1-2. Nga vilandile Malumbo 34:8, kunti twakita siani eevi tumone buwaame bwakue Yehova?

TULANDE, muntu wakupeela kyakulia kyusinaliepo ata limo. Kupitilasie kukikenta, kunti wamana vikili, kunti wauvua bunu bwakue, bintu bibiikiluemo, ao kunti wamana vikili, kupitila kubeepuzia bange vili keekio kyakulia. Anzia evio, pa kunti umane buino vili keekio kyakulia, upalile kuntompako we muine.

² Kunti wasambilila nangue Yehova aweeme kupitila kusoma Bibilia ni mpapulo yeetu pamo ni kubatuilizia bange musita lubali balondolola palua mpaalo ibaapatile kufuma kuli Yehova. Inzi, kunti twamana buino vili buwaame bwakue Yehova, kine ‘twatompa’ fwe beene vili buwaame bwakue. (Soma Malumbo 34:8.) Kansi, tumone nzila imo ili kutukwasia kukita evio. Tulande, ukebele kwiingizia mu miilo imo ya nsita yonse. Inzi, eevi ufikilizie ozo mupaango iloombele kuleengia buikazi bobe. Paange lingi weewe uli wasoma palua bulayo bwakue Yesu bulandile nangue kine watangizia miilo ya Bukolo, Yehova wakaba kukupeela kakiine bintu byukabiile. Inzi, paange teunaimwenepo ata limo ezio milandu yafikiliziiwa. (Mat. 6:33) Anzia evio, paantu uketekeele milandu yakue Yesu, walekela kwinoona nfalanga, walekela miilo ya kimubili ya kubombela, kisia wapooza saana maano obe ku miilo ya kusimikila. Kukita evio kwakukwasia wimwene we muine Yehova vyali wafikilizia bintu byukabiile. ‘Watompa’ we muine vili buwaame bwakue Yehova.

3. Kukoonkana ni lileembo lya Malumbo 16:1, 2, ni baani bali bapata buwaame bwakue Yehova?

³ Yehova ‘aweeme ku bonse’ pamo ni ku baalia basimumanine weene. (Malum. 145:9; Mat. 5:45) Inzi, asa baalia bali bamubombela kwa mweo wabo onse bali bapata mpaalo ingi kufuma kuli weene. (Soma Malumbo 16:1, 2.) Kansi tulondoluele bintu paleepale biweeme bili byatukitila Yehova.

4. Yehova ali wabalangilila siani buwaame bwakue baalia bali batendeka kumupalama weene?

 ⁴ Kila musita utuli twabombia bintu bituli twasambiliziiwa na Yehova tuli twamona vituli twakwasiiwa mu buikazi bwetu. Lutwasambiliile palwakue, ni kufikiila kumutona, keekio kyaatukwasiizie tulekele kutontonkania ni kukita bintu byasiizi kutona. (Bakol. 1:21) Kabili musita utwaaipeele kuli Yehova ni kufikiila kubatiziiwa, twaafikiile kwimwena buwaame bwakue, musita lwaatupeele kampingu kaweeme ni kutwingizia mu bukibuza bwa peepi pamo nakue.​—1 Pet. 3:21.

5. Tuli twaimwena siani buwaame bwakue Yehova mu miilo yeetu ya kusimikila?

⁵ Tuli twakila kwimwena buwaame bwakue Yehova musita utuli twaiingizia mu miilo ya kusimikila. Eba, uli wasaangua wali muntu wa busoni? Bantu bengi bakue Yehova bali basaangua evio. Paange, ntaanzi ya kwaluka mubombi wakue Yehova, te waali watontonkaniapo ata limo nangue kunti wakokoosia ku muliango wa muntu uusimanine, ni kulondolola nakue palua mpunda ili mu Bibilia. Inzi, loonu wizibiile kukita evio. Kukila pakaako, kupitila kukwasiiwa na Yehova, waakisambilila kusekelela miilo ya kusimikila! Waakifikiila kwimwena Yehova vyakikukwasia mu nzila ingi. Waakikukwasia kusiala wateekameene musita luwakiba wapingua. Kabili wakiba wakukwasia kulanguluka lileembo lyupalile kakiine lya kulondolola pamo ni muntu atonene kukutuilizia. Kabili wakiba wakupeela maka a kutwalilila kusimikila atasie musita luwakiba wasaakaana ni bantu basitonene kukutuilizia.​—Yer. 20:7-9.

