1-2. Lileembo lya Kasimika 11:6 lipateene siani ni miilo ya kusimikila mpunda iweeme ya Bukolo?

MU BYALO kampanda, bantu bali batona saana kunvua mpunda iweeme musita ubasimikilua. Bali basaangua baipembeele saana! Mu byalo binge, bantu bengi tebeezi kupoozesia maano ku mpunda palwakue Leeza ao Bibilia. Ale mu nkeende muuli waikala? Anzia bantu betabile ao abe, Yehova akebele tutwalilile ni miilo ya kusimikila mpaka musita lwali wakamona muine nangue yakumana.

² Pa musita utantikile Yehova, miilo ya kusimikila yakaba kufikiila kupua, ni ‘mpela yakaba kuiza.’ (Mat. 24:14, 36, NWT) Ntaanzi ozo musita teunafike, kunti twaviinda siani kunakila milandu “te kulekelela minue yobe ituuzie”? *​—Soma Kasimika 11:6.

3. Tuli kulondoluela ki mu leeli lyasi?

³ Lyasi lyakipita lyakilondoluela bintu bina bitupalile kukita eevi kwaluka bafundi mu miilo ya ‘kuloba bantu,’ i kulanda nangue, kwaluka bafundi mu miilo ya kusimikila mpunda iweeme. (Mat. 4:19) Leeli lyasi lili kulondoluela bintu bitatu bili kutukwasia kukosia bupinguzi bwetu bwa kusimikila, anzia kine twasaakaana na aali ki. Tuli kusambilila juu ya ki ni kintu kya mana (1) kutonta maano ku miilo ya kusimikila, (2) kulangilila mibeele ya kupembelela, ni (3) kusuunga kiketekelo kyetu kyakosele.

4. Juu ya ki tupalile kusyala twatontele maano ku miilo itupeelue na Yehova?

⁴ Yesu waalandile ntaanzi palua bintu ni aali byakalangilila nsiku ya mpeleezio kabili ni kulengia paange basambi balekele kutonta maano ku miilo ya kusimikila. Waabanine basambi bakue  ‘batwalilile kuya bakentele.’ (Mat. 24:42, NWT) Mu nsiku yakue Noa kwaali bintu bingi byaalengele bantu bandue kupooza maano ku musoko wakue Noa. Bebio byenka bintu kunti byatupuulula ni fwefue leenu. (Mat. 24:37-39; 2 Pet. 2:5) Pakaako, tutonene kusyala twatontele maano ku miilo itupeelue na Yehova.

5. Lileembo lya Miilo 1:6-8 lili lyalangilila siani nangue miilo ya kusimikila ni ya kukitua mu nzila ikata?

⁵ Leenu, tupalile kupooza saana maano ku miilo ya kusimikila. Yesu waalandile ntaanzi nangue basambi bakue bakatwalilila kusimikila kisia kufua kwakue. Kabili, waalandile nangue bakakita evio kukila vyaakitile weene ntaanzi tanafue. (Yoan. 14:12) Kisia Yesu kufua, basambi bakue bamo baabwelele ku miilo yabo ya kuloba nsabi. Kisia Yesu kutuntumuka, waakitile kimpezia maano kyaakwasiizie basambi bakue bamo kuloba nsabi ingi saana. Waabombiizie ezio nkeende kubasininkiziizia basambi bakue nangue miilo yabo ya kusimikila ni kukita basambi, ni ya mana kukila miilo inge yonse. (Yoan. 21:15-17) Musita uniini ntaanzi Yesu aye ku muulu, waabanine basambi bakue nangue miilo ya kufumia busininkizio elia yaatendekeziizie yakafuma panze pa Israeli. (Soma Miilo 1:6-8.) Kisia miaka kupita, Yesu waamulangiliile Yoane mu kimonua, bintu byakakitika “mu busiku bwakue Mulopue.” * Pakati ka bintu byaamwene Yoane, paali kintu kimo kya kupapia: “Mpunda iweeme ya muyayaya” yaali yasimikilua na malaika ku “mitundu yonse ni mikoa yonse ni bantu ba ndimi yonse ni ntundu yonse.” (Nfy. 1:10; 14:6) Keekio kilangiliile paswetele nangue Yehova atonene tukite eezi miilo ikata ya kufumia busininkizio mpaka ikabe kupua.

