1. Bantu bengi bali mukwikwinda siani kukita bingi mu miilo yakue Yehova?

 TULI ni miilo ingi ya kubomba, paantu mpela ya keenu kyalo ya kila kupalama. (Mat. 24:14; Luk. 10:2; 1 Pet. 5:2) Fwe bonse, tutonene kumubombela saana Yehova kukoonkana ni buviinde bwetu. Bengi, bali mukutania miilo yabo ya kusimikila. Bange bapaangile kwaluka bapainia. Bange batonene kubombela ku Beteli ao kukwasia mu miilo ya kukuula. Kabili, balupua bengi bali mukwikwinda eevi kufikilizia mibeele iloombelue ya kwaluka babombi bali babombela ao bakote. (1 Tim. 3:1, 8) Kakiine, kipalile Yehova ali mukusekelela kumona ozo mutima wa kwipeela uli pa bantu bakue!​—Malum. 110:3; Is. 6:8.

2. Kunti twaiunvua siani kine twaandua kufikilizia mipaango yeetu mu miilo yakue Yehova?

² Inzi, kunti twatendeka kutioka mutima kine pakokola bila twafikilizia mipaango yeetu ya kimupasi. Ao kunti twatioka mutima paantu miaka ao aali inge ituli naayo yaleengia te kunti tubombe miilo inge. (Tus Maf. 13:12) Keekio i kyaamusaangile Melissa. * Waali watonene kubombela ku Beteli ao kusoma Masomo a Bakabilambila ba Bukolo. Walanda eevi: “Miaka yane yapita kale. Loonu, ezio miilo ilisie nga kiloto. Nsita inge, ndi natioka mutima.”

3. Kunti kyaloomba bantu bange bakuzie mibeele ki eevi bafikiile kupeelua miilo inge?

³ Bange bakilisie bamisepuka kabili bali ni bukose bwaweeme. Kunti kyaloomba bakulenke kimupasi ni kukuzia mibeele inge ipalile eevi bafikiile kubomba miilo inge. Kwa mufuano bange kunti baya bali ni maano, kabili kuya baleengele kukwata bupinguzi, ni kuya batonene kubomba. Inzi, kabili kunti baya bakabiile kukila kusambilila mibeele ya kupembelela,  kubomba miilo bapoozeleko saana maano, ni kukila kukindika bange. Kine weewe waikwinda saana kukuzia mibeele iloombelue, balupua kunti bakupeela miilo we muine bila waswapiile. Mona bintu byaaimweneene Nick. Lwaali na miaka 20, waatiokele saana mutima paantu taali wafikiila kwitabilua kwaluka mubombi ali wabombela. Walanda eevi: “Naatendekele kutontonkania nangue kipalile kwali ni kintu kimbanga naluvia.” Inzi Nick taalekeele kwikwinda kukuzia mibeele yaali wapalile kukuzia. Waaikwindile saana kubombela pamo ni kilonghaano ni mu miilo ya kusimikila. Loonu, ali mukubombela mu Kabungue ka ku Musambo.

4. Tuli kulondoluela ki mu leeli lyasi?

⁴ Eba, utiokele mutima paantu mupaango obe wa kimupaasi te uli mukufikiliziiwa? Kine i evio, pepa kuli Yehova ni kumubuila vyuli waiunvua. (Malum. 37:5-7) Kukila pakaako, baloombe masoke balupua bakosele kimupasi ali kukukwasia mu miilo yakue Leeza, kabili ikwinde kubombia masoke abo. Kine wakita evio, kunti wafikiila kupata kifulo kyukabiile ao kufikilizia mupaango obe. Nga vikili kuli Melissa, loonu paange te kikitika weewe ubombe kabili ezio miilo. Kunti watwalilila siani kuya wali ni nsaansa? Eevi twasuke keekio kiipuzio leeli lyasi lili kulondoluela (1) kwa kupata nsaansa, (2) vya kukizia nsaansa, kabili ni (3) mipaango yuli kuviinda kwibiikila eevi kukizia nsaansa yobe.

5. Eevi tuye twali ni nsaansa, tupalile kupooza maano etu ku ki? (Kasimika 6:9)

⁵ Lileembo lya Kasimika 6:9, lili lyatubuila kintu kili kutukwasia kupata nsaansa. (Soma.) Muntu ali wasekelela “beelia bimwene menso” ali watasia keelia kyakwete kukoonkana ni aali yalimo. Inzi, muntu ali waemena nkulu yakue, ali watwalilila kutona keelia kyasiviinda kupata. Fwefue twasambililapo ki? Eevi tuye twali ni nsaansa, tupalile kupooza maano etu ku bintu bitukwete ni ku mipaango ituli kuviinda kufikilizia.

