Lyasi Lya Kusambilila Lya 41
Vya Kukwasia Basambi ba Bibilia Bafikiile Kubatiziiwa—Seemu ya 1
“Mulangiliilue kuya mwali mukanda wakue Kristu waaleembelue na fwefue twali babombi.”—2 BAKOR. 3:3, NWT.
LWIMBO 78 “Kusambilizia Mulandu Wakue Leeza” (Lwa Kiswahili)
KIFUPI KYA LYASI *
Kakiine, kilonghaano kyonse kili kyasaansamuka saana kumona musambi wa Bibilia u bakifikiila kutona, wabatiziiwa! (Mona lifungu lya 1)
1. Lileembo lya 2 Bakorinto 3:1-3 lili lyatukwasia siani kwinika nangue kukwasia musambi wa Bibilia afikiile kubatiziiwa ni kintu kikindeeme? (Mona foto ili ku ntendeko ya kazeeti.)
ULI waiunvua siani musita luuli wamona musambi wa Bibilia wa mu kazonga ka kilonghaano kyenu wabatiziiwa? Kakiine mutima obe uli wasaansamuka. (Mat. 28:19) Kabili kine weewe i wakiba wasambilila pamo ni musambi wa leenu, kakiine uli kusaansamuka saana kwimwena musambi ozo wali mukubatiziiwa! (1 Bat. 2:19, 20) Buyantanzi bwa kimupasi ni lubatizio lwakue, bilangiliile nangue weewe ni balupua mu kilonghaano mwakikita miilo ikata kabili ya mute eevi kumukwasia. Pakaako, kunti twabakuuta babo basambi babatiziiziwe nangue ni “mikanda ya kwitabiziiwa” iweeme, apanasie kwa baalia baasambiliile naabo, inzi ni kwa kilonghaano kyonse.—Soma 2 Bakorinto 3:1-3 *.
2. (a) Ni kiipuzio ki kya mana kitupalile kutontonkania saana, kabili juu ya ki? (b) Lisambililo lya Bibilia ni kiki? (Mona bulondolozi buli pensina.)
2 Ni kintu kya nsaansa kumana nangue mu miaka ina yakipita, mpunda ya masambililo a Bibilia * milioni likumi (10 000 000) mukulingilila, yakiba yafumiiwa kila muezi mu kyalo kyonse. Kabili ni mu ezio yenka miaka, mukulingilila, bantu bakilile pa mia ibili ni makumi munane elufu (280 000), bakiba babatiziiwa kila muaka ni kwaluka Bakasininkizia bakue Yehova, ni basambi bakue Yesu Kristu. Kunti twakwasia siani azo mamilioni a masambililo a Bibilia afikiile kubatiziiwa? Paantu Yehova atwaliliile kubapeela bantu musita ni nkeende ya kwaluka basambi bakue Kristu, tukabiile kukita maka etu onse eevi kubakwasia baleenge bakite buyantanzi ni kubatiziiwa. Emue, musita waya saana!—1 Bakor. 7:29a; 1 Pet. 4:7.
3. Ni kiki kituli kulondoluela mu leeli lyasi palua kutungulula masambililo a Bibilia?
3 Paantu kukita basambi ni kintu kya mana saana leenu, Kabungue Kali Katungulula kaakiipuzia ma biro a ku misambo bintu bitupalile kukita eevi kukwasia basambi ba Bibilia bakite buyantanzi ni kufikiila kubatiziiwa. Mu leeli lyasi tuli kusambilila kupitila bapainia, bamisionere, ni bakangalila bali ni bufundi, kabili twakaba kusambilila kupitila beene ni mu lyasi likoonkelepo. * (Tus Maf. 11:14; 15:22) Balondoluele bintu bipalile kukitua na bakasambilizia ba Bibilia pamo ni basambi babo eevi kukita lisambililo lya Bibilia limukwasie saana musambi. Mu leeli lyasi, tuli kulondoluela bintu bisano bipalile kukita musambi eevi atwalilile kukita buyantanzi mpaka kufikiila kubatiziiwa.