6. Ni kiki kili kutukwasia kutonta maano ku miilo ya kusimikila?

⁶ Kunti twatwalilila kutonta maano ku miilo ya kusimikila kine twatontonkania bintu bingi bili mukukita Yehova eevi kutukwasia. Kyakumuenako, ali mukutupeela byakulia bingi  bya kimupasi: mpapulo ifumiiziwe ku mapapie ao mu nzila ya kielektroniki, mpunda ya kutuilizia ao ya kumona ku viideo, ni mpunda mu JW Télédiffusion. Tontonkania: Mu kitente kyetu kya Enternete, muli mpunda mu ndimi ikilile pa 1000! (Mat. 24:45-47) Bantu mu kyalo bakasanikile paantu bali ni malanga a politike apuseene, ma diini apuseene, kabili paantu bange ni banoonsi ni bange bapabi. Inzi babombi bakue Yehova bakilile milioni munane, bali mu buumo bwa mu lupua lwa kyalo kyonse. Kyakumuenako, pa nsiku 19, Muezi wa 4, 2019, Nsiku ya Tano, Bakasininkizia Bakue Yehova mu kyalo kyonse baakwataniiziwe pamo kupitila kumona viideo yaali ni bulondolozi bwa lileembo lya bobo busiku. Bwenka bobo busiku kyungulo, libumba lya bantu milioni makumi abili, mia kenda ni likumi na kenda elufu, makumi ana na kamo (20919041), lyaakolongheene eevi kukita Kibukisio kya lufu lwakue Yesu. Tuli twasonseziiwa kutwalilila kutonta maano ku miilo ya Bukolo musita utuli twatontonkania palua lisyuko lyetu lya kumona, ni kukwasia bintu bya kupapia bili mukukitika mu enu nsiku.

7. Kyakumuenako kyakue Yesu kunti kyatukwasia siani kutonta maano ku miilo ya kusimikila?

⁷ Nzila inge ili kuviinda kutukwasia kutwalilila kutonta maano ku miilo ya kusimikila ni kukoonka mufuano wakue Yesu. Taalekeleele kintu ata kimo kimupuulule kubomba miilo ya kusimikila. (Yoan. 18:37) Taaitabiile musita Sataana lwaamulaile kumupeela “bukolo [bonse, NWT] pamo ni bunoonsi bulimo”; kabili taaeziizie kwitabila musita bange lubaakebele kumwalula likolo. (Mat. 4:8, 9; Yoan. 6:15) Taailekeleele atwamue na lwinso lwa bintu bya kimubili; kabili kukanzua na maka te kwaamulengele onvue muenzo. (Luk. 9:58; Yoan. 8:59) Kulanguluka musoko wakue Paulo kunti kwatukwasia kutwalilila kutonta maano ku miilo ya kusimikila musita kiketekelo kyetu lukyaeziiwa. Waabanine Bakristu bakoonke mufuano wakue Yesu eevi te kunti ‘batope ni kulekela’!​—Baeb. 12:3.

8. Kupembelela kuli na mana ki, kabili juu ya ki ni kwa mana maka-maka loonu?

⁸ Kupembelela ni buviinde bwa kukentelela wateekameene aali kampanda yaluluke. Ibe tutonene aali kampanda ibiipile ipue ao tutonene kintu kampanda kiweeme kifikiliziiwe, tupalile kupembelela. Kabika Habakuki waali wakebele aali ya bungipaani mu kyalo kya Yuda ipue. (Baeb. 1:2) Basambi bakue Yesu baali baswapiile nangue Bukolo buli “kumoneka penka paalia” ni kubafumia pensina pa buteeko bwa Baroma. (Luk. 19:11) Tuli ni nkulu ya kumona Bukolo Bwakue Leeza bwafumiapo bubiifi ni kuleeta kyalo kya leenu kya nsaambu. (2 Pet. 3:13) Inzi, tupalile kupembelela ni kukentelela musita ubiikilue na Yehova. Mona nzila kampanda ili yabombia Yehova eevi kutusambilizia mibeele ya kupembelela.

