1. Yesu waabapeele balobi bana mukupo ki, kabili baakitile siani?

PETRO, Andrea, Yakobo ni Yoane baali basambi babanga bakita miilo ya kuloba nsabi ya kusisia. Tontonkania vibaapapile musita ubaunvuile Yesu wabakupa eevi: “Nkoonke, nakamisambilizia kuloba bantu.” Baakitile siani? Bibilia ili yalanda eevi: “Penka paapo basia kale bukila bwabo bamukoonka Yesu.” (Mat. 4:18-22) Bobo bupinguzi bwaali bwa kupilibula buikazi bwabo loonse. Kuliko kuloba nsabi, baali bakutendeka ‘kuloba bantu,’ i kulanda nangue baali ba kwaluka bakasimika ba mpunda iweeme. (Luk. 5:10) Leenu Yesu ali mukukupa bantu bali ni mutima wa kwitabila, batonene kisinka, bakite enka evio. (Mat. 28:19, 20) Eba, wakitabila mukupo wakue Yesu wa kuloba bantu?

2. Ni baani bapalile kukwata bafiniizie bupinguzi bwa kukita miilo ya kuloba bantu?

² Paange wakikita buyantanzi mu lisambililo lyobe lya Bibilia kabili loonu ukebele kupingula kine kunti waaluka kasimika wa mpunda iweeme. Kine uli mukutwisika kwitabila mukupo wakue Yesu, te kutioka mutima. Kutwisika kobe kulangiliile nangue umwene bupinguzi bobo kuya bwafinine. Kulanda kisinka, Bibilia ili yalanda nangue Petro pamo ni benakue baasiile makila abo “penka paapo.” Inzi, Petro pamo ni lupua wakue te baakwete bobo bupinguzi bila kutontonkanianke. Miezi sita ntaanzi ya paapo, baali basyamwitabiile Yesu kuya wali Masia. (Yoan. 1:35-42) Paange ni weewe teusyasambiliile bingi palwakue Yehova ni Yesu, kabili utonene kutwalilila kukita buyantanzi kimupasi. Inzi, ntaanzi ya kupingula kwaluka kasimika, upalile kutontonkanianke wapoozeleko maano. Ni kiki kyaamukwasiizie Petro, Andrea ni bange kukwata bupinguzi bwabo?

3. Ni mibeele ki ili kukukwasia kukuzia nkulu yobe ya kwitabila mukupo wakue Yesu?

 ³ Basambi bakue Yesu baali ni nkulu ya kukita miilo yabo, baali baimanine buino, baali basipile, kabili baali bakindika mipaango yabo. Bila kutwisika, yenka ezio mibeele i yaabakwasiizie baaluke bafundi mu miilo ya kusimikila mpunda iweeme. Leeli lyasi lili kulondoluela vyuli kuviinda kukuzia mibeele ezio, eevi ukabe kwaluka musambi wakue Kristu ali ni bufundi.

4. Ni kiki kyaamukinkiziizie Petro atendeke kuloba bantu?

⁴ Petro waali wabomba miilo ya kuloba eevi kukwasia lupua lwakue, inzi taali waibombasie paantu ni miilo yakue. Kimwenekele nangue waali watonene miilo ya kuloba. (Yoan. 21:3, 9-15) Kabili waasambiliile kutona miilo ya kuloba bantu. Ni kupitila kukwasiiwa na Yehova, Petro waalukile fundi saana mu ezio miilo.​—Miil Bat. 2:14, 41.

5. Nga vilandile Luka 5:8-11, juu ya ki Petro waatiinine, kabili ni kiki kili kuviinda kutukwasia kine twaisaanga mu ezio aali?

⁵ Tuli twasimikila paantu tumutonene Yehova; kabili ezio i nsaambu ya mana ili yatukinkizia kukita ezio miilo. Kumutona Yehova kunti kwatukwasia kwanzia aali ya kwimona nangue tetuviinda. Musita Yesu lwaamukupile Petro aaluke mulobi wa bantu waamwanine nangue: “Te kutiina.” (Soma Luka 5:8-11.) Petro taatiinine nangue kunti wasaanga maavia kine waaluka musambi. Inzi, waapapiiziwe na kimpezia maano kibaakitiilue na Yesu kya kuloba nsabi, ni Petro waaimwene nangue tapalile kubomba pamo ni Yesu. Nga Petro, ni weewe kunti waunvua muenzo. Paange uli watiina miilo iwakaba waloombua kukita kine waaluka musambi wakue Kristu. Kine ni evio, kuzia ntono yobe kuli Yehova, Yesu, ni  mwinobe. Kine wakita evio, wakaba kukinkiziiwa kwitabila mukupo wakue Yesu wa kwaluka mulobi wa bantu.​—Mat. 22:37, 39; Yoan. 14:15.

