Mona Bibilia viili yaasuka bebio biipuzio.

Lileembo lya Miilo 24:15, lili lyatubuila nangue kwakaba kuya kwali “kutuntumunua kwa bantu ba nsaambu ni kwa bantu basili ba nsaambu.” Bantu ba nsaambu i baalia babanga bamunakila Leeza ntaanzi ya kufua kwabo, pakaako meena abo aleembelue mu kitabu kya bukose. (Mal. 3:16) Bantu basili ba nsaambu, babiikile mukati baalia baafuile bila kupata fuasi itosiizie ya kusambilila palwakue Yehova. Pakaako, meena abo te aleembelue mu kitabu kya bukose.

Yoane 5:28, 29, ilandiile palua byenka bebio bikundi bibili bizimbuilue mu lileembo lya Miilo 24:15. Yesu walanda nangue “baalia baakitile bintu biweeme” “bakatuntumunua palua bukose, ni baalia baakitile bintu bibiipile bakatuntumunua palua bupinguzi.” Bantu ba nsaambu, baakitile bintu biweeme ntaanzi ya kufua kwabo. Bakatuntumunua palua bukose, paantu meena abo asiele aleembelue mu kitabu kya bukose. Inzi bantu basili ba nsaambu, baali bakita bintu bibiipile ntaanzi ya kufua kwabo. Bakatuntumunua palua bupinguzi. Meena abo teanaleembue mu kitabu kya bukose, kabili bakapita mu kipindi kya bupinguzi ao kipindi kya kukentelelua buino ni kweziiwa palua lwendo lwabo. Mu ozo musita, bakaaluka ni fuasi ya kusambilila palwakue Yehova ni fuasi ya kuleembua meena abo mu kitabu kya bukose.

Nfyulo 20:12, 13, ilondoluele nangue bonse bakatuntumunua bakaba bakabiile kunakila bintu bileembelue mu “kitabu kya bukose kya kukuunzua,” i kulanda mizilo ya leenu yakaba yabomba mu kyalo kya leenu. Baalia baakandua kunakila, bakenoonua.​—Is. 65:20.

Lileembo lya Danieli 12:2, lyaalandile nangue bamo pakati ka baalia baleele mu lufu, bakabuuka “ku bukose bwa loonse ni bange ku kupata busoni ni ku kusuulua loonse.” Ozu mulongo wa lileembo, ulandiile palua bupinguzi bwa kupeleezia bwa baalia bakatuntumunua. Bakapata “bukose bwa loonse” ao “kusuulua loonse.” Pakaako, ku mpela ya miaka elufu (1 000), bamo bakapata bukose bwa loonse, ni bange kwinoonua loonse.​—Nfy. 20:15; 21:3, 4.

Mona ozu mufuano. Aali ya beebi bikundi bibili kunti yapalaniiwa na baeni batonene kwikala mu kyalo kinge. Bantu ba nsaambu kunti bapalana na baalia bali kupeelua mukanda wa kwitabiziiwa kubombela moomo ao mukanda wa kwitabiziiwa kwikala moomo musita waleepele eevi kubapeela nsaambu ya kuya bamanikile, kabili bali ni buntungua mu bintu paleepale. Inzi, bantu basili ba nsaambu, kunti bapalana na baeni bali kupeelua mukanda wa kwikala mu kyalo kya bueni mu musita uniini ao mukanda wa kwendela mu kyalo kya bueni. Ntaanzi ya kwitabiziiwa kutwalilila kwikala mu kyalo kya bueni, baeni ba evio bapalile kulangilila bo beene nangue bekeele kukoonkana ni mizilo ya keekio kyalo. Evio vyenka, kyakaloomba baalia bantu basili ba nsaambu bakatuntumunua, bakanakile mizilo yakue Yehova ni kwilangilila kuya bali bantu ba nsaambu eevi bakasiale mu Paradiso. Kabili, anzia kine ku ntendeko baeni bali kupeelua mukanda wa siani palua kwingila mu kyalo kinge, bamo kunti bafikiila kupeelua buraia ni bange kukumbua. Bupinguzi bwa kupeleezia buli kuya bwaswapiile aali ni lwendo lwabo mu kyalo kya bueni. Evio vyenka, bupinguzi bwa kupeleezia ku baalia bonse bakatuntumunua bwakaswapila bukisinka ni lwendo lwabo mu kyalo kya leenu.

Yehova te Leeza sie wa nkumbu, inzi kabili weene ni Leeza wa nsaambu. (Mal Miz. 32:4; Malum. 33:5) Yehova wakalangilila ntono yakue kupitila kubatuntumuna bantu ba nsaambu ni bantu basili ba nsaambu. Wakaba wakenteleele bonse eevi bakabe banakila mafunde akue palua kiweeme ni kibiipile. Baaliasie bakafikiila kumutona weene, ni kwikala kukoonkana ni mafunde akue i baketabilua kutwalilila kwikala mu kyalo kya leenu.