1. Bakristu babatiziiziwe bapalile kutwalilila kukita ki?

EBA, ubatiziiziwe? Kine i evio, waalangiliile ntaanzi ya bantu nangue uli ni kiketekelo muli Yehova kabili nangue utonene kumubombela pamo ni kuteania kwakue. * Inzi, kiketekelo kyobe kipalile kutwalilila kukula. Kabili upalile kutwalilila kukila kusininkizia nangue Yehova ali mukutungulula kuteania kwakue leenu.

2-3. Leenu, Yehova ali mukutungulula kuteania kwakue mu nzila ki? Leeta mifuano.

² Leenu, Yehova ali mukutungulula kuteania kwakue mu nzila ilangiliile bumuntu bwakue, mipaango, ni mafunde akue. Ale kansi tumone mibeele itatu imwenekele mu kuteania kwakue.

³ Kya mambo, “Leeza tali na kitoolela.” (Miil Bat. 10:34) Ntono yaamukinkiziizie Yehova amufumie Muana wakue eevi “alubule bantu bonse.” (1 Tim. 2:6; Yoan. 3:16) Yehova ali mukubombia bantu bakue eevi basimikile mpunda iweeme ku bantu bonse bali kutona kutuilizia, ni pakaako kukwasia bantu bengi banoonkele mu kilubula mulandu. Kya bubili, Yehova ni Leeza wa mupaango kabili wa mutende. (1 Bakor. 14:33, 40) Pakaako, tupalile kuswapila bantu bakue bali bamupupa baye bali kikundi kili kyamubombela kyapaangilue buino kabili kya mutende. Kya butatu, “Yehova ni Kasambilizia Mukulu.” (Is. 30:20, 21) Keekio i kilengele kuteania kwakue kwikwinde saana kusambilizia Mulandu wakue utungulwilue na mupasi ibe mu kilonghaano ao mu miilo ya kusimikila. Ezio mibeele itatu ilangiliile bumuntu bwakue Yehova, yaamwenekele siani mu kilonghaano kya Kikristu kya ku ntendeko? Ezio mibeele imwenekele siani mu nsiku yeetu? Ale leenu, mupasi utakatiifu kunti wakukwasia siani musita luuli mukubombela pamo ni kuteania kwakue Yehova?

4. Nga vilandile lileembo lya Miilo 1:8, Yesu waabalandile basambi bakue bakite ki, kabili baali bakupeelua ki?

⁴ Mu nsita ya Bakristu ba ku ntendeko. Mpunda yaali yasimikila Yesu yaali yabaleetela bantu bonse kiswapilo. (Luk. 4:43) Waabalandile basambi bakue batwalilile kubomba miilo yaatendekeziizie, kufumia busininkizio “mpaka ku nkeende ya kule saana ya kyalo.” (Soma Miilo 1:8 *.) Inzi te baali ba kukita ezio miilo ku maka abo beene. Baali bakabiile mupasi utakatiifu​—“mukwasi” waabalaile Yesu.​—Yoan. 14:26; Zek. 4:6.

5-6. Mupasi utakatiifu waabakwasiizie basambi bakue Yesu mu nzila ki?

⁵ Basambi bakue Yesu baapokeleele mupasi utakatiifu mu Pentekoste muaka wa 33, Yesu wasyavyelue. Kupitila kukwasiiwa na mupasi, baatendekele kusimikila bila kukokola, ni mu musita uniinisie, ma elufu a bantu baaitabiile mpunda iweeme. (Miil Bat. 2:41; 4:4) Musita lubaatendekele kukyuziiwa, basambi te baatiinine ni kulekela kusimikila, inzi baamuloombele Leeza abakwasie. Baapepele eevi: “Kwasia bazia bobe batwalilile kulanda mulandu obe mu kusipa konse.” Kupuako, baaizuziiziwe mupasi utakatiifu, kabili baatwaliliile ‘kulanda mulandu wakue Leeza basipile.’​—Miil Bat. 4:18-20, 29, 31, NWT.

