1. Balupua ni bankazi ba kisinka kunti baaluka ni bukibuza bwa siani pamo ni Yehova?

LUPUA lwakue Yehova lubiikile mukati Yesu, ali “libeli pa bibumbua byonse,” pamo ni bamalaika bengi saana. (Bakol. 1:15, NWT; Malum. 103:20) Musita Yesu lwabanga wali pa kyalo, waalangiliile nangue bantu ba kisinka kunti bamumona Yehova kuya wali Baba wabo. Lwaali walondolola ni basambi bakue, Yesu waamuzimbuile Yehova kuya wali ‘Baba wakue kabili Baba weenu.’ (Yoan. 20:17, NWT) Ni musita utwaipeela kuli Yehova ni kubatiziiwa, twaaluka seemu ya lupua luli ni ntono lwa balupua ni bankazi.​—Mark. 10:29, 30.

2. Tuli kulondoluela ki mu leeli lyasi?

² Bange bali bamona kyakolele kumumona Yehova kuya wali Baba wantono. Bange kunti baya bila bamanine vya kubalangilila ntono balupua ni bankazi babo. Mu leeli lyasi, tuli kumona Yesu vyali watukwasia kumumona Yehova kuya wali Baba wantono, kabili olia utuli kuviinda kupalama. Kabili, tuli kumona nzila ya kukoonka eevi kumupala Yehova mu namuna ituli twabakitilamo balupua ni bankazi betu.

3. Lipepo lyaasambiliziizie Yesu lili lyatulengia siani tumupalame Yehova?

³ Yehova ni Baba wantono. Yesu atonene tumumone Yehova nga evelia vyamumwene weene, i kulanda, tumumone nga baba ali ni ntono olia utuli kuviinda kulanda nakue musita onse, apana nga muntu asasile ali watulandasie kintu keelia kitupalile kukita. Twamana evio kupitila milandu yakue Yesu yaababuilile basambi bakue, ya kubombia musita wa kupepa. Mu lipepo lyakue litupalile kupala waatendekele na eezi milandu: “We Baba weetu.” (Mat. 6:9, NWT) Yesu nga waatulandile tuye twamukuuta Yehova nangue “Wamaka Onse,” “Kabumba,” ao “Likolo lya muyayaya.” Kabili, meena azo onse apalile, kabili apateene ni Maleembo. (Kut. 49:25; Is. 40:28; 1 Tim. 1:17) Inzi, Yesu waatulandile tuye twamukuuta Yehova nangue “Baba.”

4. Twamana siani nangue Yehova atonene tumupalame?

 ⁴ Eba, uli wasaangua wamwene kyakolele kumumona Yehova kuya wali Baba wantono? Bange pakati keetu bali basaangua bamwene kyakolele. Kine Baba weetu waali wasasile, kunti twamona kyakolele kutontonkania nangue kuli ni baba unge atutonene. Kunti twakoseleziiwa kumana nangue Yehova amanine vituli twaiunvua kabili amanine ni nsaambu ilengele twiunvue evio! Atonene kutupalama. Keekio i kilengele Mulandu wakue utukinkizie eevi: “Mupalame Leeza, ni ye ali kumipalama.” (Yak. 4:8) Yehova atutonene, kabili alandile nangue weene ali kuya wali Baba aweeme saana kukila baba onse utuli nakue.

5. Kukoonkana ni lileembo lya Luka 10:22, Yesu ali watukwasia siani kumupalama Yehova?

⁵ Yesu kunti watukwasia kumupalama Yehova. Yesu amumanine Yehova buino saana kabili ali walangilila mibeele yakue Yehova mukupuililika. Ni keekio i kyaalengele alande eevi: “Olia wamona neene, wamumona ni Baba.” (Yoan. 14:9, NWT) Nga evelia libeli, Yesu ali watusambilizia vya kumukindika ni kumunakila Baba weetu wantono, vya kutiina kumulengia afipue, ni vya kufikiila kwitabilua kuli weene. Inzi, buikazi bwakue Yesu paanu pa kyalo i buli bwatukwasia kwinika nangue Yehova aweeme saana kabili atutonene. (Soma Luka 10:22.) Ale kansi, tulondoluele mifuano paleepale.

