MUKULU umo wa mu buteeko bwa Nazi waalandile eevi ku kikundi kimo kya Bakasininkizia Bakue Yehova mu Bului bwa Bubili bwa Kyalo: “Kine kila umo pakati keenu wakaana kuluana na Bafaransa, ao na Bangereza, mwe bonse mupalile kufua!” Anzia kine basoda ba Nazi baali baimeene mu peepi bali ni biluilo kabili bapembeleele, te kuli ata umo pakati ka balupua betu waaitabiile kutiona mizilo yakue Yehova. Kakiine, keekio i kintu kyaali kyapalile kukita kilangiliile kusipa saana! Ozo mufuano ulangiliile malanga atuli twasaangua nao fwe Bakasininkizia Bakue Yehova: Tuli twakaana kuya kuluana vita ili yakitika mu keenu kyalo. Atasie musita bantu lubali batulanda nangue bali kutwipaya kine twakaana kuya ku vita, tuli twakaana kukwasia vita ya mu keenu kyalo.

1. BANTU BONSE BAKUE LEEZA BABANGA BALI MU NTUNDU IMO

Mu nsita ya kale, Yehova waakolonghaniizie bantu bakue mu ntundu imo, i kulanda, ntundu ya Israeli. Waabakuutile Baisraeli nangue “bunoonsi bakue bwibeleele ku bikundi byonse bya bantu.” (Kuf. 19:5) Kabili, Leeza waabapeele ni kazonga kaabo kamanikile. Pakaako, musita Leeza lwaali wabalanda kuya kuluana vita pamo ni ntundu inge, te baali baluana ao kwipaya bantu benaabo bali bamupupa Yehova. a

 Loonu, Bakasininkizia Bakue Yehova bafumine mu “ntundu yonse, mu mikowa yonse, mu mitundu yonse ni mu bantu ba ndimi yonse.” (Nfy. 7:9) Kabenge bantu bakue Leeza bali baluana, nga bali mukuluana ni kwipaya bantu benaabo bali bamupupa.

2. YEHOVA I WAALI WABALANDA BAISRAELI KUYA KULUANA

Mu nsita ya kale, Yehova waali wapingula musita ni kikata kipalile kubalengia Baisraeli kuya ku kuluana vita. Kwa mufuano, Leeza waalandile Baisraeli kuya kuluana na Bakanaani eevi afikilizie bupinguzi bwakue ku babo bantu baali bamanikile saana mu kupupa mipasi ibiipile, kukita bulaale-laale, ni kufumia ngeleelo ya muana. Yehova waabalandile Baisraeli babenoone babo bantu baali bakita bintu bibiipile mu Kyalo kya Bulayo eevi ni Baisraeli tekuti baye bakita bebio bintu bibiipile. (Bal. 18:24, 25) Kisia Baisraeli kwikala mu Kyalo kya Bulayo, Leeza waali waitabizia Baisraeli kuya kuluana eevi kubasakila kufuma ku baluani baalia baali batitikilana. (2 Sam. 5:17-25) Inzi, Yehova taali wabapeele Baisraeli nsaambu ya kupingula bo beene kuya ku vita. Musita ubaali bakita evio, baali basaangua na bintu bibiipile saana.​—Mpen. 14:41-45; 2 Mil Nsi. 35:20-24.

Loonu, Yehova tetabiziizie bantu kuya ku vita. Ntundu ili yaluana juu ya kukeba beelia bitonene bantu apana juu ya beelia bitonene Leeza. Bali babamba kuluana juu ya kupoka kazonga, juu ya kupata nfalanga ao eevi bengizie mu politike malanga abatonene. Eba, ale palua baalia bali balanda nangue bali baluana mu liina lyakue Leeza eevi kusuunga bantu bali bamupupa ao nangue juu ya kwipaya baluani bakue Leeza? Yehova wakaba kusuunga bantu bali bamupupa ni kwinoona baluani bakue ku vita ya mu musita uli mukuiza, i kulanda ku vita ya Armagedoni. (Nfy. 16:14, 16) Ku ezio vita, kisepe kyakue Leeza kyakaba kyaundiluesie na bibumbua bya kimupasi apana na bantu bakue bali bamupupa.​—Nfy. 19:11-15.

3. BAISRAELI TE BAALI BAIPAYA BAALIA BAALI BALANGILILA KIKETEKELO MULI YEHOVA

Mu nsita ya kale, lingi kisepe kya Baisraeli kyaali kyabalangilila luse baalia baali bamuketekela  Leeza, kyaali kyaipayasie bantu baali bapingulua na Yehova nangue bapalile kufua. Mona mifuano ibili. Anzia kine Yehova waalandile muzi wa Yeriko winoonue, Baisraeli baamusuungile Rahabu pamo ni lupua lwakue juu ya kiketekelo kyakue. (Yosh. 2:9-16; 6:16, 17) Kisia paapo, muzi onse wa Gibeoni waasuungilue kisia Bagibeoni kulangilila mukinzi kuli Leeza.​—Yosh. 9:3-9, 17-19.

