Kulanda kisinka, Yehova atonene baalia bantu baupana baye bali ni nsaansa kabili baye bali ni bukibuza bwa peepi bwakaba kutwalilila loonse. (Mat. 19:4-6) Kine utonene kuupa ao kuupua, kunti wapata siani mulume ao mukazi aweeme? Paantu Yehova i Kabumba weetu, weene i amanine bintu bitupalile kukita eevi kyupo kiye kyali ni nsaansa. Pakaako, weewe wakaba wali ni nsaansa, kine wabombia mafunde afumine kuli weene. Mona amo pakati ka azo mafunde.

Kya mambo, tupalile kumana eevi juu yeetu fwe beene: “Mutima uli wabeepana kupita kintu kinge kyonse kabili tewizi kukwatika.” (Yer. 17:9) Musita bantu babili batonene kuupana lubali basaakaana ni kutendekezia bukibuza eevi bakabe kukobekelana ao kuchumbiana, kila umo teezi kukokola kwaluka ni nkulu ya mwinakue. Kabili kine keekio kyakitika, kunti kyabakolela kukwata bupinguzi buweeme. Musita bantu lubali bapingula kuupana paantusie basonseziiwa na nkulu ili pakati kabo, lingi bali bafikiila kutioka mutima. (Tus Maf. 28:26) Pakaako, te mulangue ku bantu babili bakebele kuupana kubuilana vibali baiunvua palua kila umo ni mwinakue ao kulayana ntaanzi tebanamanane buino.

Lileembo lya Tuswalo ni Mafunde 22:3, lili lyalanda eevi: “Muntu akengeele ali wamona buavia ni kufiama, inzi kipuba ali watwalilila ntaanzi ni kusaanga maavia.” Eba, kubombia bitente bya Enternete bili byakebelana muntu wa kuupana nakue, kunti kwaya kwali ni bwavia ki? Kya bulanda, bantu bange baamoneene ku kitente kya Enternete ni bantu babasimaneene nabo, baatendekeziizie buchumba, ni kisia ku mpela baaizile kwinika nangue babo bantu baababeepele. Kingeko, bantu basili ba kisinka bali batunga mpunda ya bufi palwabo bene eevi kubeepa bantu ni kubeebila nfalanga. Nsita inge, baalia baakitile bebio bintu bibiipile, baali bailanda nangue ni Bakasininkizia.

Mona bwavia bunge. Binge bitente bili byakebelana muntu wa kuupana nakue, bili byabombia programu ya ordinatere ao aplikasio imwenue nangue ili ni buviinde bwa kulangilila bantu bapateene bapalile kuupana. Anzia evio, te kuli busininkizio bulangiliile nangue ezio nzila ili yakwasia kakiine. Eba, muntu kunti walanda nangue ali ni mulangue, kine waswapila programu ya ordinatere ikitilue na bantu eevi kukwata bupinguzi bwa mana saana, nga boolia bwa kusaakula muntu apalile kwaluka mulume ao mukazi aweeme? Programu ya ordinatere teikaviindapo ata kaniini kukwasia nga vili vyakwasia Bibilia.​—Tus Maf. 1:7; 3:5-7.

 Lifunde limo lili lyasaangua mu Tuswalo ni Mafunde 14:15, lili lyanda eevi: “Kipuba ali wazumina kila mulandu, inzi muntu akengeele ali watoosia kubalua lutanfu.” Ntanzi ya kupingula nangue muntu kampanda i wakaba kwaluka mulume ao mukazi obe, upalilenke kumumana buino ozo muntu. Inzi, kitente kya Enternete tekiviinda kukukwasia umumane buino ozo muntu. Anzia kine kila umo ali kumana mpunda ya mwinakue ao kupisia musita wingi wali mukulondolola mu kitente kya Enternete, eba, kunti walanda nangue umumanine kakiine ozo muntu? Bantu bange baamwene nangue bapata kakiine muntu ubatonene, baakisikile ku mutima musita lubaasaakeene menso kwa menso.

