1. Tuli ni lisyuko ki?

TULI ni lisyuko kakiine lya kuya twali seemu ya kilonghaano kyakue Yehova! Tuli mu paradiso ya kimupasi, ilimo mutende ukata, ni bantu bali ni nsaansa. Uli wabomba miilo ki mu kilonghaano?

2. Paulo waabombiizie kipalo ao mufuano ki mu mikanda yakue paleepale ili mu Bibilia?

² Kunti twaviinda kusambilila bingi palua nkeende ituli naayo mu kilonghaano kupitila kipalo kyaabombiizie Paulo mu mikanda yakue paleepale ili mu Bibilia. Mu ezio mikanda, Paulo waapalaniizie kilonghaano na mubili wa muntu. Kabili waapalaniizie kila muntu mu kilonghaano ku biizo bya mubili.​—Bar. 12:4-8; 1 Bakor. 12:12-27; Baef. 4:16.

3. Ni masomo ki atatu atuli kusambilila mu leeli lyasi?

³ Mu leeli lyasi tuli kulondoluela masomo atatu atuli kuviinda kupata kupitila kipalo kyaaleetele Paulo. Kya mambo, tuli kumona nangue kila umo weetu ali ni nkeende * mu kilonghaano kyakue Yehova. Kya bubili, tuli kulondoluela keelia kitupalile kukita kine twamona kyakolele kwinika nkeende ao miilo yeetu mu kilonghaano. Ni kya butatu, tuli kumona juu ya ki kila umo weetu apalile kubomba na mute mu kufikilizia miilo itupeelue na Yehova mu kilonghaano.

4. Lileembo lya Baroma 12:4, 5 lyatusambilizia ki?

⁴ Lisomo lya mambo lituli kuviinda kusambilila kupitila kipalo kyaaleetele Paulo ni leeli: Kila umo weetu ali ni nkeende ya mana mu lupua lwakue Yehova. Paulo watendeka eevi mu kipalo kyakue: “Mubili wa muntu uli ni biizo bingi, inzi kubalua kiizo kili ni mwilo wakue. Ni fwefue benka anzia kine tuli bengi, tuli sie mubili umo kupitila mukwilunda ni Kristu. Kabili kubalua muntu ni kiizo ku mwinakue.” (Bar. 12:4, 5) Paulo waali wakeba kulanda ki? Nangue kila muntu mu kilonghaano ali ni miilo iibeleele, inzi fwe bonse tuli ba mana.

5. Kilonghaano kipeelue “bupe” ki na Yehova?

⁵ Musita luuli watontonkania palua baalia bali ni nkeende mu kilonghaano, paange mu maano obe uli wamonasie baalia bali batungulula. (1 Bat. 5:12; Baeb. 13:17) Kakiine kupitila Kristu, Yehova apeele kilonghaano kyakue “bupe mu bantu.” (Baef. 4:8) Bobo “bupe mu bantu” bubiikile mukati balupua ba mu Kabungue Kali Katungulula, bakwasi ba Kabungue Kali Katungulula, balupua ba Kabungue ka ku Musambo, bakangalila ba muputule, bakasambilizia ba masomo a Bibilia, bakote ba kilonghaano, ni babombi bali babombela. Babo balupua bonse basaakwilue na mupasi utakatiifu eevi basuunge mikooko ikindeeme yakue Yehova ni kukoselezia kilonghaano.​—1 Pet. 5:2, 3.

6. Nga vilandile 1 Batesalonika 2:6-8, balupua bali basaakulua na mupasi utakatiifu bali baikwinda kukita ki?

⁶ Balupua, bali basaakulua na mupasi utakatiifu eevi babombe miilo ipusene-puseene. Biizo paleepale bya mubili, nga evelia minue ni maulu bili byabomba eevi mubili onse unoonkelemo. Evio vyenka, balupua bali basaakulua na mupasi utakatiifu, bali babomba saana eevi kilonghaano kinoonkelemo. Tebeezi kwikebela bulumba bwabo beene. Inzi, bali baikwinda kukuula ni kukoselezia balupua ni bankazi. (Soma 1 Batesalonika 2:6-8.) Tuli twamutasia Yehova palua babo balalume ba kimupasi bapalile!

