1. Ni kiswapilo ki kitupeelue na Yehova?

 YEHOVA atupeele kiswapilo kyaweeme saana kya kupata bukose bwa loonse. Bange, bali ni kiswapilo kya kwikala ku muulu, bali bibumbua bya kimupasi bisiviinda kufua. (1 Bakor. 15:50, 53) Inzi bantu bengi, bali ni kiswapilo kya kwikala loonse pa kyalo bali ni bukose bupuililikile, kabili bali ni nsaansa. (Nfy. 21:3, 4) Ibe tuye twapembeleele kupata bukose bwa loonse ku muulu ao pa kyalo, kiswapilo kyetu kikindeeme kuli fwefue.

2. Kiswapilo kyetu kiimaniine pa ki, kabili juu ya ki kunti twalanda evio?

² Mulandu “kiswapilo,” nga vyubombiiziwe mu Bibilia kunti wapilibulua mu mana ya “kuketekela nangue bintu biweeme byakaba kukitika.” Kunti twasininkizia nangue kiswapilo kyetu palua musita uli waiza kyakakitika paantu kifumine kuli Yehova. (Bar. 15:13) Tumanine kintu kyalaile, kabili tumanine nangue lyonse ali wafikilizia bulayo bwakue. (Mpen. 23:19) Tusininkiziizie nangue Yehova ali ni nkulu, kabili ali ni buviinde bwa kufikilizia kintu kyonse kyali walanda nangue wakaba kukita. Pakaako, kiswapilo kyetu, te kiimaniine pa bintu bya kutontonkaniasie, ao pa beelia bitutonene nangue bikitike. Inzi, kiswapilo kyetu kiimaniine pa beelia bitumanine nangue ni bya kisinka.

3. Tuli kulondoluela ki mu leeli lyasi? (Malumbo 27:14)

³ Baba weetu wa ku muulu atutonene, kabili atonene tuye twamuswapiile weene. (Soma Malumbo 27:14.) Kine kiswapilo kyetu kuli Yehova kikosele, twakaba kuviinda kusipikizia maavia, kusiala twasipile ni kuya twali ni nsaansa anzia kine kuli kwaluka ki. Kansi, tumone kiswapilo kyetu vikili kyatusuunga. Ntaanzi ya byonse, tuli kumona kiswapilo kyetu vikipaleene ni nanga kabili ni kisote kya kyuma. Kisia, tuli kulondoluela vituli kuviinda kukosia kiswapilo kyetu.

4. Kiswapilo kipaleene siani ni nanga? (Baebrania 6:19)

⁴ Mu mukanda wakue ku Baebrania, mutumua Paulo waapalaniizie kiswapilo kyetu na nanga. (Soma Baebrania 6:19.) Lingi, Paulo waali wakita bulendo lwa menda. Pakaako, waali wamanine vyaali vyabombiiwa nanga eevi kusuunga bato te kunti itwamininue. Mu lwendo lumo, abanga wali mu bulendo lwa bato musita mwela ukata luwaabuukile. Musita ozo mwela luwaabuukile, Paulo waamuene baalia bali babomba ku bato vibaali bapooza nanga mu menda eevi kukwasia bato te kunti iye iipume ku mabue. (Miil Bat. 27:29, 39-41) Nga evelia nanga viili yakwasia bato isiale yali pa fuasi imo, kiswapilo kyetu kili kyatukwasia tusiale twaimeene sinta eevi te kunti tufumiiwe kuli Yehova musita utuli twasaakaana ni maavia aviizie apaleene ni mwela ubiipile. Kiswapilo kyetu kili kyatukwasia kusiala twateekameene musita utuli twasaakaana ni maavia paantu twinikile nangue bintu byakaba kuwaama. Languluka, Yesu waalandile ntaanzi nangue twakasaanzua. (Yoan. 15:20) Pakaako, kutontonkania palua kilambu kyetu kya musita uli mukuiza kitulailue, kuli kwatukwasia kusiala twaimeene sinta mu bulendo bwetu bwa Kikristu.