Loonu, ntundu ili yaluana, teizi kusuunga baalia balangiliile kiketekelo. Kabili, nsita inge bantu basili na kilubo bali baipaiwa musita ntundu luili yaluana.

4. BAISRAELI BAALI BAKOONKA MIZILO YAKUE LEEZA PALUA KULUANA

Mu nsita ya kale, Yehova waali wabalanda balukale Baisraeli baye baluana bakoonkele malaizio akue. Kwa mufuano, nsita inge Leeza waali wabalanda baye baubuila muzi wa baluani bintu bipalile kukitua palua mutende. (Mal Miz. 20:10) Kabili Yehova waali watona balukale Baisraeli baye bali ni busaka bwa kimubili ni kukoonka mafunde akue Yehova alandiile palua lwendo. (Mal Miz. 23:9-14) Lingi, bisepe bya balukale bya ntundu yaali yabazyungulukiile, byaali byabaka banakazi ba mu tuzonga tubaali baluana naato. Yehova taali waitabizia Baisraeli kukita evio. Kakiine, te baali bapalile kuupa mwanakazi wa mu muzi ubaakiluana nao, mpaka pakabe kupita muezi umo kisia kukwata muzi.​—Mal Miz. 21:10-13.

Loonu, byalo bingi bili byaitabizia kuluana vita byakoonkele mizilo paleepale. Anzia kine bali babiika ezio mizilo juu ya kusuunga baalia basili balukale, lingi ntundu ili yationa mizilo ezio.

5. LEEZA WAALI WALUANA JUU YA NTUNDU YAKUE

Mu nsita ya kale, Yehova waali waluana juu ya kukwasia Baisraeli, kabili lingi waali wabakwasia kuviinda saana bului mu nzila ya kimpezia-maano. Kwa mufuano, Yehova waabakwasiizie siani Baisraeli kwanzia muzi wa Yeriko? Nga vyaalandile Yehova, musita Baisraeli “lubaasamuine na lizui likata lya bului, kibumba kyaaponene pansi,” kabili keekio kyaalengiizie kiye kyaleengele kukwata muzi. (Yosh. 6:20) Ale Baisraeli baaviindile siani bului bubaaluene na Baamori? “Yehova waapoozele pali beene bibue bikata kufuma mu muulu . . . Kakiine bengi baafuile na bibue kuliko na kipanga kya Baisraeli.”​—Yosh. 10:6-11.

BAKRISTU BA KISINKA BALI BAKITA MUTENDE

Nga vitwafuma mu kumona, loonu aali yeetu ipuseene saana ni elia ya Baisraeli ba kale. Anzia evio, te kooko kupusanasie kulengele tuye twakaana kuya ku vita. Kuli ni bintu binge bilengiizie. Kwa mufuano, Leeza waalandile ntaanzi nangue mu nsiku ya mpeleezio, baalia bakaba basambiliziiziwe na weene, “te bakasambilila bului ata kaniini.” Kabili te bakaba bakwasiako bului. (Is. 2:2-4) Kabili Yesu waalandile nangue basambi bakue ‘te bali seemu ya kyalo’; te bakaba bakwasia vita ya mu keenu kyalo.​—Yoan. 15:19.

Kabili Kristu waabalandile kukita kintu kinge kikilile paapo. Waabasokele kutiina aali ili yalengia kubiikilana mbiikizi, kipuki, ao vita. (Mat. 5:21, 22) Kabili waabasokele basambi bakue baye bali bantu “bali baleetela benaabo mutende” ni kubatona baluani babo.​—Mat. 5:9, 44.

Ale fwefue kunti twakita siani evio? Paange tetwizi kutona ata kaniini kuluana mu vita ili yonse, inzi eba, kuli ni muntu utumwene mu kilonghaano kuya wali muluani weetu? Kansi tutwalilile kukita maka eevi kupuisia malanga onse a evio mukati keetu.​—Yak. 4:1, 11.

Kuliko kukwasia vita ya ntundu, tuli twakwasia kuleeta mutende ni kutonana fwe beene. (Yoan. 13:34, 35) Kansi tuye twapinguile kukaana kwiingizia mu politike musita utupembeleele busiku bwakapuisia Yehova vita loonse.​—Malum. 46:9.