6. Ni biki binge bili byatukinkizia kusimikila?

⁶ Mona nsaambu inge ili yatukinkizia kusimikila. Tutonene kukoonka malaizio akue Yesu alandile eevi: “Endo mwaye mukite basambi.” (Mat. 28:19, 20, NWT) Kabili tuli twasimikila paantu bantu “bafundilue mpapa ni kupoozua kooku ni kooku” kabili bakabiile kakiine kusambilila kisinka palua Bukolo. (Mat. 9:36, NWT) Yehova atonene bantu ba misango yonse bafikiile kumana kisinka kisili na kilubo ni kupusuka.​—1 Tim. 2:4.

7. Lileembo lya Baroma 10:13-15 lili lyalangilila siani nangue miilo ya kusimikila ni ya mana?

⁷ Kunti twakinkiziiwa kutendeka kukita eezi miilo ili yapususia bukose, kine twatontonkania bintu bili byafumamo. Mulobi ali wakwata nsabi juu ya kulia ao kusisia, inzi, fwefue tuli ‘twaloba’ bantu, i kulanda nangue, tuli twakita basambi eevi kupususia bukose bwabo.​—Soma Baroma 10:13-15; 1 Tim. 4:16.

8-9. Mulobi apalile kumana ki, kabili juu ya ki?

⁸ Mu nsita yakue Yesu, mulobi Mwisraeli, waali wapalile kumana ni nsabi ya musango ki yapalile kuloba. (Bal. 11:9-12) Kabili waali wapalile kumana ni kupi kwali kuviinda kusaanga nsabi. Lingi nsabi ili yasaangua mu fuasi muli menda aweeme kwikalamo nsabi kabili muli byakulia bingi. Eba, musita wa kuya kulobelapo nsabi nao ni wa mana ku mulobi? Palua musita upalile wa kuloba nsabi, mona vyaalandile Kasininkizia umo wa mu kilila kya Pasifiki, musita lwaamukupile misionere umo baye mu kuloba. Misionere waalandile eevi, “Twakaba kusaakaana lukeele pa nsa ya nevere (9:00), lukele-keele.” Lupua waamwasukile eevi, “Te umanine. Tuli twaya pa musita upalile wa kukwata nsabi, apana pa musita upalile kuli fwefue.”

⁹ Enka evio, ni balobi ba bantu ba mu miaka mia ya ku ntendeko, baali baya mu fuasi mwali mwasaangua bantu kabili pa musita upalile kubasaanga. Kyakumuenako, basambi bakue Yesu baali basimikila ku hekalu, ku ma sinagogi, nsesi kwa nsesi, ni ku nsoko. (Miil Bat. 5:42; 17:17; 18:4) Ni fwefue benka tukabiile kumana fuasi ili yasaangua bantu ba mu kazonga keetu ni musita ubali basaanguako. Tupalile kuya twaleengele kupilibuka ni kusimikila mu nkeende ni pa musita upalile saana kusaanga bantu.​—1 Bakor. 9:19-23.

10. Ni biombo ki bitupeelue na kuteania kwakue Yehova?

¹⁰ Mulobi akabiile kuya waali ni biombo bipalile, kabili apalile kumana vya kubibombia. Ni fwefue mu miilo yeetu tukabiile kuya twali ni biombo bipalile. Kabili tupalile kumana vya kubibombia. Yesu waabapeele basambi bakue malaizio amanikile buino palua miilo ya kuloba bantu. Waababuilile bintu bya kutwama, kwa kuya kusimikila, ni bya kulanda. (Mat. 10:5-7; Luk. 10:1-11) Leenu, kuteania kwakue Yehova kufumiizie Biombo bya Kusambiliziiziako bili mukubomba buino. * Kabili tusambiliziiziwe vya kubombia bebio biombo. Kooko kubeeleziiwa kuli kwatukwasia kuya twali ni kisinka mu miilo ya kusimikila ni kutukwasia kwaluka ni bufundi musita utuli mukusimikila eevi tupate mazabo aweeme mu miilo yeetu.​—2 Tim. 2:15.

11. Juu ya ki balobi ba bantu bapalile kuya basipile?

¹¹ Balobi ba nsabi bapalile kuya basipile. Musita kampanda bali basaakaana ni aali ikolele  mu menda. Lingi bali babomba mu menda mu kafinzi kabili paange mu nkeende muli mwabuuka mwela wa kusitukilasie. Balobi ba bantu ni beene bakabiile kusipa. Musita utwatendeka kusimikila ni kumanika nangue tuli Bakasininkizia Bakue Yehova, kunti twasaanga “mwela” wa kukanzua na bantu ba mu lupua lwetu, kusekua na beneetu, ni mpunda yeetu kukaanua. Inzi, keekio tekiizi kutupapia. Yesu waalandile nangue wakatuma basambi bakue ku bantu bakabakanza ao kubapiinga.​—Mat. 10:16.