7. Ni mpaalo ki ili yapata babombi ba nsita yonse?

⁷ Bamo mu kilonghaano kunti basaakulua kubomba bali bamisionere, bapainia bebeleele, ao bapainia ba loonse. Kakiine, balupua ni bankazi mwaya kyalo bapinguile kukita miilo ya nsita yonse ya kusimikila ni kukita basambi. Paantu baapinguile kukita evio, tebasyakwasiizie bantu bengi kwaluka basambi bakue Yesu Kristu. Anzia kine babo bakabilambila ba nsita yonse bali ni bintu biniini bya kimubili, Yehova abapeele mpaalo ingi mu buikazi bwabo. (Mark. 10:29, 30) Tubatonene saana baba balupua ni bankazi, kabili tuli twatasia kuya twali naabo mu kilonghaano!

8. Juu ya ki kila kasimika wa mpunda iweeme ni wa mana kuli Yehova?

⁸ Eba, balupua basaakwilue ni baalia bali babomba miilo ya nsita yonse i balisie ni nkeende mu kilonghaano? Te evio ata kaniini! Kila kasimika wa mpunda iweeme, ni wa mana pa menso akue Leeza ni ku kilonghaano. (Bar. 10:15; 1 Bakor. 3:6-9) Kulanda kisinka, imo pakati ka miilo ya mana saana mu kilonghaano ni kukita basambi bakue Mulopue weetu Yesu Kristu. (Mat. 28:19, 20; 1 Tim. 2:4) Bonse bali babomba pamo ni kilonghaano, bakasimika babatiziiziwe ni basibatiziiziwe, bali baikwinda kubiika pa ntaanzi ezio miilo.​—Mat. 24:14.

9. Juu ya ki tubamwene bankazi Bakristu kuya bali ba mana?

⁹ Yehova abapeele bankazi Bakristu nkeende ya mana mu kilonghaano. Babo bakazi, ba mama, bamukanfwilua, ni bankazi basinatoolue bali bamubombela mu kisinka, Yehova abamwene kuya bali ba mana. Maleembo alandiile lingi palua banakazi ba kupapia  babanga bamusaansamusia Leeza. Batasiiziwe kuya bali byakumuenako biweeme bya mulangue, kiketekelo, mute, kusipa, kupeelana ni miilo iweeme. (Luk. 8:2, 3; Miil Bat. 16:14, 15; Bar. 16:3, 6; Baf. 4:3; Baeb. 11:11, 31, 35) Tuli twamutasia Yehova kakiine palua bankazi Bakristu bali mu bilonghaano byetu bali ni mibeele iweeme nga ezio yenka!

10. Juu ya ki tubamwene balupua ni bankazi bakotele kuya baali ba mana?

¹⁰ Kabili tuli ni mpaalo ya kuya twali ni balupua ni bankazi bakotele. Mu bilonghaano binge muli balupua ni bankazi bakotele bapua buikazi bwabo bonse bamubombela Yehova. Bange balupua ni bankazi bakotele tebanapue nsiku ingi ntangia kumana kisinka. Bengi pakati kaabo bali mukusaakaana ni maavia a mu bukote. Azo maavia kunti alengia te kunti baviinde kukita bintu bingi mu kilonghaano ni mu miilo ya kusimikila. Anzia evio, babo balupua ni bankazi bali mukwikwinda mu miilo ya kusimikila, kabili bali mukubombia maka abo onse eevi kukoselezia ni kubeelezia bange kukoonkana ni buviinde bwabo! Kabili tuli mukunoonkelamo mu bintu bibaasambiliile. Kakiine ni ba mana saana kuli Yehova ni kuli fwefue benka.​—Tus Maf. 16:31.

11-12. Uli wakinkiziiwa siani na bamisepuka mu kilonghaano kyenu?

¹¹ Kabili, tontonkania palua bamisepuka betu. Bali mukusaanga maavia musita ubali baya bakula mu keenu kyalo kiteekelue na Sataana Kibanda pamo ni malanga akue abiipile. (1 Yoan. 5:19) Anzia evio, fwe bonse tuli twakinkiziiwa musita utuli twamona bamisepuka baasukapo ku kulonghaana, baya mukusimikila, ni kusakila bintu bibazumiine bila kutiina. Kakiine, mwe bamisepuka muli ni nkeende ya mana mu kilonghaano kyakue Yehova!​—Malum. 8:2.

¹² Inzi, balupua ni bankazi bamo, bali bamona kyakolele kwitabila nangue ni beene ni ba mana mu kilonghaano. Ni kiki kili kuviinda kutukwasia kwiunvua nangue kila umo palwakue ali ni nkeende mu kilonghaano? Ale tumone.

13-14. Juu ya ki bange kunti baimona nangue te ba mana mu kilonghaano?