6. Tuli kulondoluela mufuano ki, kabili tuli kusambilila ki kupitila mufuano ozo?

⁶ Eba, kakiine kunti kyakitika kusekelela bintu byuli nabio mbeela? Bantu bengi bali balanda nangue tekikitika, paantu fwe bantu tuli twatona kutwalilila kusambilila vya kukita bintu bya leenu. Inzi kakiine kunti kyakitika. Kunti twasekelela saana bintu bituli nabio loonu. Kunti twasekelela siani? Eevi tupate kyasuko, tumone mufuano waaleetele Yesu palua talanta, uli mu Mateo 25:14-30. Mufuano ozo, uli kutusambilizia vya kupata nsaansa, ni vya kukizia nsaansa ituli naayo kukoonkana ni aali itulimo.

7. Londolola mu kifupi mufuano wakue Yesu palua talanta.

⁷ Mu ozo mufuano, mwalalume umo abanga waapaangile kukita bulendo. Ntaanzi ya kuya, waabakuutile bazia bakue, ni kupeela kila umo talanta eevi atendeke kusuluzia. * Paantu waamanine buviinde bwa kila umo, ozo mwalalume waamupeele muzia umo talanta isano, unge talanta ibili ni wa butatu talanta imo. Baalia bazia babili ba kuanza, baabombele kwa mute eevi bapatilepo nfalanga inge ya kumupeela mukulu wabo. Inzi, olia wa butatu, weene taakitilepo ata kamo palua nfalanga yaapeelue, ni mukulu wabo waamukumbile ku miilo.

8. Juu ya ki olia muzia wa kuanza azimbuilue mu mufuano wakue Yesu waali wapalile kusaansamuka?

⁸ Kipalile muzia wa kuanza waasaansamukile saana paantu mukulu wabo waamupeele  talanta isano. Ezio nfalanga yaali yavulile, kabili keekio kilangiliile nangue mukulu wabo waali wamuswapiile! Ale palua muzia wa bubili? Waali wapalile kutioka mutima paantu taapeelue nfalanga yavulile nga elia yaapeelue mubombi wa kuanza. Inzi, waakitile siani?

9. Yesu taalandile ki palua muzia wa bubili? (Mateo 25:22, 23)

⁹ Soma Mateo 25:22, 23. Yesu taalandile nangue muzia wa bubili waafipilue ni kusiala wali ni kipuki paantu waapeeluesie talanta ibili. Yesu taalandile nangue ozo muzia waali waitendooka, walanda nangue: ‘Twenka tootu? Ale buviinde bwane vibupaleenesie ni bwa olia waapeeluanga talanta isano! Paantu mukulu wane amwene nangue nsiizi kubomba buino, kansi nakaba kuya kuziikasie eezi talanta ni kutwalilila kukitasie miilo yane.’

10. Mubombi wa bubili waakitile siani palua elia talanta yaapeelue?

¹⁰ Nga evelia vyaakitile muzia wa kuanza, muzia wa bubili waatweme wafiniizie miilo ibaamupeele ni kumubombela mukulu wabo kwa mute. Keekio kyaakwasiizie wanoonkelapo kabili talanta inge ibili. Mukulu wa miilo waamupeele kilambu ozo muzia paantu waabombele kwa mute. Ozo mukulu waasaansamukile ni kupingula nangue ozo muzia apalile kongeziiziwa miilo inge!

11. Kunti twakizia siani nsaansa yeetu?

¹¹ Ni fwefue kunti twakizia nsaansa yeetu, kupitila kwipeela saana mu bintu byonse bituloombelue kukita mu miilo yakue Yehova. ‘Iipeele’ mu miilo ya kusimikila, kabili bomba kwa mute pamo ni kilonghaano. (Miil Bat. 18:5; Baeb. 10:24, 25) Uye wateania buino kulonghaana  eevi uye waleeta byasuko bili byakuula. Twama wapoozeleko maano kiputulua kyonse kya musambi kibali kukupeela kya kupisia ku kulonghaana kwa mukati ka mulungu. Kine bakupeela miilo ya kubomba mu kilonghaano, bomba pa musita kabili bomba buino miilo ezio. Apana kutontonkania nangue miilo yuli nayo te ya mana kabili nangue te upalile kuzeezia nsita yobe wabomba ezio miilo. Kita maka eevi ukile kwaluka ni bufundi mu miilo yobe. (Tus Maf. 22:29) Kine uli waipeela saana mu bintu bya kimupasi ni mu miilo yupeelue, wakaba kukita buyantanzi bila kukokola, kabili nsaansa yobe yakaba kukila kuvula. (Bag. 6:4) Kabili, wakaba kumona kyalengelesie kusekelela pamo ni bange, kine bapeelua miilo iwakiba watonene kupeelua.​—Bar. 12:15; Bag. 5:26.