SAMBILILE KILA MULUNGU
Mwipuzie musambi kine kunti mwaikala nkeende kampanda eevi kusambilila Bibilia (Mona lifungu lya 4-6)
4. Ni kiki kitupalile kwinika palua lisambililo lili lyakituasie mu musita uniini ao bantu baimeenesie ku muliango?
4 Balupua ni bankazi bengi, bali batungulula masambililo a Bibilia mu musita uniinisie kabili ni lunge baimeenesie ku muliango wa muine nsesi. Anzia kine ezio ni nzila ya kutendeka kukuzia nkulu ya muine nsesi palua Bibilia, bobo bulondolozi buli bwasaanguasie bwali bufupi, kabili lingi tebuizi kukitua kila mulungu. Eevi kukila kusonsezia nkulu ya muine nsesi, bange bali baloomba nimero ya telefone eevi kumukuuta ao kumuleembela ni kulondolola nakue Lileembo kampanda ntaanzi ya kuya kumwendela. Bulondolozi bwa ozo musango kunti bwatwalilila miezi kampanda inzi bila kufikiila ku lisambililo lya Bibilia lili lyakita buyantanzi. Kine muntu wasambiliziiwa Bibilia mu ezio nzila, kakiine, kunti kyakola kukita buyantanzi, kwipeela ni kufikiila kubatiziiwa.
5. Kunti twabombia siani milandu yakue Yesu ili mu Luka 14:28-33 eevi kukwasia basambi betu ba Bibilia?
5 Musita umo, Yesu waalondoluele kupitila mufuano, kintu kipalile kukita muntu kine akebele kwaluka musambi wakue. Waalandile palua muntu atonene kukuula lupungu ni palua likolo akebele kuluana bului. Yesu waalandile nangue olia akebele kukuula, apalile “kwikalanke pansi . . . amone kine akwete nfolanga yakumeene” eevi aviinde kupua kukuula lupungu, kabili nangue, ni likolo apalile “kwikalanke ni kwipingula” kine libumba lyakue lya balukale kunti lyaviinda kuluana. (Soma Luka 14:28-33.) Enka evio, Yesu waali wamanine nangue, muntu akebele kwaluka musambi wakue, apalile kutoosia buino beelia byapalile kukita eevi kwaluka musambi wakue. Pakaako, kunti twabakwasia babo basambi betu ba Bibilia bakite nga vyaalandile Yesu, kupitila kubakinkizia tuye twasambilila naabo kila mulungu. Kunti twakita siani evio?
6. Kunti twaezia kukita siani eevi masambililo etu akite buyantanzi?
6 Tendeka kuleepiako bobo bulondolozi bumuli mwakita mwaimeene ku muliango ao mu musita uniinisie. Kuliko kulondoluela lileembo limo sie kila musita luuli wamwendela, biikapo ni lileembo linge. Musita muine nsesi lwamona buino kukita bulondolozi buleepele, mwipuzie kine kunti mwaikala nkeende kampanda ni kutwalilila ni bulondolozi. Kyasuko kili kuleeta muine nsesi kili kulangilila kine atonene kakiine kusambilila Bibilia. Kabili, eevi akile kukita buyantanzi, kunti wamwipuzia kine kunti watona kusambilila libili mu mulungu. Anzia evio, kukila pa kusambilila nakue limo ao libili kila mulungu, kuli bintu bingi bipalile kukitua.
TEANIA KILA LISAMBILILO
Teania buino lisambililo lya Bibilia, kabili mulangilile musambi vya kuteania (Mona lifungu lya 7-9)
7. Kasambilizia kunti wateania siani buino kila lisambililo lya Bibilia?
7 Weewe kasambilizia, upalile kuteania buino kila lisambililo. Kunti watendeka na kusoma mpunda ya kuya kusambilila, ni kukeba maleembo. Mana buino bintu bikata bilandiluepo. Tontonkania palua mutue wa lyasi, mitue iniini, biipuzio, maleembo alandilue kusoma, ma foto, ni viideo ili kukwasia kulondolola leelio lyasi. Mubiike musambi obe mu maano, ni kutontonkania ntaanzi vyuli kuya ulondolole nakue mu nzila ileengele kabili yunvuikile eevi musambi onvuesie lubilo ni kubombia bebio bintu.—Neh. 8:8; Tus Maf. 15:28a.
8. Milandu yakue mutumua Paulo ili mu Bakolosai 1:9, 10 yatusambilizia ki palua kubapepela basambi betu ba Bibilia?
8 Mu kuteania kobe, pepa kuli Yehova palua musambi ni bintu byakabiile. Muloombe Yehova akukwasie kubombia Bibilia eevi kusambilizia ni kukumia mutima wakue musambi. (Soma Bakolosai 1:9, 10 *.) Tontonkania ntaanzi kintu kili kuya kyakolele ku musambi kunvua ao kwitabila. Uye wabiikile mu maano nangue, kikata kyobe ni kumukwasia akite buyantanzi ni kubatiziiwa.
