1. Yehova ali wakita ki ku kila umo weetu?

YEHOVA ali wamukulila kila umo weetu kuli weene. (Yoan. 6:44) Tontonkania mana ya keekio kintu. Paantu Yehova waatoosiizie wapoozeleko maano mamilioni onse a bantu bali mu kyalo, waamwene nangue ni weewe uli wa kisinka kabili nangue kunti wamutona. Keekio i kintu kya mana kuli weene. (1 Mil Nsi. 28:9) Yehova akumanine, ali wainika vyuli waiunvua, kabili akutonene. Kakiine keekio kili kyateekia saana mutima!

2. Yesu waaleetele mufuano ki eevi kutukwasia kumana Yehova vyali waemena mikooko yakue?

² Yehova ali wakwemena saana, kabili ali wabeemena balupua ni bankazi bobe bonse Bakristu. Eevi atukwasie kunvua ezio milandu, Yesu waamupalaniizie Yehova na musuungi. Kine musuungi akwete mikooko 100, kisia pazeeza mukooko umo, ali kukita siani? Ali ‘kusianke ezio mikooko 99 pa kapita, ni kuya kukeba ozo mukooko uzeezele.’ Kine musuungi wapata ozo mukooko, taufipilua. Ali kusekelela. Ozo mufuano wakeba kulanda ki? Kila mukooko ni wa mana kuli Yehova. Yesu waalandile eevi: “Sinue [Baba weenu] wa mwiulu ni ye tatonene ata mwanike umo pa baaba kuti azeeze.”​—Mat. 18:12-14.

3. Tuli kulondoluela ki mu leeli lyasi?

³ Te tutonene ata kaniini kutiona mutima wa lupua ao nkazi ata umo pakati ka balupua ni bankazi betu. Kunti twakita siani eevi te kunti tubakisie bange? Kabili kunti twakita siani kine muntu unge watukisia? Tuli kwasuka bebio biipuzio mu leeli lyasi. Inzi, ntaanzi ya byonse, tubamanenke “baaba banike” bazimbuilue mu Mateo katue ka 18 kine ni baani.

4. “Baaba banike” ni baani?

⁴ “Baaba banike” i basambi bakue Yesu bali ni miaka ipusene-puseene. Te bakuutilue “baana baniini” juu ya miaka yabo, inzi bakuutua evio, paantu batonene kusambiliziiwa na Yesu. (Mat. 18:3) Babo bantu babiikile mukati bantu bafumine mu nkeende ni tubeelela tupusene-puseene, kabili bali ni bumuntu bwapusene-puseene. Bonse bamuketekeele Kristu. Kabili ni Kristu abatonene saana.​—Mat. 18:6; Yoan. 1:12.

5. Yehova ali waiunvua siani kine muntu wamukisia muntu umo pa bantu Bakue?

⁵ “Baaba banike” bonse ni ba mana saana kuli Yehova. Eevi tumane Yehova vyali waiunvua, tutontonkanie vituli twaiunvua palua baana. Baana ni ba mana saana kuli fwefue. Tuli twatona kubasuunga paantu te bali na maka, te bali na kibeelezio ni mulangue nga bakulu. Kine muntu wamukisia muntu unge te twizi kutona, inzi tuli twakila kufipua kine muntu wamukisia muana weetu. Evio vyenka, ni Yehova atonene kutusuunga. Ali wakisua ao kufipua kine muntu wamukisia muntu umo pa bantu Bakue!​—Is. 63:9; Mark. 9:42.

6. Nga vilandile 1 Bakorinto 1:26-29, bantu ba mu keenu kyalo babamwene siani basambi bakue Yesu?

⁶ Ni mu nzila ki inge basambi bakue Yesu bali nga “banike”? Ati, bantu bamwenue kuya bali ba mana mu keenu kyalo ni ba siani? Banoonsi, bamanikile saana ni baalia bali ni buviinde. Inzi lingi, basambi bakue Yesu te beezi kusaangua evio. Pakaako bantu ba mu kyalo bali basaangua babamwene nangue te ba mana, kabili ba bulebulesie nga “banike.” (Soma 1 Bakorinto 1:26-29.) Inzi, Yehova weene tabamwene evio.

