1. Yehova watukinkizia tukite ki?

NTONO ilamatiliile ni ya mana saana kuli Yehova. (Hos. 6:6) Atonene ni fwefue tuye twamwene nangue ezio mibeele ni ya mana saana. Kupitila Mika kabika wakue, Leeza weetu watukinkizia ‘tutone ntono ilamatiliile.’ (Mik. 6:8, bulondolozi bwa pensina) Inzi, ntaanzi ya kukita evio, tupalile kumananke ntono ilamatiliile ni kiki.

2. Ntono ilamatiliile ni kiki?

² Ntono ilamatiliile ni kiki? Bulanzi “ntono ilamatiliile” buli bwasaangua mara 230 eevi, mu Biblia​—Tafsiri ya Ulimwengu Mupya. Ezio ntono i kiki? Kukoonkana ni “Mana ya Milandu ya Bibilia,” bobo bulanzi bulangiliile, “ntono ikinkiziiziwe na kilapo, kuya wali sinta, bukisinka, ni kulamatilila saana. Lingi ili yabombiiwa eevi kulangilila ntono yakue Leeza ku bantu, inzi kabili ili yabombiiwa eevi kulangilila ntono ili yalangililana bantu.” Yehova i mufuano uweeme saana wa kulangilila ntono ilamatiliile. Mu leeli lyasi, tuli kulondoluela Yehova vyali wabalangilila bantu ntono ilamatiliile. Paantu tuli babombi bakue Leeza, mu lyasi likoonkelepo twakaba kulondoluela vituli kuviinda kumupala Yehova kupitila kulangililana ntono ilamatiliile.

3. Yehova waamubuilile ki Musa palwakue?

³ Musita uniini kisia Baisraeli kufuma ku Misri, Yehova waamubuilile Musa bintu paleepale palua liina Lyakue ni mibeele Yakue. Waalandile eevi: “Yehova, Yehova, Leeza waluse ni nkumbu, asiizi kuleenga kufiitua kabili ali ni ntono ingi ilamatiliile ni kisinka, ali walangilila ntono ilamatiliile ku ma elufu a bantu, ali waeleela kilubo ni bubiifi ni lizaambi.” (Kuf. 34:6, 7) Kupitila ezio milandu  iweeme saana, Yehova waamubuilile Musa kintu kiibeleele saana palua ntono Yakue ilamatiliile. Waamubuilile kintu ki?

4-5. (a) Yehova waalandile nangue weene ali siani? (b) Tuli kulondoluela biipuzio ki?

⁴ Yehova telangiliilesie kuya wali ni ntono ilamatiliile, inzi elangiliile kuya wali ni “ntono ingi ilamatiliile.” Mu Bibilia, bobo bulondolozi bulimo mara ikilile pa sita. (Mpen. 14:18; Neh. 9:17; Malum. 86:15; 103:8; Yoel. 2:13; Yon. 4:2) Mu ezio fuasi yonse, bobo bulondolozi bubombiiziwesie palwakue Yehova, apana ku bantu. Eba, te kya kupapia saana kumona nangue Yehova akonkomeene saana palua mibeele yakue ya ntono ilamatiliile? Kakiine ntono ilamatiliile ni ya mana saana kuli weene. * Kakiine Likolo Daudi waali ni nsaambu ya kulanda eevi: “We Yehova, ntono yobe ilamatiliile ifikile ku muulu . . . We Leeza, ntono yobe ilamatiliile ikindeeme saana! Baana bena bantu bali bafyama mu kilelo kya mapaapi obe.” (Malum. 36:5, 7) Eba, ni fwefue tumwene ntono ilamatiliile yakue Leeza kuya yali ya mana, nga evelia Daudi vyabanga waimwene?

⁵ Pakunti tumane buino vili ntono ilamatiliile, tulondoluele biipuzio bibili. Kya kuanza: Yehova ali wabalangilila baani ntono ilamatiliile? Ni kya bubili, kunti twanoonkelamo siani mu ntono ilamatiliile yakue Yehova?

6. Yehova ali wabalangilila baani ntono ilamatiliile?

⁶ Yehova ali wabalangilila baani ntono ilamatiliile? Bibilia ili yalanda nangue kunti twatona bintu bingi, nga evelia, “kulima,” “divai ni mafuta,” “malapizio,” “kumana,” “mulangue,” ni bingeko. (2 Mil Nsi. 26:10; Tus Maf. 12:1; 21:17; 29:3) Anzia evio, ntono ilamatiliile teizi kulangililua ku bintu, inzi ili yalangililuasie ku bantu. Yehova teezi kulangilila ntono ilamatiliile ku muntu onse. Ali walangilila ntono ezio ku bantu bali ni bukibuza bwibeleele pamo nakue. Leeza weetu ali walangilila bukisinka ku babibuza bakue. Ali ni mipaango iweeme saana palua babo bantu, kabili takalekela kubatona.