9. Kasambilizia kunti wamukwasia siani musambi kuteania lisambililo lyakue?
9 Tuli twasaangua twaswapiile nangue kupitila kukita lyonse lisambililo lya Bibilia, musambi wa Bibilia kunti wamusantila Yehova ni Yesu palua beelia bibaakitile, kabili kunti watona kumana bingi. (Mat. 5:3, 6) Eevi anoonkelemo mu lisambililo lya Bibilia, musambi apalile kupooza maano saana ku beelia byali mukusambilila. Eevi kukita evio, mubuile juu ya ki ni kintu kya mana kuteania kila lisambililo kupitila kusoma lyasi ntaanzi, ni kutontonkania vya kubombia bintu byali mukusoma. Kasambilizia kunti wamukwasia siani? Teania lyasi limo pamo nakue eevi amane vya kuteania. * Mubuile vya kupata biine byasuko bya biipuzio bili mu lisambililo, kabili mubuile nangue kubiika kisiko pensina milandu ikatasie kunti kwamukwasia kulanguluka kyasuko. Kisia, mwane aye waleeta byasuko mu milandu yakue muine. Kine weene wakita evio, weewe kasambilizia kunti waviinda kwinika buviinde bwakue bwa kunvua mpunda ya kusambilila. Inzi, kuli ni kintu kinge kiupalile kumusonsezia musambi akite.
MUSAMBILIZIE KULANZIANA NI YEHOVA KILA BUSIKU
Musambilizie musambi obe wa Bibilia vya kulanziana ni Yehova (Mona lifungu lya 10-11)
10. Juu ya ki kusoma Bibilia kila busiku ni kwa mana saana, kabili musambi apalile kukita ki eevi anoonkelemo saana?
10 Musambi apalile kusambilila pamo ni kasambilizia wakue kila mulungu, inzi, kunti wanoonkelamo kupitila kukita bintu kampanda ye muine kila busiku. Apalile kulanziana ni Yehova. Kunti wakita siani evio? Kupitila kumutuilizia Yehova ni kulanda nakue. Kunti wamutuilizia Leeza kupitila kusoma Bibilia kila busiku. (Yosh. 1:8; Malum. 1:1-3) Mulangilile vya kubombia “Ntantiko ya Busomi bwa Bibilia” ili mu jw.org, mu lulimi lwa Kiswahili. * Eevi kumukwasia anoonkelemo saana mu busomi bwakue bwa Bibilia, mukinkizie aye watontonkania saana beelia byali wasambilila mu Bibilia palwakue Yehova ni vyali kubibombia mu buikazi bwakue.—Miil Bat. 17:11; Yak. 1:25.
11. Musambi kunti wamana siani vya kupepa buino, kabili juu ya ki ni kintu kya mana aye wapepa kuli Yehova lingi?
11 Mukinkizie musambi obe kulanda pamo ni Yehova kupitila kupepa kila busiku. Pepa mapepo a kufuma ku mutima, pa kutendeka ni pa kupeleezia kila lisambililo wali pamo ni musambi, kabili wamuzimbula. Kupitila kutuilizia mapepo obe, wakaba kusambilila vya kupepa kuli Yehova Leeza kufuma ku mutima kabili mu kisinka, kupitila mu liina lyakue Yesu Kristu. (Mat. 6:9; Yoan. 15:16) Tontonkania kusoma Bibilia kila busiku (kumutuilizia Yehova) ni kupepa (kulanda ni Yehova) vikwakaba kumukwasia musambi obe kumupalama saana Leeza! (Yak. 4:8) Kine musambi wakita evio kila busiku, keekio kyakaba kumukwasia kukita buyantanzi, kwipeela ni kubatiziiwa. Ni kiki kinge kyakaba kumukwasia?