12. Ni kiki kyaabakwasiizie ba Melissa ni Nick eevi bakile kwaluka ni nsaansa?

¹² Eba, wamulanguluka nkazi Melissa, olia utwazimbulanga mu lifungu lya bubili, abanga watonene saana kubombela ku Beteli ao kusoma Masomo a Bakabilambila ba Bukolo? Anzia kine te kwaali kabili namuna ya kufikilizia bintu byaali waatonene, walanda eevi: “Naaikwindile saana kubomba miilo ya bupainia ni kubombia nzila paleepale ya kusimikila. Keekio, kyaandeteele nsaansa ingi.” Ale, Nick waakitile siani eevi kuluisia aali yakue ya kutioka mutima paantu taali wafikiila kwaluka mubombi ali wabombela? Walanda eevi: “Naapoozele maano ane ku beelia binaali ni buviinde bwa kukita, nga evelia kusimikila ni kufumia byasuko bili byakoselezia ku kulonghaana. Naaizuziizie fomu ya kuya ku Beteli, ni muaka wakoonkelepo naakupilue kuya kubombela kooko.”

13. Kine waipeela saana mu miilo yuli nayo leenu, kwakaba kwaluka ki? (Kasimika 2:24)

¹³ Kine uli mukwipeela saana mu miilo yuli naayo leenu, eba keekio kilangiliile nangue wakaba kupeelua bifulo bikata musita uli mukuiza? Kunti kyakitika nga vikyaakitikile kuli Nick. Inzi kine tekyalukile evio, kunti wakila kwaluka ni nsaansa nga vikyaali palwakue Melissa, kabili wakaba kusekelela saana palua miilo yuli mukumubombela Yehova. (Soma Kasimika 2:24.) Kukila pakaako, wakaba kwaluka ni nsaansa ingi paantu umanine nangue mute obe uli mukulengia Mukulu weetu wa miilo, Yesu Kristu asaansamuke.

14. Lyonse, tupalile kulanguluka ki musita utuli twatontonkania palua mipaango yeetu mu miilo yakue Yehova?

¹⁴ Eba, kwipeela saana mu miilo ituli mukubomba loonu, kulangiliile nangue te tupalile kabili kubomba miilo inge yakue Yehova? Ata, te evio! Tupalile kwibiikila mipaango ya kutukwasia kwaluka ni bufundi mu miilo ya kusimikila, kusambilizia ni kukila kukwasia balupua ni bankazi. Twakaba kufikilizia mipaango yeetu kine twabombia mulangue ni kwikoosia eevi kupooza maano etu ku kubombela bange kuliko kwibombela fwe beene.​—Tus Maf. 11:2; Miil Bat. 20:35.

15. Ni mipaango ki ili kuviinda kukukwasia kukizia nsaansa yobe?

¹⁵ Weewe, kunti waibiikila mipaango ki? Muloombe Yehova akukwasie kwinika mipaango yuli kuviinda kwibiikila ni kwifikilizia. (Tus Maf. 16:3; Yak. 1:5) Eba, kunti waikwinda kufikilizia mupaango umo pakati ka mipaango itwazimbulanga mu  lifungu lya kuanza mu leeli lyasi, nga evelia kwaluka painia ali wakwasia, ao painia wa loonse, kubombela ku Beteli, ao kukwasia mu miilo ya kukuula? Ao paange upaangile kusambilila lulimi lunge eevi utanie miilo yobe ya kusimikila mpunda iweeme ao kuya kusimikila mu kazonga ka ku bueni. Kunti wamona bintu biloombelue  kukita mu lyasi lya 10 lya kitabu Tengenezo Yenye Kufanya Mapenzi ya Yehova. * Kine waikwinda saana eevi kufikilizia mipaango ezio, buyantanzi bobe bwakaba kumoneka paswetele kabili ni nsaansa yobe yakaba kukila.

16. Kunti wakita siani kine te ukili na buviinde bwa kufikilizia mupaango uukebele?

¹⁶ Ale kine te ukili na buviinde bwa kufikilizia mipaango itwafuma mukuzimbula mu leeli lyasi? Kintu kya mana ni kukeba mupaango unge uuli kuviinda kufikilizia. Bintu bili paapa pensina kunti byakukwasia.

