1. Ni biki biwaamanine musita luwaatendekele kusambilila Bibilia?

 EBA, walanguluka musita luwaatendekele kusambilila Bibilia? Paange weewe waapapile luwaainikile nangue Leeza ali ni liina. Paange waatasiizie kumana nangue Leeza teezi kukyuzia bantu mu mulilo. Kabili paange weewe waasaansamukile saana kumana nangue wakabamona kabili batonua bobe baafuile, ni kwikala naabo mu kyalo kya paradiso.

2. Kukila pa kusambilila kisinka kya Bibilia, ni buyantanzi ki bunge buwaakitile? (Baefeso 5:1, 2)

² Viwaali wakila kusambilila Mulandu Wakue Leeza, ntono yobe kuli Yehova, i viyaali yakila kukula. Ezio ntono yaakukinkiziizie kubombia beelia biwaali wasambilila. Waakitile bupinguzi buweeme buswapiile mafunde a Bibilia. Weewe, waasambiliile kutontonkania palua bintu biweeme ni kubikita, paantu waatonene kumusaansamusia Leeza. Nga evelia muana vyali wapala muviazi ali ni ntono, ni weewe waatendekele kumupala Baba obe wa ku muulu.​—Soma Baefeso 5:1, 2.

3. Ni biipuzio ki bitupalile kwiipuzia?

³ Tupalile kwiipuzia eevi: ‘Eba, loonu, nkilile kumutona Yehova kuliko musita unaalukile Mukristu? Kisia kubatiziiwa kwane, eba, naakikila kumupala Yehova kupitila kubalangilila ntono balupua ni bankazi bane?’ Atasie kine weewe wainika nangue ntono yobe kuli Yehova ni ku balupua ni bankazi yakeepa, te kutioka mutima. Keekio, kipaleene ni kintu kyaakitikile ku Bakristu ba ku ntendeko. Yesu taabapoozele, kabili tatupoozele ni fwefue. (Nfy. 2:4, 7) Weene amanine nangue kunti twaviinda kubuezia ntono itwaali naayo musita utwaatendekele kusambilila kisinka kya Bibilia.

4. Tuli kulondoluela ki mu leeli lyasi?

⁴ Mu leeli lyasi, tuli kulondoluela vya kutwalilila kukuzia ntono yeetu kuli Yehova ni ku bantu bange. Kisia, tuli kumana mpaalo paleepale ituli twapata pamo ni bange musita utuli twakosia ntono yeetu.

5-6. Mutumua Paulo waapatile maavia ki mu kipindi kyakue kya miilo ya kusimikila, inzi ni kiki kyaamukinkiziizie atwalilile kumubombela Yehova?

⁵ Mutumua Paulo waali wasekeleele kumubombela Yehova. Anzia evio, te kibanga kyaleengelesie lyonse. Lingi, Paulo waali wakita bulendo bwaleepele, kabili mu ezio nsiku kukita bulendo te kwaali kwaleengele. Mu nghendo yakue yaali wakita, lunge Paulo waali waisaanga mu “masaanzo a kwizula kwa myenzi” ni mu ‘masaanzo a kwipaiwa na bangipaani.’ Kabili lunge, waali wafikiila kuumua na baluani bakue. (2 Bakor. 11:23-27) Kabili ni balupua Bakristu bakue Paulo, lunge te baali batasia palua bintu byaali waikwinda kukita eevi kubakwasia.​—2 Bakor. 10:10; Baf. 4:15.

⁶ Ni kiki kyaamukwasiizie Paulo eevi atwalilile kumubombela Yehova? Paulo waasambiliile bingi palua mibeele yakue Yehova kupitila Maleembo, ni kupitila bintu byaasaakeene nabio. Paulo waafikiile kusininkizia nangue Yehova Leeza waali wamutonene. (Bar. 8:38, 39; Baef. 2:4, 5) Kabili waafikiile kumutona saana Yehova. Paulo waalangiliile nangue amutonene Yehova kupitila kutwalilila ‘kubomba . . . pa mulandu wa bazumizi nakue.’​—Baeb. 6:10.

