Bila, Bibilia aosie bitabu bilandiile mpunda ya kale te bilangiliile nangue keekio kyali kyakitika.

Nzila ipilibuiluemo leeli lileembo mu ma Bibilia engi, ili yalengia bantu kampanda batontonkanie nangue, mu nsiku yakue Paulo, Bakristu baali babatiziiwa pa fuasi ya bantu bafuile. Kwa mufuano, ma Bibilia ange alandile eevi: “Ale kine tekuli butuntumuko, ni kiki kyakakita baalia bali babatiziiwa palua bafuile?”​—New International Version.

Inzi, mona bulondolozi bwa bantu babili basambiliile Bibilia. Dr. Gregory Lockwood waalandile nangue malanga a kulanda nangue lubatizio lwaali lwakitua “palua bantu baali basyafuile kale” kunti aya ali “musango wa lubatizio, loolia kine lwatoosiiwa, te lwapateenepo na bitabu bilandiile mpunda ya kale ao Bibilia.” Enka evio, Kasambilizia Gordon D. Fee waaleembele eevi: “Tekuli mpunda ya kale ao ya Bibilia isininkiziizie loolo lubatizio. Kipingo kya Leenu te kilandile kantu palua kaako; tekuli busininkizio bulangiliile nangue keekio kyaakitiluepo na umo pakati ka Bakristu ba ku ntendeko ao na kanisa kampanda kaatendekeziiziwe musita uniini kisia batumua kufua.”

Bibilia ili yalanda nangue basambi bakue Yesu baali bapalile ‘kukita basambi kufuma ku bantu ba ntundu yonse, ni kubabatizia . . . , kubasambilizia kukoonka bintu byonse’ byaalaiziizie Yesu. (Mat. 28:19, 20, NWT) Ntaanzi muntu aaluke musambi abatiziiziwe, waali wapalile kusambilila palwakue Yehova ni Muana wakue, kubazumina, ni kubanakila. Muntu waali wasyafuile kabili wali mu kilibu, taviinda kukita bebio bintu; ni Mukristu akosele taviinda kukita bebio bintu pa fuasi yakue.​—Kas. 9:5, 10; Yoan. 4:1; 1 Bakor. 1:14-16.

Ale, kansi, Paulo wali wakebele kulanda ki?

Bantu kampanda ba mu Korinto, baali balanda nangue bafuile te bakatuntumunua. (1 Bakor. 15:12) Paulo waalangiliile nangue azo malanga ni a bufi. Waalandile nangue ‘kubalua busiku waali waenda wafuile.’ Kakiine, waali wakikoselesie. Waali wakebele kulanda nangue, kila busiku waali mu buavia bwa kufua, inzi, waali wasininkiziizie nangue kisia kufua, wakatuntumunua wali mupasi uli ni maka, nga vyaalukile Yesu.​—1 Bakor. 15:30-32, 42-44.

Bakorinto baali bapalile kumana nangue kine bantu baaluka Bakristu babiikilue mafuta, kila busiku kunti basaakaana na meezio ni kufikiila kufua ntaanzi ya kutuntumunua. Kwaluka muntu ‘abatiziiziwe muli Yesu Kristu’ kubiikile mukati ‘kubatiziiwa [ . . . ] mu lufu lwakue.’ (Bar. 6:3) Lubatizio lwabo lwa kimpalania lwaali lwabalengia baaluke ni buikazi bwa kubafikia ku lufu ni kutuntumunua eevi kwikala ku muulu.

Miaka ikilile pa ibili kisia Yesu kubatiziiwa, waabanine babili pakati ka basambi bakue eevi: “Lubatizio lundi mukubatiziiwa, mwakaba kubatiziiwa.” (Mark. 10:38, 39, NWT) Paapa, Yesu taali wabatiziiwa mu menda. Waakebele kulanda nangue kusiala wali wa kisinka kuli Leeza kwakamulengia kakiine kufikiila kufua. Paulo waaleembele nangue Bakristu babiikilue mafuta, baali ni ‘kukyuziiwa pamo eevi baviinde kulumbaniiwa pamo.’ (Bar. 8:16, 17, NWT; 2 Bakor. 4:17) Pakaako, eevi kufikiila kutuntumunua ni kuya ku muulu, ni beene baali ba kufua.

Pakaako, milandu yakue Paulo kunti yapilibulua eevi bila kilubo: “Kine te evio, baalia bali mukubatiziiwa eevi kufikiila kufua, bakakita siani? Kine bafuile te bakatuntumunuapo, ale juu ya ki kabili babo bali mukubatiziiwa eevi kufikiila kwaluka evio?”