1. Tupalile kumona siani lisyuko lyetu lya kupepa kuli Yehova?

 TUPEELUE lisyuko likata saana lya kumupalama kupitila lipepo olia Waakitile muulu ni kyalo. Tontonkania kaniini: Fwefue, kunti twamuponguela Yehova bintu bili ku mutima weetu pa nsita yonse, kabili mu lulimi lutuli kutona bila kulayana nakue. Kunti twapepa kuli weene twali pa butanda ku opitali, twakakilue mu buloko twali ni kisinka nangue Baba weetu wantono ali kututuilizia. Kakiine tuli twatasia saana palua bobo bupe.

2. Likolo Daudi waalangiliile siani nangue waatweme wafiniizie lisyuko lya kupepa?

² Likolo Daudi waali watweme wafiniizie lisyuko lya kupepa. Waamwimbiile eevi Yehova: “Kansi lipepo lyane liye lyali nga buvumba ntaanzi yobe.” (Malum. 141:1, 2) Mu nsiku yakue Daudi, buvumba butakatiifu bwaali bwabombiiwa na bamakoani mu lupupo lwa kisinka. Bobo buvumba bwaali bwateaniiwa buino saana. (Kuf. 30:34, 35) Daudi waatonene kutontonkania buino palua bintu byali kulanda musita wa kupepa kuli Baba wakue wa ku muulu. Ni fwefue tutonene saana kukita evio vyenka. Tutonene mapepo etu amusaansamusie Yehova.

3. Ni aali ki itupalile kulangilila musita utuli twapepa kuli Yehova, kabili juu ya ki?

³ Musita utuli twapepa kuli Yehova, tupalile kuya twamukindikile saana. Tontonkania palua bimonua bya kupapia byaamwene Isaya, Ezekieli, Danieli, ni Yoane. Kila kimonua kipuseene ni kinakue, inzi bipateene mu kintu kimo. Bebio bimonua byonse bimulangiliile Yehova wali Likolo wa kupapia saana. Isaya ‘waamumwene  Yehova waikeele pa kitebe kya bukolo kya pa muulu kabili kyalendukile.’ (Is. 6:1-3) Ezekieli waamumwene Yehova waikeele mu tyakala ya ku muulu, wazyungulukiilue na “lubuto lubeekele . . . nga loolia lwa mukolanvula.” (Ezek. 1:26-28) Danieli waamwene “Mukote wa Nsiku” wavuele maubo asue, ni mabeebe a mulilo afuma pa kitebe Kyakue kya bukolo. (Dan. 7:9, 10) Ni Yoane waamumwene Yehova waikeele pa kitebe kya bukolo wazyungulukiilue na kintu kipaleene ni mukolanvula wa rangi ya libue lya emerodi ya kisombe lifuaniine saana. (Nfy. 4:2-4) Musita utuli twatontonkania palua bulumba bwakue Yehova busiviinda kupalaniiwa, tuli twalanguluka lisyuko likata lituli nalio lya kumupalama weene kupitila lipepo, kabili tuli twalanguluka juu ya ki ni kintu kya mana kukita evio twalangiliile mukinzi. Inzi, tupalile kupepa palua ki?

4. Twasambilila ki kupitila milandu ya ntendeko ya mu lipepo lya mufuano lili mu Mateo 6:9, 10?

⁴ Soma Mateo 6:9, 10. Mu Nsimiko Yakue ya ku Lupili, Yesu waabasambiliziizie basambi bakue kuya bapepa mu nzila ili yamusaansamusia Leeza. Kisia kulanda nangue, “kansi, mupalile kupepa eevi,” Yesu waazimbuilenke bintu bya mana bipateene ni mipaango yakue Leeza. Waapepele palua kuswesiiwa kwa liina lyakue Yehova; kuiza kwa Bukolo Bwakue Leeza, bolia bwakaba kwinoona baluani bonse bakue Leeza ni mpaalo yapaangile palua kyalo ni ku bantu. Kine twabiika bebio bintu mu mapepo etu, twalangilila nangue kutona kwakue Leeza ni kwa mana kuli fwefue.