12. Nga vilandile Yoshua 1:7-9, ni kiki kili kutukwasia kukuzia mibeele ya kusipa?

¹² Kunti wakuzia siani mibeele ya kusipa? Kya mambo, uye wasininkiziizie nangue Yesu atwaliliile kutungulula eezi miilo wali ku muulu. (Yoan. 16:33; Nfy. 14:14-16) Kingeko, kosia kiketekelo kyobe mu bulayo bwakue Yehova bwa kukupeela bintu biukabiile. (Mat. 6:32-34) Kine wakila kukosia kiketekelo kyobe, ni mibeele yobe ya kusipa ili kukila. Petro pamo ni benakue baalangiliile kiketekelo kikata musita lubaalekeele miilo yabo ya kuloba ni kumukoonka Yesu. Enka evio, ni weewe waalangiliile kiketekelo kikata musita luwaababuilile benoobe ni bantu ba mu lupua lobe nangue, wakitendeka kusambilila pamo ni Bakasininkizia Bakue Yehova, ni kulonghaana pamo naabo! Kakiine waakikita bupilibuko bukata mu lwendo ni mu buikazi bobe eevi wikale kukoonkana ni mafunde a nsaambu akue Yehova. Eevi uviinde kukita evio, waalangiliile kiketekelo ni kusipa. Musita luuli kuya watwaliliile kukuzia mibeele ya kusipa, kunti waya wali ni kisinka nangue  “Yehova Leeza obe ali pamo noobe konse ku waya.”​—Soma Yoshua 1:7-9.

13. Kutontonkania ni kupepa kunti byakukwasia siani kukuzia mibeele ya kusipa?

¹³ Kunti waviinda siani kabili kukuzia mibeele ya kusipa? Pepa eevi upate mibeele ya kusipa. (Miil Bat. 4:29, 31) Yehova wakaba kwasuka mapepo obe kabili takaba kukusia ata kaniini. Eteaniizie lyonse kukukwasia. Kabili, kunti watontonkania Yehova vyaapususiizie bange mu nsita ya kale. Tontonkania kabili vyakikukwasia eevi usipikizie maavia ni vyakikupeela maka eevi uviinde kwalulula buikazi bobe. Kakiine Olia waatunguluile bantu bakue ni kubapisia mu Lyezi lya Kasi kunti wakukwasia kwaluka musambi wakue Kristu. (Kuf. 14:13) Uye wali ni kisininkizio nga keelia kyali na kaleemba umo wa Malumbo waalandile eevi: “Yehova ali ku lubali lwane; nsikaba kutiina. Muntu kunti wankita ki?”​—Malum. 118:6.

14. Wasambilila ki ku bintu byaasaakeene na Masae ni Tomoyo?

¹⁴ Nzila inge ya kukuzia mibeele ya kusipa ni kusambilila Yehova vyakikwasia bantu bali basaangua batalaliile, baaluke ni mibeele ya kusipa. Mona mufuano wakue nkazi umo ali wakuutua Masae. Waali ni busoni kabili waali waimwene nangue taviinda kulanda palua kiketekelo kyakue ntaanzi ya bantu bengi. Kulanda na bantu baasimanine waali wamwene nga kibumba kileepele kyasiviinda kupiluka ata kaniini. Pakaako, waaikwindile saana eevi kukuzia ntono yakue kuli Leeza ni ku benakue. Waatontonkaniizie palua musita utwikeelemo upalile kubomba lubilo, kabili waapepele eevi akile kwaluka ni nkulu ya kusimikila. Waaviindile kwanzia muenzo wakue kabili waabombele waali painia wa loonse. Kabili, Yehova kunti wakwasia bakasimika ba leenu baaluke ni mibeele ya ‘kusipa.’ Mona kintu kyaaimweneene nkazi Tomoyo. Musita lwaatendekele kusimikila nsesi kwa nsesi, muine nsesi wa kuanza waalandile eevi wasamuine: “Nsizi kutona ata kaniini kulanda na Bakasininkizia Bakue Yehova!” Kisia, waaizeele muliango na maka. Tomoyo taatiinine, inzi waamuanine eevi mwinakue ubaali nakue mu kusimikila: “Waunvua vyalanda? Nakiba nalisie nsinalande kantu, inzi weene wainika kale nangue ndi Kasininkizia Wakue Yehova. Naunvua makola saana!” Loonu, Tomoyo ni painia wa loonse.

