1. Kunti twaiipuzia siani kine twatontonkania palua bintu byonse byaabumbile Yehova?

KINE twatontonkania palua bukata bwa muulu ni kyalo byaabumbile Yehova, kunti twaiunvua nga evelia vyaaiunvuile kaleemba umo wa Malumbo ali wakuutua Daudi. Waapepele ni kumwipuzia eevi Yehova: “Musita undi namona myulu yobe, miilo ya minue yobe, muezi ni ntanda biwaateaniizie, ale muntu ali wafua ni kiki eevi uye wamubiikile mu maano, kabili muana mwina muntu ni kiki eevi uye wamwemena?” (Malum. 8:3, 4) Nga vyaakitile Daudi, kine twatendeka kutontonkania ni kwipalania ku ntanda yaabumbile Yehova, kunti twafikiila kupapa saana ni kwiipuzia juu ya ki Yehova atupozeleko maano. Nga vituli kumona, Yehova taali wabeemenasie bantu ba kuanza, ba Adamu ni Eva, inzi kabili waali wabengiziizie mu lupua lwakue.

2. Mupaango wakue Yehova palua baana bakue ba kuanza ba ku kyalo, ubanga wali siani?

² Ba Adamu ni Eva, babanga bali baana ba kuanza bakue Yehova pa kyalo, kabili Yehova abanga wali Baba wabo wantono wa ku muulu. Abanga watonene loolo lupua luye lwavyalana. Leeza waabalandile eevi: “Vyale, mwaluke bengi, mwizuzie kyalo ni kukiteeka.” (Kut. 1:28) Baali bapalile kuvyala baana ni kusuunga buino kyalo, fuasi yabo ya kwikalapo. Kabenge ba Adamu ni Eva baamunakiile Leeza ni kukita beelia byaali wabaloombele bakite, beene pamo ni baana babo nga baasiele loonse bali mu lupua lwakue Leeza.

3. Juu ya ki kunti twalanda nangue Yehova waabapeele ba Adamu ni Eva fuasi yakindeeme mu lupua lwakue?

³ Ba Adamu ni Eva babanga bali ni fuasi ikindeeme saana mu lupua lwakue Yehova. Nga vilandile Malumbo 8:5 pamo ni bulondolozi bwa pensina, Daudi waalandile eevi palua kubumbua  kwa muntu na Yehova: “Waamukitile wakeepeleko kakaniini kuliko bamalaika, kabili waamuvuikile ngala ya bulumba ni kufuanina kukata.” Kakiine bantu te baapeelue maka, maano ni buviinde nga bwa bamalaika. (Malum. 103:20) Bantu ‘bakeepeleko kakaniini’ kuliko babo bamalaika bali ni maka. Inzi ni kya kupapia! Musita Yehova lwaababumbile baviazi betu ba kuanza, waabapeele buikazi bwaweeme saana.

4. Ba Adamu ni Eva baapatilue na ki musita ubaakeene kumunakila Yehova, kabili tuli kulondoluela ki mu leeli lyasi?

 ⁴ Kya bulanda, ba Adamu ni Eva baazeziizie fuasi yabo mu lupua lwakue Yehova. Nga vituli kumona mu leeli lyasi, keekio kyaabaleeteele baana babo maavia abiipile saana. Inzi, mupaango wakue Yehova te waalulukile. Atonene bantu bali bamunakila bakaaluke baana bakue loonse. Ale kansi tumonenke Yehova vyaalangiliile nangue atumwene kuya twali bantu ba mana. Kisia, tuli kulondoluela bintu bitupalile kukita eevi tulangilile nangue tutonene kuya twali mu lupua lwakue Leeza. Kupuako, tuli kulondoluela mpaalo yakasekelela loonse baana ba pa kyalo bakue Yehova.