5. Eba, kilisie buino kupepa palua bintu byetu fwe beene?

⁵ Mu seemu ikoonkelepo ya lipepo, Yesu waalangiliile nangue kili buino kupepa palua bintu byetu fwe beene. Kunti twamuloomba Yehova atupeele kyakulia kya kila busiku, atweleele mazaambi etu, atusuunge tekuti twingile mu buezio, kabili atupususie ku mubiifi. (Mat. 6:11-13) Musita utuli twamuloomba Yehova bebio bintu, tuli twalangilila nangue twinikile nangue buviinde bwetu buswapiilesie weene kabili nangue tutonene kwitabilua na weene.

6. Eba, tupalile kuya twazimbulasie bintu bili mu lipepo lya mufuano musita utuli twapepa? Londolola.

⁶ Yesu taali wakeba kulanda nangue tupalile kukoonka katue kale milandu ya mu lipepo lya  mufuano. Mu mapepo ange abanga apepa Yesu, waali wazimbula bintu paleepale bibanga byali bya mana kuli weene mu ozo musita. (Mat. 26:39, 42; Yoan. 17:1-26) Evio vyenka ni fwefue, tupalile kupepa palua kila kintu kili mukutwemia. Kine twakeba kukwata bupinguzi, kunti twapepa eevi tupate mulangue kabili twaluke ni buviinde bwa kwinika. (Malum. 119:33, 34) Kine tukebele kutendeka miilo ikolele itwakipeelua, kunti twapepa eevi twaluke ni buviinde bwa kumana vya kukita ezio miilo. (Tus Maf. 2:6) Baviazi kunti bapepa palua baana babo, baana kunti babapepela baviazi babo, kabili fwe bonse kunti twabapepela, kabili tupalile kukita evio palua basambi betu ba Bibilia pamo ni baalia batuli twasimikila. Inzi, musita utuli twapepa kuli Yehova, te tupalile kuya twamuloombasie bintu.

7. Juu ya ki tupalile kumulumbania Yehova kupitila lipepo?

⁷ Tupalile kuya twalangulukile kumulumbania Yehova mu mapepo etu. Te kuli muntu unge apalile kupeelua bulumba nga bolia bupalile kupeela Leeza weetu. Weene ‘aweeme, kabili aleengele kweleela.’ Kukila pa kaako, ‘ali ni luse kabili ni nkumbu, teezi kufipua lubilo, kabili ali ni ntono ingi ilamatiliile ni bukisinka.’ (Malum. 86:5, 15) Kakiine tuli ni nsaambu iweeme ya kumulumbania Yehova palua evelia vyali, ni palua beelia byali wakita.

8. Zimbula bintu paleepale bipalile kutulengia kumutasia Yehova. (Malumbo 104:12-15, 24)

⁸ Kukila pa kumulumbania Yehova mu mapepo etu, twakinkiziiwa kumutasia palua bintu biweeme saana byali watupeela. Kwa mufuano, kunti twamutasia palua rangi iweeme saana ituli twamona ku maluba, palua byakulia biweeme saana bipusene-puseene, ni palua nsaansa ya kuya twali ni babibuza ba peepi. Baba weetu wantono ali watupeela bebio bintu pamo ni binge bingi eevi tuye twasaansamukile. (Soma Malumbo 104:12-15, 24.) Kintu kya mana saana ni keeki: Tuli twamutasia Yehova palua byakulia bingi bya kimupasi byali watupeela, ni palua kiswapilo kyetu kiweeme saana kya musita uli waiza.

9. Ni kiki kili kukukwasia kulanguluka kumutasia Leeza? (1 Batesalonika 5:17, 18)

⁹ Kunti kyaya kyaleengele saana kulaba kumutasia Yehova palua bintu biweeme byali  mukuya watukitila. Ni kiki kili kukukwasia kulanguluka? Kunti wakita liste ya bintu biwaakiloomba, kisia musita toosia eevi umone Yehova vyaasukile bebio bintu. Kisia, pepa eevi umutasie paantu waakikukwasia. (Soma 1 Batesalonika 5:17, 18.) Tontonkania palua keeki kintu: Tuli twaunvua nsaansa ni kwiunvua kuya twatonenue musita bange lubali batutasia. Evio vyenka, musita utuli twalanguluka kumutasia Yehova mu mapepo etu, keekio kili kyasaansamusia mutima wakue. (Bakol. 3:15) Inzi, ni nsaambu ki inge ya mana ipalile kutulengia kumutasia Leeza weetu?

