1. Kumubombela Yehova kunti kwakola musita ki?

NI MUSITA ki uumwene nangue ukilile kukola kumubombela Yehova? Eba ni musita luuli mu maavia engi ao ni musita luusili na maavia engi? Musita utwasaakaana na maavia kili kyasaangua kyalengele kumuswapila Yehova. Inzi, tuli twakita siani musita utuli mu mutende? Eba, tuli twasaangua twalaba nangue tupalile kumubombela Yehova? Yehova waabasokele ntaanzi Baisraeli nangue keekio kunti kyakitika.​—Mal Miz. 6:10-12.

2. Likolo Asa waabiikile mufuano ki?

² Likolo Asa ni mufuano uweeme saana wa mwalalume waabombiizie mulangue kupitila kumuswapila Yehova kakiine. Waamubombeele Yehova tekubasie mu nsita ibiipile inzi ni nsita ya mutende. Kutendekelasie ku ntendeko mu buikazi bwakue, “mutima wakue Asa waali waipeele onse kuli Yehova.” (1 Mak. 15:14, bulondolozi buli pensina) Asa waalangiliile nangue waali wamubombela Yehova na mutima wakue onse kupitila kupyanga lupupo lwa bufi mu Yuda. Bibilia ili yalanda nangue “waafumiizie ma altare a kyeni ni nkeende yapamuulu, waavungile mapumpu atakatiifu, ni kuponia bimuti bitakatiifu.” (2 Mil Nsi. 14:3, 5) Kabili, waamufumiizie bibi wakue waali wakuutua Maaka pa kifulo kyakue kya kuya wali mwanakazi wa mambo mu bukolo. Juu ya ki? Paantu waali wakinkizia bantu baye bapupa mukisi.​—1 Mak. 15:11-13.

3. Mu leeli lyasi tuli kulondoluela ki?

³ Asa taapuiliilesie pa kufumia lupupo lwa bufi. Waabueziizie lupupo luswetele ni kukwasia bantu ba mu Yuda bamubuelele Yehova. Yehova waamupaalile Asa pamo ni Baisraeli kupitila  kubakwasia bekale mu mutende. * Mu musita wa buteeko bwa miaka likumi bwakue Asa, “kyalo te kyavulunghaniiziwe.” (2 Mil Nsi. 14:1, 4, 6) Mu leeli lyasi, tuli kumona Asa vyaabombiizie ozo musita wa mutende. Kisia, tuli kumona Bakristu ba ku ntendeko vibaakitile nga Asa kupitila kubombia buino musita wa mutende. Kupuako, tuli kwasuka keeki kiipuzio: Kine wikeele mu kyalo kilimo buntungua bwa kupupa, kunti wabombia siani ozo musita wa mutende na mulangue?

4. Nga vilandile lileembo lya 2 Milandu ya Nsiku 14:2, 6, 7, Asa waabombiizie siani musita wa mutende?

⁴ Soma 2 Milandu ya Nsiku 14:2, 6, 7. Asa waababuilile bantu nangue Yehova i ‘waalengele batuuzie mu nkeende yonse kubazyunguluka.’ Asa taamwene nangue ozo musita wa mutende ni wa kutuuzia. Inzi, waatendekele kukuula mizi, bibumba, mpungu, ni kutengenezia miliango ikata. Waabanine bantu ba mu Yuda nangue: “Kyalo kikilisie mu minue yeetu.” Asa waali wakeba kulanda ki? Waali wakeba kulanda nangue bantu baali ni buntungua bwa kwiendela mu kyalo kyabo kibapeelue na Leeza ni kukuula bila kwemiiwa na baluani. Waabasokele bantu babombie buino ozo musita wa mutende.

5. Juu ya ki Asa waakosiizie kisepe kyakue kya balukale?

⁵ Kabili Asa waabombiizie musita wa mutende kukosia kisepe kyakue kya balukale. (2 Mil Nsi. 14:8) Eba, i kulanda nangue taali wamuswapiile Yehova? Ata. Inzi, Asa waali wamanine nangue paantu weene ni Likolo, waali wapalile kuteania bantu palua kinvulunghania kyaali kyapalile paange kuiza. Asa waali wamanine nangue mu muzi wa Yuda temukaba mwalisie mutende lyonse, kabili i vikyakitikile.