5. Kiswapilo kyaamukwasiizie siani Yesu musita lwaali wasyakeba kwipaiwa?

⁵ Tontonkania kiswapilo vikyaamukwasiizie Yesu kusiala wali wa kisinka anzia kine abanga wamanine nangue wakaba kufua lufu lwa kukisia. Mu busiku bwa Pentekoste ya 33 Yesu wasyavyelue, mutumua Petro waabombiizie milandu ya bukabika kufuma mu kitabu kya Malumbo. Ezio milandu, ilangiliile Yesu vyabanga wateekameene kabili wali ni kiswapilo. Ilandile eevi: “Nakafua naswapiile, paantu we Mulopue teukandekelela mu kilibu; teuketabizia mubombi obe wa kisinka kubolela mu kilibu. . . . Kuba noobe kwakansaansamusia saana.” (Miil Bat. 2:25-28; Malum. 16:8-11) Anzia kine Yesu waali wamanine nangue wakaba kufua, waali waswapiile saana nangue Leeza wakaba kumutuntumuna. Kabili waali waswapiile nangue wakaba ni nsaansa ya kwiunga kabili pamo ni Baba wakue wa ku muulu.​—Baeb. 12:2, 3.

6. Lupua umo waalandile ki palua kiswapilo?

⁶ Kiswapilo kyetu kya Kikristu kili kyakwasia balupua bengi ni bankazi betu kusipikizia. Tontonkania palwakue Leonard Chinn, lupua wa kisinka ali wasaangua mu kyalo kya Uingereza. Mu Bului bwa Mambo bwa Kyalo, waakakilue paantu waakeene kwiingizia mu busoda. Waakitile miezi ibili wateekelue mu fuasi ya bunke. Kisia paapo waapatikiziiziwe kubomba miilo yaviizie saana. Waaleembele eevi: “Bintu binaaimweneene byaankwasiizie kwinika nangue tupalile saana kuya twali ni kiketekelo eevi tuviinde kusipikizia. Tuli ni mufuano wakue Yesu, batumua, ni bakabika, kabili tuli ni bulayo buweeme buli mu Bibilia. Bebio byonse bili byatupeela kiswapilo kikata palua musita uli waiza, kabili bili byatupeela maka a kusipikizia.” Kiswapilo kibanga kyali nga nanga kuli Leonard, kabili kunti kyaaluka nga nanga ni kuli fwefue.

7. Maavia ali akosia siani kiswapilo kyetu? (Baroma 5:3-5; Yakobo 1:12)

⁷ Kiswapilo kyetu kili kyakosa kisia kusipikizia maavia ni kumona Yehova vyali watukwasia ni kutwitabila. (Soma Baroma 5:3-5; Yakobo 1:12.) Pakaako, tuli ni kiswapilo kikilile kuluma kuliko keelia kitubanga twali nakio musita utwaaitabiile lya kuanza mpunda iweeme. Sataana atonene maavia etu atutitikile, inzi, kupitila kukwasiiwa na Yehova, kunti twaviinda kusipikizia buino kila buavia.

8. Kiswapilo kipaleene siani ni kisote kya kyuma? (1 Batesalonika 5:8)

⁸ Bibilia ili yapalania kabili kiswapilo kyetu na kisote kya kyuma. (Soma 1 Batesalonika 5:8.) Soda ali wavuala kisote kya kyuma eevi  kusuunga mutue wakue te kunti ulasue musita baluani lubali mukwezia kumuuma. Mu lizibo lyetu lya kimupasi, tupalile kusuunga maano etu musita Sataana lwali watusaukila. Ali wabombia bintu bingi eevi kutwezia ni kwinoona malanga etu. Nga evelia kisote kya kyuma vikili kyasuunga mutue wakue soda, kiswapilo kyetu kili kyasuunga maano etu eevi tusiale twali ba kisinka kuli Yehova.

9. Ni kiki kili kyakitika musita bantu lubali bazeezia kiswapilo?

⁹ Kiswapilo kyetu kya bukose bwa loonse, kyakaba kutukwasia kukita bintu kwa mulangue ni kubombia buviinde bwa kwinika. Ku lubali lunge, kine kiketekelo kyetu kyatopa kisia twatendeka kutontonkaniasie palua nkulu yeetu fwe beene, kunti twalaba kiswapilo kyetu kya bukose bwa loonse. Mona aali yaaisaangilemo Bakristu bange baali baikala mu Korinto ya kale. Baazeeziizie kiketekelo mu bulayo bwa mana bwakue Leeza, i kulanda kiswapilo palua kutuntumunua. (1 Bakor. 15:12) Paulo waaleembele nangue baalia basili na kiketekelo palua kutuntumuka, bekeele juu ya kufikiliziasie nkulu yabo beene. (1 Bakor. 15:32) Loonu, bantu bengi basiswapiile bulayo bwakue Leeza bali bakita kila kintu kibali kuviinda, eevi besaansamusie. Anzia evio, fwefue tuswapiile musita uli mukuiza utulailue na Leeza. Kiswapilo kyetu kili nga kisote kya kyuma kili kyasuunga maano etu. Kabili kili kyatukwasia te kunti tuye twatontonkaniasie palwetu fwe beene, paantu keekio kunti kyainoona bukibuza bwetu pamo ni Yehova.​—1 Bakor. 15:33, 34.