6. Kubeeleziiwa kutuli twabeeleziiwa na Yehova, kulangiliile siani buwame bwakue?

⁶ Kabili, Yehova ali watulangilila buwaame kupitila kutubeelezia mu miilo ya kusimikila. (Yoan. 6:45) Ku kulonghaana kwa mukati ka mulungu, tuli twatuilizia mifuano iweeme ya milandu itupalile kulanda musita utuli twasimikila bange, kabili tuli twakinkiziiwa kubombia nzila ezio mu miilo ya kusimikila. Ku ntendeko, kunti twamona kyakoleleko kubombia nzila ya leenu, inzi kine twaibombia, kunti twafikiila kumona nangue ezio nzila iweeme saana ku bantu ba mu kazonga keetu. Kabili, ku kulonghaana kwa kila mulungu ni ku kulonghaana kukata, tuli twakinkiziiwa kubombia nzila paleepale ya kusimikila itusinaeziepo. Kabili, keekio kunti kyaloomba tukuuke mu kazonga keetu katutonene. Inzi, kine twakita evio Yehova ali kutupaala. Loonu, tuli kumona bintu paleepale bili byatupeela Yehova musita utuli twamuswapila ni kwezia nzila ya leenu eevi kumupeela kintu kiweeme saana anzia tuye twali mu aali ki. Kisia, tuli kulondoluela vya kufikilizia mipaango yeetu.

7. Ni mpaalo ki ituli twapata kine twaezia kutania miilo yeetu ya kusimikila?

⁷ Tuli twakila kumupalama. Mona mufuano wa mukote umo ali wakuutua Samuel, * ali wabombela mu kyalo kya Kolombia pamo ni mukazi wakue. Baaba ba mulume ni mukazi baasekeleele kubombela mu kilonghaano kya mu kazonga kabo. Inzi, baatonene kutania miilo yabo ya kusimikila kupitila kubombela mu kilonghaano kiloombele saana kukwasiiwa. Eevi baviinde kufikilizia mupaango wabo, baalekeele kukita bintu paleepale bibaali batona kukita. Samuel walanda eevi: “Twaabombiizie milandu ili mu Mateo 6:33 ni kulekela kusita bintu bitusyali twakabiile. Inzi, twaamwene kyakolele saana kukuuka mu nsesi yeetu. Yaali yakuulilue buino, kabili te twali twalipila ezio nsesi.” Musita ubaakuukiile mu kilonghaano kya leenu, baafikiile kumona nangue kooko baali babombiasie nfalanga iniini mu buikazi bwabo kuliko lwa ntaanzi. Samuel watwalilila kulanda eevi: “Twaakimwena Yehova vyakitungulula ntanfu yeetu ni kwasuka mapepo  etu. Twiunvuile nangue Yehova atwitabiile kabili atutonene kupusana ni vitwali twaiunvua lwa ntaanzi.” Wamona siani kine ni weewe watontonkania nzila imo ya kutania miilo yobe ya kusimikila? Kine wakita evio, uye waali ni kisinka nangue wakaba kukila kumupalama Yehova kabili ni weene wakaba kukwemena.​—Malum. 18:25.

8. Weewe, wasambilila ki kupitila milandu yakue Ivan ni Viktoria?

⁸ Tuli twapata nsaansa mu miilo yeetu. Mona vyalanda ba Ivan ni Viktoria, ba mulume ni mukazi bapainia bali baikala mu kyalo kya Kyrgyzstan. Baaleengiizie buikazi bwabo eevi beepeele mu miilo yonse ibali kupeelua, kubiika mukati ni miilo ya kukuula. Ivan walanda eevi: “Twaali twabomba kwa mute saana miilo yonse itwaali twapeelua. Anzia kine mu kuzika kwa koba twali twatopa, tubanga twaunvua nsaansa paantu twaali twamanine nangue tubanga twabombia maka etu mu miilo yakue Yehova. Kabili, twaali twaaluka ni nsaansa paantu twaali twapata babibuza bengi ba leenu ni kwimwena bintu bingi bya kusaansamusia.”​—Mark. 10:29, 30.

9. Nkazi umo abanga wali mu aali yaviizie, waakitile siani eevi kutania miilo yakue ya kusimikila, kabili keekio kyaamuleteele mazabo ki?

