Yesu waali wasimikila mpunda ya mutende. Inzi, waabalandile eevi batumua bakue: “Tekutontonkanie nangue naaizile kuleeta mutende ku kyalo; naaizile kuleeta, apana mutende, inzi kipanga. Paantu naaizile kulengia kukasanika pakati ka muntu ni baba wakue, pakati ka muana mwanakazi ni mama wakue, ni pakati ka muana-vyala ni nghina-vyala.” (Mat. 10:34, 35, NWT) Yesu waali wakeba kulanda ki?

Yesu taali watonene bantu ba mu lupua batengane, inzi waali wamanine nangue masambilizio akue kunti alengia bantu bange mu lupua basuulane. Evio vyenka baalia batonene kwaluka basambi bakue Kristu ni kufikiila kubatiziiwa, bapalile kuya bamanine nangue nsita inge bantu ba mu lupua lwabo kunti babasuula palua bupinguzi bwabo. Nsita inge balume ao bakazi babo ao bantu ba mu lupua lwabo kunti babapinga ni kulengia kiye kyakolele kuli beene kusiala baali ba kisinka ku masambilizio akue Kristu.

Bibilia ili yabakinkizia Bakristu ‘kuya bali ni mutende pa bantu bonse.’ (Bar. 12:18) Inzi, masambilizio akue Yesu kunti aya ali nga “kipanga” mu bantu ba mu lupua paleepale. Keekio kunti kyakitika kine umo mu lupua waitabila masambilizio akue Kristu ni kooku bantu bange bali mukupinga masambilizio akue Yesu. Kine keekio kyakitika, bantu ba mu lupua baaluka “baluani” bakue olia ali mukusambilila kisinka.​—Mat. 10:36.

Baalia basambi bakue Kristu bali mu lupua lulimo bantu ba diini ipuseene, nsita inge kunti basaakaana ni aali ili kwezia ntono yabo kuli Yehova ni Yesu. Kwa mufuano, bantu ba mu lupua basizumiine, kunti baezia kubatiinta babo Bakristu eevi basekelele nsiku nkulu ya kidiini. Kine baeziiwa, bapalile kupingula kine naani ubali kusaansamusia. Yesu waalandile eevi: “Muntu atonene se [baba wakue] ao nghina [mama] kukila neene te musambi wane.” (Mat. 10:37) Kulanda kisinka, Yesu taali wakeba kulanda nangue eevi baalia bali mukusambilila kisinka baaluke basambi bakue bapalile kubatonasie kaniini baviazi babo. Inzi, waali wakeba kubasambilizia vya kupingula bintu bya mana saana mu buikazi bwabo. Kine bantu ba mu lupua basizumiine bapinga mute weetu wa kumubombela Yehova, tupalile kutwalilila kubatona inzi twainikile nangue kumutona Leeza i kintu kipalile kuya kyali kya kuanza.

Kulanda kisinka, kupingua na bantu ba mu lupua kunti kwakisia saana. Inzi, basambi bakue Yesu bapalile kuya balangulukile milandu eezi yakue Yesu: “Muntu onse ali wakaana kutwama kimuti kyakue kya busaanso ni kunkoonka, tapalile kuli neene.” (Mat. 10:38, NWT) Mu milandu inge, Bakristu bali bamona kupingua na bantu ba mu lupua kuya kwali seemu ya maavia apalile kusipikizia Bakristu mukwitonena. Inzi, bali basaangua baswapiile nangue kupitila lwendo lwabo, bantu ba mu lupua kunti baalulula malanga abo ni kutona kusambilila mpunda ili mu Bibilia.​—1 Pet. 3:1, 2.