5. Kunti twalangilila siani nangue tumukindikile Yehova paantu waatubumbile kwa mufuano wakue?

⁵ Yehova waalangiliile nangue atumwene kuya twali ba mana kupitila kutubumba kwa mufuano wakue. (Kut. 1:26, 27) Paantu twaabumbilue kwa mufuano wakue Leza, kunti twaviinda kukuzia ni kulangilila mibeele yakue ingi iweeme saana, nga evelia ntono, nkumbu, bukisinka ni nsaambu. (Malum. 86:15; 145:17) Musita utuli twakuzia ezio mibeele, tuli twalangilila nangue tuli twamupeela Yehova mukinzi, kabili tuli twamutasia. (1 Pet. 1:14-16) Musita utuli twakita bintu bili byatona Baba weetu wa ku muulu, tuli twaaluka ni nsaansa. Kabili, musita lwaatubumbile kwa mufuano wakue, Yehova waatupeele buviinde bwa kwaluka bantu bali watona kuya bali mu lupua lwakue.

6. Musita Yehova lwaabumbile kyalo, waalangiliile siani nangue abamwene bantu kuya bali ba mana?

⁶ Yehova waateaniizie fuasi yeetu ya kwikalapo yaibeleele. Ntaanzi tanamubumbe muntu wa kuanza, Yehova waateaniizie kyalo kya kwikalapo bantu. (Yob. 38:4-6; Yer. 10:12) Paantu Yehova aweeme kabili ali wapeelana, waabumbile bintu bingi eevi biye byatusaansamusia. (Malum. 104:14, 15, 24) Waali wapisia nsita watoosia kintu kyaali wabumba, kisia ‘waali wamona nangue kyaali buino.’ (Kut. 1:10, 12, 31) Waalangiliile nangue waabamwene bantu kuya bali ba mana kupitila kubapeela miilo ya ‘kuteeka’ kila kintu kiweeme saana kyaabumbile pa kyalo. (Malum. 8:6) Leeza apaangile nangue bantu bapuililikile baye basekeleele kusuunga bintu biweeme saana byaabumbile. Eba, lyonse uli wamutasia Yehova palua bobo bulayo buweeme saana?

7. Lileembo lya Yoshua 24:15 lilangiliile siani nangue muntu ali ni buntungua bwa kusaakula?

⁷ Yehova waatupeele buntungua bwa kukwata bupinguzi fwe beene. Kunti twasaakula kintu kitupalile kukita mu buikazi bwetu. (Soma Yoshua 24:15.) Bobo buviinde buli bwakuutua buntungua bwa kusaakula. Leeza weetu wa ntono ali wasekelela musita utuli twasaakula kumubombela weene. (Malum. 84:11; Tus Maf. 27:11) Kunti twabombia buntungua bwetu bwa kusaakula eevi kukwata bupinguzi mu aali ingi. Mona mufuano waatubiikiile Yesu.

8. Leeta mufuano ulangiliile Yesu vyaabombiizie buntungua bwakue bwa kusaakula.

⁸ Kunti twapala mufuano wakue Yesu kine twasaakula kubiika pa ntaanzi bintu bikabiile beneetu kuliko kutangizia bintu byetu fwe beene. Busiku bumo, Yesu pamo ni batumua bakue baatopele saana, pakaako baaile ku fuasi iteekameene eevi baye batuuzienke kaniini. Inzi te baatuuziizie. Baasaakeene ni kikundi kya bantu, kabili baali batonene saana  kusambiliziiwa kuli Yesu. Yesu taafipilue. Inzi, waabonvuiliile nkumbu babo bantu. Ale Yesu waakitile siani? ‘Waabambile kubasambilizia twebo twingi.’ (Mark. 6:30-34) Musita utuli twamupala Yesu kupitila kubombia musita ni maka etu eevi kukwasia bange, tuli twamuleetela bulumba Baba weetu wa ku muulu. (Mat. 5:14-16) Kabili tuli twamulangilila Yehova nangue tutonene kwaluka mu lupua lwakue.