⁹ Tuli twapata nsaansa mu miilo yakue Yehova atasie musita utuli mu maavia. Kwa mufuano, Mirreh, nkazi mukanfuila akotele, ali waikala mu kyalo kya ku Afrika ya kuzika koba, abanga wali doktere. Musita lwaaimikilue kubomba miilo yakue juu ya bukote, waatendekele kubomba miilo ya bupainia. Mirreh abanga wali ni buluele bwaaviizie saana bubanga bwamwanzia kwenda, kabili waali wasyakitasie nsa imo mu miilo ya kusimikila nsesi kwa nsesi. Inzi, kuya waali ni buviinde bwa kusimikila nsita ingi pa fuasi ya bantu bengi kupitila prezantware. Akwete bantu bengi bakubuelela ni masambililo a Bibilia, ni bamo pakati kabo ali wabasimikila kupitila telefone. Juu ya ki Mirreh waatonene kukita bingi mu miilo yakue Yehova? Walanda eevi: “Mutima wane umutonene saana Yehova ni Kristu Yesu. Kabili, lingi ndi napepa eevi Yehova ankwasie kumubombela saana kukoonkana ni buviinde bwane.”​—Mat. 22:36, 37.

10. Nga vilandile Yoane 6:45, Yehova ali wabapeela ki baalia bali baipeela?

¹⁰ Tuli twabeeleziiwa kabili na Yehova mu nzila inge. Kenny, painia umo ali wabombela mu kilila kya Maurice, waamwene nangue keekio ni kisinka. Lwaasambiliile kisinka, waafikiile kulekela iniversite ni kubatiziiwa, kisia waatendekele miilo ya nsita yonse. Walanda eevi: “Ndi naikwinda kukoonka milandu yakue kabika Isaya, ilandile eevi: ‘Neene onu! Ale ntume!’” (Is. 6:8) Kenny waakibomba mu miilo ingi ya kukuula, ni mu miilo ya kupilibula mpapulo iswapiile Bibilia mu lulimi lwakue lwa kavyalilo. Kenny walanda eevi: “Naabeeleziiziwe eevi ngaluke ni bufundi bupalile mu miilo inaali napeelua.” Inzi, kukila pa kusambiliziiwa bufundi, waasambiliileko ni bintu binge bingi. Watwalilila kulanda eevi: “Naasambiliile kumana mipaka yane, ni mibeele inaali napalile kukuzia eevi ngaluke mubombi wakue Yehova aweeme.” (Soma Yoane 6:45.) Wamona siani kine ni weewe watoosia aali yobe eevi kumona kine kunti kyakitika wipeele ni kubeeleziiwa na Yehova mu nzila inge?

11. Bankazi bamo ba mu kyalo kya Korea ya ku Nkungulua baaikwindile kukita ki eevi bepeele mu miilo ya kusimikila, kabili keekio kyaabaleteele mpaalo ki? (Mona foto ili ku ntendeko ya kazeeti.)

¹¹ Atasie bantu bakokola kale bamubombela Yehova, ni beene bali banoonkelamo mu kubeeleziiwa, musita ubali baikwinda kubombia nzila ya leenu mu miilo yabo. Mu musita wa buluele bwa korona (COVID-19), bakote bamo ba mu kilonghaano kimo kya mu kyalo kya Korea ya ku Nkungulua (Kusini), baaleembele eevi: “Bange babanga batontonkania nangue tebaviinda kusimikila juu ya aali ya bukose bwabo, inzi loonu bali mukusimikila kupitila kukuutana ku viideo. Bankazi batatu bali na miaka 80 eevi, baasambiliile  nzila ya leenu ya kubombia ordinatere eevi kukita miilo ya kusimikila, kabili loonu bali mukubomba miilo ezio. Kunti twalandasie nangue bali bakita evio kila busiku.” (Malum. 92:14, 15) Wamona siani kine watania miilo yobe ya kusimikila ni kutompa eevi ukile kumona buwaame bwakue Yehova? Mona nzila paleepale yuli kuviinda kukoonka ili kukwasia kufikilizia ozo mupaango.

12. Yehova abalaile ki bantu bamuswapiile?

¹² Sambilila kumuswapila Yehova. Atulaile kutupeela mpaalo kine twamuswapila ni kumupeela maka etu. (Mal. 3:10) Nkazi umo ali wakuutua Fabiola, ali waikala mu kyalo kya Kolombia, waaimweneene mu buikazi bwakue Yehova wafikilizia bulayo bwakue. Kisia kubatiziiwa, ozo nkazi waali watonene kwaluka painia wa lonse. Anzia evio, baana bakue batatu pamo ni mulume wakue baali baswapiile nfalanga yaali wapata ku miilo. Pakaako, musita ubaamulandile alekele miilo yakue juu ya bukote, ozo nkazi waapepele saana kuli Yehova eevi amukwasie. Walanda eevi: “Lingi kili kyatwama musita waleepele eevi muntu atendeke kupeelua nfalanga ya pansio, inzi neene naakitile sie muezi umo ni kutendeka kulipua nfalanga ezio. Kibanga kyali nga kimpezia maano!” Kisia miezi ibili waatendekele bupainia. Loonu, ozo nkazi ali na miaka 70 eevi, kabili wakita kale miaka 20 walisie painia. Mu ozo musita onse waakikwasia bantu munane kufikiila kubatiziiwa. Walanda eevi: “Anzia kine musita unge ndi naiunvua kutopa, Yehova ali mukunkwasia kila busiku kutwalilila kubomba miilo ya bupainia.”

