1. Nsaansa yeetu iswapiile siani ‘bintu bitukabiile kimupasi’?

 NSAANSA ya kisinka, te aalisie ya kwiunvua buino ili yaiza ni kupita. Kunti yatwalilila mu buikazi bonse bwa muntu. Kunti yatwalilila siani? Yesu waalandile eevi mu nsimiko yakue ya ku lupili: “Bali ni nsaansa ni baalia benikile bintu byabo bibakabiile kimupasi.” (Mat. 5:3, NWT) Yesu waali wamanine nangue bantu, baabumbilue bali ni nkulu ikata ya kumumana ni kumupupa Kabumba wabo, Yehova Leeza. Keekio i kintu ‘kitukabiile kimupasi.’ Kabili, paantu Yehova ni “Leeza wansaansa,” baalia bali bamupupa ni beene kunti baaluka ni nsaansa.​—1 Tim. 1:11, NWT.

2-3. (a) Nga vyaalandile Yesu, ni baani bange bali kuviinda kwaluka ni nsaansa? (b) Tuli kulondoluela ki mu leeli lyasi, kabili juu ya ki tukabiile beebi bintu?

² Eba, iloombele tuye twali mu aali iweeme mu buikazi bwetu eevi tuye twali ni nsaansa? Ata. Mu nsimiko yakue, Yesu waalandile kintu kimo kya kupapia. “Baalia bali ni bulanda,” ibe juu ya kwemiiwa na mazaambi abo, ao juu ya lyemo libali nalio mu buikazi bwabo kunti baaluka ni nsaansa. Yesu waalandile evio vyenka palua ‘baalia bali mukwema palua kukita mutoneene Leeza,’ ao baalia bali ‘mukutukua’ paantu beene ni basambi bakue Kristu. (Mat. 5:4, 10, 11) Inzi, kunti kyakitika siani kwaluka ni nsaansa ya kisinka mu aali nga ezio?

³ Yesu taasambiliziizie nangue pa kunti tuye twali ni nsaansa iloombele kuya twali mu aali iweeme mu buikazi. Inzi, waasambiliziizie nangue nsaansa ya kisinka ili yafuma mu kufikilizia bintu bya kimupasi bitukabiile ni kuya twali ni bukibuza bwa peepi pamo ni Leeza. (Yak. 4:8) Kunti twakita siani evio? Mu  leeli lyasi, tuli kulondoluela bintu bitatu bya musinzi bili byatungulula ku nsaansa ya kisinka.

4. Zimbula kintu kya kuanza kya kutukwasia kuya twali ni nsaansa ya kisinka. (Malumbo 1:1-3)

⁴ KINTU KYA 1: Eevi tuye twali ni nsaansa ya kisinka, tupalile kuya twalia kyakulia kya kimupasi. Bantu pamo ni banama, bakabiile kyakulia kya kimubili eevi baye bakosele. Inzi, bantu sie bunke i bali balia kyakulia kya kimupasi. Kabili, tukabiile kyakulia keekio. Keekio i kyaalengiizie Yesu alande eevi: “Muntu takaba wakoselesie na kulia mukate, inzi waya wakosele na keebo kali kalanda Leeza.” (Mat. 4:4) Pakaako, te tupalile kulekelela busiku bonse bupitesie bila kusoma Mulandu Wakue Leeza wa mana, i kulanda Bibilia. Kaleemba umo wa Malumbo waaleembele eevi: ‘Muntu ali ni nsaansa ni olia ali wasaansamukila muzilo wakue Yehova, kabili ali wasoma muzilo Wakue mu lizui lya pansi busiku ni koba.’​—Soma Malumbo 1:1-3.

5-6. (a) Kunti twasambilila ki mu Bibilia? (b) Kusoma Bibilia kunti kwatukwasia mu nzila ki?

⁵ Paantu Yehova atutonene, ali watulangilila kupitila Bibilia beelia bitupalile kukita eevi tuye twali ni buikazi buli ni nsaansa. Tuli twasambilila vili mipaango yakue palua buikazi bwetu. Tuli twasambilila vya kumupalama weene ni kufikiila kweleelua mazaambi etu. Kabili tuli twasambilila palua kiswapilo kiweeme saana keelia kyalaile palua musita uli mukuiza. (Yer. 29:11) Bebio bisinka bituli twapata kupitila kusambilila Bibilia, bili byatulengia kwaluka ni nsaansa ikata!