9. Ni mifuano ki ilangiliile nangue Yehova ali wapembelela?

⁹ Yehova ni mufuano upuililikile wa kupembelela. Waamusiliile Noa musita ulingiliile buino wa kukuula safina ni kubomba wali “kasimika wa nsaambu.” (2 Pet. 2:5, NWT; 1 Pet. 3:20) Yehova waamutuiliziizie Abrahamu musita lwaamwipuziizie lingi palua bupinguzi Bwakue bwa kwinoona bantu babiipile ba mu muzi wa Sodoma ni Gomora. (Kut. 18:20-33) Yehova waakitile miaka ingi saana wabapembeleelesie bantu basyali ba kisinka ba mu ntundu ya Israeli. (Neh. 9:30, 31) Leenu tumwene busininkizio bulangiliile nangue Yehova ali mukupembelela. Ali mukubasiila musita bantu bonse bali watona baaluke babibuza bakue, “balapile bibalo byabo.” (2 Pet. 3:9; Yoan. 6:44; 1 Tim. 2:3, 4) Mufuano wakue Yehova watupeela nsaambu iweeme ya kulangilila mibeele ya kupembelela musita ututwaliliile kusimikila ni kusambilizia.  Kabili ali watusambilizia mibeele ya kupembelela kupitila mufuano umo uli mu Mulandu wakue.

10. Mufuano wakue mulimi ulondolwelue mu Yakobo 5:7, 8, watusambilizia ki?

¹⁰ Soma Yakobo 5:7, 8. Mufuano wa mulimi wa bilimbua watusambilizia vya kulangilila mibeele ya kupembelela. Kulanda kisinka, bimuti binge bili byakula lubilo. Inzi, bimuti bingi, maka-maka bimuti bya mazabo, bili byapua musita waleepele eevi bifikiile kuliwako mazabo. Mu Israeli, kulima ni kukuzia kwaali kwatwama miezi sita eevi. Mulimi waali wabyala mbezu yakue ku ntendeko ya mainza ni kuzombola ku mpela ya mainza. (Mark. 4:28) Kansi tulangilile mulangue kupitila kupala mibeele ya kupembelela yakue mulimi. Inzi, kukita evio tekwizi kusaangua kwaleengele.

11. Kupembelela kunti kwatukwasia siani mu miilo ya kusimikila?

¹¹ Lingi bantu basipuililikile bali batona bamone penka paalia bintu biweeme bifume mu miilo yabo ya mute. Inzi, kine tutonene busitani bwetu bufumie mazabo, tupalile kutwalilila kupoozako maano​—tupalile kutipa, kubyala, kusekwila, ni kwitilila. Ni mu miilo ya kukita basambi, tupalile kutwalilila kubomba na mute. Ili yatwama musita waleepele eevi tufikiile kukwasia basambi ba Bibilia basambilile kulekela mibeele ya bukapatulula ni kubakwasia kulangilila ntono. Mibeele yeetu ya kupembelela yakaba kutukwasia te kunti tutioke mutima musita utwasaanga maavia. Musita bantu kampanda lubaitabila kututuilizia ni kusambilila, tupalilesie kutwalilila kupembelela. Tetuviinda kumupatikizia musambi wa Bibilia azumine. Musita kampanda, basambi bakue Yesu tebaali balenga kwinika mana ya bintu byaali wabasambilizia. (Yoan. 14:9) Tulanguluke nangue fwefue kunti twabyala ni kwitilila, inzi Leeza i ali wakuzia.​—1 Bakor. 3:6.

