1. Daudi waalandile ki palua mibeele ya kwikeefia yakue Yehova?

EBA, KUNTI twalanda nangue Yehova ekefiizie? Een, kunti twalanda enka evio. Limo, Daudi waalandile eevi: “Wampeela kisolelo kyobe kya bupusuko, ni kwikeefia kobe kwangalula mukulu.” (2 Sam. 22:36; Malum. 18:35) Paange, Daudi waali watontonkania musita Samweli lwaaizile ku nsesi yakue baba wakue eevi amubiike mafuta olia wakaba kwaluka likolo wa Israeli. Pa baana munaane, Daudi i waali mukala. Inzi i waasaakwilue na Yehova eevi amupyane Likolo Sauli.​—1 Sam. 16:1, 10-13.

2. Tuli kusambilila ki mu leeli lyasi?

² Kakiine milandu yakue Daudi yapalana ni milandu yakue kaleemba umo wa Malumbo olia waalandile eevi palwakue Yehova: “Ali wafuinama ni kukenta muulu ni kyalo, ali wabuusia muntu wa pansi kufuma mu lufunko. Ali walendula mupabi . . . eevi ekale pamo ni bakindeeme.” (Malum. 113:6-8) Kya mambo, tuli kusambilila masomo a mana palua kwikeefia kupitila Yehova vyalangiliile ezio mibeele. Kupuako, tuli kumona beelia bituli kusambilila kuli likolo Sauli, kabika Danieli, ni Yesu palua mibeele ya kwikoosia.

3. Yehova ali watukitila siani, kabili keekio kyalangilila ki?

³ Yehova ali walangilila mibeele ya kwikeefia kupitila bintu byali wabakitila bantu basipuililikile bali bamupupa. Teezi kwitabilasie lupupo lwetu, inzi atumwene kuya twali babibuza bakue. (Malum. 25:14) Yehova waakwete mupaango wa kumufumia Muana wakue aaluke ngeleelo palua mazaambi etu eevi tuviinde kukita bukibuza pamo nakue. Kakiine waatulangiliile saana mibeele ya kweleela ni ya nkumbu!

4. Yehova waatupeele ki, kabili juu ya ki?

 ⁴ Mona kabili Yehova vyali walangilila kwikeefia. Paantu weene i Kabumba, Yehova nga waatubumbile bila twali na buviinde bwa kusaakula vyakaba buikazi bwetu. Inzi, taakitile evio. Waatubumbile kwa mufuano wakue ni kutupeela buntungua bwa kusaakula. Atonene fwefue bantu ba pansi tumubombele kufuma ku mutima paantu tumutonene kabili paantu twinikile mpaalo ituli twapata kine tunakiile kuli weene. (Mal Miz. 10:12; Is. 48:17, 18) Twamutasia saana Yehova paantu ekefiizie!

5. Yehova ali watusambilizia siani eevi tuye twaikefiizie? (Mona foto ili ku ntendeko ya kazeeti.)

⁵ Yehova ali watusambilizia kwikeefia kupitila vyali watukitila. Yehova i Muntu ali saana ni maano mu muulu ni pa kyalo. Anzia evio, ali waitabiziako ni bange. Kyakumuenako, Yehova waamupeeleko Muana wakue nkeende ya kukwasia miilo ya kubumba bintu byonse. (Tus Maf. 8:27-30; Bakol. 1:15, 16) Anzia kine Yehova ni wamaka onse, ali wapeelako bange bifulo. Kyakumuenako ni keeki: Waamusaakwile Yesu aaluke Likolo wa Bukolo bwakue. Kabili wakabapeela bifulo bilingiliile bantu mia imo ni makumi ana na bana elufu (144 000) baalia bakateeka pamo ni Yesu. (Luk. 12:32) Kakiine, Yehova waamubeeleziizie Yesu eevi aaluke Likolo kabili Koani Mukulu. (Baeb. 5:8, 9) Kabili ali wababeelezia baalia bakateeka pamo ni Yesu, inzi teezi kubapangila kila kantu atasie tolia tubapalile kupingula beene mu ezio miilo. Ali waikala waswapiile nangue bakaba kukita nga vyatonene.​—Nfy. 5:10.