10. Kiswapilo kunti kyatukwasia siani eevi te kunti tuye twali ni malanga a bufi?

¹⁰ Kabili, kiswapilo kyetu kunti kyatusuunga te kunti tuye twatontonkania nangue tetuviinda ata kaniini kumusaansamusia Yehova. Kwa mufuano, muntu kunti watontonkania eevi: ‘Nsikaalukapo ata limo pakati ka bantu bakekala loonse. Nsiizi kusaangua naweeme. Nsikaalukapo na buviinde bwa kukita beelia bitonene Leeza.’ Languluka nangue Elifazi kibuza wa bufi wakue Yobu, waabombiizie malanga enka azo kuli Yobu. Elifazi waalandile eevi: “Muntu ali wafua ni kiki eevi aye waiswesiizie?” Kukila pa kaako, waalandile eevi palwakue Leeza: “Mona! Tali na kiketelo ata kaniini ku batakatiifu bakue, kabili atasie myulu te iswetele pa menso akue.” (Yob. 15:14, 15) Bobo ni bufi bwabiipile! Languluka muntu ali ku nyuma kwa azo malanga, i kulanda Sataana. Amanine nangue kine weewe wailekelela kusiala mu azo malanga, uli kutendeka kuzeezia kiketekelo kyobe. Inzi, kaana bufi bwa evio, ni kupooza maano obe ku bulayo bwakue Yehova. Te kutwisika ata kaniini nangue weene atonene weewe ukekale loonse, kabili nangue Weene wakaba kukukwasia ukabe kufikilizia ozo mupaango.​—1 Tim. 2:3, 4.

11. Juu ya ki tupalile kuya twali ni mibeele ya kupembelela musita utupembeleele kiswapilo kyetu kifikiliziiwe?

¹¹ Tekiizi kusaangua kyaleengelesie lyonse kusuunga kiswapilo kyetu kusiala kyalumine. Kunti twaandua kulangilila mibeele ya kupembelela musita utupembeleele Leeza afikilizie bulayo bwakue. Anzia evio, Yehova ni wa loonse kabili nzila yali wamwenamo musita ipuseene ni vituli twamona fwefue. (2 Pet. 3:8, 9) Wakakita beelia byalaile mu nzila iweeme saana. Inzi, kunti wakita evio, pa musita utusiswapiile fwefue. Ni kiki kili kutukwasia kusuunga kiswapilo kyetu kisiale kyalumine musita utupembeleele Leeza afikilizie bulayo bwakue?​—Yak. 5:7, 8.

12. Nga vilandile Baebrania 11:1, 6, kiswapilo kikwateene siani ni kiketekelo?

¹² Kunti twasuunga kiswapilo kyetu kisiale kyalumine kine twasiala twali peepi ni Yehova paantu weene i wakalengia kiswapilo kyetu kikaaluke kya kisinka. Eevi twaluke ni kiswapilo, tupalile kuya twaketekeele nangue Yehova kwali, kabili nangue “ali walambula baalia bali bamukeba.”  (Soma Baebrania 11:1, 6.) Vituli kukila kumumona Yehova kuya waliko kakiine, i vituli kukila kuswapila nangue wakaba kufikilizia bintu byonse byalaile. Kansi tumone nzila ya mana ya kukizia bukibuza bwetu pamo ni Yehova, ni pakaako kusiala twasuungile kiswapilo kyetu kyalumine.

13. Kunti twamupalama siani Leeza?

¹³ Uye wapepa kuli Yehova ni kusoma Mulandu wakue. Anzia kine tetuviinda kumumona Yehova, kunti twamupalama. Kunti twalanda nakue kupitila lipepo twasininkiziizie nangue ali kututuilizia. (Yer. 29:11, 12) Kunti twamutuilizia Leeza kupitila kusoma ni kutontonkania Mulandu wakue. Musita utuli kuya twasoma mpunda ilangiliile Yehova vyaasuungile bantu babanga bali ba kisinka kuli weene, kiswapilo kyetu kili kuya kyakila kukosa. Kila kintu kili mu Mulandu Wakue Leeza “kyaaleembeelue fwefue pakuti kiye kyatufunda ni kutukoselezia eevi tuye twateekameene ni kuya twali ni maswapi.”​—Rom. 15:4.