12. Kunti twalangilila siani mibeele ya kupembelela musita utuli mukusimikila bantu ba mu lupua lwetu basizumiine?

¹² Kunti twamona kyakolele kulangilila mibeele ya kupembelela musita utuli mukusimikila  bantu ba mu lupua lwetu basizumiine. Lifunde lili mu Kasimika 3:1, 7 kunti lyatukwasia. Lili lyalanda eevi: “Kuli . . . musita wa kutalala ni musita wa kulanda.” Lwendo lwetu luweeme kunti lwalengia bantu ba mu lupua lwetu basizumiine batone kunvua mpunda yeetu, inzi tupalile kuya twaiteaniizie kulanda palwakue Yehova kine nkeende yamoneka. (1 Pet. 3:1, 2) Tupalile kusimikila ni kusambilizia kwa mute, inzi, lyonse tupalile kulangilila mibeele ya kupembelela ku bantu bonse​—kubiika mukati ni bantu ba mu lupua lwetu basizumiine.

13-14. Ni mifuano ki kampanda ya bantu baalangiliile mibeele ya kupembelela itupalile kupala?

¹³ Kunti twasambilila mibeele ya kupembelela kupitila mifuano ya bantu bakisinka balondolwelue mu Bibilia ni ba mu nsita yeetu. Habakuki waali wapembeele kwa nkulu bubiifi bupue, inzi waalangiliile nangue waali ni mibeele ya kupembelela musita lwaalandile eevi: “Nakaba kutwalilila kwimana pa nkeende yane pa kumwena.” (Hab. 2:1) Mutumua Paulo waalandile nangue waali ni nkulu ya “kupua” miilo yakue ya kusimikila. Anzia evio waatwaliliile “kufumia busininkizio bukumeene palua mpunda iweeme,” wapembeleele.​—Miil Bat. 20:24, NWT.

¹⁴ Tontonkania mufuano wa ba mulume ni mukazi bamo baasomene masomo a Gileadi ni kutumua mu kyalo kimo mulisie Bakasininkizia baniini kabili mulisie ma diini aniini a Kikristu. Bantu bengi te baali batonene kusambilila Bibilia. Inzi, balupua bange babaasomene naabo, baatuminue mu byalo binge, baali babatumina mpunda palua bantu babaasambiliile naabo Bibilia, baalukile Bakasininkizia Bakue Yehova. Anzia kine bantu bengi ba mu kazonga kaabo tebaali baitabila, babo ba mulume ni mukazi baatwaliliile kusimikila bapembeleele. Kisia kupua miaka munane bali mukusimikila mu kazonga kaali kamwenekele nangue temuli buyantanzi, baafikiile kupata nsaansa musita lubaamwene musambi umo pakati ka basambi babo, wabatiziiwa. Mifuano ezio ya kale ni ya leenu yatusambilizia ki? Babo babombi bakisinka te baalukile bananghani ao kulekelela minue yabo ituuzie, ni Yehova waapaalile mibeele yabo ya kupembelela. Kansi “tupale baalia bali bapyana bulayo kupitila kiketekelo ni kupembelela.”​—Baeb. 6:10-12, NWT.

15. Kiketekelo kili kyakosia bupinguzi bwetu bwa kusimikila. Mu nzila ki imo?

¹⁵ Tuli twasaangua ni kiketekelo mu mpunda ituli twasimikila, pakaako tuli twatona kubabuila bantu bengi palua mpunda ezio kine kyakitika. Tuswapiile bulayo buli mu Mulandu Wakue Leeza. (Malum. 119:42; Is. 40:8) Tuli mukumona bukabika bwa Bibilia bwali mukufikiliziiwa mu eno nsiku yeetu. Tuli mukwimwena buikazi bwa bantu vibuli mukwaluluka ni kukila kuwaama musita ubatendeka kubombia masoke ali mu Bibilia. Keekio, kyakila kutusininkiziizia nangue mpunda iweeme ya Bukolo i mpunda ikabiile kila muntu kunvua.