¹³ Lisomo lya bubili lili mu kipalo kyaaleetele Paulo, lyalengia tutontonkanie palua buavia buli na bantu bengi leenu. Bengi bali bamona kyakolele kwitabila nangue ni ba mana mu kilonghaano. Paulo waleemba eevi: “Kine kuulu kwalanda nangue, ‘Neene nsili kiizo kya mubili paantu nsili kuboko.’ Ati, kuulu te kiizo kya mubili? Kabili kine kutui kwalanda nangue ‘Neene nsili kiizo kya mubili paantu nsili linso.’ Ati, kutui te kiizo kya mubili?” (1 Bakor. 12:15, 16) Paulo waali wakeba kutusambilizia ki?

¹⁴ Kine weewe waipalania ku bange mu kilonghaano kunti watendeka kutontonkania nangue teuli wa mana. Mu kilonghaano, bange kunti baya bali ni bufundi mu kusambilizia, mu kupaanga buino tuntu, ao mukukita miilo ya kukoselezia bange. Paange wimwene nangue teuviinda kukita nga beene. Keekio kilangiliile nangue wikefiizie ni kwikoosia. (Baf. 2:3) Inzi uye wakengeele. Kine watwalilila kwipalania ku baalia bali ni bufundi bwa kupapia, kunti waitiona mutima we muine. Kabili nga vyaaleembele Paulo, kunti watontonkania nangue mu kilonghaano temuli nkeende yobe ata kaniini. Ni kiki kili kukukwasia kuviinda kuluisia ezio aali?

15. Nga vilandile 1 Bakorinto 12:4-11, tupalile kumana ki palua bupe bonse butuli paange naabo?

¹⁵ Tontonkania kisinka keeki: Yehova waabapeele Bakristu bamo ba mu miaka mia ya ku ntendeko bupe bwa kupapia bwa mupasi utakatiifu. Inzi, bupe bubaapatile te bwali bwabomba mu namuna imo ku bonse. (Soma 1 Bakorinto 12:4-11.) Yehova waabapeele bupe ni buviinde bwapuseene-puseene, inzi kila Mukristu waali wa mana. Leenu, te tupeelue bupe bwa kupapia bwa mupasi utakatiifu. Inzi, kilisie nga vikibanga kyali kale. Tetwizi kuya twali ni bufundi bwa namuna imo, inzi fwe bonse tuli ba mana kuli Yehova.

16. Ni musoko ki waafumiizie mutumua Paulo utupalile kukoonka?

 ¹⁶ Kuliko kwipalania na Bakristu bange, tupalile kubombia musoko wakue mutumua Paulo uli mu Bibilia ulandile eevi: “Kubalua muntu amone vili lwendo lwakue [bikitua byakue muine, NWT]. Kine luli buino, kuti waitoneena pa beelia byali wakita, pasili kupalania na beelia bili byakita bange.”​—Bag. 6:4.

17. Kunti twanoonkelamo siani kine twakoonka musoko wakue Paulo?

¹⁷ Kine twakoonka musoko wakue Paulo utungulwilue na mupasi ni kutoosia bikitua byetu, kunti twainika nangue tuli ni bupe ni bufundi bwibeleele. Kwa mufuano, mukote kunti wabulua bufundi bwa kusambilizia mu kilonghaano, inzi kunti waya waali ni bufundi mu miilo ya kukita basambi. Ao paange kunti wabulua bufundi mu kupaanga buino tuntu nga bakote nakue. Inzi, kunti waya wamanikile buino kuya wali musungi ali ni ntono, kabili paange, bakasimika bali bamupalama balengeelue musita ubakabiile kupata masoke aweeme aswapiile Bibilia. Ao kunti waya wamanikile buino juu ya mibeele ya kupokelela baeni. (Baeb. 13:2, 16) Kine twainika buino buviinde ni bupe butuli naabo, tuli kuya twali ni nsaambu ya kusaansamukila beelia bituli kuviinda kukita eevi kukwasia kilonghaano. Kabili paange tetuviinda kubonvuila bunkua ao buivu balupua betu bali ni buviinde bupuseene ni bwetu.

18. Kunti twaviinda siani kuongezia bufundi bwetu?

¹⁸ Anzia nkeende ituli naayo mu kilonghaano, fwe bonse tupalile kuya twali ni nkulu ya kwikwinda kuwaamia miilo ituli naayo ni kuongezia bufundi bwetu. Eevi kutukwasia kuwaamia bufundi bwetu, Yehova ali watubeelezia buino mu kuteania kwakue. Kyakumuenako ni keeki, mu kulonghaana kwetu kwa mukati mulungu, tuli twabeeleziiwa vya kukila kuwaamia bufundi bwetu mu miilo ya kusimikila. Uli waikwinda kubombia azo malaizio auli wapeelua?