6. Leeta mifuano ilangiliile namuna Yehova vyaamutuiliziizie Yesu.

⁶ Yehova ali wabatuilizia baana bakue. Tontonkania Yehova vyaatuiliziizie Muana wakue libeli. Kakiine, Yehova waatuiliziizie mapepo engi aakitile Muana wakue lwaali paanu pa kyalo. (Luk. 5:16) Waamutuiliziizie Yesu wali mukupepa musita wa kukita bupinguzi bwa mana bwa kusaakula batumua bakue 12. (Luk. 6:12, 13) Kabili, Yehova waatuiliziizie lipepo lyakue Yesu musita lwaali waemene saana. Ntaanzi ya kunti Yuda amupaane Yesu ku baluani bakue, Yesu waapepele wamubuila Baba wakue palua bintu byaali peepi kumusaanga. Yehova taapeleelesie pa kutuilizia lipepo lyakue Yesu, inzi kabili, waatumine malaika eze amukoselezie Muana wakue mutonua.​—Luk. 22:41-44.

7. Kumana nangue Yehova ali waasuka mapepo a bantu bakue kwakulengia wiunvue siani?

⁷ Leenu, Yehova atwaliliile kutuilizia mapepo  a babombi bakue, kabili ali wabaasuka pa musita upalile kabili mu nzila ikilile kuwaama. (Malum. 116:1, 2) Kwa mufuano, nkazi umo wa mu kyalo kya India waaimweneene Yehova vyaasukile mapepo akue. Abanga wali ni buavia bwa kuya waemenesie mu maano, kabili waapepele saana kuli Yehova palua ezio aali. Waleemba eevi: “Ntantiko ya JW Télédiffusion ya Muezi 05, 2019, ibanga yalandila vya kuluisia lyemo ni muenzo, yaali kyenka kintu kinaali nakabiile. Keekio i kyali kyasuko kya mapepo ane.”

8. Yehova waalangiliile mu nzila ki nangue amutonene Yesu?

⁸ Yehova atutonene, kabili ali watwemena nga eveliasie vyabanga wamutonene ni kumwemena Yesu musita wa buikazi bwakue bonse paanu pa kyalo. (Yoan. 5:20) Waamukwasiizie Yesu atwalilile kuya wali ni kiketekelo kyalumine, waamukoseleziizie musita lwabanga wali ni lyemo, kabili waasininkiziizie nangue Yesu ali ni bintu byakabiile eevi aye wakosele. Kabili, Yehova waalandile paswetele nangue amutonene kabili amwitabiile Muana wakue. (Mat. 3:16, 17) Paantu lyonse waali wamuswapiile Baba wakue wantono ali ku muulu, Yesu taaiunvuile ata kaniini kuya wali bunke.​—Yoan. 8:16.

9. Ni busininkizio ki butuli naabo bulangiliile nangue Yehova atutonene?

⁹ Nga Yesu, fwe bonse twakimuena ntono yakue Yehova mu nzila ingi. Tontonkania kakaniini: Yehova etabiile twaluke babibuza bakue, kabili atupeele balupua ni bankazi bali batulengia twiunvue buino musita utuli mukwema mu maano. (Yoan. 6:44) Kabili, Yehova ali watupeela kila kintu kitukabiile eevi kiketekelo kyetu kitwalilile kuya kyakosele. Kabili ali watukwasia eevi tupate bintu byetu bya kimubili bitukabiile kila busiku. (Mat. 6:31, 32) Musita utuli twatontonkania palua ntono yakue Yehova pali fwefue, ntono yetu kuli weene ili yakila kukosa.

10. Kunti twasambilila ki kupitila nzila yakue Yehova yali wabakitilamo balupua ni bankazi betu?

¹⁰ Yehova abatonene balupua ni bankazi betu. Inzi, lingi tekiizi kusaangua kyalengele kwiunvua kuya twabatonene ao kubalangilila ntono. Musita unge kikolele paantu mibeele ya ku fuasi kutwakuliile ni nkulilo yeetu ipuseene. Kabili fwe bonse tuli twakita bilubo bili byalengia bange bafiitue ni kubationa mutima. Anzia evio, fwe bonse kunti twakwasia kukosia ntono ya mu lupua lwetu lwa kimupasi. Kunti twakita evio siani? Kupitila kumupala Baba weetu mu kubalangilila ntono balupua ni bankazi betu. (Baef. 5:1, 2; 1 Yoan. 4:19) Ale kansi, tumone bintu bituli kusambilila kupitila mufuano wakue Yehova.