7. Yehova atonene tubamone siani balupua ni bankazi betu?

⁷ Yehova abatonene babombi bakue bonse, anzia kine bakokola bamubombela Yehova ao bakilisie ba leenu. Balupua ni bankazi bonse ni ba mana saana kuli Yehova, pakaako, ni fwefue tupalile kubamona kuya bali ba mana. Tukebele ‘kutona buumo bonse bwa balupua,’ apana kutonaposie bamo pakati kabo. (1 Pet. 2:17, NWT) Pakaako, tupalile kuya twalengelesie kukita maka etu onse eevi kubasuunga ni kubeemena. Kine twainika nangue twakiluvia muntu unge, te tupalile kusuulakosie ni kutontonkania nangue apalilesie kutweleela ni kulabakosie. Paange ni kiki kili kyalengia bange bafipua? Bange bali baimona kuya bali ba pansi juu ya aali ibaakuliilemo. Bange baakizuminasie leenu, kabili te banamane vya kukita kine bantu babaluvia. Anzia kine aali ili kuya yali siani, tupalile kukita maka etu onse eevi kubuezia mutende. Kukila pakaako, kine muntu ali wafiitua-fiitua juu ya kuluviiwa na bange, apalile kumana nangue ezio mibeele te ipalile, kabili apalile kwaluluka. Kine muntu wakita evio, ali kwaluka ni nsaansa ni bukibuza buweeme pamo ni bange.

8. Basambi bakue Yesu, baali batwaminiinue na malanga ki abanga ali na bantu ba mu nsita yakue Yesu?

⁸ Ni kiki kyaamulengiizie Yesu alande palua “baaba banike”? Basambi bakue baamwipuziizie kiipuzio. Baamwipuziizie eevi: “Naani akuliisiepo mu Bukolo bwa mwiulu?” (Mat. 18:1) Mu ozo musita, Bayuda bengi baali batonene bantu babamone nangue beene ni ba mana saana. Muntu umo asomene saana walanda eevi: “Kukeba mukinzi ni kumanika saana ku bantu bange, i byaali bintu bya mana saana mu buikazi bwabo.”

9. Basambi bakue Yesu baali bapalile kukita ki?

⁹ Yesu waali wamanine nangue basambi bakue, baali bapalile kukita maka abo onse eevi kufumia mu mitima mibeele ya kuluisiania  ibanga yaingiile mu tubeelela twa Bayuda. Waabalandile eevi: “Onse atonene kuba mukulu pakati keenu, apalile kwikeefia kukila bange bonse. Ni onse ali walombola bange apalile kuba mubombi.” (Luk. 22:26) Tuli twaialula nga ‘banike’ musita utusiizi kwimona “kuya twabakilile beneetu.” (Baf. 2:3) Vituli kuya twakila kukuzia ezio mibeele, i vituli kuya twakila kutiina kubakisia bange.

10. Ni musoko ki wakue Paulo utupalile kutwama twafiniizie?

¹⁰ Balupua ni bankazi bonse, batupitile mu nzila paleepale. Kileengele kumona evio, kine twapooza maano ku mibeele yabo iweeme. Tupalile kutwama twafiniizie musoko wakue mutumua Paulo ku Bakorinto. Waabalandile eevi: “Eba naani waakubiikile kuba mukulu pa unge? Ati, te Leeza waakupeele bintu byonse byuli nabio? Ale kine ni Leeza waakupeele, uli waitasiizia ki we waapeeluesie?” (1 Bakor. 4:7) Kansi, te tupalile ata kaniini kutona kutasiiwa saana na bange, ao kwimona fwe beene nangue tuli ba pa muulu kuliko bange. Kwa mufuano, baalia balupua bali balanda buino saana maasi, ao bankazi bamanine kutendekezia buino masambilizio a Bibilia, lyonse bapalile kumupeela Yehova bulumba palua beelia bibali bakita.