9. Yehova waabapeele bantu bupe ki bwibeleele?

⁹ Yehova waabapeele bantu buviinde bwa kuvyala baana ni miilo ya kubasambilizia kumutona weene ni kumubombela. Kine uli muviazi, uli wasekelela bobo bupe bwibeleele? Yehova waabapeele bamalaika buviinde buingi bwaweeme saana, inzi taabapeele buviinde bwa kuya baali ni baana. Kansi kine uli muviazi upalile kutasia palua lisyuko lyupeelue lya kukuzia baana. Baviazi bapeelue miilo ya mana saana ya kusuunga baana babo na “kyunvuila mu mafunde akue Mulopue.” (Baef. 6:4; Mal Miz. 6:5-7; Malum. 127:3) Eevi kukwasia baviazi, kuteania kwakue Leeza kufumiizie biombo bingi biswapiile Bibilia nga evelia mpapulo, ma viideo, miziki, ni maasi ange ali asaangua mu kitente kyetu kya Enternete. Kakiine Baba weetu wa ku muulu pamo ni Muana wakue, babatonene saana banike. (Luk. 18:15-17) Musita baviazi lubali bamuswapila Yehova ni kukita maka abo onse eevi kusuunga baana babo ba mana, Yehova ali watona. Kabili baviazi bali bakita evio, bali babapeela baana babo kiswapilo kya kwaluka loonse bantu ba mu lupua lwakue Yehova!

10-11. Yehova waalengiizie kwaluke ki kupitila kufumia kilubula mulandu?

¹⁰ Yehova waamufumiizie Muana wakue mutonua eevi fwefue tuviinde kwaluka kabili bantu ba mu lupua Lwakue. Nga vitwamonanga mu  lifungu lya buna, ba Adamu ni Eva baazeziizie fuasi yabo pamo ni ya baana babo mu lupua lwakue Yehova. (Bar. 5:12) Ba Adamu ni Eva baakeene kumukindika Leeza na bufue, pakaako baali ni nsaambu ya kufumiiwa mu lupua lyakue. Ale baana babo? Yehova waakwete mupaango eevi baana babo bali bamunakila weene, betabilue mu lupua lwakue. Waakitile evio kupitila kufumia ngeleelo ya Muana wakue lyonga, ao wa bunke, Yesu Kristu. (Yoan. 3:16; Bar. 5:19) Kupitila ngeleelo yakue Yesu, bantu ba kisinka mia ni makumi ana na bana elufu (144 000), betabiilue kuya bali baana bakue Leeza.​—Bar. 8:15-17; Nfy. 14:1.

¹¹ Kabili, mamilioni ange a bantu ba kisinka bali mukumunakila Leeza kupitila kukita kutona kwakue. Babo bantu bali ni kiswapilo kya kwaluka bantu ba mu lupua lwakue Leeza, kisia kupita pa buezio bwa kupeleezia ku mpela ya miaka elufu (1 000). (Malum. 25:14; Bar. 8:20, 21) Paantu bali ni keekio kiswapilo, bali bamukuuta Yehova Kabumba wabo nangue, “Baba.” (Mat. 6:9, NWT) Baalia bakatuntumunua, ni beene bakapeelua fuasi ya kusambilila bintu bitonene Yehova bakite. Baalia baketabila butunguluzi bwakue, ni beene bakafikiila kwaluka mu lupua lwakue.

12. Ni kiipuzio ki kituli kwasuka loonu?

¹² Nga vitwafuma mukumona, Yehova waabakitiile kale bantu bintu bingi eevi kubalangilila nangue ni ba mana. Waabetabiile kale baalia babiikilue mafuta kwaluka baana bakue, kabili abapeele “bantu bengi saana [libumba likata, NWT]” kiswapilo kya kwaluka baana bakue mu kyalo kya leenu. (Nfy. 7:9) Loonu, kunti twakita siani eevi kumulangilila Yehova nangue tutonene kuya twali loonse mu lupua lwakue?