16. Kukoonkana ni Malumbo 46:1-3, kumuketekela Yehova kuli kwakosia siani bupinguzi bwetu bwa kusimikila? Kumuketekela Yesu ni kwene kuli kwakosia siani bupinguzi bwetu bwa kusimikila?

¹⁶ Kabili tuli ni kiketekelo muli Yehova, Nsulo ya mpunda ituli twasimikila, kabili tuli ni kiketekelo muli Yesu, abiikilue na Yehova kuya wali Likolo wa Bukolo. (Yoan. 14:1) Anzia tusaakaana na maavia a siani, lyonse Yehova wakaba kuya wali kibutukilo ni maka etu. (Soma Malumbo 46:1-3.) Kukila pakaako, tuli ni kisinka nangue Yesu ali mukutungulula miilo ya kusimikila wali ku muulu, wabombia maka ni buviinde bwapeelue na Yehova.​—Mat. 28:18-20.

17. Leeta mufuano ulangiliile juu ya ki tupalile kutwalilila kusimikila.

¹⁷ Kiketekelo kili kyalengia tukile kuswapila  nangue Yehova kunti wapaala miilo yeetu ya mute, musita kampanda mu nzila itusiswapiile. (Kas. 11:6) Kyakumuenako, kila busiku, maelufu a bantu bali bamona ma meza ni ma prezantware a kwenzia atuli twabiikapo mpapulo yeetu. Eba, ezio nzila ili yaleeta mazabo aweeme? Kakiine! Lupapulo lwa Huduma Yetu ya Ufalme, lwa Muezi wa 11, 2014, lwaalandile palua musambi umo mukaziana wali wasoma ku iniversite, waali wakeba kuleemba lyasi limo palua Bakasininkizia Bakue Yehova. Waali waandua kupata kuli Nsesi ya Bukolo, inzi waamwene meza yaali yatantikiluepo mpapulo, kabili waapatile ni mpunda ya kubiika mu lyasi lyakue. Kupuako, waafikiile kwaluka Kasininkizia abatiziiziwe, leenu ali wabomba wali painia wa loonse. Bebio bintu byaakitikile, byatusonsezia kutwalilila kusimikila paantu bili mukulangilila nangue kukilisie ni bantu bakabiile kunvua mpunda ya Bukolo.

18. Juu ya ki tuli ni kisinka nangue miilo ya kusimikila Bukolo yakaba kupua nga vitantikile Yehova?

¹⁸ Kunti twasininkizia nangue miilo ya kusimikila yakapua pa musita utantikilue. Mona vikyakitikile mu nsiku yakue Noa. Yehova waalangiliile nangue weene ni mufuano upuililikile wa kukindika nsita. Miaka mia ni makumi abili (120) ntaanzi, waatantikile nsita yakatendelapo Kibunda. Kisia miaka ingi kupita, Yehova waamwanine Noa akuule safina. Paange Noa waapuile miaka makumi ana (40) ao makumi asano (50) eevi wali mukubomba na maka, ntaanzi Kibunda tekinafike. Anzia kine bantu tebaali bamunvua, weene waatwaliliile kubasoka mpaka musita Yehova lwaalandile nangue musita wa kwingizia banama mu safina wafika. Kupuako, pa musita wabanga watantikile, “Yehova waaizeele muliango.”​—Kut. 6:3; 7:1, 2, 16.

19. Ni bintu ki bitwakemwena kine te tulekeleele minue yeetu ituuzie?

¹⁹ Leenusie Yehova wakaba kutubuila nangue miilo ya kusimikila yakumana. Kupuako, wakaba kwinoona kyalo kyakue Sataana ni kuleeta kyalo kya leenu kyakabamo bantu bali bamukindika. Kansi, mukupembelela ozo musita, tumupale Noa, Habakuki, ni bange basyaalekeleele minue yabo ituuzie. Kansi tutwalilile kutonta maano etu ku miilo ya kusimikila, tulangilile mibeele ya kupembelela ni kusuunga kiketekelo kyakosele muli Yehova ni mu bulayo bwakue.