19. Kunti wafikiila siani kufikilizia mupaango obe wa kusoma Masomo a Bakabilambila ba Bukolo?

¹⁹ Kubeeleziiwa kunge kwa kupapia kutuli twapeelua ni Masomo a Bakabilambila ba Bukolo. Aza masomo ali asomua na balupua ni bankazi bali mu miilo ya kusimikila ya nsita yonse, kabili bali pakati ka miaka 23 ni 65. Paange kunti waimona nangue weewe teuli na buviinde bwa kufikiila kusoma azo masomo. Inzi, kuliko kutendeka kutantika bintu byumwene nangue bili kukwanzia kusoma azo masomo, tantika bintu bilengele utone kusoma azo masomo. Kisia, leemba bintu byupalile kubombelapo bili kukukwasia kufikilizia bintu biloombelue. Kine waikwinda, ni Yehova wakukwasia, kunti waviinda kukita bintu biwakiba wamwene nangue teuviinda kukita.

20. Lileembo lya Baroma 12:6-8 kunti lyatusambilizia ki?

²⁰ Lisomo lya butatu lituli kuviinda kusambilila kupitila kipalo kyaaleetele Paulo, lili mu Baroma 12:6-8. (Soma.) Mu leeli lileembo, Paulo walangilila kabili nangue baalia bali mu kilonghaano bali ni bupe bwibeleele. Inzi loonu, wakonkomena nangue tupalile kubombia kubalua bupe butuli naabo eevi kukuula ni kulumia kilonghaano.

21-22. Kunti twasambilila lisomo ki kupitila mufuano wakue Robert ni Felice?

²¹ Tontonkania palua mufuano wakue lupua utuli kukuuta Robert. Kisia kubombela mu kyalo kinge, baamwanine abuele ni kutendeka kubomba ku Beteli mu kyalo kyakue. Baamusininkiziizie nangue kupilibuka kwa miilo yakue te kulanda nangue wakyandua. Inzi waalandile eevi: “Naakitile miezi ingi bila naali na nsaansa paantu naali natontonkania nangue  nakyandua kubomba miilo. Musita umo naatendekele kutontonkania kulekela kubombela ku Beteli.” Waaviindile siani kabili kupata nsaansa yakue? Mukote mwinakue wa kilonghaano, waamulangulusiizie nangue Yehova ali watubeelezia mu miilo itwakiba twali naayo, eevi tuviinde kukita buino saana mu miilo ituli naayo leenu. Robert waainikile nangue waali wapalile kulekela kupooza maano ku bintu byakipita, ni kutendeka kupooza maano ku beelia byali kuviinda kukita loonu.

²² Lupua Felice Episcopo waasaakeene ni buavia nga bobo. Weene pamo ni mukazi wakue baapatile diplome ya masomo a Gileadi mu muaka wa 1956 ni kutendeka kubombela mu muputule mu kyalo kya Bolivia. Mu 1964 baavyele muana. Felice waalandile eevi: “Twaamwene kyakolele kulekela miilo yeetu itwali twatonene. Kulanda kisinka, naakitile muaka umo natiokelesie mutima. Inzi Yehova waankwasiizie. Naaluluile aali yane ni kupooza maano ku miilo yaleenu ya kuya naali muviazi.” Eba, ni weewe aali yobe ili nga yakue Robert ao yakue Felice? Uli watioka mutima paantu teukili na kifulo kiwakiba wali nakio musita wakipita? Kine i vikili, wakaba kusaanga nsaansa kine waalulula aali yobe ni kutendeka kupooza maano ku beelia byuli kuviinda kukita loonu, kubombela Yehova ni balupua. Twalilila kuya waali ni bingi bya kukita ni kubombia bupe ni buviinde bobe eevi kukwasia bange. Kine wakita evio wakaba kupata nsaansa paantu wakwasia kukuula kilonghaano.

23. Tupalile kukwata musita wa kukita ki, kabili twakaba kulondoluela ki mu lyasi likoonkelepo?

²³ Kila umo pakati keetu ni wa mana kuli Yehova. Atonene twiunvue kuya twali seemu ya lupua lwakue. Kansi, tukwate musita wa kutontonkania palua beelia bituli kuviinda kukita eevi kukuula balupua ni bankazi mu kilonghaano, ni kisia twikwinde kubifikilizia. Kine twakita evio, kakiine kunti twaimona kuya twali ni nkeende mu kilonghaano! Ale bange tuli twabamona siani mu kilonghaano? Kunti twalangilila siani nangue tubamwene kuya baali ba mana? Twakaba kulondoluela keekio mu lyasi likoonkelepo.