7. Kunti twakuzia ntono yeetu kuli Yehova mu nzila ki imo?

⁷ Kunti twakuzia ntono yeetu kuli Leeza kupitila kusambilila Mulandu wakue kwa mute. Musita luuli wasoma Bibilia, uye waikwinda kwinika kine kila seemu iwasoma yalangilila ki palwakue Yehova. Kisia, iipuzie eevi: ‘Eezi mpunda inasoma yalangilila siani nangue Yehova antonene? Mu eezi seemu inasoma, ni biki byankinkizia mutone Yehova?’

8. Kupepa kunti kwatukwasia siani kukuzia ntono yeetu kuli Leeza?

⁸ Nzila inge ili kuviinda kutukwasia kukuzia ntono yeetu kuli Yehova ni eezi: Kumubuila lingi bintu byonse bili ku mutima weetu mu mapepo etu. (Malum. 25:4, 5) Ni Yehova wakaba kwasuka mapepo etu. (1 Yoan. 3:21, 22) Khanh, nkazi ali waikala mu Asia, walanda eevi: “Ku ntendeko naali namutonene Yehova juu ya bintu binaasambiliile palwakue. Inzi musita unaamwene waasuka mapepo ane, naakilile kumutona. Keekio, kyaandengiizie ntone kuya nakita bintu bya kumusaansamusia.” b

9. Timoteo waalangiliile siani nangue waakosiizie ntono yakue palua balupua ni bankazi bakue?

⁹ Miaka iniini kisia Paulo kwaluka Mukristu, waasaakeene ni mulumendo waali waweeme, olia waali wakuutua Timoteo. Timoteo waali wamutonene Yehova, kabili waali wabatonene ni bantu. Paulo waabalandile eevi Bafilipi: “Nsili na muntu unge ali ni aali nga yakue [Timoteo], olia wakaba kwemena saana bintu bili byamyemia.” (Baf. 2:20, NWT) Paapa, Paulo taali walandila palua buviinde bwakue Timoteo bwa kupaanga buino tuntu ao bwa kulanda buino maasi, inzi Paulo waasonseziiziwe saana na ntono yakue Timoteo ku balupua ni bankazi. Kulanda kisinka, bilonghaano byaali byabombelamo Timoteo, byaali byapembela kwa nkulu kwendelua na weene.​—1 Bakor. 4:17.

10. Ba Anna ni mulume wakue baalangiliile siani ntono ku balupua ni bankazi babo?

¹⁰ Ni fwefue tuli twakeba nzila ya kubakwasiiziamo balupua ni bankazi betu Bakristu. (Baeb. 13:16) Mona mufuano wakue Anna, olia utwaakizimbula mu lyasi lyaakipita. Kisia mwela ukata kupita, weene pamo ni mulume wakue, baaile kwendela ku nsesi ya lupua lumo lwa Bakasininkizia ni kusaanga  mutenge wa nsesi yabo wainoonenue. Keekio kyaalengiizie maubo onse a bantu ba mu loolo lupua afiite. Anna walanda eevi: “Twaatweme maubo abo ni kuya kuafula ni kubuezia akomene, kabili apaangilue. Fwefue twaamwene ezio miilo itwaakitile kuya yali iniinisie. Inzi keekio kyaalengiizie twaluke ni bukibuza bwa peepi saana, bolia butwaliliile kuya bwalumine mpaka loonu.” Ba Anna pamo ni mulume wakue baakinkiziiziwe na ntono palua balupua ni bankazi, ni kufikiila kubakwasia mu nzila imonekele.​—1 Yoan. 3:17, 18.

11. (a) Lingi, bange bali baunvua siani musita utuli twalangilila nangue tubatonene? (b) Kukoonkana ni lileembo lya Tuswalo ni Mafunde 19:17, Yehova ali waunvua siani musita utuli twalangilila ntono?