6. Bakristu ba ku ntendeko baabombiizie siani musita wa mutende?

⁶ Anzia kine lingi Bakristu ba ku ntendeko baali basaanzua, baali baikala ni musita wa mutende. Basambi baali babombia siani ozo musita? Babo balalume ni banakazi bakisinka baali basimikila mpunda iweeme bila kulekela. Kitabu kya Miilo kili kyalanda nangue baali “bamunakila Mulopue [Yehova, NWT].” Baatwaliliile kusimikila mpunda iweeme, ni pakaako “baali baya bavula.” Kakiine, Yehova waapaalile miilo yabo ya kusimikila kwa mute mu nsita ya mutende.​—Miil Bat. 9:26-31.

7-8. Paulo ni bange baakitile siani musita nkeende luyamonekele? Londolola.

⁷ Bakristu ba ku ntendeko baabombiizie kila nkeende ibaali naayo eevi kusalangania mpunda iweeme. Kyakumuenako kimo ni mutumua Paulo. Lwaali wali mu muzi wa Efeso, waainikile nangue muliango ukata waaizukile kuli weene, ni pakaako waabombiizie ezio nkeende eevi kusimikila ni kukita basambi mu ozo muzi.​—1 Bakor. 16:8, 9.

⁸ Nkeende inge yaailangiliile kuli Paulo ni ku Bakristu bange musita buavia palua kuteetua yando lubwapwisiiziwe mu muaka wa 49, Yesu wasyavyelue. (Miil Bat. 15:23-29) Kisia bupinguzi kupundua ku bilonghaano, basambi baakilile kwaluka ni mute wa kusimikila “mpunda iweeme ya mulandu wakue Yehova.” (Miil Bat. 15:30-35, NWT) Ni kiki kyafuminemo? Bibilia ili yalanda nangue “bilonghaano . . . byaaimeene sinta mu kiketekelo ni bantu baali bakila kuvula kubalua busiku.”​—Miil Bat. 16:4, 5.

9. Leenu mu byalo bingi, aali ili siani, kabili kunti twaiipuzia kiipuzio ki?

⁹ Leenu, mu byalo bingi kunti twasimikila ni buntungua. Eba, wikeele mu kyalo muli buntungua bwa kupupa? Kine ni evio, iipuzie eevi, ‘Ndi mukubombia siani bobo buntungua?’ Nsiku ya mpeleezio ili mukubaleetela nsaansa bantu bakue Yehova paantu bali mukubomba saana mu eezi miilo ikata ya kusimikila ni kusambilizia. Kabili ezio miilo, ili mukubombua mu nzila isinakitikepo mu kyalo nga leenu. (Mark. 13:10) Nkeende ingi izukile ku bantu bakue Yehova.

10. Lileembo lya 2 Timoteo 4:2 lyatukinkizia kukita ki?

¹⁰ Kunti wabombia siani buino musita wa mutende? (Soma 2 Timoteo 4:2.) Wamona siani kine watoosia aali yobe eevi kumona kine weewe ao umo wa mu lupua lobe kunti wakila kubomba miilo ya kusimikila, paange wali painia? Ono te musita wa kwilundikila bunoonsi ao bintu bya kimubili​—paantu tebikatukwasia kupusuka musita wa lyemo likata.​—Tus Maf. 11:4; Mat. 6:31-33; 1 Yoan. 2:15-17.

11. Bakasimika bange bali mukukita siani eevi baviinde kukwasia bantu bengi kunvua mpunda iweeme?

¹¹ Bakasimika bengi bali mukusambilila lulimi lwa leenu eevi baviinde kukwasia bange kusambilila palwakue Yehova. Kuteania kwakue Yehova kuli mukubakwasia kupitila kufumia mpapulo iswapiile Bibilia mu ndimi ingi. Kyakumuenako, mu muaka wa 2010, mpapulo yaali mu ndimi mia isano (500). Leenu, ezio mpendua ya ndimi teisyakilile pa 1000!