⁶ Tumanine nangue mu Bibilia mwizuzi masoke ali abomba mu buikazi bwetu bwa kila  busiku. Kine twakoonka azo masoke, kunti twapata nsaansa. Kine waiunvua kuya watiokele mutima juu ya maavia, pisia nsita ingi wasoma Mulandu wakue Yehova ni kutontonkania. Yesu waalandile eevi: “Bakilile kusyuka [ao, bali ni nsaansa], baalia bali baunvua twebo twakue Leeza ni kutunakila!”​—Luk. 11:28.

7. Ni kiki kili kuviinda kukukwasia kunoonkelamo saana musita luuli wasoma Mulandu Wakue Leeza?

⁷ Musita luuli wasoma Mulandu Wakue Leeza, kwata musita wa kusekelela beelia byuli mukusoma. Tuleete mufuano, eba, ni weewe waaimweneene kale keeki kintu? Muntu umo, waeleka kyakulia keelia kyuli watona saana. Inzi paange, teuli na musita utosiizie wa kulia, ao paange upuuluilue juu ya kutontonkania bintu binge, ni keekio kyakulengia ulie lubilo saana bila kupisia musita wa kunvua kuwaama kwa kila kipande kya kyakulia kyuli kubiika mu kanua. Kisia kupua kulia, wainika nangue walia lubilo saana, kisia wafikiila kumona nangue wakiba wapalile kulia bukebuke eevi unvue makola a kila kipande kiwakiba wabiika mu kanua. Kunti kyaaluka enka evio ni musita utuli twasoma Bibilia. Nsita inge, tuli twasoma lubilo saana ni kwandua kusekelela mpunda ili mukati. Kwata musita wa kusekelela kusoma Mulandu Wakue Leeza. Iisaange waali mukumona bintu bili mukukitika, ezia kutontonkania vili mazui alandiiluemo, kabili tontonkania palua beelia biwafuma wasoma. Kukita evio, kunti kwaongezia nsaansa yobe.

8. “Muzia wa kisinka ni wa maano” ali mukufikilizia siani miilo yakue? (Mona ni bulondolozi bwa pensina.)

⁸ Yesu waasaakuile “muzia wa kisinka ni wa maano” eevi aye wateania kyakulia kya kimupasi pa musita upalile, kabili tuli mukulisiiwa buino saana kimupasi. b (Mat. 24:45, NWT) Kila kintu kili kyafumia muzia wa kisinka, kili kyasaangua kyaswapiile Maleembo atungulwilue na mupasi. (1 Bat. 2:13) Keekio kyakulia kya kimupasi, kili kyatukwasia kumana Yehova vyali watontonkania nga vikilangiliilue mu Bibilia. Keekio i kili kyatulengia kuya twasoma Lupungu Lwakue Kamwenenena ni Buuke! pamo ni maasi ali asaangua mu jw.org. Tuli twateania kulonghaana kwa mukati ka mulungu ni kwa ku mpela ya mulungu. Kabili tuli twakoonka viideo ya kila muezi ya JW Télédiffusion kine kuili. Kulia byakulia bingi bya kimupasi, kuli kutukwasia kukoonka nzila ya bubili ili yaleeta nsaansa ya kisinka.

9. Ni kintu ki kya bubili kili kyatuleetela nsaansa ya kisinka?

⁹ KINTU KYA 2: Eevi tuye twali ni nsaansa ya kisinka, tupalile kwikala kukoonkana ni mafunde akue Yehova. Kaleemba umo wa Malumbo waaleembele eevi: “Ali ni nsaansa ni olia onse ali wamutiina Yehova, olia ali waenda mu nzila Yakue.” (Malum. 128:1) Kumutiina Yehova, kuli na mana ya kumukindika saana weene, ni kutiina kukita kintu kyonse kyasiizi kutona. (Tus Maf. 16:6) Pakaako, tuli twatwalilila kwikwinda kukoonka mafunde akue Leeza alondolwelue mu Bibilia palua kiweeme ni kibiipile. (2 Bakor. 7:1) Kine twakita bintu bili byatona Yehova ni kukaana beelia byasiizi kutona, tuli kwaluka ni nsaansa.​—Malum. 37:27; 97:10; Bar. 12:9.

