1. Likolo Sulemani waatusambiliziizie ki kupitila milandu ili mu Kasimika 7:20?

 LIKOLO Sulemani waalandile eevi: “Pa kyalo te pali muntu wa nsaambu, ali wakita lyonse bintu biweeme kabili asiizi kukitapo lizaambi.” (Kas. 7:20) Keekio ni kisinka kakiine! Fwe bonse tuli ba mazaambi. (1 Yoan. 1:8) Pakaako, tukabiile kweleelua na Leeza, ni kweleelua na bantu bange.

2. Uli waiunvua siani kine waeleelua na kibuza obe wa peepi?

² Kulanda kisinka, weewe, walanguluka busiku buwaamuluviizie kibuza obe wa peepi. Waatonene kupuisia ozo mulandu ni kuwaamia kabili bukibuza bobe pamo nakue, pakaako, waamuloombele eevi akweleele. Weewe, waaiunvuile siani musita kibuza obe lwaakweleele mukwitonena? Eba, waatendekele kwiunvua buino saana? Eba, keekio te kyaakulengiizie kabili waluke ni nsaansa?

3. Tuli kulondoluela ki mu leeli lyasi?

³ Tutonene Yehova aye wali kibuza weetu wa peepi saana, inzi nsita inge kunti twalanda ao kukita bintu bya kumulengia afipue. Inzi, juu ya ki kunti twasininkizia nangue Yehova atonene kutweleela? Kweleelana kwakue Yehova kupuseene siani ni kweleelana kwa bantu? Kabili ni kya kupeleezia, naani ali waeleelua na Leeza?

4. Juu ya ki kunti twasininkizia nangue Yehova ali wasaangua waiteaniizie kweleela?

⁴ Mulandu Wakue Leeza uli watusininkiziizia nangue Yehova eteaniizie kweleela. Musita Yehova lwaailangiliile kuli Musa ku  Lupili lwa Sinai, Weene, waamutumine malaika alande eevi: “Yehova, Yehova, Leeza wa luse ni nkumbu, asiizi kuleenga kufiitua kabili ali ni ntono ingi ilamatiliile ni kisinka, ali walangilila ntono ilamatiliile ku ma elufu a bantu, ali waeleela kilubo ni bubiifi ni lizaambi.” (Kuf. 34:6, 7) Yehova aweeme, kabili weene ni Leeza wa luse, ali wasaangua waiteaniizie kweleela lyonse baalia bali balapila mazaambi abo.​—Neh. 9:17; Malum. 86:15.

5. Nga vilandile Malumbo 103:13, 14, Yehova ali wakita ki paantu amanine vituli?

⁵ Paantu Yehova i Kabumba weetu, amanine kila kintu palwetu. Tontonkania kaniini! Yehova amanine kila kantu palua muntu onse ali pa kyalo. (Malum. 139:15-17) Pakaako, weene, kunti wamona kusipuililika konse kutwaambuile kufuma ku baviazi betu. Kabili amanine atasie bintu byaakitikile mu buikazi bwetu bilengiizie tuye twali mu aali itulimo. Yehova ali wakita ki paantu atumanine buino saana? Keekio, kili kyamukinkizia atukitile bintu kwa luse.​—Malum. 78:39; soma Malumbo 103:13, 14.

6. Yehova waalangiliile siani nangue atonene saana kweleela?

⁶ Yehova alangiliile nangue atonene saana kutweleela. Amanine nangue juu ya bintu byaakitile muntu wa kuanza, Adamu, fwe bonse twaalukile ba mazaambi kabili, fwe bonse tuli twafikiila kufua. (Bar. 5:12) Te twaali na buviinde bwa kwifumia mu lizaambi ni lufu, aosie muntu unge onse wa kutufumia mu lizaambi ni lufu. (Malum. 49:7-9) Anzia evio, Leeza weetu wantono waalangiliile nkumbu ni kukwata mupaango wa kutulubula. Waakitile siani? Nga vilangiliile Yoane 3:16, Yehova waapeele ao waamufumiizie Muana wakue lyonga eevi afue palwetu. (Mat. 20:28; Bar. 5:19) Yesu waatufuiliile eevi kulubula muntu onse ali walangilila kiketekelo muli weene. (Baeb. 2:9) Kakiine Yehova waakisikile saana kumona Muana wakue mutonua wafua lufu lwa mupamba kabili bila mukinzi! Kakiine Yehova taasiile kumufumia Muana wakue eevi afue, kabenge Weene taali watonene kutweleela.

