Kukoonkana ni lileembo lya 1 Bakorinto 15:8, Paulo waalandile eevi: “Pa mpeleezio, ni neene wenka naamumwene anzia kine ndi nga muntu waavyelue wali kabisi.” Mu miaka yaapitile, twali twalondolola nangue kipalile Paulo, waali walandila palua kintu kyaaimweneene musita lwaamumwene Yesu mu kimonua wali mu bulumba bwa ku muulu. Kibanga kyali nga evelia weene waapeelue lisyuko lya kuvyalua, ao kutuntumunua ku bukose bwa kimupasi ntaanzi ya nsita, ma mia a miaka ntaanzi butuntumuko bwa ozo musango tebunakitike. Anzia evio, kisia kusambilila saana palua ozo mulongo, kyakimoneka nangue kipalile kwalulula bulondolozi bwa ozo mulongo.

Kakiine ni kisinka nangue paapa, Paulo ali mukulandila palua keelia kyaakitikile pa kuzumina kwakue. Inzi, waali wakeba kulanda ki musita lwaalandile nangue “waavyelue wali kabisi”? Keekio kiipuzio kunti kyaasukua mu nzila ingi.

Kuzumina kwakue Paulo kubanga kwali kwa kusitukila, kabili keekio kyaali kintu kikolele kyaaimweneene. Kuvyalua kwa bukabisi, lingi kuli kwaiza mukusitukila. Musita Sauli, (olia waaizile kumanika mu liina lya Paulo) lwaali waya ku Damasko kwemia Bakristu, taali waswapiile nangue ali kumona kimonua kyakue Yesu atuntumwinue. Kuzumina kwakue Paulo kwaali kwa kupapia, apanasie kuli weene, inzi kabili ni ku Bakristu baali wapaangile kuya kwemia mu ozo muzi. Kukila pakaako, ezio aali yaaimweneene ibanga yaaviizie saana. Keekio kyaalengiizie menso akue andue kumona mu musita uniini.​—Miil Bat. 9:1-9, 17-19.

Waazumiine pa “musita usipalile.” Mulandu wa Kigiriki upilibuilue na bulanzi “muntu waavyelue wali kabisi,” kunti wapilibulua kabili nangue “muntu waavyelue pa musita usipalile.” Mpilibulo ya The Jerusalem Bible, ipilibuile eevi: “Inzi kibanga kyali nga neene waavyelue musita lukusibanga kwali muntu ata umo wali waswapiile evio.” Musita Paulo lwaazumiine, Yesu waali wasyabuelele ku muulu. Kupusana ni baalia bazimbuilue na Paulo mu milongo itangiile, ntaanzi Yesu atuntumwinue tanaye ku muulu, Paulo taamumwene. (1 Bakor. 15:4-8) Kumoneka kwakue Yesu kusiali kwaswapiilue na Paulo, kwaamupeele weene fuasi ya kumumona Yesu, anzia kine kyaamonekele kuya kyali pa “musita usipalile.”

Waali walandila palwakue muine mu nzila ya kwikoosia. Basomi bange balandile nangue bobu bulanzi bubombiiziwe paapa na Paulo, kunti bwaunvuika nga evelia waali wailuula. Kine keekio i kyaali kyabiikile Paulo mu maano, kansi waali walangilila nangue taali wapalile kupeelua lisyuko lya kwaluka mutumua. Kakiine, waatwaliliile kulanda eevi: “Kulanda kisinka, nkepeesie kukila batumua bonse. Kabili nsipalile kukuutua mutumua paantu naali naemia saana kilonghaano kyakue Leeza. Inzi, ndi mutumua kupitila mu buwaame bwakue Leeza.”​—1 Bakor. 15:9, 10.

Pakaako, kimonekele nangue Paulo, kunti waya walandila Yesu vyaamonekele kuli weene mu nzila isiswapiilue kabili ya kusitukila, musita usyali waswapiilue wa kuzumina kwakue, ao nangue taali wapalile kumona keekio kimonua kya kupapia. Anzia kine ni kiki kyaalengele alande evio, kintu kyaaimweneene Paulo, kibanga kyakindeeme saana kuli weene. Keekio kyaamusininkiziizie bila kutwisika nangue Yesu waatuntumukile kufuma ku bafuile. Kakiine, musita lwaali wabasimikila bange palua kutuntumunua kwakue Yesu, lingi waali walandila palua keekio kintu kyaamusaangile mu nzila isiswapiilue.​—Miil Bat. 22:6-11; 26:13-18.