Biipuzio Kufuma ku Bakabeleenga
Leelia lyasi lili mu Lupungu Lwakue Kamwenenena, lwa Muezi wa 06, 2020 lilandile, “Liina Lyobe Liswesiiwe,” lilondoluele siani paswetele bintu bituzumiine palua liina lyakue Yehova ni nsaambu yakue ya kuteeka?
Mu leelio lyasi, twaasambiliile nangue kuli kintu kimo kya mana saana kikumiizie bantu bonse ni bamalaika, i kulanda kuswesiiwa kwa liina likata lyakue Yehova. Mu keekio kintu kya mana saana, muli: nsaambu ya kuteeka yakue Yehova, i kulanda nzila yakue ya kuteeka iweeme saana. Kabili, bukisinka bwa bantu ni bwene, bukwateene ni keekio kintu.
Eba, juu ya ki twabuela kulanda kabili nangue keekio kintu kya mana saana kiimaniine palua liina lwakue Yehova ni kuswesiiwa kwa leelio liina? Tumone nsaambu itatu.
Sataana waalandile bufi palua liina lyakue Leeza, kubambila ku bukisanguka bwa mu busitani bwa Edeni mpaka loonu
Nsaambu ya kuanza, mu Edeni Sataana waasaukiile liina lyakue Yehova ao lulumbi lwakue. Kiipuzio kyaaipuziiziwe Eva kuli Sataana, kyaali kyalangiliile nangue Yehova ni Leeza asiizi kupaana, kabili nangue alia malaizio aabapeele ba Adamu ni Eva te aali apalile. Kisia Sataana waabalandile bintu bipuseene ni beelia bibaalandilue kuli Yehova. Kakiine waalangiliile nangue Leeza ni wa bufi. Pakaako, waalandile bufi palua liina lyakue Yehova. Waalukile “Kibanda,” liina lilangiliile “kasongelezia.” (Yoan. 8:44) Paantu Eva waazumiine bufi bwakue Sataana, taamunakiile Leeza. Keekio, kyaalangiliile nangue Eva taatonene Leeza aye wali kateeka wakue. (Kut. 3:1-6) Sataana atwaliliile kulanda bufi palua liina lyakue Leeza, ao kumwinoonena lulumbi mpaka loonu. Baalia bali bazumina bobo bufi, ni beene kunti baandua kumunakila Yehova. Pakaako, bantu bakue Leeza bali bamona kubeepa palua liina litakatiifu lyakue Yehova kuya kwali kutiona saana nsaambu. Bobo bufi, i kintu kikata kilengiizie mu kyalo muye mwali maavia ni bubiifi.
Nsaambu ya bubili, eevi kukwasia bamalaika ni bantu banoonkelemo, Yehova apinguile kusakila liina lyakue, kupitila kuliswesia kufuma ku bintu byonse bilandilue beelia bifisiizie leelio liina. Keekio i kintu kya mana saana kuli Yehova. Pakaako, alandile eevi: “Kakiine nakaswesia liina lyane likata.” (Ezek. 36:23) Kabili, Yesu waalangiliile paswetele kintu kipalile kuya kyali kya mana saana mu mapepo a babombi ba kisinka bakue Yehova, musita lwaalandile eevi: “Liina lyobe liswesiiwe.” (Mat. 6:9, NWT) Mu Bibilia muli maleembo engi alandile nangue ni kintu kya mana saana kulumbania liina lyakue Yehova. Kwa mufuano, mona aza maleembo vialandile: “Mupeele Yehova bulumba buloombele kupeelua liina lyakue.” (1 Mil Nsi. 16:29; Malum. 96:8) “Tasie liina lyakue lya bulumba kupitila lwimbo.” (Malum. 66:2) “Nakaba kulumbania liina lyobe loonse.” (Malum. 86:12) Busiku bumo, Yehova waalandile kufuma ku muulu. Bobo busiku, Yesu abanga wali mu ekalu ya mu Yerusalemu, kabili waalandile eevi: ‘We Tawe [ao Baba], lumbania liina lyobe.’ Yehova waamwasukile eevi: ‘Nalilumbaniizie, kabili nakalilumbania.’—Yoan. 12:28. a