12. Bantu bali banoonkelamo siani musita ubali baunvua mpunda ya Bukolo mu lulimi lwabo lwa kavyalilo? Leeta mufuano.

¹² Bantu bali baiunvua siani musita ubali basambilila palwakue Yehova mu lulimi lwabo lwa kavyalilo? Mona vyaaiunvuile nkazi umo waasaangilue ku kulonghaana kwa kalaale mu muzi wa Memphis, Tennessee, ku Amerika. Kooko kulonghaana kwaakitikile mu Kinyarwanda, lulimi luli lwalandua saana mu Rwanda, Kongo (Kinshasa), ni Uganda. Kisia  kulonghaana, ozo nkazi ali walanda Kinyarwanda waalandile eevi: “Nakita kale miaka 17 nakukiile ku Amerika, inzi leeli i lya kuanza kunvuisia buino kulonghaana.” Kakiine, ozu nkazi waakumiiziwe saana ku mutima musita lwaakoonkele ntantiko ya kulonghaana mu lulimi lwakue lwa kavyalilo. Kine aali yobe yazuminizia, eba, kunti wasambilila lulimi lunge eevi ukwasie bantu bange mu kazonga keenu? Eba, bantu kampanda mu kazonga keenu kunti batonesia kunvua mpunda iweeme kine walanda naabo mu lulimi lwabo lwa kavyalilo? Kwikwinda kobe eevi kukita evio te kuya kwali kwa mpuni.

13. Balupua mu kyalo kya Urusi baabombiizie siani musita wa mutende?

¹³ Te balupua bonse bali ni buntungua bwa kusimikila bamwenekele ku bantu. Mu byalo kampanda, balupua tebeezi kusimikila baali ni buntungua paantu buteeko bukaniizie miilo yeetu. Tontonkania palua balupua betu mu kyalo kya Urusi. Kisia miaka ingi bali mukusaanzua, baaitabiilue na buteeko, Muezi wa 3, 1991. Mu ozo musita, mu kyalo kya Urusi kwali bakasimika elufu likumi na sita (16 000) eevi ba Bukolo. Kisia miaka makumi abili, ezio mpendua ya bakasimika yaavulile ni kukila pa mia ni makumi sita elufu (160 000)! Kakiine, balupua betu baabombiizie mulangue musita ubaali ni nkeende ya kusimikila bali ni buntungua. Ozo musita wa mutende te waakokwele. Anzia kine aali yaalulukile mu keekio kyalo, bakilisie ni mute mu lupupo lwakue Yehova. Batwaliliile kumubombela Yehova, babombia kila nzila ibali kupata eevi kumubombela.

14-15. Yehova waabombiizie siani maka akue eevi kumukwasia Asa?

¹⁴ Mu nsiku yakue Asa, musita wa mutende wafikiile kupua. Kisepe kikata saana kya  balukale milioni imo, balumine, baaizile kufuma ku Etiopia. Zera, mukulu wa keekio kisepe kya balukale, waali wasininkiziizie nangue weene pamo ni balukale bakue bali kubakanda Bayuda. Likolo Asa weene, taaswapiile mpendua, inzi waamuswapiile Leeza wakue, Yehova. Asa waapepele walanda eevi: “We Yehova Leeza weetu, tukwasie, paantu tukuswapiile, kabili twaiza kuluana na leeli libumba likata mu liina lyobe.”​—2 Mil Nsi. 14:11.

¹⁵ Anzia kine mpendua ya balukale Baetiopia ibanga yakilile libili mpendua ya balukale bakue Asa, Asa waali wamanine nangue Yehova ali ni maka ni buviinde bwa kukwasia bantu Bakue. Ni Yehova taamulekeleele; kisepe kya Baetiopia kyaakandilue ni nkumbu.​—2 Mil Nsi. 14:8-13.