10. Kukoonkana ni Baroma 12:2, fwefue tupalile kukita ki?

¹⁰ Soma Baroma 12:2. Muntu kunti waya wamanine nangue Yehova i ali ni buviinde bwa kupingula kiweeme ni kibiipile, inzi kabili, apalile kupingula kukoonka mafunde akue Leeza. Kwa mufuano, muntu kunti waya wamanine nangue buteeko buli ni nsaambu ya kupingula lwendo lupalile kwenziziamo kiombo mu musebo.  Inzi, paange teezi kutona kunakila azo malaizio. Keekio kyamulengia aye waenzia lubilo saana kupusana ni vikipalile. Kupitila lwendo lwetu, tuli twalangilila nangue twinikile kakiine nangue kukoonka mafunde akue Yehova i nzila ya mana saana ya buikazi. (Tus Maf. 12:28) Daudi waaiunvuile evio vyenka. Keekio i kyaalengele alande eevi palwakue Yehova: “Weewe wandengia mane nzila ya bukose. Nsaansa ingi ili ntaanzi yobe; ku kuboko kobe kwa kulio kuli nsaansa loonse.”​—Malum. 16:11.

11-12. (a) Kine tuli mukwema ao tutiokele mutima, tupalile kuya twakengeele palua ki? (b) Milandu ili mu Bafilipi 4:8 kunti yatukwasia siani musita utuli twasaakula bintu bya kwisaansamusia?

¹¹ Musita utuli mukwema ao musita ututiokele mutima, kunti twatontonkania kukita kintu kya kutukwasia kulekela kwema palua maavia etu. Kukita evio kulisie buino, inzi tupalile kuya twakengeele eevi te kunti tubambe kukita kintu kisiizi kutona Yehova.​—Baef. 5:10-12, 15-17.

¹² Mu mukanda wakue ku Bafilipi, mutumua Paulo waabakinkiziizie Bakristu batwalilile kutontonkania palua bintu “bya nsaambu, . . . biswetele, . . . bitonekele, [kabili] biweeme.” (Soma Bafilipi 4:8 c.) Anzia kine mutumua Paulo taazimbuile bintu bya kwisaansamusia mu mpunda yaaleembele, beelia byaaleembele, bipalile kutukwasia ni fwefue musita utuli twasaakula bintu bya kwisaansamusia. Ezia kukita eevi: Ponse pali mulandu “bintu” mu ozo mulongo, biikapo mulandu, “nghimbo,” “ma viideo,” “bitabu,” ao “misaapo ya viideo.” Kukita evio, kunti kwakukwasia kwinika beelia bili kwitabilua na Leeza ni beelia byasiviinda kwitabila. Tutonene kukoonka mafunde a pa muulu akue Yehova. (Malum. 119:1-3) Kisia, kunti twakoonka kintu kya butatu kili kyatuleetela nsaansa ya kisinka twali ni kampingu kaswetele.​—Miil Bat. 23:1.

13. Zimbula kintu kya butatu kili kyatuleetela nsaansa ya kisinka. (Yoan. 4:23, 24)

¹³ KINTU KYA 3: Sininkizia nangue lupupo lwakue Yehova luli pa fuasi ya kuanza mu buikazi bobe. Yehova i waatubumbile, pakaako tupalile kumupupa weene. (Nfy. 4:11; 14:6, 7) Kansi, kintu kya mana saana mu buikazi bwetu kipalile kuya kyali kumupupa Yehova mu nzila elia yatonene, i kulanda kumupupa “na mupasi ni kisinka.” (Soma Yoane 4:23, 24. d) Tutonene mupasi wakue Leeza utungulule lupupo lwetu eevi lupatane ni bisinka bili mu Mulandu wakue. Lupupo lwetu lupalile kuya lwali lwa kuanza anzia kine twikeele mu kyalo moolia mukaaniiziwe miilo yeetu paleepale ao miilo yeetu yonse. Kufikiila loonu, balupua ni bankazi betu bakilile pa 100 bakakilue, paantusie beene ni Bakasininkizia Bakue Yehova. e Anzia evio, bali ni nsaansa paantu bali mukukita maka abo onse eevi kupepa, kusambilila ni kubabuilako bange palwakue Leeza weetu ni Bukolo bwakue. Kine bantu batuseka ao batusaanza, tuli kuya twali ni nsaansa paantu tumanine nangue Yehova ali pamo ni fwefue kabili wakaba kutupaala.​—Yak. 1:12; 1 Pet. 4:14.