13-14. Ni mifuano ki ili kuviinda kutukwasia tumuswapile Yehova ni kufikiila kwipeela?

 ¹³ Sambilila kupitila mifuano ya bantu baalangiliile mibeele ya kumuswapila Yehova. Mu Bibilia muli mifuano ingi ya bantu baaipeele saana mu miilo yakue Yehova. Ntaanzi Yehova abapeele mpaalo, yaali yaloombele bakitenke kintu kimo. Kwa mufuano Yehova waamupaalile Abrahamu kisia kukuuka ni “kuya ku kyalo kyasimanine.” (Baeb. 11:8) Yakobo nawe kisia kuluana ni malaika, i lwaapatile mpaalo iibeleele. (Kut. 32:24-30) Lubaali basyali peepi ni kyalo kya bulayo, Baisraeli baaviindile kwabuka Mwenzi wa Yordani kisia bamakoani kutika mu menda a mu ozo mwenzi.​—Yosh. 3:14-16.

¹⁴ Kabili, kunti wasambilila kupitila mifuano ya Bakasininkizia Bakue Yehova ba mu enu nsiku bali bamuswapila Yehova ni kufikiila kwipeela. Kwa mufuano, lupua umo ali wakuutua Payton pamo ni mukazi wakue ali wakuutua Diana, babanga batona saana kusoma maasi a balupua ni bankazi bali batania miilo yabo ya kumubombela Yehova. Babanga basoma maasi nga alia afumine mu mutue ulandile “Walijitoa kwa Kujipendea.” * Payton walanda eevi: “Musita utuli twasoma bintu byaaimweneene babo bantu, tuli twaiunvua nga evelia fwefue bamwene muntu ali mukulia kyakulia kyaweeme. Lutuli twakila kusoma azo maasi, tuli twakila kutona ‘kutompa ni kumona nangue Yehova aweeme.’” Kisia, Payton ni Diana baakuukile ni kuya kubombela ku kazonga kakabiile saana kukwasiiwa. Eba, ni weewe wakisoma kale azo maasi? Eba, wakimona kale viideo ilandile nangue Wanahubiria Watu Katika Eneo la Mbali​—Australia, ni elia ilandile nangue Wanahubiria Watu Katika Eneo la Mbali​—Ireland, ali mu kitente kya jw.org? Ezio mpunda kunti yakukwasia ukebe nzila ya kutaniiziamo miilo yobe.

15. Kupisia musita pamo ni baalia bali kutukinkizia twipeele saana mu miilo yakue Yehova, kunti kwatukwasia siani?

¹⁵ Saakula kupisia musita pamo ni baalia bali kukukinkizia wipeele saana mu miilo yakue Yehova. Tuli twatona saana kulia kyakulia kitusinaliepo lwa ntaanzi kine tuli pamo ni muntu ali wasekelela kulia keekio kyakulia. Enka evio, ni fwefue kine twasaakula kupisia musita pamo ni baalia babiikile miilo yakue Yehova pa ntaanzi mu buikazi bwabo, keekio kunti kyakila kutukinkizia tukebe nzila ya kutania miilo yeetu ya kumubombela Leeza. Lupua umo ali wakuutua Kent, pamo ni mukazi wakue Veronica baamwene nangue keekio ni kisinka. Kent walanda eevi: “Babibuza beetu pamo ni bantu ba mu lupua lwetu, baatusonseziizie twezie kwiingizia mu miilo iibeleele. Twaafikiile kwinika nangue kupisia musita pamo ni baalia bali babiika Bukolo pa ntaanzi, kwaatukwasiizie ni fwefue twezie kukita kintu kitusinakitepo.” Loonu ba Kent ni Veronica bali mukubombela ku Serbia bali bapainia bebeleele.

16. Nga vilangiliile mufuano wakue Yesu uli mu Luka 12:16-21, juu ya ki tupalile kuya twatonene kwitana bintu binge juu ya miilo yakue Yehova?