7. Yehova ali wabalangilila siani bantu bonse ntono?

⁷ Yehova ali wabalangilila ntono bantu bonse. Yesu waamulandile eevi muntu umo waali wakuutua Nikodemu: “Leeza waatoneesie bantu ba mu kyalo, i kyaapeleele muana wakue lyonga eevi kubalua muntu wamuketekela tekuti azeeze inzi aye wali ni bukose bwa muyayaya.”​—Yoan. 3:1, 16; Mat. 5:44, 45.

8-9. (a) Juu ya ki Yehova ali walangilila ntono ilamatiliile ku babombi bakue? (b) Kisia, tuli kulondoluela ki?

⁸ Nga vitwamona paapa pa muulu, Yehova ali walangililasie ntono ilamatiliile ku babombi  bakue, baalia bali ni bukibuza bwa peepi pamo nakue. Keekio kimwenekele buino mu bulanzi bwaalandile Likolo Daudi ni kabika Danieli. Kwa mufuano Daudi waalandile eevi: “Twalilila kulangilila ntono yobe ilamatiliile ku baalia bakumanine weewe.” Kabili waalandile eevi: “Ntono ilamatiliile yakue Yehova ni ya loonse ku baalia bali bamutiina weene.” Ni kabika Danieli waalandile eevi: “We Yehova Leeza wakisinka, [olia] ali walangilila ntono ilamatiliile ku baalia bamutonene weene ni kukoonka malaizio akue.” (Malum. 36:10; 103:17; Dan. 9:4) Kukoonkana ni eezi milandu itungulwilue na mupasi, Yehova ali walangilila ntono yakue ilamatiliile ku babombi bakue, paantu bamumanine, bali bamutiina, bamutonene kabili bakoonka malaizio akue. Yehova ali walangililasie ntono ilamatiliile ku bantu bali bamubombela mu nzila ipalile.

⁹ Ntaanzi tetunatendeke kumubombela Yehova, Leeza waali watulangilila ntono nga vyali wabalangilila bantu bange bonse. (Malum. 104:14) Inzi loonu, paantu tuli babombi bakue, ali watulangilila kabili ni ntono yakue ilamatiliile. Kakiine, Yehova ali mukubasininkiziizia eevi babombi bakue: “Ntono yane ilamatiliile teikafuma pali mwemue.” (Is. 54:10) Kakiine, nga vyaaimweneene Daudi, “Yehova wakaba kumukitila muntu wakue wa kisinka mu nzila iibeleele.” (Malum. 4:3) Keekio, kipalile kutukinkizia kukita ki? Kaleemba umo wa Malumbo waaleembele eevi: “Muntu onse ali ni mulangue, wakaba kukita beebi bintu, kabili wakaba kupooza saana maano ku bikitua byakue Yehova bya ntono ilamatiliile.” (Malum. 107:43) Ozo musoko uweeme ufumine kuli Yehova. Pakaako, loonu tulondolole Yehova vyali walangilila ntono yakue ilamatiliile mu nzila itatu. Kabili tuli kumona keekio vikili kyatukwasia musita lwali watulangilila ntono yakue ilamatiliile.

10. Ntono ilamatiliile ya loonse yakue Leeza ili yatukwasia siani? (Malum. 31:7)

¹⁰ Ntono ilamatiliile yakue Leeza ni ya loonse. Ntono ezio, izimbuilue mara 26 mu kitabu kya Malumbo 136. Azo Malumbo atendekele na eezi milandu: “Mutasie Yehova, paantu weene aweeme; ntono yakue ilamatiliile ni ya loonse.” (Malum. 136:1) Mu mulongo wa 2 mpaka wa 26, muli milandu ibuelulukile yalandile eevi: “Paantu ntono yakue ilamatiliile ni ya loonse.” Musita  utuli twasoma aza malumbo, tuli twapapa kumona Yehova vyali watwalilila kulangilila ntono yakue ilamatiliile bila kulekela. Milandu ibuelulukile mu azo malumbo, ilandile nangue “paantu ntono yakue ilamatiliile ni ya loonse,” ili yatusininkiziizia nangue ntono yakue Leeza ku bantu teizi kwaluluka. Kakiine, kili kyateekia saana mutima kumana nangue Yehova teezi kulekela lubilo kutona babombi bakue! Inzi, musita lwali watendeka kumulangilila ntono muntu ali wamubombela weene, teezi kumusia, asa mu nsita ya maavia. Fwefue, tuli twanoonkelamo siani? Kumana nangue Yehova teezi kutusia kuli kwatuleetela nsaansa. Kukila pakaako, kuli kwatupeela maka a kusipikizia maavia etu, ni kutukwasia kutwalilila kwenda mu nzila ili yatwala ku bukose.​—Soma Malumbo 31:7.