6-7. Baba weetu wa ku muulu ali wabapeelako bange miilo. Fwefue twasambililako ki?

⁶ Baba weetu wa ku muulu takabiile kukwasiiwa na muntu yeyonse, inzi ali wabapeelako  bange bifulo. Kansi fwefue tupalile saana kukita evio! Kwa mufuano, eba, uli mutue wa nsesi ao mukote wa kilonghaano? Mupale Yehova kupitila kubapeelako bange miilo ni kutiina kukoonkezia kila kantu kabali mukukita mu miilo iwakibapeela. Kine wamupala Yehova, baalia bawapeela miilo bakaba kuikita buino. Kabili wakaba kubabeelezia ni kubakwasia baye bainikile nangue bali mukubombasie buino. (Is. 41:10) Baalia bali ni bifulo bilingiliile, kunti basambilila ki kabili kuli Yehova?

⁷ Bibilia ili yalanda nangue Yehova ali waunvua bili byalanda baana bakue, bamalaika. (1 Mak. 22:19-22) Mwe baviazi kunti mwapala siani mufuano wakue Yehova? Kine kyapala, beepuzie baana bobe balandepo vipalile kubombua miilo kampanda. Koonka beelia bibalanda kine bilisie buino.

8. Yehova waalangiliile siani kupembelela kukoonkana ni vyaamukitiile Abrahamu ni Sara?

⁸ Kabili Yehova ali walangilila nangue ekefiizie kupitila mibeele yakue ya kupembelela. Kyakumuenako, Yehova ali walangilila kupembelela musita baalia bali bamubombela lubali bakaana kwitabizia bupinguzi bwakue inzi balangiliile mukinzi. Leeza waapinguile kwinoona muzi wa Sodoma ni Gomora, inzi waatuiliziizie beelia byalandile Abrahamu palua bupinguzi bwakue. (Kut. 18:22-33) Kabili languluka Yehova vyaamukitiile Sara, muka Abrahamu. Musita Yehova lwaamulaile Sara nangue wakaba kwimita wali mukote, Sara waasekele; inzi Yehova taafiitilue. (Kut. 18:10-14) Inzi waamukitiile Sara bintu wamukindikile.

9. Baviazi ni bakote kunti basambilila ki ku mufuano wakue Yehova?

⁹ Mwe baviazi ni mwe bakote ba bilonghaano kunti mwamupala siani Yehova? Uli wakita siani musita baana bobe ao bantu kampanda ba mu kilonghaano kyobe lubali bakaana kwitabizia bupinguzi bobe? Eba, uli wabapotolola bakoonke byobe? Ao eba, uli waikwinda kwinika kyalengia balande evio? Kulanda kisinka, bantu ba mu lupua ni ba mu bilonghaano bali banoonkelamo saana kine baalia bemaniine kilonghaano ao lupua, bamupala Yehova. Kufikiila paanu, twamona vituli kupala mufuano wakue Yehova wa kwikeefia. Loonu, ale tumone vituli kulangilila mibeele ya kwikoosia kupitila kupala mifuano inge ili mu Bibilia.

10. Yehova ali wabombia siani byakumuenako bya bantu bange eevi atusambilizie?

¹⁰ Paantu Yehova i ‘Kasambilizia weetu Mukulu,’ abiikile byakumuenako bingi mu Mulandu wakue eevi atusambilizie. (Is. 30:20, 21) Mu Bibilia, tuli twasambilila maasi a bantu babanga baali ni mibeele ili yamusaansamusia Leeza, ibiikile mukati kwikoosia. Kabili tuli twapata lisomo musita utuli twatoosia bintu byaapatile baalia baandilue kulangilila ezio mibeele iweeme.​—Malum. 37:37; 1 Bakor. 10:11.