11. Yesu waalangiliile siani “nkumbu ilambaleele” yakue Yehova?

¹¹ Yehova ali walangilila “nkumbu ilambaleele.” (Luk. 1:78, NWT) Muntu ali ni nkumbu ali waema musita lwali wamona bantu bali mu lyemo, kabili ali wakeba nzila ya kubakwasia ni kubateekia mutima. Yesu waalangiliile Yehova vyali waemena bantu kupitila nzila yaali wabakitilamo. (Yoan. 5:19) Musita Yesu lwaamwene libumba lya bantu, “waabonvwiliile nkumbu paantu baali batopele bali mukwemooka nga mikooko isili na musungi.” (Mat. 9:36) Yesu taali wapeleelasie pa kubonvuila nkumbu, inzi, waali wakitapo ni kantu eevi kubakwasia. Waakosiizie baluele ni kukwasia baalia baali “batopele na kutwama bitwamo.”​—Mat. 11:28-30; 14:14.

12. Kunti twabalangilila siani nkumbu balupua ni bankazi betu? Leeta mufuano.

¹² Kine twatontonkania palua maavia ali na balupua ni bankazi betu, kunti twabonvuila nkumbu. Kwa mufuano, nkazi umo kunti waya wali ni buluele bukolele. Inzi, teezi kulanda palua buavia bobo. Anzia evio, kunti watona saana  kine muntu kampanda wamukwasia. Paange ali ni buavia bwa kufikilizia bintu bya kimubili bikabiile bantu ba mu lupua lwakue. Eba, ali kutona kine twamukwasia kweleka byakulia ao kuswesia mu nsesi yakue? Paange lupua umo miilo yakue yakipua. Kunti twamupeela bupe bwa nfalanga, paange bila kumubuila nangue fwefue i bamupeela, eevi kumonasie imukwasie mu kupembelela akabe kupata miilo inge.

13-14. Kunti twamupala siani Yehova mu kulangilila mibeele ya kupeelana?

¹³ Yehova ali wapeelana. (Mat. 5:45) Te tupalile kupembelela mpaka ba lupua ni bankazi beeze baloombe tubakwasie kusyali tubalangilile nkumbu. Nga vili vyakita Yehova, tupalile kubalangilila nkumbu ntaanzi tebanatuloombe. Ali wanokia nvula bila twamuloombele! Kabili nvula ili yakwasia kila umo, atasie baalia basiizi kutasia. Musita Yehova lwali watupeela bintu bitukabiile, ali walangilila nangue atutonene. Tumutonene saana Yehova paantu aweeme saana kabili ali ni mibeele ya kupelaana!

¹⁴ Balupua ni bankazi bengi bali mukumupala Yehova. Bali mukukita evio kupitila kukwata bo beene bupinguzi bwa kulangilila mibeele ya kupaana. Kwa mufuano mu 2013, mulula ukata wa mu menda waainoonene saana bintu mu kyalo kya Ufilipino. Balupua ni bankazi bengi baazeeziizie masesi ni bintu byabo. Inzi, lupua lwabo lwa kimupasi lwa mu kyalo kyonse lwaabakwasiizie bila kukokola. Bengi baalongiizie nfalanga ao kukwasia miilo ya kukuula ni keekio kyaalengiizie masesi mia saba ni makumi asano (750) eevi, atengeneziiwe ao kukuulua mu muaka umosie! Musita wa bulwele bwa korona (COVID-19), Bakasininkizia bengi baabombele saana eevi kukwasia balupua ni bankazi babo. Kine twabakwasia balupua ni bankazi beetu bila kukokola, twalangilila nangue tubatonene.

15-16. Kukoonkana ni lileembo lya Luka 6:36, kunti twakita ki eevi kumupala Baba weetu wa ku muulu?