Kaleemba umo wa malumbo waalandile eevi: “Nsiizi kupisia musita pamo ni bantu ba bufi, kabili ndi natiina baalia bali baifiika vibali.” (Malum. 26:4) Bantu bengi bali bamona kyalisie buino kubeepa musita ubali babiika mpunda yabo mu kitente kya Enternete kili kyakebelana muntu wa kupaana nakue. Bali bakita evio eevi bamoneke kuya bakilile kuwaama. Kunti bafiika mibeele yabo ibiipile, ao paange ezio mibeele teiviinda kumoneka musita ubali batuma mpunda yabo ku bantu bange. Anzia kine bantu bange kunti bailangilila nangue ni Bakasininkizia Bakue Yehova, eba, ni Bakristu babatiziiziwe kakiine? Eba, bakosele kimupasi? Eba, bali ni bukibuza bwabo bunke pamo ni Yehova? Eba, mu kilonghaano kyabo bakindikilue? Ao, eba, babo bantu kunti baya bali mifuano ibiipile ao “bibuza bibiipile”? (1 Bakor. 15:33; 2 Tim. 2:20, 21) Eba, babo bantu bali ni buntungua bwa kuupa ao kuupua kukoonkana ni Maleembo? Upalile kumana byasuko bya beebio biipuzio. Inzi, kunti kyakola kupata byasuko kine te wipuziizie Bakasininkizia bamumanine buino ozo muntu. (Tus Maf. 15:22) Kabili, kakiine mubombi wa kisinka wakue Yehova taviinda kutontonkania ata kaniini “kwampana” na muntu asizumiine.​—2 Bakor. 6:14; 1 Bakor. 7:39.

Paantu kubombia bitente bili byakebelana muntu wa kuupana nakue kuli kwaingiziana mu buavia, kuli nzila ikilile kuwaama ya kukebelamo ni kumumana muntu olia wakaba kwaluka paange mulume ao mukazi obe. Kunti wamupata pi olia wakaba kuya wali paange mulume ao mukazi aweeme? Kine bantu te bakaniiziwe kukolonghana, Bakasininkizia bali bamanana buino musita ubali basaakaana pamo ku kulonghaana kwa kila mulungu, ku kulonghaana kukata ni nsita inge ibali basakaana pamo.

Kine te kiviinda kukitika bantu kukolonghana nga vili mu musita wa buluele bwa korona (COVID-19), tuli twabombia biombo bya kielektronike eevi kulonghaana. Ozo musita, fuasi ili yamoneka ya kumanana ni Bakasininkizia basinaupe ao kuupua. Kunti wamona vibali bapisia biputulua byabo, kabili kunti watuilizia vibali balangilila kiketekelo kyabo musita ubali baasukapo. (1 Tim. 6:11, 12) Kabili kunti mwalanziana mu olia musita uli wasiiwa kisia kulonghaana. Musita wa kukolonghana mu bikundi bya Bakasininkizia kupitila biombo bya kielektronike eevi kwisaansamusia, kunti wamona ozo muntu wautonene vyali wabakitila bantu bange, ni keekio kili kulangilila vili mibeele yakue kakiine. (1 Pet. 3:4) Mukupita kwa nsiku, vimulikuya mwakila kumanana buino, kunti wapingula kine mipaango yeenu ni bintu bimuli mwatona mwe bonse babili ni bimo kabili kine mupateene.

Kine muntu asinaupe ao kuupua wakeba muntu wakuupana nakue wakonkele mufunde a Bibilia, kakiine ali kwimwena milandu ili mu tuswalo ni mafunde ilandile eevi: “Olia wapata mukazi [ao mulume] aweeme, wapata kintu kimo kyaweeme, kabili waitabilua na Yehova.”​—Tus Maf. 18:22.