamona nangue kileengele saana kuya ku lisambililo twali bunke, ao kuya pamo ni kasimika olia wenka kila musita. Anzia kine kunti wamona kyaleengele kukita evio, musambi obe wa Bibilia kunti wakila kunoonkelamo kine lingi uli waya pamo ni bakasimika paleepale. Dmitrii, ali waikala mu kyalo kya Moldova, walanda eevi: “Kila kasimika abanga waiza pamo ni mwalimu wane, waali walondolola bintu mu bufundi bwakue bwibeleele. Keekio, kyaali kyankwasia kumona nzila inge ya kubombiiziamo beelia binaali nasambilila. Musita unaaile ku kulonghaana lya kuanza, nsyaaunvuile busoni saana, paantu naali nasyamanine balupua ni bankazi bengi.”

13. Juu ya ki tupalile kumukwasia musambi weetu atendeke kulonghaana?

¹³ Mukwasie musambi obe atendeke kulonghaana. Juu ya ki? Paantu Yehova abalandile bantu bali bamupupa baye balonghaana. Kulonghaana ni seemu ya lupupo lwetu. (Baeb. 10:24, 25) Kukila pakaako, balupua ni bankazi betu, bali baaluka lupua lwetu lwa kimupasi. Musita utuli mu kulonghaana pamo naabo, kili nga evelia fwefue bali mu nsesi yeetu twali mukulia pamo naabo, kyakulia kiweeme. Kine wamukwasia musambi obe wa Bibilia kutendeka kulonghaana, wamukwasia kukoonka nzila imo pakati ka nzila ya mana ya kumukwasia afikiile kubatiziiwa. Inzi, weene kunti wamona kyakolele kutendeka kulonghaana. Kitabu Sekelela Buikazi Loonse! kunti kyamukwasia siani musambi obe kwanzia maavia ali alengia tekuti atendeke kulonghaana?

14. Kunti twamukinkizia siani musambi wa Bibilia atendeke kulonghaana?

¹⁴ Bombia lisomo lya 10 lya kitabu Sekelela Buikazi Loonse! eevi likukwasie kubuusia nkulu ya musambi obe. Ntaanzi keeki kitabu tekinafumiiwe, bakasimika paleepale baakilandua bezie kubombia leeli lisomo pamo ni basambi babo. Babo bakasimika, baakilanda nangue leelio lisomo lyakibomba saana ni kukwasia basambi babo kutendeka kulonghaana. Te kupembelela mpaka mukabe kufika mu lisomo lya 10 mane ukabe kumukupa kwiza ku kulonghaana. Mukupe bila kukokola, kabili uye wakita evio lyonse. Basambi bali ni maavia alekenkeene. Pakaako, uye wapooza maano ku bintu bikabiile musambi obe, kabili kine kyapala, kunti wakeba nzila ipalile ya kumukwasia. Kine musambi wakokola bila watendeka kulonghaana, te kutioka mutima. Twalilila kulangilila mibeele ya kupembelela kabili twalilila kumukupa.

15. Basambi betu ba Bibilia kunti baunvua muenzo wa ki?

¹⁵ Eba, weewe walanguluka viwaali waunvua muenzo wa kwaluka Kasininkizia Wakue Yehova? Paange waali wamwene nangue teuviinda kusimikila ntaanzi ya bantu. Paange weewe waali watiina kupingua na bantu ba mu lupua lobe. Kine i evio, uli kwinika buino musambi obe vyali waiunvua. Yesu waalandile nangue bantu bange kunti baunvua muenzo wa evio. Anzia evio, wabasokele basambi bakue tekuti balekelele muenzo ubanzie kumubombela Yehova. (Mat. 10:16, 17, 27, 28) Yesu waabakwasiizie siani basambi bakue kwanzia muenzo? Kabili kunti wapala siani mufuano wakue?

16. Kunti twamubeelezia siani musambi weetu eevi atendeke kubabuilako bange beelia byali wasambilila?

¹⁶ Mubeelezie bukebuke musambi obe eevi atendeke  kubabuilako bange bintu byali wasambilila. Paange basambi bakue Yesu baaunvuile muenzo musita Yesu lwaabatumine kuya kusimikila. Inzi, Yesu waabakwasiizie kupitila kubabuila kwa kuya kusimikila ni mpunda ibaali bapalile kuya kusimikila. (Mat. 10:5-7) Kunti wamupala siani Yesu? Mukwasie musambi obe amane koolia kwapalile kusimikila. Kwa mufuano, mwipuzie kine amanineko muntu unge ali kutona kusambilila kisinka kimo kili mu Bibilia. Kisia, mukwasie ateanie beelia byali kulanda kupitila kumulangilila nzila ileengele ya kulondolola kisinka keekio pamo ni bange. Kine kyapala, kunti wabombia seemu ya kwibeelezia ilandile, “Bange Bali Balanda” ni elia ilandile “Unge Kunti Waipuzia,” ili mu kitabu Sekelela Buikazi Loonse! Musita uuli wakita evio, pooza maano ku kumubeelezia musambi obe abombie Bibilia eevi aasuke mu nzila ileengele kabili ya bufundi.

17. Kunti twabombia siani lileembo lya Mateo 10:19, 20, 29-31 eevi tumukwasie musambi weetu wa Bibilia amuswapile Yehova?

¹⁷ Mukwasie musambi obe amuswapile Yehova. Yesu waabasininkiziizie basambi bakue nangue Yehova wakabakwasia paantu Weene abatonene. (Soma Mateo 10:19, 20, 29-31.) Mulangulusie musambi obe nangue Yehova wakaba kumukwasia ni weene. Kunti wamukwasia amuswapile Yehova kine weewe wapepa pamo nakue palua mipaango yakue. Franciszek, ali waikala mu kyalo kya Polandi, walanda eevi: “Lingi mwalimu wane waali wazimbula mipaango yane mu mapepo akue. Musita unaamwene Yehova vyaali waasuka mapepo akue mwalimu wane, ni neene naatendekele kupepa bila kukokola. Naamwene nangue Yehova waasukile mapepo ane, musita unaaloombele ku miilo yane ya leenu eevi mpeelue nsaambu ya kuya ku kulonghaana kwa kila mulungu ni ku kulonghaana kukata.”

18. Yehova ali waiunvua siani palua miilo ya kusambilizia ili yakita Bakristu?

¹⁸ Yehova ali wabeemena saana basambi betu ba Bibilia. Yehova ali wabatasia saana Bakristu palua miilo ibali bakita ya kusambilizia bantu eevi bamupalame weene. Kabili abatonene palua ezio miilo ibali bakita. (Is. 52:7) Kine loonu te ukwete muntu wa kusambilizia Bibilia, kunti wakwasia basambi ba Bibilia bakite buyantanzi ni kubatiziiwa kupitila kubatwala bakasimika bange ku masambililo abo.