13. Ni kiki kitupalile kukita eevi twaluke seemu ya lupua lwakue Leeza? (Mark. 12:30)

¹³ Langilila nangue umutonene Yehova kupitila kumubombela kwa mutima obe onse. (Soma Marko 12:30.) Leeza waatupeele kwa ntono bupe buingi. Buviinde bwa kumupupa  weene buli pakati ka bupe bwa mana saana butwaapeelue. Tuli twalangilila nangue tumutonene Yehova lutuli ‘twanakila mafunde akue.’ (1 Yoan. 5:3) Yehova atonene tukoonke malaizio akue Yesu a kukita basambi ni kubabatizia nga vyaalandile Yesu. (Mat. 28:19) Kabili, Yesu waalandile nangue tutonane. (Yoan. 13:35) Yehova wakaba kubapokelela baalia bonse bali banakila malaizio akue mu lupua lwa kyalo kyonse lwa bantu bali bamupupa.​—Malum. 15:1, 2.

14. Kunti twabalangilila siani bange ntono? (Mateo 9:36-38; Baroma 12:10)

¹⁴ Balangilile bange ntono. Ntono i mibeele yakue Yehova ikilile kuya yali ya mana saana. (1 Yoan. 4:8) Yehova waatulangiliile ntono ntaanzi fwefue tetunamumane. (1 Yoan. 4:9, 10) Musita utuli twabalangilila bange ntono, tuli twamupala. (Baef. 5:1) Kubakwasia bange basambilile palwakue Yehova musita wakisieleko, kuli pakati ka nzila iweeme saana ya kubalangilila bange ntono. (Soma Mateo 9:36-38.) Kine twakita evio, tuli kubapeela fuasi ya kwaluka ni kiswapilo kya kwingila mu lupua lwakue Leeza. Kisia muntu kubatiziiwa, tupalile kutwalilila kumutona ni kumukindika. (1 Yoan. 4:20, 21) Kunti twakita siani evio? Nzila imo ya kukita evio, ni kumulangilila nangue tumuswapiile. Kwa mufuano, kine te tumanine kyamulengianga akite kintu kampanda, te tupalile kutontonkania nangue wakitilangasie juu ya kwiwaamiizia. Inzi, tupalile kumukindika lupua weetu ni kumumona kuya wali wa pa muulu kuliko fwefue.​—Soma Baroma 12:10; Baf. 2:3.

15. Ni baani batupalile kulangilila mibeele ya kuwamiziana ni luse?

¹⁵ Uye waabawaamiizia ni kubalangilila bantu bonse luse. Kine tutonene loonse kuya twali mu lupua lwakue Yehova, tupalile kubombia Mulandu Wakue Leeza mu buikazi bwetu. Kwa mufuano, Yesu waasambiliziizie nangue tupalile kubalangilila bantu bonse luse ni kubawaamiizia, kubiika mukati ni baluani betu. (Luk. 6:32-36) Nsita inge kunti twamona nangue kikolele kukita evio. Kine i evio, tupalile kusambilila kutontonkania ni kukita nga vyaakitile Yesu. Musita utuli twakita maka etu onse eevi kumunakila Yehova ni kumupala Yesu, tuli twamulangilila Baba weetu wa ku muulu nangue, loonse tutonene kuya twali mu lupua lwakue.

16. Kunti twasuunga siani lulumbi lwa bantu ba mu lupua lwakue Yehova?

¹⁶ Suunga lulumbi lwa bantu ba mu lupua lwakue Yehova. Mu lupua, lingi mwanike ali wapala bintu bili byakita mukulube. Kine muana mukulu ali wabombia mafunde a Bibilia mu buikazi bwakue, ali kwaluka mufuano uweeme kuli mwalawakue. Kine muana mukulu watendeka kukita bintu bibiipile, ni mwalawakue kunti watendeka kukita evio vyenka. I vikili ni mu lupua lwakue Yehova. Kine Mukristu wakiba wakosele kimupasi waaluka kisanguka ao watendeka kukoonka lwendo lubiipile, ni bange kunti bamupala ni kutendeka kukita bintu bibiipile. Bantu bali bakita evio, bali bainoona lulumbi lwa bantu bali mu lupua lwakue Yehova bali bamupupa. (1 Bat. 4:3-8) Te tupalile kukoonka ata kaniini mifuano ibiipile, kabili te tupalile kulekelela ata kaniini kintu kyonse kiinoone bukibuza bwetu pamo ni Baba weetu wantono ali ku muulu.