7. Mibeele ya kweleela mu kwitonena yakue Yehova ilangiliilue siani mu Bibilia?

⁷ Mu Bibilia muli mifuano ingi ya bantu baaeleelue na Yehova mukwitonena. (Baef. 4:32) Weewe walanguluka ni? Paange watontonkania palwakue Likolo Manase. Ozo muntu mubiifi waamukitiile Yehova mazaambi akata mu nzila ingi. Waali wapupa baleeza ba bufi ni  kukinkizia bange bakite enka evio. Waabepaile baana bakue muine ni kubafumia eevi baye bali ngeleelo ku baleeza ba bufi. Kabili, waafikiile kwimika mukisi mu ekalu itakatiifu yakue Yehova. Bibilia ili yalanda eevi palwakue : “Waakitile bintu bibiipile mu nzila ikata pa menso akue Yehova, eevi kumulengia afipue.” (2 Mil Nsi. 33:2-7) Anzia evio, musita Manase lwaalapiile kakiine, Yehova waamweleele mukwitonena. Kabili, Leeza waamwitabiziizie eevi abuele kwaluka likolo. (2 Mil Nsi. 33:12, 13) Paange watontonkania kabili palwakue Likolo Daudi, waakitile mazaambi akata, abiikile mukati bukende ni bungipaani. Anzia evio, musita Daudi lwaalapiile kakiine ni kwitabila lizaambi lyakue, Yehova waamweleele. (2 Sam. 12:9, 10, 13, 14) Kakiine kunti twasininkizia nangue Yehova atonene saana kweleela. Kabili nga vituli kumona, buviinde bwakue Yehova bwa kweleela bwibeleele saana kine twabupalania ni bwa bantu.

8. Buviinde bwibeleele saana bwa kupingula bwakue Yehova bukumiizie siani buviinde bwakue bwa kweleela?

⁸ Yehova i “Mupinguzi wa kyalo kyonse.” (Kut. 18:25) Mupinguzi aweeme, apalile kuya wamanine buino saana vili mizilo. I vili ni Yehova, paantu kukila pa kuya wali Mupinguzi weetu, kabili weene Ali Wapeelana Mizilo. (Is. 33:22) Te kuli muntu unge amanine biweeme ni bibiipile nga Yehova vyamanine. Mupinguzi aweeme, apalile kuya wamanine kiki kinge? Apalile kumana mpunda yonse palua mulandu ntaanzi ya kufumia bupinguzi. Kansi, Yehova i mupinguzi akilile kuwaama paantu lyonse ali wamana mpunda yonse palua mulandu.

9. Yehova ali wasaangua wamanine mpunda ki musita lwali wapingula kine muntu apalile kweleelua ao abe?

⁹ Kupusana ni bazuuzi bali bapingula bantu, Yehova ali wasaangua wamanine mpunda yonse palua kila mulandu uli ntaanzi yakue. (Kut. 18:20, 21; Malum. 90:8) Weene teezi kupeleelasie pa bintu bili byamona ao kunvua bantu. Weene amanine buino saana kili kyalengia muntu aye wakita bintu kampanda, nga evelia kulengiiwa na mibeele ni bintu byaapalile ku baviazi bakue, masomo aasomene, ao fuasi kwaakuliile. Kabili amanine muntu vyali waiunvua ku mutima ni mu maano. Kabili, Yehova ali wasoma mutima. Ali wasaangua wamanine buino saana kili kyalengia muntu akite kintu. Te kuli kintu kili kuviinda kufiikua ntaanzi yakue Yehova. (Baeb. 4:13) Kansi, Yehova ali waeleela muntu, ali wakita evio paantu ali wasaangua wamanine buino mpunda yonse.

10. Juu ya ki kunti twalanda nangue bupinguzi bwakue Yehova lyonse buli bwasaangua bwali bwa nsaambu kabili bwapalile? (Malanguluzi a Mizilo 32:4)

¹⁰ Bupinguzi bwakue Yehova lyonse buli bwasaangua bwali bwa nsaambu kabili bwapalile. Teezi kupatulula ata kaniini. Yehova teezi kumweleela muntu paantu afuaniine, anoonkele, akindeeme, ao amanine bufundi buingi. (1 Sam. 16:7; Yak. 2:1-4) Te kuli muntu ali kuviinda kumutiinta Yehova akite kintu ao kumupeela bituulilo. (2 Mil Nsi. 19:7) Teezi kukwata bupinguzi paantu tamwene vya kunti akite ao kukoonkana ni vyali kwiunvua. (Kuf. 34:7) Yehova ni Mupinguzi aweeme saana paantu amanine buino kila kintu palwetu ni aali yeetu.​—Soma Malanguluzi a Mizilo 32:4.

