LISA waalandile eevi: “Mibeele ya kuwamiiziana ya balupua ni bankazi Bakristu i yaankumiizie saana.”  * Abanga walandila palua kintu kya kuanza kyaamusonseziizie azumine kisinka kya Bibilia. I vikibanga kyali ni palwakue Anne. Weene walanda eevi: “Ku ntendeko, naakulilue saana ku kisinka kya Bibilia na mibeele ya kuwamiiziana ya Bakasininkizia kuliko masambilizio abo.” Loonu, babo bankazi bonse, bali mukusekelela kusoma Bibilia ni kutontonkania, inzi mibeele ya kuwamiiziana ili ni buviinde bukata pali beene.

Kunti twalangilila siani mibeele ya kuwamiiziana ili yakumia mutima wa baalia bali peepi neetu? Ale tumone nzila ibili: lulimi ni bikitua byetu. Kisia tuli kumona kine ni baani batupalile kulangilila mibeele ya kuwamiiziana.

Mwanakazi ali ni buviinde azimbuilue mu Tuswalo ni Mafunde katue ka 31, ali ni “muzilo wa kuwamiiziana” pa lulimi lwakue. (Tus Maf. 31:26) Ali walekela ozo “muzilo” utungulule milandu yali walanda ni nzila yali walandilamo. Ba baba bapalile kuya bali ni ozo “muzilo” pa lulimi lwabo. Baviazi bengi bamanine buino nangue bulanzi busasile kunti bwakumia baana babo mu nzila ibiipile. Kine bali balanda mu lizui lya kusamuna, ao lizui lyatalaliile saana, keekio kunti kyamwinoona muana kabili kunti wakaana kukoonka beelia byali walandua. Kine baviazi bali balanda mu nzila iweeme, baana babo bali kumona kyaleengele kutuilizia ni kukoonka beelia bibalandua.

Ibe uye wali muviazi ao abe, weewe kunti wasambilila siani kulanda mu nzila ya kuwamiiziana? Keekio kintu kimonekele mu seemu ya kuanza ya lileembo lya Tuswalo ni Mafunde 31:26 ilandile eevi: “Ali waizula kanua kakue kwa mulangue.” Keekio kibiikile mukati kusaakula kwa mulangue milandu yeetu ni nzila ya kulandilamo. Lyonse kunti kyawaama tuye twaiipuzia eevi: ‘Eba, eezi milandu inkebele kulanda ili kulengia bange bonvue kipuki ao ili kukwasia kuleeta mutende?’ (Tus Maf. 15:1) Kakiine, kili buino tuye twatontonkania ntaanzi ya kulanda.

Lileembo linge lya Tuswalo ni Mafunde lili lyalanda eevi: “Milandu ili yalandua bila kutontonkania ili yatunka nga kipanga.” (Tus Maf. 12:18) Kine twatontonkania milandu yeetu, ni nzila ya kulandilamo viili kulengia bange bonvue, keekio kunti kyatukwasia tuye twatoosia beelia bitukebele kulanda. Kakiine, kine tuli twalanda kukoonkana ni “muzilo wa kuwamiiziana,” tetuya twabombia milandu ya kukisiana ao kulanda mu nzila isiweeme. (Baef. 4:31, 32) Tuli kufumia malanga ni bulanzi bubiipile ni kubiikapo milandu iweeme kabili tuli kuilanda mu nzila iweeme, ya kusaansamusia. Yehova waabiikile mufuano waweeme wa kulanda, musita lwaamuteekiizie mutima Eliya, mubombi wakue abanga waunvuile muenzo. Olia malaika waatuminue na Yehova waalandile mu “lizui liteekameene, lya pansi.” (1 Mak. 19:12) Anzia evio, kuya twali ni mibeele ya kuwamiiziana kubiikile mukati bintu bingi kulikosie kulanda bulanzi buweeme. Tupalile kabili kulangilila bikitua bya kuwamiiziana. Mu nzila ki?

Tuli twamupala Yehova kupitila kulanda milandu iweeme, ni kupitila kukitilana bintu mu nzila iweeme. (Baef. 4:32; 5:1, 2) Lisa, olia utwazimbulanga lwa ntaanzi, waalondoluele mibeele ya kuwamiiziana yaalangiliilue na Bakasininkizia.  Waalandile eevi: “Musita lupua lwetu lulwapatikiziiziwe kukuuka, balupua babili pamo ni bakazi babo baasiile miilo yabo ni kuiza kutukwasia kulongela bintu. Pa ozo musita, nsyali nasambilila atasie Bibilia!” Bebio bikitua bya kuwamiiziana, byaamukinkiziizie Lisa atoosie buino kisinka kili mu Bibilia.

Anne, utwazimbulanga ku ntendeko, ni weene watasia mibeele ya kuwamiiziana yaalangiliilue na Bakasininkizia. Waalandile eevi: “Juu ya bintu binaali nakitilua na bantu basiizi kumubombela Yehova, naali namwene kyakolele kubaswapila bantu.” Waatwaliliile kulanda eevi: “Musita unaasaakeene ni Bakasininkizia, nsyabaswapiile. Naaiipuziizie eevi: ‘Juu ya ki bampoozako maano?’ Inzi, mibeele ya kuwamiiziana saana yakue mwalimu wane wa Bibilia, yaankinkiziizie kumuswapila.” Keekio kyaalengiizie kwaluke ki? “Kisia, naatendekele kupooza maano ku beelia binaali nasambilila.”