14. Juu ya ki tupalile kutontonkania palua bintu byaakitile Yehova ku bantu bange?

¹⁴ Tontonkania Yehova vyaafikiliziizie bulayo bakue. Mona Leeza vyaabakitiile ba Abrahamu ni Sara. Baafikiizie miaka ibasiviinda kabili kuvyala baana. Inzi, Leeza waabalaile nangue bakavyala muana. (Kut. 18:10) Abrahamu waakitile siani? Bibilia ili yalanda eevi: “Abrahamu waamuketekeele ni kumuswapila, . . . ni pakaako, i kyabeleele situe fwe ntundu yonse.” (Bar. 4:18) Anzia kine Abrahamu tabanga wamanine kine bulayo bwakue Leeza kunti bwafikiliziiwa siani, waali wasininkiziizie nangue Yehova wakaba kufikilizia bulayo Bwakue. Ozo mwalalume wa kiketekelo, taatiokele mutima. (Bar. 4:19-21) Mpunda ya evio ili yatusambilizia nangue loonse kunti twamuswapila Yehova afikilizie bulayo bwakue anzia kine fwefue tumwene nangue tekikitika.

15. Juu ya ki tupalile kutontonkania palua bintu bili byatukitila Leeza?

 ¹⁵ Tontonkania palua bintu bili byakukitila Yehova. Tontonkania weewe viwakinoonkelamo kale kupitila kufikiliziiwa kwa bulayo buli mu Mulandu Wakue Leeza. Yesu waalaile nangue Baba wakue wakakupeela bintu byukabiile mu buikazi. (Mat. 6:32, 33) Kabili Yesu waakusininkiziizie weewe nangue Yehova wakakupeela mupasi utakatiifu kine wamuloomba. (Luk. 11:13) Yehova ali mukufikilizia bobo bulayo. Kabili, paange kunti watontonkania palua bulayo bunge bwali mukufikilizia kuli weewe. Kwa mufuano, alaile kukweleela, kukuteekia mutima, ni kukuliisia kimupasi. (Mat. 6:14; 24:45; 2 Bakor. 1:3) Kine weewe watontonkania palua bintu byakikukitila kale Leeza, uli kukosia kiswapilo kyobe palua beelia byali wakaba kukita mu musita uli mukuiza.

16. Juu ya ki kiswapilo ni bupe bukindeeme?

¹⁶ Kiswapilo kyetu kya bukose bwa loonse, ni bupe bukindeeme kufuma kuli Leeza. Tupembeleele musita uli mukuiza uweeme saana, olia utuli kuviinda kusininkizia nangue wakaba kufika. Kili kyabomba nga nanga yeetu, elia ili yatukwasia kusiala sinta eevi tusipikizie maavia ni musita utuli twasaanzua. Kabili, kili kyatukwasia kusipikizia atasie kine twaaluka mu buavia bwa kwipaiwa. Kili kyabomba nga kisote kyetu kya kyuma, keelia kili kyasuunga malanga etu, eevi tuviinde kukaana kukita bibiipile, kisia tukite biweeme. Kiswapilo kyetu kiimaniine pa Bibilia, kili kyatukwasia tukile kumupalama Leeza, kabili kili kyatulangilila Yehova vyatutonene. Tuli twanoonkelamo saana musita utuli twasuunga kiswapilo kyetu kyasiele kyalumine.

17. Juu ya ki kiswapilo kyetu kili kyaleeta nsaansa?

¹⁷ Mu mukanda wakue ku Baroma, mutumua Paulo, waakinkiziizie nangue “maswapi enu amisaansamusie.” (Bar. 12:12) Paulo abanga wali ni nsaambu ya kusaansamuka paantu waali wasininkiziizie nangue kine wasiala wali wa kisinka, wakapata bukose bwa loonse ku muulu. Ni fwefue kunti twasekelela mu kiswapilo kyetu paantu tusininkiziizie nangue Yehova wakaba kufikilizia bulayo bwakue. Nga vyaaleembele kaleemba umo wa Malumbo, “ali ni nsaansa ni olia . . . ali ni kiswapilo muli Yehova Leeza wakue, . . . Olia asiele loonse wali wakisinka.”​—Malum. 146:5, 6.