MUKWASIE KUKUZIA BUKIBUZA BWAKUE PAMO NI YEHOVA
12. Kasambilizia kunti wamukwasia siani musambi kukuzia bukibuza bwakue pamo ni Yehova?
12 Beelia bili byasambilila musambi mu Bibilia te bipalilesie kukumia mu maano akue, inzi kabili, bipalile kukumia ni ku mutima wakue. Juu ya ki? Ni paantu tutonene musambi weetu asambilile palwakue Yehova, inzi kabili, beelia byali wasambilila bipalile ni kukumia ku mutima wakue eevi atone kubibombia. Yesu waasambiliziizie bintu bingi, ni bantu baali batona kumutuilizia. Inzi, baali batona kumukoonka weene paantu waali wakumia ni ku mutima wabo. (Luk. 24:15, 27, 32) Musambi obe apalile kumumona Yehova kuya wali Muntu kakiine, olia wali kuviinda kukita nakue bukibuza, ni kumumona kuya Wali Baba wakue, Leeza wakue, kabili Kibuza wakue. (Malum. 25:4, 5) Musita wa lisambililo lya Bibilia, mukwasie musambi enike mibeele yakue Leeza. (Kuf. 34:5, 6; 1 Pet. 5:6, 7) Mu maasi onse amuli kuya mwasambilila, uye watonta maano ku mibeele yakue Yehova. Mukwasie musambi obe enike mibeele iweeme yakue Yehova, nga evelia, ntono, kuwamiziana ni nkumbu. Yesu waalandile nangue “mulao wa mambo ni utaniisiepo,” ni “kutona Mulopue [Yehova] Leeza obe.” (Mat. 22:37, 38) Mukwasie musambi obe amutone saana Yehova kufuma ku mutima wakue.
13. Londolola vya kukwasia musambi wa Bibilia asambilile palua mibeele yakue Yehova.
13 Mu bulondolozi bobe, mubuile musambi juu ya ki umutonene saana Yehova. Keekio kunti kyamukwasia musambi obe kwinika nangue ni weene akabiile kukuzia bukibuza bwakue bunke pamo ni Leeza, ni kumutona. (Malum. 73:28) Kwa mufuano, mu lupapulo lwa lisambililo ao mu mulongo wa Bibilia, muli ni kantu kampanda kaakikumia mutima obe kalangiliile ntono, mulangue, nsaambu, ao maka akue Yehova? Mubuile musambi kaako kantu, kabili mubuile nangue kaako kali pakati ka bintu bilengele weewe umutone Baba weetu wa ku muulu. Kabili kuli kintu kinge kikabiile kukita kila musambi wa Bibilia eevi afikiile kukita buyantanzi ni kubatiziiwa.
MUKINKIZIE ABAMBE KULONGHAANA
Kinkizia musambi obe atendeke kulonghaana bila kukokola! (Mona lifungu lya 14-15)
14. Milandu ili mu Baebrania 10:24, 25 palua kulonghaana, kunti yamukwasia siani musambi wa Bibilia akite buyantanzi?
14 Fwe bonse tutonene basambi betu ba Bibilia bakite buyantanzi ni kubatiziiwa. Nzila imo ya mana ya kukita evio ni kubakinkizia batendeke kulonghaana. Bakasambilizia bali ni bufundi, bali balanda nangue basambi bali batendeka kulonghaana bila kukokola, bali bakita buyantanzi lubilo saana. (Malum. 111:1) Bakasambilizia bamo bali bababuila basambi babo nangue bintu binge bingi bibasiizi kusambilila mu lisambililo, kunti babisambilila ku kulonghaana. Soma Baebrania 10:24, 25 ni kumulondoluela bintu byali kunoonkelamo kine watendeka kuiza ku kulonghaana. Mulangisie viideo Kiki Kiakitika ku Nsesi ya Bukolo? * Mukwasie musambi obe wa Bibilia amone kulonghaana kuya kwali kintu kya mana mu buikazi bwakue.
15. Kunti twakita ki eevi kumukwasia musambi atendeke kulonghaana lyonse?
15 Kunti wakita siani kine musambi obe tanaizepo ata limo ku kulonghaana ao ali waizasie limo-limo? Mubuile wasaansamukile kintu kampanda kiwakisambilila ku kulonghaana kwakipita. Keekio kunti kyamusonsezia saana kulikosie kumukupa aye waiza ku kulonghaana. Mupeele Lupungu Lwakue Kamwenenena ni lupapulo lwa Buku la Mukutano Utumishi na Maisha ya Mukristu bimuli mukusambililamo loonu ku kulonghaana. Mulondoluele beelia bimwakaba kusambilila ku kulonghaana kukoonkelepo ni kumwipuzia ni biki byamukumia. Beelia bili kumona ni kunvua musambi obe ku kulonghaana kwakue kwa kuanza, bili kukila bintu byonse byaaimweneene ku kulonghaana kwa ma diini ange onse. (1 Bakor. 14:24, 25) Ali kusaakaana ni bantu bange bali byakumuenako biweeme, baali kuviinda kupala ni bali kumukwasia kukita buyantanzi ni kubatiziiwa.