⁶ Basambi bakue Yesu baasaakeene ni maavia ange kabili. Kwa mufuano, bantu bengi te baali na Maleembo. Basambi te baali bakwete mpapulo ya kukwasia kulondolola Bibilia nga vikili leenu. Kabili basambi baali bapalile kusimikila bantu baali balanda ndimi ingi ipusene-puseene. Anzia maavia azo onse, babo basambi bali ni mute baaviindile kukita kintu kyaali kyamwenekele nangue tekiviindikana​—mu miakasie 30 eevi, baali basyasimikiile mpunda iweeme “ku bantu bonse mwaya kyalo.”​—Bakol. 1:6, 23.

7. Mu miaka ikilile pa mia imo (100) yaapitile, babombi bakue Yehova baainikile siani keelia kibaali baloombelue kuli Leeza bakite, kabili baakitile siani?

⁷ Mu nsiku yeetu. Yehova atwaliliile kubatungulula ni kubapeela maka bantu bakue. Kakiine, Yehova ali mukutungulula bantu bakue maka-maka kupitila Mulandu wakue utungulwilue na mupasi. Moomo muli mpunda palua miilo ya kusimikila yakue Yesu ni malaizio akue ku basambi a kutwalilila kukita miilo yaatendekeziizie. (Mat. 28:19, 20) Kale saana, Lupungu Lwakue Kamwenenena lwa Muezi wa 07, 1881, lwaalandile nangue: “Yehova taatusaakuile eevi tukindikue na bantu ao twaluke banoonsi, inzi waakitile evio eevi tubombie kila kintu kituli nakio eevi kusimikila mpunda iweeme.” Katabu kamo (To Whom the Work Is Entrusted) kaafumiiziwe mu muaka wa 1919, kaali ni malaizio ku bakasimika palua kusimikila, kaalandile: “Kuli miilo ingi saana ya kukita, inzi ni miilo yakue Mulopue, kabili wakatupeela maka a kuikita.” Kakiine, nga Bakristu ba ku ntendeko, babo balupua baaipeele mu ezio miilo basipile, kabili bali ni kisinka nangue mupasi utakatiifu uli kubakwasia kusimikila ku bantu ba misango yonse. Ni fwefue leenu tutwaliliile kuya twali ni kisininkizio nga kyenka keekio.

8-9. Kuteania kwakue Yehova tekusyabombiizie nzila ki eevi kusalangania mpunda iweeme?

⁸ Kuteania kwakue Yehova kuli kwabombia biombo biweeme saana biliko eevi kusalangania mpunda iweeme. Mu bebio biombo, temusyali kale mpapulo ifumiiziwe ku mapapie, “Foto Drama ya Bibumbua,” fono (phonograph), myotoka ili ni bizanzula mazui, radio, ni leenu ma ordinatere ni Enternete. Kabili, kuteania kwakue Yehova kuli mukukita miilo ya kupilibula mpapulo mu nzila isinakitikepo! Juu ya ki? Eevi bantu ba misango yonse bonvue mpunda iweeme mu lulimi lwabo bene. Yehova tali na kitoolela ao kapaatulula; waalandile ntaanzi nangue mpunda iweeme yakapundua “ku mikoa yonse, ni bantu ba ndimi yonse, pamo ni ntundu yonse.” (Nfy. 14:6, 7) Atonene kubalua muntu onvue mpunda ya Bukolo.