Nsaambu ya butatu, lyonse mupaango wakue Yehova wakatwalilila kuya wakwateene ni liina lyakue, ao lulumbi lwakue. Tontonkanianke: Bintu byakaba siani kisia buezio bwa kupeleezia bwakakitika ku mpela ya Buteeko bwa Miaka Elufu Bwakue Kristu? Ale, bamalaika ni bantu bonse bakeyunvua siani pa ozo musita palua liina lyakue Yehova? Mu ozo musita, bantu te bakaba bakabiile kabili kusininkizia nangue ni ba kisinka. Bakaba basyapitile mu buezio bonse, kabili bakaba basyapuililikile. Bakaba basyapatile bukose bwa loonse. Kabili tekikaba kyakabiile kukeba busininkizio bwa kulangilila nangue nzila yakue Yehova ya kuteeka i iweeme saana. Mu ozo musita, bamalaika ku muulu ni bantu bonse pa kyalo bakaba mu kimo, kabili baketabila buteeko bwakue Yehova. Ale kyakaba siani palua liina lyakue Yehova?
Pa ozo musita, bantu bonse bakamana kisinka palwakue Yehova, kabili liina lyakue lyakaswesiiwa saana. Anzia evio, bamalaika ku muulu pamo ni bantu bonse ba kisinka pa kyalo bakatwalilila kumona leelio liina kuya lyali lya mana saana. Juu ya ki? Paantu bakamona Yehova watwalilila kukita bintu bya kupapia. Tontonkanianke: Yehova wakaaluka “bintu byonse ku kila muntu” paantu Yesu wakamubueziizia buteeko bonse waikefiizie. (1 Bakor. 15:28, NWT) Kisia paapo, bantu bonse ku kyalo, bakasekelela mu ‘bulubuko [ao uuru] wa bulumba bwa baana bakue Leeza.’ (Bar. 8:21) Kabili, Yehova wakaba kufikilizia mu nzila ipuililikile mupaango wakue wa musita uleepele wa kukita bamalaika ku muulu ni bantu pa kyalo, bonse bakaaluke lupua lukata lukwateene.—Baef. 1:10.
Kisia bebio bintu byonse kukitika, lupua lwa ku muulu ni lwa pa kyalo, lwakeyunvua siani? Kakiine twakatwalilila kuya twali ni nkulu ikata ya kulumbania liina lyakue Yehova. Daudi, kaleemba wa Malumbo, waatungulwilue na mupasi ni kuleemba eevi: “Kansi Yehova Leeza alumbue . . . Liina lyakue lya bulumba lilumbue loonse.” (Malum. 72:18, 19) Mu muyayaya onse, twakatwalilila kumona bintu binge bya leenu, kabili bikinkiziizie bya kutulengia kumutasia Yehova.
Liina lyakue Yehova lilangiliile vili Baba weetu, byonse byali wakita, ni byonse byali wakaba kukita. Musita utuli twatontonkania palua liina lyakue Yehova, tuli twalanguluka ntono yakue. (1 Yoan. 4:8) Lyonse twakaba twalangulukile nangue Yehova waatubumbile paantu waali wakinkiziiziwe na ntono, waafumiizie ngeleelo ya kilubula mulandu paantu waali wakinkiziiziwe na ntono, kabili waalangiliile nangue weene i ali ni nsaambu ya kuteeka paantu waali wakinkiziiziwe na ntono. Inzi loonse twakatwalilila kwimwena nangue Yehova atutonene. Mu muyayaya onse, twakasonseziiwa kukila kumupalama weene, wali Baba weetu ni kumulumbania kupitila nghimbo palua liina lyakue liweeme saana.—Malum. 73:28.