15. Mibeele ya kukindika mipaango ni kiki, kabili juu ya ki kukita evio ni kwa mana ku Bakristu?

¹⁵ Balobi bali bakindika mipaango yabo, i bali baviinda kukita buino miilo yabo. Mibeele ya kukindika mipaango ilondolwelue kuya yaali “buviinde bwa kwipatikizia we muine eevi ukite bintu beelia bipalile kukitua.” Balobi bali baviinda kukita buino miilo yabo, bali baikwinda kukita bintu bibapalile kukita. Kwa mufuano, bapalile kwikwinda kubuuka paakili, kubomba mpaka bapue miilo ibabuukilanga, ni kusipikizia anzia kine mu menda mwaaluka aali ikolele. Ni fwefue tupalile kuya twali bantu bali bakindika mipaango yeetu eevi tuviinde kusipikizia ni kupua miilo yeetu.​—Mat. 10:22.

16. Ni kiki kili kutukwasia kuviinda kukita bintu bitumwene kuya byakolele?

¹⁶ Tetwizi kupyana mibeele ya kukindika mipaango. Inzi, lingi kabeelela keetu ni kukeba kulezia kukita bintu bitupaangile. Iloombele kwipatikizia eevi tuviinde kukindika mipaango yeetu. Pakaako, tukabiile kukwasiiwa kwibeelezia fwe beene kukita bintu beelia bituli twamona byakolele kukita. Yehova ali watukwasia kukita evio kupitila mupasi wakue utakatiifu.​—Bag. 5:22, 23.

17. Nga vikileembelue mu 1 Bakorinto 9:25-27, Paulo waalandile nangue waakitile ki eevi aviinde kukuzia mibeele ya kukindika mipaango?

 ¹⁷ Mutumua Paulo waali wakindika mipaango. Inzi waaitabiile nangue waali wapalile ‘kwemia’ mubili wakue eevi aviinde kukita bintu biweeme. (Soma 1 Bakorinto 9:25-27.) Waasokele bange baye baipatikizia ni kukita bintu byonse “mu mukinzi ni mu mupaango.” (1 Bakor. 14:40, NWT) Tupalile kukindika mipaango yeetu, eevi tuviinde kusuunga ntantiko yeetu ya kimupasi ibiikile mukati miilo yeetu ya kusimikila ni kusambilizia mpunda iweeme.​—Miil Bat. 2:46.

18. Ni kiki kili kulengia Yehova amone nangue tuli mukubomba buino?

¹⁸ Mulobi ali wainika nangue ali mukukita buino miilo yakue kukoonkana ni buingi bwa nsabi yali kuloba. Inzi miilo ya kusimikila iibeleele. Tetwizi kupingula nangue twakibomba buino paantu twakikwasia bantu bengi kwingila mu kuteania kwakue Leeza. (Luk. 8:11-15) Kine twatwalilila kukita miilo ya kusimikila ni kusambilizia bange, Yehova ali kumona nangue tuli mukubomba buino. Juu ya ki? Paantu tutwaliliile kumunakila Weene ni Muana wakue.​—Mark. 13:10; Miil Bat. 5:28, 29.

19-20. Ni nsaambu ki iibeleele ipalile kutukinkizia kubomba miilo ya kusimikila loonu?

¹⁹ Mu byalo binge, miilo ya kuloba ili yasaangua yaitabiziiziwesie mu miezi kampanda. Mu byalo nga bebio, mulobi ali wakila kubomba lubilo musita lwali wamona nangue ezio miezi te yaya ku kupua. Paantu tuli balobi ba bantu, kuli ni nsaambu inge ipalile kutulengia tusimikile loonu: Mpela ya keeno kyalo yakila kupalama! Musita usyeleko wa kukwasia eezi miilo ili yapususia bukose bwa bantu wakeepa saana. Te kusisiita ao kumona nangue upalile kupembelela musita ukilile kuwaama eevi kukita eezi miilo ya mana.​—Kas. 11:4.

²⁰ Bambilapo leenu kukuzia nkulu yobe ya kusimikila, sambilila bingi palua Bibilia, kuzia mibeele yobe ya kusipa, kabili kindika mipaango yobe. Bomba pamo ni balobi ba bantu, bakilile pa milioni munane. Kine wakita evio wakaba kwaluka ni nsaansa ili yafuma kuli Yehova. (Neh. 8:10) Pingula kubomba na maka obe onse mpaka ku mpela ya ezio miilo. Lyasi likoonkelepo lyakaba kulondoluela nzila itatu mutuli kuviinda kukosia bupinguzi bwetu bwa kutwalilila mu miilo ya kusimikila Bukolo, twali balobi ba bantu.