 ⁹ Ale palua bantu batuli twaandua kumonana naabo, paange paantu bekeele mu bikuulua musiizi kwingilua ovio-ovio? Eevi kusimikila bantu bengi bali mu ezio aali, kuteania kwakue Yehova kwakitontonkania nzila paleepale ya kusimikila pa bantu bengi. Kwa mufuano, mu 2001, Kabungue Kali Katungulula kaaitabiziizie ma prezantware ni biombo binge bya kulangisiiziapo mpapulo bimbobiiwe mu kyalo kya Ufaransa ni kisia paapo mu nkeende inge. Keekio kyaafumiizie mazabo aweeme. Mu 2011, nzila ya leenu yaatendekeziiziwe mu kyalo kya Amerika, mu nkeende imo pakati ka nkeende ili yasaangua mu New York City. Mu muaka wa kuanza, bitabu mia imo ni tubili elufu mia ni makumi abili na kenda (102 129), ni ma kazeeti makumi sita na munane elufu mia kenda ni likumi na kamo (68 911), aakasaniiziwe. Kabili bantu elufu ina mia saba ni umo (4 701) baaloombele kusambilila Bibilia! Kakiine, Yehova waabombiizie mupasi wakue utakatiifu eevi kukwasia ezio miilo. Pakaako, Kabungue Kali Katungulula kaaitabiziizie kubombia mu kyalo kyonse biombo bya kulangisia mpapulo.

10. Kunti twakita siani eevi kuwaamia miilo yeetu ya kusimikila?

¹⁰ Kintu kiuli kuviinda kukita. Ku kulonghaana kwa Kikristu, Yehova ali watubeelezia vya kusimikila. Bombia beelia biuli wasambilila kooko. Lyonse, bomba pamo ni kitente kyobe kya miilo ya kusimikila. Balupua ni bankazi ba mu kitente kyobe kya miilo ya kusimikila, kunti bakukwasia kuwaamia nzila yobe ya kusimikila ni kusambilizia, kabili kunti bakukinkizia kupitila mufuano wabo uweeme. Twalilila kusimikila anzia maavia. Nga vilandile lileembo liimaniine leeli lyasi, tuli twakita kutona kwakue Yehova, apana mu buviinde bwetu, inzi kupitila kukwasiiwa na mupasi utakatiifu. (Zek. 4:6) Kabili tusininkiziizie evio paantu tuli mukukita miilo yakue.

11. Kabungue kaali katungulula mu miaka mia ya ku ntendeko, kaabombele siani mu buumo eevi kukita bintu biye byapaangilue buino kabili kwaluke mutende mu bantu bakue Leeza?

¹¹ Mu miaka mia ya ku ntendeko ya Bakristu. Balupua ba mu kabungue kaali katungulula kabanga kali mu Yerusalemu, baabombele bonse pamo eevi kukita bintu bitwalilile kuya byapaangilue buino ni mutende uye wali pakati ka bantu bakue Leeza. (Miil Bat. 2:42) Kwa mufuano, musita lukwaalukile buavia palua kuteetua yando mu muaka wa 49, Yesu wasyavyelue, kupitila kukwasiiwa na mupasi utakatiifu, kabungue kaaikeele eevi kulondoluela ozo mulandu. Kilonghaano  kitwalililenge kukasanika juu ya ozo mulandu, miilo ya kusimikila nga te yaakitikile buino. Anzia kine batumua ni balalume bakote baali Bayuda, te baailekeleele babembue na tubeelela twa Bayuda ni baalia baali batukinkizia saana. Inzi, baakebele butunguluzi mu Mulandu Wakue Leeza ni kuloomba mupasi ubakwasie eevi bakwate bupinguzi buweeme. (Miil Bat. 15:1, 2, 5-20, 28) Keekio kyaaleetele mazabo ki? Yehova waapaalile bupinguzi bwabo, kabili mutende ni buumo i byaalukileko, ni miilo ya kusimikila yaatwaliliile kuya pa ntaanzi.​—Miil Bat. 15:30, 31; 16:4, 5.

