Busininkizio bulangiliile nangue Yesu waalukile Koani Mukulu musita lwaabatiziiziwe mu muaka wa 29, kisia kuvyalua kwakue. Twamana siani? Musita lwaabatiziiziwe, Yesu waalangiliile nangue waali watonene kufumia bukose bwakue bwaluke ngeleelo pa altare ao mazabau apalaniizie “kutona” kwakue Leeza. (Bag. 1:4; Baeb. 10:5-10) Paantu ezio altare ya kimpalania yaalukileko kutendekela musita wa kubatiziiwa kwakue Yesu ni kutwalilila, ekalu ikata ya kimupasi​—ipalaniizie mipaango yakue Yehova palua lupupo luswetele, luswapiile kilubula mulandu​—ipalile yaalukileko kutendekela pa ozo musita.​—Mat. 3:16, 17; Baeb. 5:4-6.

Mu ekalu ikata ya kimupasi, mwaali mwapalile kuya mwali ni koani mukulu wa kubombamo. Pakaako, Yehova waamusaakuile Yesu aye wali koani mukulu “kupitila mupasi utakatiifu ni maka.” (Miil Bat. 10:37, 38; Mark. 1:9-11, NWT) Anzia evio, kunti twasininkizia siani nangue Yesu waasaakuilue kuya wali Koani Mukulu ntaanzi ya kufua kwakue ni kutuntumunua? Mufuano wakue Aruni ni bantu baaizile kubomba bali ba makoani bakulu kisia weene, uli kutukwasia kwasuka keekio kiipuzio.

Nga vyaali vyalandile Muzilo wapeelue Musa kuli Yehova, koani mukulu sie i waali wapalile kwingila Patakatiifu Saana pa liema lya kupupilamo, ni kisia miaka, musita wakuulilue ekalu, waali waingila Patakatiifu Saana. Rido i yaali yatenganisiizie Patakatiifu Saana ni Patakatiifu. Koani mukulu waali wapitasie ezio rido mu Busiku bwa Kweleelua Mazaambi. (Baeb. 9:1-3, 6, 7) Aruni ni bantu baabombele bali ba makoani bakulu kisia weene, baasaakuilue kuba ba makoani bakulu ntaanzi ya kwingila Patakatiifu Saana mu liema lya kupupilamo “kupitila rido [ikitilue na bantu].” Kansi, ipalile ni Yesu waasaakuilue kuya wali Koani Mukulu wa ekalu ikata yakue Yehova ntaanzi ya kufua kwakue, ni kisia, waaingiile kuya kwikala ku muulu “kupitila rido, i kulanda nangue, mubili wakue.” (Baeb. 10:20, NWT) Keekio kyalengele mutumua Paulo amulondolole Yesu kuiza waali “nga koani mukulu,” ni kisia paapo, ‘waapitile mu liema likata kabili likilile kupuililika lisikitilue na minue,’ i kulanda, “ku muulu kwine.”​—Baeb. 9:11, 24, NWT.

Te kuli bupusano pakati ka musita waaitabiilue kipingo kya leenu ni musita ukyatendekeziiziwe. Juu ya ki? Paantu musita Yesu lwaaile ku muulu ni kutwala mutengo wa bukose bwakue bwaali nabo wali muntu apuililikile, pa mulandu weetu, wakitile kintu kya mambo pa bintu bitatu byaali byapalile kulengia kipingo kya leenu kitabiilue ao kyaluke ni nsaambu. Bebio byenka bintu bitatu i byaatendekeziizie kipingo kya leenu ao kukilengia kitendeke kubomba. Eba, ni bintu ki bebio?

Kya mambo, Yesu waamwenekele ntaanzi yakue Yehova; kya bubili, Yesu waamupeele Yehova mutengo wa ngeleelo yakue; ni kya butatu, Yehova waaitabiile mutengo wa milopa yakue Yesu yaaitikile. Bebio bintu byaali byapalile kukitikanke ntaanzi kipingo kya leenu kitendeke kubomba.

Bibilia teizi kutubuila musita winewine waaitabiile Yehova mutengo wa ngeleelo yakue Yesu. Enka evio, ni fwefue tetuviinda kulanda musita winewine waaitabiilue kipingo kya leenu ni musita ukyatendekele kubomba. Anzia evio, tumanine nangue Yesu waaile ku muulu nsiku likumi ntaanzi ya Pentekoste. (Miil Bat. 1:3) Musita kampanda kisia ozo musita uniini, waamupeele Yehova mutengo wa ngeleelo yakue, ni Yehova waaitabiile. (Baeb. 9:12) Busininkizio bwa kintu keekio bwaamwenekele paswetele musita wa Pentekoste. (Miil Bat. 2:1-4, 32, 33) Yaamwenekele paswetele nangue kipingo kya leenu kiitabilue kabili kili mukubomba.

Mu kifupi, kipingo kyaleenu kyaitabiilue ni kutendekeziiwa kisia Yehova kwitabila mutengo wa milopa yakue Yesu yaaitikile. Kupuako, kipingo kyatendekele kyali ni Koani Mukulu, Yesu , wali mukubomba nga Mupwaniki wa keekio kipingo.​—Baeb. 7:25; 8:1-3, 6; 9:13-15.