10. Nga vilandile 1 Petro 2:21, juu ya ki tuli ni nsaambu ya kumutasia Yehova pa kumutuma Yesu paanu pa kyalo?

¹⁰ Soma 1 Petro 2:21. Tupalile kumutasia Yehova paantu waamutumine Muana wakue mutonua. Tuli twasambilila bintu bingi palwakue Yehova ni vya kumusaansamusia weene, kupitila kusambilila buikazi bwakue Yesu. Kine twalangilila kiketekelo mu ngeleelo yakue Kristu, kunti twaaluka ni bukibuza bwa peepi pamo ni Yehova Leeza ni kusekelela mutende pamo nakue.​—Bar. 5:1.

11. Juu ya ki tuli twapepa mu liina lyakue Yesu?

¹¹ Tuli twamutasia Yehova paantu kunti twapepa kuli weene kupitila Muana wakue. Yehova ali wamubombia Yesu eevi kutupeela beelia bituli twaloomba. Yehova ali watuilizia ni kwasuka mapepo ali akitua kupitila mu liina lyakue Yesu. Yesu waalandile eevi: “Byonse bimwakaba mwaloomba mu liina lyane, nakaba namipeela, eevi Tawe [Baba] alumbue kupitila mu Muana wakue.”​—Yoan. 14:13, 14.

12. Zimbula nsaambu inge ili yatulengia tumutasie Yehova palua Muana wakue.

¹² Yehova ali waeleela mazaambi etu kupitila ngeleelo ya kilubula mulandu kyakue Yesu. Maleembo ali amulondolola Yesu kuya wali “kitambua [koani] mukulu ekeele mwiulu ku kulio kwa kitebe kya bukindami.” (Baeb. 8:1) Yesu ni “mukwasi ali watulandilako kuli Situe [Baba weetu].” (1 Yoan 2:1) Tuli twamutasia saana Yehova paantu waatupeele Koani Mukulu amanine kusipuililika kwetu kabili ali “watupapaatila”! (Bar. 8:34; Baeb. 4:15) Fwefue, te tupuililikile, pakaako bila ngeleelo yakue Yesu, tetuviinda kumupalama Yehova mu lipepo. Kakiine, ni weewe kunti waitabizia nangue tetuviinda kufikapo pa kutasia palua bupe butwapeelue na Yehova, i kulanda bupe bwa Muana wakue mutonua!

13. Mu nsita ya busiku ntaanzi ya kufua kwakue, Yesu waalangiliile siani nangue waali wabatonene basambi bakue?

¹³ Mu nsita ya busiku ntaanzi ya kufua kwakue, Yesu waapepele saana palua basambi bakue, wamuloomba baba wakue eevi ‘abalabukile ku olia mubi.’ (Yoan. 17:15) Kakiine keekio kyaalangiliile nangue Yesu waali wabatonene basambi bakue! Anzia kine Yesu waali wamanine nangue kwasiala musita uniini asaanzue saana, waatwaliliile kubeemena batumua bakue.

14. Kunti twalangilila siani nangue tubatonene balupua ni bankazi betu?

¹⁴ Eevi kumupala Yesu, tetwizi kupoozasie maano etu ku bintu bitukabiile. Kuliko kukita evio, lingi tuli twasaangua twabapepela balupua ni bankazi betu. Musita utuli twakita evio, tuli twanakila malaizio akue Yesu a kuya twatoneene, kabili tuli twamulangilila Yehova vitutonene balupua ni bankazi betu. (Yoan. 13:34) Kubapepela balupua ni bankazi betu, te kuzeezia musita. Mulandu Wakue Leeza uli watubuila eevi: “Mapepo a muntu aweeme ali ni maka a kukosia.”​—Yak. 5:16.