¹¹ Musita utuli twabakitila bange mu nzila ya ntono kabili ya buwaame, lingi bali bamona vituli twaikwinda kupala nzila ya kutontonkania yakue Yehova pamo ni bikitua byakue. Kabili paange kunti batasia saana palua buwaame bwetu, inzi paange fwe beene bila kumana nangue batasia saana. Khanh, olia utwazimbulanga lwa ntaanzi, walanguluka saana baalia baamukwasiizie. Walanda eevi: “Ndi mukubatasia saana bankazi bonse batonua baalia baali bantwama mu miilo ya kusimikila. Baali baiza kuntwama ku nsesi yane, baali bankupa kuya kulia pamo naabo, ni kusininkizia nangue nafika buino ku nsesi yane. Loonu nginikile nangue pa kunti baviinde kukita evio, baali baikwinda saana. Kabili baali basekeleele kukita evio.” Kulanda kisinka, te bonse bali batasia palua beelia bituli twabakitila. Khanh walanda eevi palua baalia baamukwasiizie: “Ndi natona kubalipa juu ya bintu byonse biweeme bibaankitiile, inzi nsimanine koolia kubali baikala bonse. Anzia evio, Yehova weene amanine. Kabili ndi napepa eevi akabe kubalipa palwane.” Milandu yakue Khanh, ni ya kisinka. Yehova  ali wamona atasie tuntu tuniini saana tutuli twakita eevi kulangilila buwaame ku bange. Ali wamona tooto tuntu kuya twali bupe bwa mana, kabili twali nga lideeni leelia lyali wakaba kubueziiziamo.​—Soma Tuswalo ni Mafunde 19:17.

12. Balupua kunti balangilila siani ntono palua kilonghaano? (Mona ni foto.)

¹² Kine uli lupua, kunti wabalangilila siani bange ntono ni kwikwinda eevi kubakwasia? Lupua umo mulumendo ali wakuutua Jordan, waamwipuziizie mukote umo palua bintu byaali wapalile kukita eevi akwasie saana kilonghaano. Ozo mukote waamutasiizie palua buyantanzi bwaali wasyakitileko. Kisia, waamupeele masoke paleepale a kumukwasia eevi akite bingi mu kilonghaano. Kwa mufuano, waamulandile aye wafika mbele ku Nsesi ya Bukolo ni kupozia bange. Kabili aye waasukapo mu kulonghaana, aye wasimikila lingi pamo ni kikundi kyakue kya kusimikila, ni kukeba nzila ya kukwasia bange mu nzila imonekele. Musita Jordan, lwaabombiizie azo masoke, waamanine vya kukita tuntu tunge, kabili waakilile kubatona balupua ni bankazi. Jordan waafikiile kwinika nangue kine lupua waaluka mubombi ali wabombela, keekio te kilangiliile nangue watendeka kukwasia bange kubambila paapo, inzi watwalililasie kubakwasia.​—1 Tim. 3:8-10, 13.

13. Ntono yaamukinkiziizie siani lupua Christian kubuela kufikilizia mibeele iloombelue palua kwaluka mukote?

¹³ Ale kine lwa ntaanzi weewe wali wabomba wali mukote ao mubombi ali wabombela? Yehova alangulukile miilo iwaabombele mu musita waapitile pamo ni ntono yaakukinkiziizie eevi ubombe ezio miilo. (1 Bakor. 15:58) Kabili amwene ntono yutwaliliile kulangilila. Lupua Christian waatiokele mutima musita miilo yakue ya bukote luyaapuile. Inzi, walanda  eevi: “Naapinguile nangue nakaba kukita kyonse kindi kuviinda kukita mu miilo yakue Yehova, ibe ngie nali mukote ao abe.” Kisia musita, waabuelele kabili kwaluka mukote. Christian walanda eevi: “Naaunvuile ovio kaniini palua kubuela kubombela kabili mu miilo ya bukote. Inzi, naapinguile nangue kine Yehova watona mbombe kabili nali mukote, ndi kwitabila juu ya kumutona weene ni kutona balupua ni bankazi.”