12. Ni kiki kilangiliile nangue loonu mu kuteania kwakue Yehova bintu bipaangilue buino kabili mu mutende?

¹² Mu nsiku yeetu. Kuteania kwakue Yehova kuli mukwikwinda kusuunga mutende ni kukita bintu biye byapaangilue buino mu bantu bakue Yehova. Kale saana mu muaka wa 1895, Lupungu Lwakue Kamwenenena lwa pa nsiku 15, Muezi wa 11, lwa Kingereza, lwaali ni mutue wa lyasi uswapiile 1 Bakorinto 14:40, waali walanda nangue, “Mu Mukinzi Kabili mu Mupaango.” Leelio lyasi lyaalandile eevi: “Batumua baalandile saana palua bintu kukitua mu mupaango ku kilonghaano kya ku ntendeko . . . Ni kintu kya mana saana kukoonka twapoozeleko maano bintu ‘byaalembeelue fwefue pakuti biye byatufunda.’” (Bar. 15:4) Kakiine, kwenka koolia kutona bintu biye byakitua mu mupaango kabili mu mutende kwali kwamwenekele mu kilonghaano kya Bakristu kya ku ntendeko, i kumwenekele ni mu kuteania kwakue Yehova leenu. Kyakumuenako ni keeki: Kine waya kulonghaana Lisambililo lya Lupungu Lwakue Kamwenenena mu kilonghaano kinge​—aosie mu kyalo kinge—​uli kuya wamanine vili kutungululua lisambililo, ni lyasi lya kusambilila. Bila kukokola, uli kwiunvua kusiasie uli mu kilonghaano kyenu! Kakiine, mupasi sie wakue Leeza i uli mukulengia bobo buumo!​—Zef. 3:9, bulondolozi buli pensina.

13. Lileembo lya Yakobo 3:17 kunti lyatulengia kwiipuzia siani?

¹³ Kintu kiuli kuviinda kukita. Yehova atonene bantu bakue ‘basuunge buumo bwa mupasi mu kifundo kili kyakwatania kya mutende.’ (Baef. 4:1-3) Pakaako iipuzie eevi: ‘Ndi nakwasia kuleeta buumo ni mutende mu kilonghaano? Ndi nabanakila baalia bali batungulula? Eba, bange kunti banswapila, maka-maka kine ndi ni bifulo mu kilonghaano? Eba, ndi muntu eteaniiziesie lyonse kukwasia, kabili ali wabombela bange mukwitonena?’ (Soma Yakobo 3:17.) Kine wamona nkeende ya kuwaamia, loomba mupasi utakatiifu ukukwasie. Kine wakila kutwalilila kulekelela mupasi ozo walulule bumuntu bobe ni bikitua byobe , balupua ni bankazi bali kukila kukutona ni kukumona kuya wali wa mana.

14. (Bakolosai 1:9, 10) Mu nsita ya Bakristu ba ku ntendeko, Yehova waabakwasiizie siani bantu bakue baaluke ni “kumana kusili na kilubo palua kutona kwakue”?

¹⁴ Mu miaka mia ya ku ntendeko ya Bakristu. Yehova ali watona saana kubasambilizia bantu bakue. (Malum. 32:8) Atonene bamumane, bamutone, kabili bekale loonse nga baana bakue batonua. Bila masambilizio aali wabapeela, bebio byonse nga te biviindikeene. (Yoan. 17:3) Yehova waabombiizie kilonghaano kya Kikristu kya mu miaka mia ya ku ntendeko eevi kusambilizia bantu bakue. (Soma Bakolosai 1:9, 10 *.) Mupasi utakatiifu​—“mukwasi” waalailue na Yesu—​waabombele miilo ikata. (Yoan. 14:16) Waabakwasiizie basambi bonvuisie Mulandu Wakue Leeza ni kubalangulusia bintu byaalandile Yesu ni byaakitile, bintu byaaizile kuleembua mu Nsimiko (Injili). Kooko kumana kwaalengiizie kiketekelo kya Bakristu ba ku ntendeko, ntono yabo kuli Leeza, kuli Muana wakue, ni kuli umo ni mwinakue bikose.