15. Juu ya ki tupalile kubapepela balupua ni bankazi betu?

 ¹⁵ Tupalile kubapepela balupua ni bankazi betu paantu bali mukusaakaana ni maavia engi. Kunti twamuloomba Yehova abakwasie basipikizie maluele, maavia ali aleetua na maka a kyalo ali ainoona bintu, vita, kusaanzua ni maavia ange. Kabili kunti twabapepela balupua ni bankazi betu bali baipeela eevi kubakwasia baalia bakabiile kukwasiiwa. Paange weewe umanine bantu bali mukwemiiwa na maavia a evio. Wamona siani ukabe kuya wabazimbula mu mapepo obe? Tuli twalangilila ntono ya bulupua kupitila kumuloomba Yehova abakwasie basipikizie maavia.

16. Juu ya ki tupalile kubapepela baalia bali batutungulula?

¹⁶ Baalia bali batungulula mu kilonghaano, bali batasia saana ni kunoonkelamo mu mapepo a balupua ni bankazi. Mutumua Paulo waali wamanine nangue waali wakabiile mapepo a bange. Waaleembele eevi: “Mpepeleko ni neene wenka, eevi Leeza ampeele twebo twa kulanda lungiteaniizie eevi ndande nakinkimeene ni kumania kafiso ka [ao, siri ya] nsimiko.” (Baef. 6:19) Ni loonu, tuli ni balupua bengi bali baboomba saana eevi kututungulula. Tuli twalangilila nangue tubatonene kupitila kumuloomba Yehova apaale miilo yabo.

17-18. Kunti twapeelua lisyuko lya kupepela bange musita ki, kabili ni kiki kitupalile kulanguluka?

¹⁷ Nsita inge tuli twakupua eevi tupepe ntaanzi ya bange. Kwa mufuano, nkazi ali mukutungulula lisambililo lya Bibilia, kunti wamulanda nkazi ubali nakue apepe. Paange nkazi ubali nakue tamumanine buino musambi, pakaako kunti watona kupepa lipepo lya kupeleezia leelio lisambililo. Kukita evio, kunti kwamukwasia apatanisie saana lipepo lyakue ni bintu bikabiile musambi.

¹⁸ Lupua kunti walandua apepe ku bulondolozi bwa kuya mu kusimikila ao ku kulonghaana. Lupua wapeelua leelio lisyuko, apalile kuya walangulukile kikata kya kulonghaana. Lipepo te lipalile kubombiiwa juu ya kusoka kilonghaano ao juu ya kubuila bantu mpunda. Ku kulonghaana kuingi kutuli twakita, lwimbo ni lipepo bili byatwamasie dakika isano, pakaako lupua apeelue lisyuko lya kupepa tapalile kulanda “bingi,” asa kine ni lipepo lya kutendeka kulonghaana.​—Mat. 6:7.

19. Ni kiki kyakaba kutukwasia eevi tuye twaiteaniizie palua busiku bwakue Yehova?

¹⁹ Tupalile kukita lipepo liye lyali seemu ya mana saana ya buikazi bwetu paantu busiku bwa bupinguzi bwakue Yehova bwapalama. Palua kaako, Yesu waalandile eevi: “Kansi labuke, muye mwapepa lyonse eevi mukabe ni maka a kupita buino mu beebi bintu byonse byakaba kukitika.” (Luk. 21:36) Kakiine, kuya twapepa lyonse, kwakaba kutukwasia kusiala twakentele kimupasi eevi busiku bwakue Leeza tekuti bukabe kutusangilila bila twaiteaniizie.

20. Mapepo etu kunti apalana siani ni buvumba buli bwanunkila buino?

²⁰ Twasambilila ki? Tuli twatasia saana palua lisyuko lyetu likata lya kupepa. Bintu bikata bitupalile kupepela bipalile byapateene kakiine ni mipaango yakue Yehova. Kukila pakaako, tuli twatasia palua Muana wakue Leeza ni kuteeka kwa Bukolo bwakue, kabili tuli twapepa palua balupua ni bankazi betu. Kabili, kakiine kunti twapepa palua bintu bya kimubili ni bya kimupasi bitukabiile. Musita utuli twatontonkania palua bintu bya kubiika mu mapepo etu, tuli twalangilila nangue tutweme twafiniizie lisyuko lyetu lya kupapia. Milandu yeetu ili kuya yali nga buvumba buli bwanunkila buino kuli Yehova, i kulanda ‘ya kumusaansamusia weene.’​—Tus Maf. 15:8.