14. Weewe wasambilila ki kupitila milandu yaalandile nkazi umo wa mu kyalo kya Georgia?

¹⁴ Kabili babombi bakue Yehova bali balangilila ntono ni ku bekazi naabo. (Mat. 22:37-39) Kwa mufuano, nkazi Elena wa mu kyalo kya Georgia, walanda eevi: “Ku ntendeko, kumutona Yehova i kintu kimosie kyaankinkiziizie kusimikila. Inzi, ntono yane kuli Baba wane wa ku muulu luyaakulile, keekio kyaalengiizie ngie naya nakila kubatona ni bantu. Naaikwindile kutontonkania palua maavia abaali bapata, ni maasi ali kuviinda kukumia mutima wabo. Vinaali nakila kutontonkania palwabo mu ezio nzila, i vinaali nakila kutona kubakwasia.”​—Bar. 10:13-15.

15-16. Nga vilangiliile ma foto, ni mpaalo ki ili yafuma mu kubalangilila bange ntono?

¹⁵ Musita utuli twabalangilila ntono balupua betu, te beenesie bali banoonkelamo. Musita buluele bwa korona (COVID-19) lubwaatendekele, ba lupua Paolo ni mukazi wakue baakwasiizie bankazi bengi bakotele eevi bamane  vya kubombia biombo bya kielektronike juu ya kusimikila. Nkazi umo, olia waali wamwene kyakolele kubombia kiombo kyakue kya kielektronike, waafikiile kumana. Waaviindile kubombia kiombo kyakue eevi kukupa bantu ba mu lupua lwakue ku Kibukisio. Pakati ka bantu baakupile, bantu makumi sita (60), baalongheene Kibukisio kupitila kwiunga ku viideo! Ozo nkazi pamo ni bantu ba mu lupua lwakue, baanoonkeelemo kupitila kwikwinda kwa ba Paolo ni mukazi wakue. Kisia, ozo nkazi waamuleembeele eevi Paolo: “Natasia pa kutusambilizia fwe bakotele. Nsikaba kulaba ata kaniini Yehova vyaakitwemena saana ni vimwaakikwinda eevi kutukwasia.”

¹⁶ Bintu bya kwimwena nga bebio, byaamusambiliziizie Paolo lisomo likata. Byaamulangulusiizie nangue ntono ni ya mana saana kuliko kumana bintu ao kuya twali ni buviinde bwa kavyalilo. Weene walanguluka eevi: “Naali nabomba nali kangalila wa muputule. Loonu, nginikile nangue atasie kine bakasimika baalabile kale maasi anaali nalanda, balangulukile mpaka loonu bintu binaakitile eevi kubakwasia mu nzila imonekele.”

17. Ni baani bange bakaba kunoonkelamo kine twalangilila ntono?

¹⁷ Musita utuli twabalangilila bange ntono, tuli twanoonkelamo fwe beene mu nzila itusiketekeele. Jonathan, olia ali waikala mu kyalo kya Nouvelle-Zélande, wasininkizia evio. Kyungulo kimo kya Nsiku ya Sita mu lyuza, Jonathan waamwene painia umo wali mukusimikila mu musebo. Jonathan waapinguile kubamba kusimikila pamo ni ozo painia kila Nsiku ya Sita kyungulo. Loolo, taali wamanine kine kunti wanoonkelamo siani kupitila keekio kintu kiweeme kyaakitile. Jonathan walanda eevi: “Mu buikazi bwane, nsyaali nasekelela miilo ya kusimikila. Inzi, musita unaamwene ozo painia vyaali wasambilizia, ni miilo yakue viyaali yaleeta mazabo, keekio kyaansonseziizie saana kutona ezio miilo. Kabili ozo lupua waalukile kibuza wane wa peepi, olia waankwasiizie kusekelela miilo ya kusimikila ni kukila kumupalama Yehova.”

18. Yehova atonene tukite ki?

¹⁸ Yehova atonene fwe bonse tukile kumutona, ni kutona bantu bange. Nga vitwafuma mu kusambilila, kunti twakosia ntono yeetu kuli Yehova kupitila kusoma Mulandu wakue ni kutontonkania palua beelia bituli mukusoma, ni kulanda nakue lingi kupitila lipepo. Kunti twakuzia ntono yeetu palua balupua ni bankazi betu kupitila kubakwasia mu nzila imonekele. Kine ntono yeetu yatana, twakaba kukila kumupalama Yehova, pamo ni balupua ni bankazi betu. Kabili, twakaba kusekelela bobo bukibuza loonse!