15. Eba, umwene Yehova wafikilizia mu nzila ki bulayo bwakue buli mu Isaya 2:2, 3?

¹⁵ Mu nsiku yeetu. Yehova waalandile ntaanzi nangue “mu musita wa kupeleezia wa ezio nsiku,” bantu ba ntundu yonse bakakolonghana ku lupili lwakue eevi basambiliziiwe nzila yakue. (Soma Isaya 2:2, 3.) Tuli mukumona bobo bukabika bwali mukufikiliziiwa. Yehova ali mukukolonghania bantu bakisinka kabili bali bamutiina, ku lupili Lwakue lutakatiifu, i kulanda, mu lupupo Lwakue luswetele luli pa muulu saana pa misango yonse ya lupupo lufiitile. Kakiine, Yehova ali mukufumia maliila a kimupasi! (Is. 25:6) Kupitila “muzia wa kisinka ni wa maano,” ali mukutupeela byakulia bingi kabili byapusene-puseene mu nzila ya kupapia, kutendekela ku mpunda ituli twasoma , maasi atuli twatuilizia, ma viideo sie ni ma viideo a ba teente. (Mat. 24:45, NWT) Twaiunvuasie nga Elihu, kibuza wakue Yobu, waalandile eevi: “Ni kasambilizia ki ali nga [Leeza]?”​—Yob. 36:22.

16. Kunti wakita siani eevi unoonkele mu masambilizio akue Yehova?

¹⁶ Kintu kiuli kuviinda kukita. Mupasi wakue Leeza kunti wakukwasia kubombia mu buikazi bobe beelia biuli mukusoma ni kusambilila mu Bibilia. Pepa nga vyaakitile kaleemba umo wa Malumbo waalandile eevi: “Nsambilizie nzila yobe, We Yehova. Nakaba kwenda mu kisinka kyobe. Kwatania mutima wane eevi ntiine liina lyobe.” (Malum. 86:11) Pakaako, twalilila kulia byakulia bya kimupasi bili mukufumia Yehova kupitila Mulandu wakue ni kuteania kwakue. Kakiine kikata kyobe te kumanasie kisinka. Inzi, kikata ni kwingizia kisinka ku mutima obe ni kukibombia mu buikazi bobe. Mupasi wakue Yehova kunti wakukwasia uviinde kukita evio. Kabili utonene kubakinkizia balupua ni bankazi. (Baeb. 10:24, 25) Juu ya ki? Paantu ni bantu ba mu lupua lobe lwa kimupasi. Pepa mupasi wakue Leeza ukukwasie kuleeta byasuko bili byafuma ku mutima ku kulonghaana ni kuviinda kupisia buino saana kine uli ni kiputulua. Kine wakita evio, uli kumulangilila Yehova ni Yesu nangue utonene “mikooko” yabo ikindeeme.​—Yoan. 21:15-17.

17. Kunti walangilila mu nzila ki nangue uli mukukwasia kuteania kwakue Yehova?

¹⁷ Leenusie, kuteania kumo sie kuli mukutungululua na mupasi wakue Leeza i kwakaba kusiala pa kyalo. Pakaako, bomba na mute pamo ni kuteania kwakue Yehova. Langilila ntono yakue Leeza isili na kitoolela kupitila kusimikila mpunda iweeme ku bantu bonse bauli kusaakaana naabo. Mupale Yehova ali watona bintu bikitike mu mupaango ni mu mutende kupitila kuya wakwasia buumo mu kilonghaano. Kabili mutuilizie Kasambilizia obe Mukulu kupitila kulia maliila a kimupasi aali mukufumia. Ni musita kyalo kyakue Sataana lukili mukuya kyaya ku mpela, teuya wali ni muenzo. Inzi wakaba kuya wasipile ni kwimana pamo ni baalia bali mukumubombela Yehova mu kisinka pamo ni kuteania kwakue.