11. Twapatako lisomo ki ku mufuano ubiipile wakue Sauli?

¹¹ Mona kyaakitile kuli Likolo Sauli. Ku ntendeko, abanga wali muntu ekoosiizie. Musita lwabanga wakili mulumendo, abanga wamanine mipaka yakue, kabili ni kwitabilasie bifulo bingi abanga wakaana. (1 Sam. 9:21; 10:20-22) Inzi, musita kampanda waalukile ni kibuli ni kutendeka kukita bintu byasibanga wapalile kukita. Waalangiliile ezio mibeele ibiipile kisia kwaluka likolo. Musita umo, waandilue kusipikizia musita lwabanga wamupembeele kabika Samweli eze. Kuliko kwikoosia ni kuswapila nangue Yehova ali kubakwasia bantu, Sauli waaziziizie ngeleelo anzia  kine tabanga waali na nsaambu ya kukita evio. Kyafuminemo ni keeki, Yehova waamusuulile, kupuako taamwitabiile kabili aye wali likolo. (1 Sam. 13:8-14) Tuli kwaluka ni mulangue kine twapatapo lisomo ku ozo mufuano wa kutusoka ni kutiina kukita bintu bitusipalile kukita.

12. Danieli waalangiliile siani mibeele ya kwikoosia?

¹² Kupusana ni mufuano ubiipile wakue Sauli, mona mufuano uweeme wakue kabika Danieli. Mu buikazi bwakue, waatwaliliile kuya wali mubombi wakue Leeza ekefiizie kabili ekoosiizie. Lyonse abanga wakeba butunguluzi bwakue Yehova. Kyakumuenako ni keeki, musita Yehova lwaamutumine aye atandulule kiloto kyakue Nebukadneza, Danieli taalandile nangue watandulula kiloto ku maano akue muine. Inzi, waaikoosiizie ni kumupeela Yehova bulumba bonse ni mukinzi. (Dan. 2:26-28) Twasambililapo ki? Kine balupua ni bankazi bali batutasia juu ya maasi atuli twalanda, ao tuli twapata mazabo aweeme mu miilo ya kusimikila, tupalile kumupeela Yehova bulumba bonse. Tupalile kwikoosia twainikile nangue kine Yehova tatukwasiizie, tetuviinda kukita evio. (Baf. 4:13) Kine twakita evio, twapala kabili mufuano uweeme wakue Yesu. Mu nzila ki?

13. Twasambilila ki palua kwikoosia kukoonkana ni milandu yakue Yesu ili mu Yoane 5:19, 30?

¹³ Anzia kine abanga waali Muana apuililikile wakue Leeza, Yesu waali wamuswapiile Yehova. (Soma Yoane 5:19, 30.) Taaeziizie kupoka kifulo kyakue Baba wakue wa ku muulu. Lileembo lya Bafilipi 2:6 lyatubuila nangue Yesu “taatontonkaniizie kupoka kifulo, i kulanda nangue, aye walingheene ni Leeza.” Paantu abanga wali Muana ali wanakila, Yesu waainikile mipaka yakue ni kukindika kifulo kyakue Baba wakue.

14. Musita ubamuloombele Yesu akite kintu kyasibanga wali na nsaambu ya kukita, waakitile siani?

¹⁴ Mona vyaakitile Yesu musita Yakobo ni Yoane lubaaizile kumumona Yesu bali pamo ni mama wabo ni kumuloomba kifulo kyasibanga wali na nsaambu ya kubapeela. Bila kutuisika, Yesu waalandile nangue Baba wakuesie bunke i ali ni nsaambu ya kupingula kine naani wakeekala ku kuboko kwa kulio ao kwa kuso mu Bukolo bwakue. (Mat. 20:20-23) Yesu waalangiliile nangue waakindikile mipaka yakue. Abanga waikoosiizie. Taakitile  kintu ata kimo kibasyamulandile kuli Yehova. (Yoan. 12:49) Kunti twapala siani mufuano uweeme wakue Yesu?

15-16. Kunti twabombia siani musoko wa Bibilia uli mu 1 Bakorinto 4:6?