11. Nga vilandile Malumbo 86:5, ni kiki kili kyamusonsezia Yehova kweleela?

¹¹ Ntono ilamatiliile yakue Leeza ili yamulengia atweleele. Musita Yehova lwali wamutoosia muntu alapiile, alekeele kukoonka lwendo lwa lizaambi, ntono yakue ilamatiliile ili yamukinkizia kweleela. Kaleemba wa Malumbo Daudi waalandile eevi palwakue Yehova: “Teezi kutukitila kukoonkana ni mazaambi etu, kabili teezi kutulipa kukoonkana ni bilubo byetu.” (Malum. 103:8-11) Daudi waaiunvuiliile misa ni bulanda buli bwaunvua muntu kine kampingu kakue kali mukumwemia. Inzi kabili, weene waasambiliile nangue Yehova ‘aweeme kabili aleengele kweleela.’ Ni kiki kili kyamusonsezia Yehova kweleela? Kyasuko kili mu Malumbo 86:5. (Soma.) Kakiine, nga evelia vyaalandile Daudi mu lipepo, Yehova ali waeleela paantu ali ni ntono ilamatiliile ku baalia bali bamuloomba eevi abeleele.

12-13. Kine tuli mukwiluula palua bilubo byetu bya kale, ni kiki kili kuviinda kutukwasia?

¹² Kine twakita lizaambi, kili buino kunuuna palua bintu bitwakikita. Keekio kunti kyatukinkizia tulapile ni kwalulula lwendo lwetu lubiipile. Anzia evio, babombi bange bakue Leeza bali batwalilila kwiluula palua bilulo bibaakitile lwa kale. Kwiluula kwabo kuli kwabalengia bapingule nangue Yehova taviinda kubeleela ata kaniini, anzia kine baalapiile palua mazaambi abo ni kulekela kukita bintu bibiipile. Kine i vyuli waiunvua, kusambilila Yehova vyali wabalangilila babombi bakue ntono yakue ilamatiliile mu kwitonena, kuli kukukwasia.

 ¹³ Fwefue, tuli twanoonkelamo siani? Anzia kine tuli twakita bilubo, kunti twasekelela kumubombela Yehova twali ni kampingu kaswetele. Keekio kili kyakitika paantu “mulopa wakue muana wakue Yesu uli watusamba bibalo [mazaambi] byonse.” (1 Yoan. 1:7) Kine watioka mutima juu ya kilubo kyobe, languluka nangue atonene saana kukweleela kine walapila lizaambi lyobe. Mona Daudi vyaapalaniizie ntono ilamatiliile ni mibeele ya kweleela. Waaleembele eevi: “Nga evelia myulu viili kule ni kyalo, i vitanine ntono yakue ilamatiliile ku baalia bali bamutiina weene. Nga evelia vili kuleepa kuli pakati ka kutula koba ni kuzika koba, i vyali wabiika kule ni bilubo byetu.” (Malum. 103:11, 12) Kakiine, Yehova atonene ‘kweleela mu nzila ikata.’​—Is. 55:7.

14. Daudi waalangiliile siani nangue ntono ilamatiliile yakue Yehova ili yatusuunga?

¹⁴ Ntono ilamatiliile yakue Leeza ili yasuunga kimupasi. Daudi waapepele eevi kuli Yehova: “Weewe uli fuasi yane ya kufyaminamo; weewe wakansuunga kufuma mu buavia. Wakanzyungulukila na tupundu twa nsaansa twa kupususia. . . . Olia amuswapiile Yehova azyungulukiilue na ntono Yakue ilamatiliile.” (Malum. 32:7, 10) Mu nsita ya kale, mizi yaali yazyungulukiilue na mpango ya bibumba byaali byasuunga bantu eevi te kunti bengililue na baluani. Ntono ilamatiliile yakue Yehova, ili nga bibumba bili byatusuunga ku kila kintu kili kuviinda kwinoona bukibuza bwetu pamo nakue. Kukila pakaako, ntono ilamatiliile yakue Yehova ili yatukinkizia tumupalame.​—Yer. 31:3.