17. Nga vilandile 1 Timoteo 4:13, 15, lupua kunti wakita siani eevi aaluke kasambilizia ali ni bufundi?

¹⁷ Soma 1 Timoteo 4:13, 15. Kine uli lupua abatiziiziwe, kunti wawaamia buviinde bobe bwa kulanda ni bwa kusimikila. Juu ya ki? Paantu kine ‘wakita maka’ mu kusoma, mu kulanda ni mu kusambilizia, wakaba kukila kwaluka ni buviinde bwa kubakwasia baalia bali bakutuilizia. Ezia kwibiikila mupaango wa kusambilila ni kubombia kila bufundi bwa kulanda bulondolwelue mu broshua Fanya Bidii Katika Kusoma na Kufundisha. Sambilila mibeele imo pa musita umo, kabili iibeelezie kwa mute wakili ku nsesi yobe, ni musita luuli walanda maasi ikwinde kubombia beelia biwakisoma. Loomba masoke kuli lupua ali wakwasia kusoka baalia bali bapisia biputulua, ao ku bakote bange ‘bali babombesia mu kusimikila ni mu kusambilizia.’ * (1 Tim. 5:17) Apana kupoozasie maano obe ku kubombia lisomo lili mu broshua, inzi kabili bakwasie bakatuilizia bobe bakosie kiketekelo kyabo, ao bakinkizie babombie beelia bibali mukusambilila mu lyasi.  Kine wakita evio, nsaansa yobe pamo ni nsaansa yabo ili kukila kuvula.

18. Ni kiki kili kuviinda kutukwasia kufikilizia mipaango yeetu mu miilo ya kusimikila?

¹⁸ Fwe bonse tupeelue miilo ya kusimikila ni kukita basambi. (Mat. 28:19, 20; Bar. 10:14) Eba, kunti watona kuwaamia bufundi bobe mu ezio miilo ya mana? Iibiikile mipaango imanikile buino musita luuli mukusambilila, kabili ikwinde kubombia beelia byuli mukusambilila mu broshua ili yakuutua Kufundisha. Kabili kunti wapata masoke ange ali abomba mu Buku la Mukutano​—Utumishi na Maisha ya Mukristo, ni mu ma viideo alangiliile vya kutendekezia bulondolozi, ali apisiiwa ku kulonghaana kwa mukati ka mulungu. Ikwinde kubombia masoke paleepale eevi umone kine ni a pipo ali kukila kukwasia. Kine wabombia azo masoke, wakaba kwaluka kasambilizia aweeme saana kabili wakaba kukila kwaluka ni nsaansa.​—2 Tim. 4:5.

19. Kunti wakuzia siani mibeele ya Kikristu?

¹⁹ Musita luuli mukutontonkania palua mipaango yupalile kwibiikila, te kupuulula mupaango umo wa mana saana, i kulanda, mupaango wa kukuzia mibeele ya Kikristu. (Bag. 5:22, 23; Bakol. 3:12; 2 Pet. 1:5-8) Kunti wakita siani? Tulande utonene kukosia kiketekelo kyobe. Kunti wasoma maasi ali asaangua mu mpapulo yeetu, ali aleeta masoke ali akwasia eevi ukosie kiketekelo kyobe. Kabili wakaba kunoonkelamo kupitila kukenta ma viideo ali mu JW Télédiffusion, alangiliile balupua ni bankazi vibali balangilila kiketekelo kyabo musita ubali basaakaana ni maavia paleepale. Kisia, keba vyupalile kupala kiketekelo kyabo mu buikazi bobe.

20. Kunti twakizia siani nsaansa yeetu ni kupunguzia aali yeetu ya kutioka mutima?

²⁰ Kakiine, fwe bonse tutonene kumubombela saana Yehova kukoonkana ni buviinde butuli naabo loonu. Mu kyalo kya leenu kyakue Leeza, twakaba kuya twali ni buviinde bwa kumubombela saana Yehova. Kutendekela loonu, kunti twakila kwaluka ni nsaansa ni kupunguzia aali yeetu ya kutioka mutima, kine twaikwinda kukita keelia kituli kuviinda kukita loonu. Kabili, kintu kikilile kuwaama, twakaba kumuleetela mukinzi ni bulumba Yehova, “Leeza wansaansa.” (1 Tim. 1:11, NWT) Kansi, tusekelele palua bintu bituli kuviinda kukita!