Leelio lileembo lili lyasonsezia, twalisoma eevi: “Kine wamona mupabi watitikiilue, ni kutionua kwa nsaambu ni bupinguzi mu kalaale kobe, te kupapa palua bebio bintu. Paantu ozo mukulu wa mu buteeko amwenue na mukulu akilile pali weene, kabili kukilisie ni bange bapamuulu kukila babo.”​—Kas. 5:8.

Mukumona kwa fwe bantu, leeli lileembo lilandiilesie bantu bali ni bitebe mu buteeko bwa bantu. Inzi kine twatontonkania saana, mu leelio lileembo muli ni kisinka palwakue Yehova, ni keekio kipalile kutukoselezia ni kututeekia mutima.

Lileembo lya Kasimika 5:8 lilandiile palua mukulu ali watitikila mupabi ni kumutana nsaambu yakue. Mukulu wa mu buteeko apalile kwinika nangue amwenue na muntu unge amukilile mu buteeko ao olia ali ni buviinde kumukila mu buteeko. Kulanda kisinka, kunti kwasaangua ni bange bali ni bifulo byapamuulu kumukila weene. Kya bulanda ni keeki, mu buteeko bwa bantu, babo bakateeka bonse kunti baya babiipile, kabili ni bantu ba pansi kunti baemiiwa mu nzila ingi.

Anzia kine aali kunti yationa saana mutima, kunti twakoseleziiwa kupitila kumana nangue Yehova amwene ata ‘bakulu ba mu buteeko’ bali mukuteeka mu buteeko bwa bantu. Kunti twamuloomba Leeza atukwasie ni kumupoozela bifunda byetu. (Malum. 55:22; Baf. 4:6, 7) Tumanine nangue ‘menso akue Yehova ali aenda kooku ni kooku mwaya kyalo kyonse eevi alangilile maka ku baalia bali ni mutima upuililikile kuli weene.’​—2 Mil Nsi. 16:9.

Lileembo lya Kasimika 5:8 lyatulangulusia bintu vibili byasaangua mu buteeko bwa bantu; lyonse kuli kwasaangua muntu ali ni kifulo kikata kumukila mwinakue. Kintu kikilile kuwaama ni keeki, leeli lileembo lyatulangulusia nangue Yehova i wapamuulu saana, een, Weene i Wabuviinde Bukililepo. Loonu ali mukuteeka kupitila Muana wakue, Yesu Kristu, Likolo wa Bukolo. Wamaka Onse ali mukumona kila kintu ni kila muntu. Weene i apuililikile mukulangilila nsaambu, kabili ni Muana wakue ali wakita enka evio.