11. Musita Yesu lwaaleetele mufuano ulandiile palua likolo ni muzia, waali wakeba kutusambilizia ki?

¹¹ Musita uniini kisia Yesu kubasoka basambi bakue tekuti baye babakisia bange, waaleetele mufuano ulandiile palua likolo ni muzia wakue. Likolo waamweleele muzia wakue lideni likata lyaasyaali waali na buviinde bwa kulipa. Kisia paapo, ozo wenka muzia waakeene kweleela muzia nakue lideni liniini saana lyabanga wakopelue. Likolo lwaamanine ezio mpunda, waamukakiizie mu buloko ozo muzia asili na nkumbu. Twasambililapo ki? Yesu waalandile eevi: “Eevi i vimwakakitilua na Tawe [Baba wane, NWT] wa mwiulu kine te muya mwaeleela benenu na mitima yeenu yonse.”​—Mat. 18:21-35.

12. Kine twakaana kumweleela muntu, kunti twabakisia siani bange?

¹² Bintu byaakitile ozo muzia, te byaakisiiziesie muzia waakakiiziwe, inzi byaakisiizie ni bange. Kya mambo, waamukisiizie muzia nakue kupitila “kumukakia mu buloko mpaka pakapuila kulipa madeni.” Kya bubili, waabakisiizie ni bazia bange baalia baamwene kintu kyaakitile. Musita “babombi nakue lubaamwene vyaamukitiile baafiitilue saana.” Evio vyenka, bintu bituli twakita bili byakumia ni bange. Kine muntu watuluvia, kisia twakaana kumweleela, kunti kwaaluka ki? Kya mambo, tuli kumukisia weene paantu twakaana kumweleela, kabili paange tuli kulangilila nangue twamuleebula kabili twaandua kumulangilila ntono. Kya bubili, tuli kulengia bange mu kilonghaano beyunvue ovio musita ubali kwinika nangue te twizi kunvuana ni ozo muntu.

13. Weewe, wasambilila ki kupitila bintu byaamusaangile painia umo?

¹³ Musita utuli twabeleela balupua ni bankazi betu, tuli twaiunvua buino kabili tuli twalengia ni bange beyunvue buino. Painia umo ali wakuutua Crystal waaimweneene evio. Waaluviiziwe na nkazi umo wa mu kilonghaano. Walanda eevi: “Milandu yaali walanda isili ya ntono, lunge yaali yankisia nga neene wakisiiwa na kisu. Nsyaali natona ata kuya nakue mu miilo ya kusimikila. Naatendekele kuzeezia mute ni nsaansa yane.” Crystal waali wamwene nangue abanga wali ni nsaambu ya kufiitua. Anzia evio, taatwaliliile kumufiitilua ozo nkazi ni kupooza maano ku malanga akue muine. Waabombiizie waikefiizie musoko uswapiile Maleembo, uli mu lyasi lilandile  ‘Eleela na Mutima obe Onse,’ lifumine mu Lupungu Lwakue Kamwenenena lwa pa nsiku 15, Muezi wa 10, 1999. Waamweleele nkazi wakue. Crystal walanda eevi: “Loonu nainika nangue fwe bonse tuli twakita maka saana eevi twaluluke, kabili Yehova ali wasaangua waiteaniiziesie eevi kutweleela kila busiku. Ndi naiunvua nga neene waatuulilue kifunda kikata pa nkombe. Nsaansa yane yaakibuela kabili.”

14. Kukoonkana ni lileembo lya Mateo 18:21, 22, paange mutumua Petro waali ni buavia ki, kabili weewe wasambilila ki kupitila kyasuko kyakue Yesu?