Languluka nangue ba Lisa ni Anne, baakumiiziwe saana na bikitua bya ntono bya kuwamiiziana kufuma ku bantu ba mu kilonghaano, kabili keekio kyaabakwasiizie batone kusambilila kisinka kya Bibilia. Mibeele ya kuwamiiziana ibaalangiliilue mu kilonghaano, yaabakwasiizie batendeke kumuswapila Yehova pamo ni bantu bakue.

Bange kunti baya baleengele kubombia milandu iweeme ni kusaansamuka paantu ezio i aali ibaakuliilemo ao i vili mibeele ya bantu ba ku fuasi ibaakuliile. Kine bange bali bakinkiziiwa kulangilila mukinzi juu ya aali ao fuasi ibaakuliilemo, kili buino. Inzi kine tuli twakinkiziiwasie na tubeelela ni aali yeetu itwaakuliilemo, paange tetuviinda kupala mibeele ya kuwamiiziana yakue Leeza.​—Palania ni Miilo 28:2.

Kuwamiiziana kwa kisinka ni seemu ya lizabo lya mupasi utakatiifu wakue Leeza. (Bag. 5:22, 23) Kansi, eevi tuviinde kulangilila mibeele ya kuwamiiziana kwa kisinka, tupalile kulekelela mupasi utakatiifu wakue Leeza utukwasie mu malanga etu ni mu bikitua byetu. Kine twakita evio tuli kumupala Yehova ni Yesu. Kabili, paantu tuli Bakristu, tuli twabapoozako saana maano bantu bange . Pakaako, tuli twakinkiziiwa na kumutona Yehova Leeza pamo ni kutona muntu mwinetu. Keekio kili kyalengia mibeele yeetu ya kuwamiiziana yaaluke mibeele ili ni maka, ili yafuma ku mutima kabili ili yaitabilua na Leeza.

Kunti twamona kyaleengele kulangilila mibeele ya kuwamiiziana ku bantu bali batulangilila ezio mibeele ao ku bantu batumanine. (2 Sam. 2:6) Nzila imo ya kukita evio ni kubatasia babo bantu. (Bakol. 3:15) Eba, ale kine twamona nangue muntu umo tapalile kulangililua mibeele ya kuwamiiziana?

Languluka: Yehova abiikile mufuano waweeme saana wa kulangilila mibeele ya kuwamiiziana kusipalilue, kabili ni Mulandu wakue uli watusambilizia lisomo likata palua kulangilila ezio mibeele. Bulanzi “kuwaamia kusipalilue” bubombiiziwe mara ingi mu Maleembo a Kigiriki a Kikristu. Leeza ali watulangilila siani mibeele ya kuwamiiziana?

Yehova waalangiliile mibeele ya kuwamiiziana ku mamilioni a mamilioni a bantu kupitila kubapeela beelia bibakabiile eevi baye bakosele. (Mat. 5:45) Kakiine atasie ntaanzi ya kumumana weene, Yehova waatulangiliile mibeele ya kuwamiiziana. (Baef. 2:4, 5, 8) Kwa mufuano, waamufumiizie Muana wakue lyonga, aweeme saana juu ya bantu bonse. Mutumua Paulo waaleembele nangue Yehova waateaniizie kilubula mulandu kukoonkana ni “bukata bwa buwaame bwakue.” (Baef. 1:7) Kukila pakaako, anzia kine tuli twakita mazaambi, ni kumulengia Yehova afipue, weene atwaliliile sie kututungulula ni kutusambilizia. Malaizio akue ni milandu yakue bili nga “nvula iteekameene.” (Mal Miz. 32:2) Tetuviinda kubueziiziamo bintu byonse bili mukutukitila Yehova kupitila mibeele yakue ya kuwamiiziana yali watulangilila. Kabili, kulanda kisinka, musita weetu uli waiza, uswapiile mibeele yakue Yehova ya kuwamiiziana.​—Palania ni 1 Petro 1:13.

Kakiine, mibeele ya kuwamiiziana yakue Yehova ili yakulana ni kukinkiziana. Keekio kilangiliile nangue, kuliko kusaakuila bantu batupalile kulangilila mibeele ya kuwamiiziana, tupalile kwikwinda saana kumupala Yehova kupitila kulangilila mibeele ezio ku bange nsita yonse. (1 Bat. 5:15) Kine lyonse tuli twalangilila mibeele ya kuwamiiziana, tuli kuya twali nga mulilo uleemene buino mu busiku buliko mupepo. Tuli kuya twakoselezia bantu ba mu lupua lwetu, balupua ni nkazi neetu, babombi neetu, baalia batwasoma naabo ni bekazi neetu.

Tontonkania palua bantu ba mu lupua lobe ao bantu ba mu kilonghaano kyenu vibali kusekelela kupitila milandu ni bikitua byobe. Paange kuli muntu umo mu kilonghaano kyenu akabiile saana kukwasiiwa kuwaamia nsesi yakue ni busitani ao kubomba twazi tunge nga evelia kukwasiiwa kuya kusita tuntu. Kukila pakaako, kine weewe wasaakaana ni muntu mu miilo yobe ya kusimikila akabiile kukwasiiwa, eba, kunti wamukwasiako mu nzila imonekele?

Kansi, kupitila kumupala Yehova, lyonse milandu ni bikitua byetu biye byatungulwilue na “muzilo wa kuwamiiziana.”