11. Kweleela kwakue Yehova kwibeleele siani ni kwa bantu?

¹¹ Baalia baaleembele Maleembo a Kiebrania, baainikile nangue Yehova ali waeleela mu nzila iibeleele saana. Mu fuasi inge, baabombiizie mulandu wa Kiebrania ulandilue mu kitabu kimo nangue “uli wabombiiwasie eevi kulangilila Leeza vyali waeleela lizaambi lya muntu. Ozo mulandu tewizi kubombiiwa eevi kulondoluela muntu vyali wamweleela muntu  mwinakue mu nzila ifupi.” Yehova sie bunke i ali ni buviinde bwa kweleela mu nzila ipuililikile muntu ali walapila lizaambi. Kine Yehova watweleela kuli kwaluka ki?

12-13. (a) Ni kiki kili kyasekelela muntu kine waeleelua na Yehova? (b) Kine Yehova watweleela lizaambi taviinda kukita ki kabili?

¹² Kine twainika kisinka nangue Yehova waakitweleela, tuli kusekelela “nsita ya kuwaaminua,” pamo ni kwaluka ni mutende mu maano ni kampingu kaswetele. Kweleela kwa evio, te kuviinda kufuma ku bantu inzi kupalile kufuma kuli “Yehova muine.” (Miil Bat. 3:19, NWT) Musita Yehova lwali watweleela, ali wabuezia bukibuza pamo neetu mu nzila ipuililikile, kabili nga evelia fwe basinakitepo lizaambi ata limo.

¹³ Kisia Yehova kutweleela, taviinda kabili kutuluula ata kaniini, ao kutupeela kabili malipizi palua leelio lizaambi. (Is. 43:25; Yer. 31:34) Yehova ali waeleela mazaambi etu “nga evelia vili kuleepa kuli pakati ka kutula koba ni kuzika koba.” * (Malum. 103:12) Kine twatontonkania Yehova vyali watweleela mu nzila ikata, tuli kufikiila kumusantila ni kumukindika saana. (Malum. 130:4) Inzi, naani ali waeleelua na Yehova?

14. Twasambilila ki palua bupinguzi bwakue Yehova bwa kweleela?

¹⁴ Nga vitwafuma mukumona, Yehova teezi kupingula kweleela kukoonkana ni bukata ao buniini bwa lizaambi. Kabili, twasambilila nangue Yehova ali wabombia kumana kwakue wali Kabumba weetu, olia Ali Wapeelana Mizilo, kabili wali Mupinguzi musita lwali wapingula kine kunti waeleela ao abe. Ni bintu ki bili byatoosia Yehova musita lwali wapingula kine ali kweleela ao abe?

15. Nga vilandile lileembo kya Luka 12:47, 48, ni kiki kili kyatoosia Yehova?

¹⁵ Kintu kimo kili kyatoosia Yehova ni kumana kine olia waakikita lizaambi enikile nangue bintu byaakikita bibiipile. Yesu waalangiliile buino keekio kintu nga vilandile Luka 12:47, 48. (Soma.) Muntu ali wakita kintu kibiipile na bufue, kabili wamanine buino nangue kibiipile ntaanzi yakue Yehova, ali wakita lizaambi likata. Yehova kunti wapingula tekuti amweleele muntu wa evio. (Mark. 3:29; Yoan. 9:41) Anzia evio, twalanda twaanununa, nsita inge  tuli twafikiila kwinika nangue bintu bitwakitile bibiipile. Eba, mu aali nga ezio kuli ni kiswapilo kya kweleelua? Een! Twaitabila paantu kuli ni kintu kinge kili kyatoosia Yehova musita lwali wapingula kweleela.