14. Ni kiki kyaamusaangile mulumendo umo wa ku Tajikistan, kabili juu ya ki?

¹⁴ Bamo pakati ka balupua ni bankazi betu baasaakeene ni aali ikolele saana, inzi babanga  bali ni nsaansa kakiine paantu baakoonkele bintu bitatu bitwafuma mukulondoluela. Mona bintu byaamupatile mulumendo umo wa miaka 19 wa ku Tajikistan, ali wakuutua Jovidon Bobojonov, olia waakeene kwiingizia mu miilo ya bulukale. Pa nsiku 04, Muezi wa 10, 2019, waakwetue kwa maka kufuma ku nsesi yakue ni kutwalua mu buloko, kabili waakitile miezi ingi wakakilue nga ngipaani. Kooko kukitilua bintu bila nsaambu, kwaasalanghaniiziwe mu byalo bingi kupitila biombo bya kusalanghania mpunda. Mpunda yaalandile nangue ozo lupua waauminue eevi kumutiinta etabile kukita kilapo kya bulukale ni kuvuala ngubo ya bulukale. Kisia paapo, bazuuzi baapinguile nangue abanga wali ni kilubo, kisia baamutwele ku nkambi ya masaanzo, mpaka musita kateeka wa kyalo lwaafikiile kumweleela ni kwitabizia akakulue. Mu ozo musita onse, Jovidon waasuungile bukisinka bwakue ni nsaansa yakue. Ni kiki kyaamukwasiizie? Lyonse abanga wamanine bintu byaali wakabiile kimupasi.

15. Jovidon waali wapata siani kyakulia kya kimupasi musita lwabanga wali mu buloko?

¹⁵ Musita lwabanga wali mu buloko, Jovidon abanga walia kyakulia kya kimupasi anzia kine tabanga wali na Bibilia ao mpapulo yeetu. Waali waviinda siani kukita evio? Balupua ni bankazi ba kooko, lubaali bamutwalila byakulia bya kimubili, baali baleemba lileembo lya busiku ku  bifunda bilimo byakulia. Keekio kyaali kyamukwasia kuviinda kusoma Bibilia ni kutontonkania palua beelia byaali waasoma kila busiku. Kisia kufuma ku buloko, waabasokele eevi baalia basinapate maavia akolele nga azo: “Kili buino kubombia saana buntungua bumuli naabo eevi kumumana saana Yehova kupitila kusoma Mulandu wakue ni mpapulo yeetu.”

16. Jovidon waali wapoozele maano akue ku ki?

¹⁶ Lupua weetu waali waikeele kukoonkana ni mafunde akue Yehova. Kuliko kutwalilila kutontonkania palua nkulu ibiipile ni kwiingizia mu lwendo lubiipile, waapoozele maano akue kuli Yehova ni ku beelia bili byatona Yehova muine. Jovidon waali wapapiiwa na kuwaama kwa bibumbua byakue Yehova. Kila lukele-keele waali wabuuka musita tooni lutubanga twalila. Busiku, waali wakenta muezi ni ntanda. Waalandile eevi: “Bobo bupe kufuma kuli Yehova bwaali bwandengia nsaansamuke ni kukoseleziiwa.” Musita utuli twatasia palua bintu bya kimubili pamo ni malaizio atuli twapeelua na Yehova, tuli twaaluka ni nsaansa, kabili ezio nsaansa kunti yakosia buviinde bwetu bwa kusipikizia.

17. Musita utuli twaisaanga mu aali ipaleene ni yakue Jovidon, kunti kwaaluka ki kine twatwalilila kusipikizia? (1 Petro 1:6, 7)

¹⁷ Kabili Jovidon waabiikile lupupo lwakue Yehova pa ntaanzi. Waali wamanine nangue ni kintu kya mana kusiala wali wa kisinka kuli Leeza wakisinka. Yesu waalandile eevi: “Pupa Mulopue [Yehova] Leeza obe ni kumubombela ye bunke!” (Luk. 4:8) Bakulu ba balukale pamo ni balukale, baali batonene Jovidon alekele kuya wali Kasininkizia Wakue Yehova. Inzi, waali wapepa saana kila busiku nsita ya koba ni mu nsita ya busiku, wamuloomba Yehova eevi amukwasie kusiala wali wa kisinka. Anzia kine waakitiilue bintu bila nsaambu, Jovidon waasielesie wali wa kisinka. Keekio kyaalengiizie aye wali ni nsaansa paantu waapatile kintu kyasibanga wali nakio ntaanzi ya kusaanzua, kuumua ni kukakua, i kulanda waapatile kiketekelo kyeziiziwe.​—Soma 1 Petro 1:6, 7.

18. Kunti twatwalilila siani kusuunga nsaansa yeetu?

¹⁸ Yehova amanine keelia kitukabiile eevi tuye twali ni nsaansa ya kisinka. Kine weewe wakoonka bintu bitatu bili byaleeta nsaansa ya kisinka, kunti wasuunga nsaansa yobe anzia kine uli kuya wali mu maavia akolele. Kisia ni weewe kunti wafikiila kulanda nangue: “Bali ni nsaansa ni bantu bali ni Leeza wabo Yehova!”​—Malum. 144:15.