¹⁴ Tumanine nangue tupalile kweleela. Keekio i kintu kiweeme kitupalile kukita. Inzi, paange kunti twamona kyakolele kweleela. Paange mu nsita inge mutumua Petro waali waiunvua evio vyenka. (Soma Mateo 18:21, 22.) Ni kiki kili kuviinda kutukwasia? Kya kuanza, tontonkania Yehova vyali wakweleela. (Mat. 18:32, 33) Fwefue, te tupalile kweleelua na weene, inzi ali watweleela mu kwitonena. (Malum. 103:8-10) Evio vyenka ni fwefue ‘i vya kuti tuye twatoneene.’ Pakaako, te tupalilesie kweleela kine twatona. Tuli ni madeni a kubeleela balupua ni bankazi betu. (1 Yoan. 4:11) Kya bubili, tontonkania palua aali ili kwalukako kine twaeleela. Kunti twamukwasia muntu waakituluvia, tuli kuleeta buumo mu kilonghaano, tuli kusuunga bukibuza bwetu pamo ni Yehova, kabili tuli kwiunvua nga fwefue batuula kifunda kitwakiba twapingile pa nkombe. (2 Bakor. 2:7; Bakol. 3:14) Kupuako, pepa kuli Olia ali watulanda tweleelane. Te kulekelela Sataana enoone mutende uuli mukusekelela pamo ni balupua ni bankazi bobe. (Baef. 4:26, 27) Eevi tuye twali ni mutende mu kilonghaano tupalile kukwasiiwa na Yehova.

15. Kukoonkana ni Bakolosai 3:13, kunti wakita siani kine bintu byakita lupua ao nkazi byakukisia?

¹⁵ Ale kine muzumizi nobe waakitanga kintu kili kukulengia ukisike saana? Upalile kukita siani? Kita maka obe onse eevi usuunge mutende. Mubuile Yehova bintu bili ku mutima  obe. Muloombe Yehova amupaale ozo muntu wakukisianga, kabili akukwasie kumona mibeele iweeme ili na ozo muntu, mibeele iweeme ilengele Yehova amutone. (Luk. 6:28) Kine wamona nangue teuviinda kulabakosie ku kintu kya kukitanga ozo lupua, keba nzila ili kukukwasia eevi munvuane. Lyonse, kili kyasaangua kyaweeme saana kutontonkania nangue lupua taviinda kutukisia na bufue. (Mat. 5:23, 24; 1 Bakor. 13:7) Musita uuli mukulondolola nakue musininkiziizie nangue ele walisie ni malanga aweeme. Ale kine tatonene munvuane? Twalilila ‘kumweleela.’ Twalilila kumusipikizia lupua obe. (Soma Bakolosai 3:13.) Kintu kya mana saana ni keeki, te kutwalilila kuya wamufipiilue lupua obe, paantu kukita evio kuli kwinoona bukibuza bwenu ni Yehova. Te kulekelela kintu ata kimo kikulengie wikisie we muine. Kine wakita evio, uli kulangilila nangue umutonene saana Yehova kukila kintu kinge kyonse.​—Malum. 119:165.

16. Kila umo weetu apalile kukita ki?

¹⁶ Tuli twamusantila saana Yehova, paantu tuli ni lisyuko lya kumubombela pamo ni balupua ni bankazi betu twali “kisepe kimo” kili kyatungululua na ‘musuungi walisie umo’! (Yoan. 10:16) Kitabu Tengenezo Yenye Kufanya Mapenzi ya Yehova lyasi lya 16, lifungu lya 8 kili kyalanda eevi: “Paantu uli mukunoonkelamo mu bobo buumo, upalile kukwasia kusuunga bobo buumo.” Pakaako, tupalile “kwikwinda kubamona balupua ni bankazi betu nga evelia Yehova vyabamwene.” Pa menso akue Yehova, fwe bonse tuli “banike” ba mana. Eba, i vyuli wabamona balupua ni bankazi bobe? Yehova ali wamona ni kutasia palua kila kintu kyuli wakita eevi kubakwasia ni kubeemena.​—Mat. 10:42.

17. Twapingula kukita ki?

¹⁷ Tubatonene bantu batuli twapupa naabo. Kansi “tukite maka a kwisuunga eevi tekuti tubazyanie (ao tekuti tubalengie bange bakite kilubo).” (Bar. 14:13) Tubamwene balupua ni bankazi kuya bali ba pa muulu kuliko fwefue, kabili tutonene kubeeleela kufuma ku mutima. Kansi, te kunti tulekelele bilubo bya bange bitukisie. Inzi, tusaakule “kukebesia bintu byakuya bya tuleetela mutende ni bipalile kukuzyania.”​—Bar. 14:19.