17. Tupalile kutiina kutontonkania siani, kabili juu ya ki?

¹⁷ Muswapile Yehova kuliko kuswapila bintu bya kimubili. Yehova atulaile nangue kine twabiika Bukolo bwakue pa ntaanzi ni kukoonka mafunde akue a nsaambu, wakaba kutupeela byakulia, maubo ni mwakwikala. (Malum. 55:22; Mat. 6:33) Kine tuswapiile bobo bulayo, tetuviinda kutontonkania nangue bintu bya kimubili bya mu keenu kyalo bili kutusuunga ni kutuleetela nsaansa. Tumanine nangue kukita kutona kwakue Yehova, i nzila imosie ili yatukwasia kwaluka ni mutende wa kisinka mu  maano. (Baf. 4:6, 7) Anzia kine tuli ni buviinde bwa kusita bintu bingi, tupalile kutontonkania kine kakiine tuli ni musita ao maka a kubombia ni kusuunga bebio bintu. Eba, tuli twaitanka juu ya bintu bitukwete? Tupalile kulanguluka nangue Leeza atupeele ni miilo ya kubomba mu lupua lwakue. Keekio kilangiliile nangue te tupalile kwilekelela tupuululue. Kakiine te tutonene ata kaniini kwaluka nga olia mwalalulme waatonene saana bunoonsi bwakue ni kukaana kumukoonka Yesu. Pakaako, waazeeziizie lisyuko lya kumubombela Yehova ni kwitabilua kuya wali pakati ka baana bakue!​—Mark. 10:17-22.

18. Bantu bali banakila bakasekelela kintu ki kikindeeme, kabili ni mpaalo ki ibakapata?

¹⁸ Bantu bali banakila bakaba kusekelela kintu kikindeeme saana, i kulanda nangue bakaba kupata lisyuko lya kumutona ni kumupupa Yehova loonse! Baalia bali ni kiswapilo kya kwikala pa kyalo, bakaba kusekelela lisyuko lya kusuunga keenu kyalo kiweeme saana kyaabumbile Yehova mu nzila ipuililikile eevi kiye kyali fuasi yabo ya kwikalapo. Leenusie Bukolo Bwakue Leeza bwakaba kuwaamia kabili kyalo pamo ni bintu byonse bilipo. Yesu wakaba kupuisia maavia onse aaleetelue na bupinguzi bwa ba Adamu ni Eva bwa kufuma mu lupua lwakue Leeza. Yehova wakaba kutuntumuna mamilioni a bantu ni kubapeela fuasi ya kupata bukose bwa loonse kabili bupuililikile pa kyalo kyakaba kwaluka Paradiso. (Luk. 23:42, 43) Musita bantu bali bamubombela Yehova lubakapuililika, bakaaluka ni “bulumba ni kufuanina kukata” nga vyaaleembele Daudi.​—Malum. 8:5.

19. Ni kiki kitupalile kuya twabiikile mu maano?

¹⁹ Kine uli wa mu “libumba likata,” uli ni kiswapilo kyaweeme saana. Leeza akutonene; kabili atonene uye wali mu lupua lwakue. Pakaako, kita maka obe onse eevi umusaansamusie. Kila busiku, uye wabiikile bulayo bwakue Leeza mu maano ni mu mutima obe. Sekelela lisyuko lyobe lya kumupupa Baba weetu mutonua wa ku muulu, kabili sekelela kiswapilo kyuli nakio kya kumulumbania ao kumutasia weene loonse!