15. Fuasi ya kubutukilamo pamo ni kifyamino, bipateene siani ni ntono ilamatiliile yakue Yehova?

¹⁵ Daudi waabombiizie mulandu unge wa kupalania, eevi kulangilila Yehova vyali wasuunga bantu bakue. Waaleembele eevi: “Leeza ni fuasi yane ya kubutukilamo iswapikikile, Leeza ali wandangilila ntono ilamatiliile.” Kabili Daudi waalandile eevi palwakue Yehova: “Weene ni ntono yane ilamatiliile, kabili weene ni kifyamino kyane, fuasi yane ya kubutukilamo iswapikikile kabili mupususi wane, kisoolelo kyane, kabili Olia undi nabutukilamo.” (Malum. 59:17; 144:2) Juu ya ki Daudi waapalaniizie ntono ilamatiliile yakue Yehova na fuasi ya kubutukilamo ni kifyamino? Anzia kine twikeele kupi paanu pa kyalo, inzi twali babombi bakue, Yehova wakaba kutusuunga mu nzila itukabiile eevi kusuunga bukibuza bwetu bwa mana pamo nakue. Busininkizio bwa evio buli bwasaangua ni mu Malumbo 91. Kaleemba wa azo malumbo waalandile eevi: “Nakaba kumulanda eevi Yehova: ‘Weewe uli fuasi yane ya kubutukilamo kabili uli kifyamino kyane.’” (Malum. 91:1-3, 9, 14) Musa ni weene, waabombiizie milandu ilandiile palua fuasi ya kubutukilamo. (Malum. 90:1, bulondolozi bwa pensina) Musita uniini ntaanzi ya kufua kwakue, Musa waalandile bulanzi bunge bupalile kupoozuako maano kabili bwa kuteekia mutima. Waaleembele eevi: “Leeza ni fuasi ya kubutukilamo kutendeka mu nsita ya kale, maboko akue a loonse ali pensina pobe.” (Mal Miz. 33:27) Bulanzi “maboko akue a loonse ali pensina pobe,” bwatusambilizia ki palwakue Yehova?

16. Yehova ali watukwasia siani? (Malum. 136:23)

¹⁶ Musita utuli twaswapila nangue Yehova wakaba kutusuunga, tuli twaiunvua kuya twasuungilue. Inzi, nsita inge kunti twatioka mutima ni kutwalilila kuya twali mu ezio aali. Mu aali nga ezio, Yehova kunti watukitila ki? (Soma Malumbo 136:23.) Ali kubiika maboko akue pensina petu, ni kutukwasia tulekele kwiunvua ovio. (Malum. 28:9; 94:18) Fwefue, tuli twanoonkelamo siani? Tumanine nangue lyonse kunti twamuswapila Leeza. Keekio kili kyatukwasia kulanguluka nangue tupaalilue mu nzila ibili. Ya kuanza, tuli ni fuasi iswapikikile ya kubutukilamo anzia kine tuye twaikeele ku fuasi ki. Ya bubili, Baba weetu wantono ali ku muulu ali watwemena saana.

17. Juu ya ntono ilamatiliile yakue Leeza, kunti twasininkizia ki? (Malum. 33:18-22)

¹⁷ Nga vitwafuma mukusambilila, musita onse utwakaba kusaanga maavia, Yehova wakaba kutukwasia kusuunga bukibuza bwetu buweeme pamo nakue. (2 Bakor. 4:7-9) Kabika Yeremia waalandile eevi: “Juu ya ntono ilamatiliile yakue Yehova te twaapuile, paantu luse lwakue te luizi kupua ata kakiini.” (Lwi Mal. 3:22) Kunti twasininkizia nangue kakiine Yehova wakaba kutwalilila kutulangilila ntono yakue ilamatiliile, paantu Bibilia ili yalanda nangue “menso akue Yehova ali akenta baalia bali bamutiina weene, baalia bapembeleele ntono yakue ilamatiliile.”​—Soma Malumbo 33:18-22.

18-19. (a) Tutonene kuya twalangulukile ki? (b) Twakaba kulondoluela ki mu lyasi likoonkelepo?

¹⁸ Tutonene kuya twalangulukile ki? Ntaanzi tetunatendeke kumubombela, Yehova waali watulangilila ntono nga evelia vyali wabalangilila bantu bange bonse. Inzi, musita utwaatendekele kumupupa, waabambile kutulangilila ni ntono ilamatiliile. Paantu asonseziiziwe na ezio ntono, Yehova ali watukumbatila na maboko akue ali asuunga. Wakaba kutwalilila kuya watupalamikile peepi nakue, kabili wakaba kufikilizia mipaango yakue palwetu. Atonene tuye twali babibuza bakue loonse! (Malum. 46:1, 2, 7) Pakaako, anzia kine kunti twasaakaana ni maavia ali siani, Yehova wakaba kutupeela maka atukabiile eevi tuviinde kusiala twali ba kisinka kuli weene.

¹⁹ Twamona Yehova vyali walangilila ntono ilamatiliile ku babombi bakue. Kabili, atukenteleele ni fwefue tulangililane ntono ilamatiliile. Kunti twalangililana siani ntono ezio? Lyasi likoonkelepo lyakaba kutubuila vya kukita.