16. Twamana siani nangue musita wa mutende teukaba kutwalilila lyonse?

¹⁶ Anzia kine te tumanine buino kyakaba kutusaanga kila muntu palwakue mu musita uli waiza, tumanine nangue mutende uli na bantu bakue Leeza leenu te wa loonse. Languluka, Yesu waalandile ntaanzi nangue mu nsiku ya mpeleezio ‘ntundu yonse yakabasuula’ basambi bakue.’ (Mat. 24:9) Enka evio, ni mutumua Paulo waalandile nangue “kubalua muntu atonene kwikala buikazi bwa kumunakila Leeza ni kuya wali mu buumo ni Yesu Kristu, amane nangue wakemiiwa.” (2 Tim. 3:12) Sataana ali ni “kipuki kikata,” kabili tetuviinda kulezia bintu bili byafuma mu kipuki kyakue.​—Nfy. 12:12, NWT.

17. Kiketekelo kyetu kunti kyaeziiwa mu nzila ki?

¹⁷ Leenusie fwe bonse twakaba kusaanga meezio mu kiketekelo kyetu. Kabili kyalo kyakengila mu “bwavia bukata [lyemo likata, NWT] businabeeko kutula kulengua kwa kyalo mpaka bono busiku.” (Mat. 24:21) Mu ozo musita, paange bantu ba mu lupua lwetu bakatwalukila, kabili paange ni miilo yeetu yakakaniiwa. (Mat. 10:35, 36) Eba, weewe pa lobe, wakamuswapila Yehova nga Asa eevi akakukwasie ni kukusuunga?

18. Nga vilandile lileembo lya Baebrania 10:38, 39, ni kiki kyakaba kutukwasia kwiteania musita mutende luwakaba kupua?

¹⁸ Yehova ali mukututeania kimupasi palua bintu byakaba kukitika kooku ku ntaanzi ku twaya. Ali mukubombia “muzia wa kisinka ni  wa maano” eevi kutupeela “byakulia pa musita upalile” eevi kutukwasia tusiale twaimeene sinta mu lupupo lwetu. (Mat. 24:45, NWT) Inzi palwetu, tupalile kukita maka etu onse eevi kukosia kiketekelo kyetu muli Yehova.​—Soma Baebrania 10:38, 39.

19-20. Kukoonkana ni milandu ili mu 1 Milandu ya Nsiku 28:9, ni biipuzio ki bitupalile kwiipuzia, kabili juu ya ki?

¹⁹ Nga vyaakitile Likolo Asa, tupalile “kumukeba Yehova.” (2 Mil Nsi. 14:4; 15:1, 2) Tuli twabamba kukita evio musita utwatendeka kusambilila palwakue Yehova ni kufikiila kubatiziiwa. Tuli twabombia kila nzila ituli naayo eevi kukosia ntono yeetu kuli Yehova. Pakunti tumane kine tuli mukukita evio kunti twaiipuzia eevi: ‘Eba, ndi nasaangua ku kulonghaana lyonse?’ Musita utuli twaya ku kulonghaana kupaangilue na kuteania kwakue Yehova, tuli twapata maka a leenu eevi kutwalilila kumubombela Yehova, kabili tuli twakoseleziiwa na balupua ni bankazi. (Mat. 11:28) Kunti twaiipuzia kabili eevi: ‘Ndi nasambilila Bibilia lyonse? Kine uli mu lupua, eba, mubiikile musita wa kukita lupupo lwa mu lupua kila mulungu? Ao, kine uli we bunke, eba, uli wasaangua waipaangiile musita nga we ali mu lupua? Uli waikwinda kusimikila ni kukita basambi na mute?’

²⁰ Juu ya ki tupalile kwiipuzia bebio biipuzio? Bibilia ili yalanda nangue Yehova ali watoosia malanga ali ku mitima yeetu, kansi ni fwefue tupalile kukita enka evio. (Soma 1 Milandu ya Nsiku 28:9.) Kine twamona nangue tupalile kwalulula mipaango yeetu, aali yeetu ni malanga etu, tupalile kumuloomba Yehova atukwasie. Onu, i musita utupalile kwiteania palua meezio atupembeele kooku ku twaya. Kansi te kulekelela kantu ata kamo kakwanzie kubombia buino musita wa mutende!