¹⁶ Iitane bintu binge palua miilo yakue Yehova. Eevi tumusaansamusie Yehova, teiloombele twitane bintu byonse. (Kas. 5:19, 20) Anzia evio, kine twaandua kwipeela saana mu miilo yakue Yehova paantusie twatiina kwitana bintu paleepale, tuli kukita kilubo nga keelia kyaakitile olia mwalalume azimbuilue mu mufuano wakue Yesu. Ozo mwalalume waabombele saana eevi apate bintu bingi biweeme, inzi kabili bila kwemena kumubombela Leeza. (Soma Luka 12:16-21.) Lupua Christian, ali waikala ku Ufaransa walanda eevi: “Nsyali naipeela saana, kabili nsyali nabombia maka ni musita wane mu miilo yakue Yehova ni palua bantu ba mu lupua lwane.” Weene pamo ni mukazi wakue baapinguile kwaluka bapainia. Inzi, eevi baviinde kufikilizia mupaango wabo baalekeele miilo yabo  ya kimubili ya kubombela. Eevi bapate nfalanga ya kubakwasia, baatendekelesie kubomba miilo ya kupyangila mu masesi ao mu ma biro a bantu. Eba, bali mukusekelela paantu baaitanine bintu binge juu ya miilo ya bupainia? Christian walanda eevi: “Tuli mukusekelela saana miilo yeetu ya kusimikila, kabili tuli mukusekelela kumona basambi ba Bibilia ni bantu batuli twabuelela basambilila palwakue Yehova.”

17. Juu ya ki paange kunti twamona kyakolele kubombia nzila ya leenu ya kusimikila?

¹⁷ Uye waleengele kwezia kubombia nzila ya leenu ya kubombelamo miilo. (Miil Bat. 17:16, 17; 20:20, 21) Shirley, nkazi umo painia ali waikala ku États-Unis, waali wapalile kwalulula nzila yakue ya kusimikila mu kipindi kya buluele bwa korona (COVID-19). Ku ntendeko, waali watiina kusimikila kupitila telefone. Inzi, musita kangalila wa muputule lwaaendeele kilonghaano kyabo, waamubeeleziizie. Kisia ozo nkazi waatendekele kusimikila lingi kupitila telefone. Walanda eevi: “Ku ntendeko, nsyali namwene yaweeme, inzi loonu ndi mukusekelela saana kubombia ezio nzila. Loonu tuli mukupata bantu bengi kuliko baalia batwaali twapata lutwaali twasimikila nsesi kwa nsesi!”

18. Ni kiki kili kuviinda kutukwasia kulwisia maavia musita utuli mukukeba kutania miilo yeetu ya kusimikila?

¹⁸ Iibiikile ntantiko ni kuikoonka. Musita utuli twasaakaana ni maavia, tuli twapepa eevi tukwasiiwe ni kutontonkania buino bintu bitupalile kukita palua azo maavia. (Tus Maf. 3:21) Sonia, ali wabomba wali paini wa loonse mu kikundi kimo kya lulimi lwa Kiromani mu Bulaya, walanda eevi: “Ndi natona kuleemba ntantiko yane ku lipapie ni kuibiika pa fuasi imonekele. Pa meza yane, pali bisiko bibili bilangiliile nzila ibili yaile ku fuasi ipuseene. Kine kuli bupinguzi bumpalile kukwata ndi nakenta pa bebio bisiko bibili bya misebo ni kutontonkania kine bupinguzi bwane buli kuntwala kupi.” Sonia ali watwalilila kuya wali ni malanga aweeme musita lwali wasaakana ni maavia. Walanda eevi: “Mpalile kupingula kine kunti namona aali yonse ili yaaluluka mu buikazi bwane kuya yali nga kibumba kya kungazia te kunti nfikilizie mupaango wane, ao nga kilalo kya kunkwasia kufikilizia mupaango ozo.”

19. Tupalile kupingula kukita ki?

¹⁹ Yehova ali watupaala mu nzila ingi. Kunti twalangilila nangue tuli mukutasia palua ezio mpaalo kine twaikwinda saana kumulumbania weene. (Baeb. 13:15) Kunti twaipeela saana eevi kukita bintu paleepale mu miilo yakue Yehova, ni weene ali kukila kutupaala. Kansi, kila busiku tuye twakeba nzila ya ‘kutompa ni kumona nangue Yehova aweeme.’ Kine twakita evio tuli kwaluka nga Yesu waalandile eevi: “Bilio byane ni kukita kutona kwakue olia antumine, ni kufikilizia miilo yakue.”​—Yoan. 4:34.