¹⁵ Kunti twapala mufuano wakue Yesu wa kwikoosia kine twabombia musoko uli mu 1 Bakorinto 4:6. Ulandile eevi: “Koonke buino buino bileembelue.” Kansi kine lupua ao nkazi watuloomba musoko, te tupalile kulandasie kukoonkana ni maano etu ao kulandasie kaalia kaiza mu maano. Inzi tupalile kubombia masoke ali mu Bibilia ni mu mpapulo yeetu. Kine twakita evio, tuli kulangilila nangue twinikile mipaka yeetu. Kabili tuli kulangilila nangue masoke akue Yehova i aweeme saana kupita masoke etu.​—Nfy. 15:3, 4.

¹⁶ Kukila pa kumukindika Yehova, tuli ni nsaambu inge ingi ya kulangilila mibeele ya kwikoosia. Kuya twaikefiizie ni kwikoosia kunti kwatuleetela siani nsaansa ni kutukwasia kwikala buino pamo ni bange? Ale tumone.

17. Juu ya ki bantu bekefiizie ni kwikoosia bali baikala ni nsaansa?

¹⁷ Kine twikefiizie ni kwikoosia, kunti kyakitika tuye twali ni nsaansa. Juu ya ki twalanda evio? Kine twinikile nangue tetuviinda kukita bintu kampanda, tuli kuya twatasia ni kusaansamuka kine bange batukwasia. Kyakumuenako, tontonkania musita Yesu lwaakosiizie bantu 10 babanga baluele tembue ao bukoma. Umosie pakati kabo i waabuelele kumutasia Yesu paantu waamukosiizie buluele bubiipile saana. Te kwaali muntu ata umo wasiile kuviinda kwikosia. Ozo muntu abanga waikefiizie, waatasiizie paantu bamukosiizie kabili wamupeele Leeza bulumba.​—Luk. 17:11-19.

18. Kwikeefia ni kwikoosia kuli kwatukwasia siani kwikala ni bange? (Baroma 12:10)

 ¹⁸ Bantu bekefiizie ni kwikoosia bali baikala buino ni bange, kabili imwenekele nangue bali bapata saana babibuza ba peepi. Juu ya ki? Paantu bali basaangua bamanine nangue bantu bange, bali ni mibeele iweeme kabili bali baviinda kubaswapila babo bantu. Bantu bekefiizie bali baunvua makola kine bange babomba buino kila miilo ibapeelue, kabili bali baikala baleengele kubatasia ni kubakindika.​—Soma Baroma 12:10.

19. Ni nsaambu ki paleepale ili kulengia tutiine kibuli?

¹⁹ Inzi, bantu ba kibuli tebeezi kutona kutasia bange, bali batonasie batasiiwe beene. Bali batona saana kwipalania ni bange kabili bali batona bamoneke ku bange nangue beene ni ba mana saana kuliko bange. Kuliko kubabeelezia bange ni kubapeelako bifulo, muntu ali ni kibuli ali watontonkania nangue apalile kubomba miilo kampanda ye muine, paantu mu maano akue, amwene nangue bange tebaviinda kuibomba buino. Lingi muntu wa kibuli ali watona bamumone nangue ni wa mana saana kuliko bange kabili waikala wali ni bunkua. (Bag. 5:26) Lingi, bukibuza pamo ni bantu ba evio tebuizi kutwalilila. Kine twainika nangue tuli ni kibuli, tupalile kupepa kufuma ku mutima eevi Yehova atukwasie ‘kupilibula malanga etu’ eevi ezio mibeele ibiipile te kunti iziike misila mu mitima yeetu.​—Bar. 12:2.

20. Juu ya ki tupalile kuya twaikefiizie ni kwikoosia?

²⁰ Kakiine tuli mukutasia kyakumuenako kyakue Yehova! Twamona vyali waikeefia kukoonkana ni vyali wabakitila babombi bakue kabili tutonene kumupala. Tutonene kupala bantu baaendele pamo ni Yehova baikefiizie. Kansi, lyonse tumupeele Yehova mukinzi ni bulumba bumupalile. (Nfy. 4:11) Kine twakita evio, twakaba kwenda pamo ni Baba weetu wa ku muulu, olia atonene bantu bekefiizie kabili bekoosiizie.