16. Ni biki bitupalile kukita eevi kukwasia basambi ba Bibilia bafikiile ku lubatizio, kabili ni kiki kitwakaba kulondoluela mu lyasi likoonkelepo?
16 Kunti twaviinda siani kukwasia musambi afikiile kubatiziiwa? Tupalile kumukwasia musambi wa Bibilia akwate lisambililo wapoozeleko maano, kupitila kumukinkizia muye mwasambilila nakue kila mulungu, kabili aye wateania kila lisambililo. Tupalile kumukinkizia aye walanziana pamo ni Yehova kila busiku ni kukita bukibuza bwakue bunke pamo ni Weene. Kabili, tupalile kumukinkizia abambe kulonghaana. (Mona kisanduku “ Bintu Bipalile Kukita Basambi Eevi Bakite Buyantanzi ni Kubatiziiwa,” ku lubali lwa 12.) Mu lyasi likoonkelepo, twakaba kulondoluela bintu binge bisano bipalile kukita bakasambilizia ba Bibilia eevi kutungulula basambi ku lubatizio.
LWIMBO 76 Waiunvua Siani? (Lwa Kiswahili)
^ kip. 5 Kumusambilizia muntu kintu kampanda kuli na mana ya kumukwasia “atontonkanie, eyunvue, ao akite kintu mu nzila ya leenu ao iibeleele.” Lileembo lyetu lya muaka wa 2020, Mateo 28:19, lyakitulangulusia juu ya ki ni kintu kya mana kusambilila Bibilia pamo ni bantu, ni kubasambilizia vya kwaluka basambi bakue Yesu Kristu babatiziiziwe. Mu leeli lyasi tuli kumona vya kwaluka bafundi mu eezi miilo ya mana saana, kabili ni mu leelia likoonkelepo twakaba kulondoluela kenka kaako.
^ kip. 1 2 Bakorinto 3:1-3, NWT: “Eba, tuli mukutendeka kwibiikapo kabili fwe beene? Ao, nga bantu bange, eba, tukabiile mikanda ya kwitabiziiwa ya kufuma kuli mwemue ao kuli fwefue? Mwemue benka i mukanda weetu, uleembelue mu mitima yeetu, wamanikile ni kusomua na bantu bonse. Paantu mulangiliilue kuya mwali mukanda wakue Kristu waaleembelue na fwefue twali babombi, usileembelue na wino inzi na mupasi wakue Leeza mukose, te kuba pa bipande bya mabue inzi pa bipande bya nama, pa mitima.”
^ kip. 2 MILANDU ILONDOLWELUE: Kine lingi uli walondolola ni muntu palua maasi kampanda a Bibilia eevi kumukwasia amane masambilizio a musinzi a Bibilia, uli watungulula lisambililo lya Bibilia. Kunti waleemba lisambililo leelio kine waamulangiliile ozo muntu vya kusambilila Bibilia, ni kisia paapo, wasambilila nakue libili, ni kine wasininkizia nangue lyakaba kutwalilila.
^ kip. 3 Mu aza maasi muli ni masoke afumine mu maasi, “Kuongoza Mafunzo ya Biblia Yenye Maendeleo” aafumine mu lupapulo lwa Huduma Yetu ya Ufalme lwa Muezi wa 07, 2004 mpaka Muezi wa 05, 2005.
^ kip. 8 Bakolosai 1:9, 10, NWT: “Kabili, kutendekela busiku butwaunvuile evio, keekio i kilengele, tekuti tulekele ata kaniini kumipepela ni kuloomba eevi mwizuziiwe na kumana kusili na kilubo palua kutona kwakue, mu mulangue onse ni kunvua kwa kimupasi, kuti mwende mu nzila imupalile Yehova, eevi kumulengia asekelele saana lumuli kuya mwatwaliliile kuseeka mazabo mu kila miilo iweeme ni kukila kwaluka ni kumana kusili na kilubo palwakue Leeza.”
^ kip. 9 Mona viideo ya dakika ina ilandile “Tuonyeshe Wanafunzi Wetu Namna ya Kujitayarisha.” Mu jw.org/swc, endo mu MAKTABA > VIDEO > MIKUTANO NA KAZI YETU YA KUHUBIRI > TUKOMALISHE UFUNDI WETU.
^ kip. 10 Endo mu MAKTABA > VITABU NA BROSHUA.
^ kip. 14 Mu jw.org, endo mu MPAPULO > MA VIIDEO > KULONGHAANA NI MIILO YEETU YA KUSIMIKILA > BIOMBO PALUA MIILO YA KUSIMIKILA.