16. Kulapila kuli na mana ki, kabili juu ya ki ni kwa mana kine tutonene kweleelua na Yehova?

¹⁶ Yehova ali watoosia kabili eevi kumana kine muntu akitile lizaambi alapiile kakiine. Kulapila kuli na mana ki? Kulapila, kulangiliile “kwalulula malanga atuli nao, aali, ao mupaango.” Kulapila kwa kisinka kulangiliile nangue muntu wanuuna ni kukisua saana palua kintu kibiipile kyaakikita, ao palua kwandua kukita kintu kiweeme kipalile kukita. Muntu ali walapila teezi kukisikasie juu ya bintu bibiipile byaakikita, inzi ali wakisua kabili paantu bintu byaakikita byaakilengia bukibuza bwakue pamo ni Yehova butope. Languluka nangue Likolo Manase ni Likolo Daudi, bonse babili baakitile mazaambi akata, inzi Yehova waabeleele mazaambi abo, paantu baalapiile kisinka. (1 Mak. 14:8) Kakiine Yehova ali watweleela kinesie wamona nangue twalapila kisinka. Inzi, te kitosiizie kunuunasie palua mazaambi atwakikita. Tupalile kuya twaleengele kukwata mipaango. * Keekio, i kintu kinge kabili kili kyatoosia Yehova.

17. Kupilibuka kulangiliile ki, kabili juu ya ki ni kwa mana kine te tutonene kukita kabili mazaambi atwaakitilenke? (Isaya 55:7)

¹⁷ Kupilibuka i kintu kinge kya mana kili kyatoosia Yehova. Kupilibuka kulangiliile nangue muntu ali mukwalulula lwendo, kupitila kulekela kukita bintu bibiipile ni kutwalilila kukita bintu bitonene Yehova. (Soma Isaya 55:7.) Muntu ali walapila, apalile kwalulula malanga akue, ni kutendeka kutungululua na malanga akue Yehova. (Bar. 12:2; Baef. 4:23) Apalile kuya wapinguile kulekela kutontonkania ni kukita bintu bibiipile byakiba wakita. (Bakol. 3:7-10) Kulanda kisinka, kulangilila kiketelo kyetu mu ngeleelo yakue Kristu, i kuli kwamulengia Yehova atweleele ni kutuswesia kufuma mu lizaambi lyetu. Yehova wakaba kutweleela kupitila ezio ngeleelo kine wamona nangue tuli mukukita maka kakiine eevi kwalulula lwendo lwetu.​—1 Yoan. 1:7.

18. Twasambilila ki palua kweleela kwakue Yehova?

¹⁸ Kansi, tulondoluele mu kifupi bintu bikata bitwafuma mukulondoluela. Mu myulu ni mu kyalo kyonse, Yehova i Ali Waeleela mu nzila ikata saana. Ni kiki kyalengia tulande evio? Kya kuanza, lyonse weene, ali wasaangua waiteaniiziesie kweleela. Kya bubili, amanine buino kila kintu palwetu. Kabili, weenesie bunke i ali ni buviinde bwa kwinika kine twalapila kisinka ao abe. Ni kya butatu, musita Yehova lwali watweleela, ali wavuta lizaambi kakiine, ni kutumona nga evelia fwe basinakitepo lizaambi. Keekio, kili kyatulengia kwaluka ni kampingu kaswetele ni kwitabilua na weene.

19. Anzia kine te tupuililikile kabili twakaba kutwalilila kuya twakita mazaambi, juu ya ki kunti twaya twali ni nsaansa?

¹⁹ Kulanda kisinka, paantu tetunapuililike, twakaba kuya twatwaliliile kukita mazaambi. Anzia evio, kunti twateekiiwa mutima na milandu ili mu kitabu, Étude perspicace des Écritures, Libuku lya 2, lubali lwa 765. Ezio milandu ilandile eevi: “Paantu Yehova ali ni luse kabili amanine butope buli na babombi bakue, beene te bapalile kuya batwaliliile kwiunvua ovio nsita yonse juu ya bilubo bili byalengiiwa na kusipuililika kwabo. (Malum. 103:8-14; 130:3) Kine bakita maka abo onse eevi kwikala kukoonkana ni nzila yakue Leeza, kunti baya bali ni nsaansa. (Baf. 4:4-6; 1 Yoan. 3:19-22).” Kakiine, ezio milandu yatukoselezia saana!

20. Mu lyasi likoonkelepo, twakaba kulondoluela biipuzio ki?

²⁰ Tuli mukutasia saana paantu Yehova eteaniizie kutweleela kine twalapila kakiine mazaambi etu atwakikita. Inzi, kunti twapala siani kweleela kwakue Yehova? Kweleela kwetu, kupaleene siani ni kweleela kwakue Yehova, inzi kupuseeneko ki? Juu ya ki kumana kupusana kooko ni kwa mana? Lyasi likoonkelepo lyakaba kwasuka bebio biipuzio.