¹⁵ Yehova ali ni luse kabili ali waeleelana. (Soma Luka 6:36. *) Kila busiku Yehova ali watulangilila luse. (Malum. 103:10-14) Basambi bakue Yesu te baali bapuililikile; inzi, Yesu waali wabalangilila luse ni kubeleela. Kabili waali waiteaniiziesie kufumia bukose bwakue eevi  mazaambi etu eleelue. (1 Yoan. 2:1, 2) Luse ni kweleelua kutuli twaeleelua na Yehova ni Yesu, bili byalengia tukile kubapalama.

¹⁶ Tuli twakila kutonana musita utuli ‘twaeleelana mukwitonena.’ (Baef. 4:32, NWT) Inzi, musita unge kweleelana kuli kwasaangua kwakolele, pakaako, tupalile kwikwinda eevi kubombelapo. Nkazi umo waamwene nangue lyasi limo lya mu Lupungu Lwakue Kamwenenena lyaali lyalanda nangue “Be Mwaeleelana Mukwitonena,” lyaamukwasiizie ekwinde kweleela bange. * Waakileemba eevi: “Kusambilila leelio lyasi, kwaakinkwasia kumona bintu mu nzila iibeleele kabili yaweeme. Lyaalondoluele nangue kuya twaiteaniizie kweleela bange te kulanda nangue twaitabizia keekio kilubo ao kukeefia buavia buli bwaleetua na keekio kilubo. Inzi, kweleela kuli na mana ya kusiala bila twamufitiilue ozo muntu ni kusiala twasuungile mutende weetu.” Kine twabeleela balupua ni bankazi betu mukwitonena, twalangilila nangue tubatonene kabili twamupala Baba weetu, Yehova.

17. Kukoonkana ni lileembo lya Mateo 5:16, kunti twakita ki eevi tumukindike Baba wetu wa ku muulu?

¹⁷ Tuli twatasia saana kuya twali mu lupua lwa balupua ni bankazi lwa mu kyalo kyonse, luli ni ntono. Tutonene bantu bengi saana beyunge pamo ni fwefue mu kumupupa Leeza weetu. Pakaako, te tupalile kukita ata kaniini kantu kali kulengia bantu balande bibiipile palwakue Yehova ni bantu bakue. Pakaako, tupalile kwikwinda lyonse kuya twali ni lwendo luli kulengia bantu betabile mpunda iweeme.​—Soma Mateo 5:16.

18. Ni kiki kili kutukwasia tusimikile bila muenzo?

¹⁸ Nsita inge, bantu kunti batupunia ao kutukyuzia juu tuli twamunakila Baba weetu wa ku muulu. Kunti twakita ki kine twaunvua mwenzo wa kubabuilako bange bintu bituzumiine? Tupalile kuya twali ni kisinka nangue Yehova ni Muana wakue bali kutukwasia. Yesu waabasininkiziizie basambi bakue nangue te bapalile kunvua muenzo palua milandu ya kubombia ni vya kulanda. Juu ya ki? Yesu waalandile eevi: “Mwakapeelua beelia bimupalile kulanda  mu wenka ozo musita, paantu baalia bali mukulanda te mwemuesie, inzi, mupasi wakue Baba weenu i uli mukulanda kupitila mwemue.”​—Mat. 10:19, 20, NWT.

19. Leeta mufuano wa muntu umo waasimikiile wasipile.

¹⁹ Tontonkania palua mufuano wakue Robert. Musita umo waapitile, lwaali wakilisie musambi wa leenu wa Bibilia, kabili tanamane bingi palua Bibilia, baamukuutile ku tribinali ya ba lukale mu kyalo kya Afrika ya ku Nkungulua (Afrique du Sud). Baamulandile alondolole juu ya ki teezi kwiingizia mu miilo ya ba lukale. Waali wasipile kabili waabalandile nangue tatonene kukwasia ku lubali lolonse paantu abatonene balupua bakue Bakristu. Waali watasiizie kuya wali mu lupua lwetu lwa kimupasi! Zuuzi umo waamwipuziizie eevi mukusitukila: “Balupua bobe ni baani?” Robert taali wamaniine mbeela nangue bali kumwipuzia keekio kiipuzio, inzi penka paalia waalangulukile lileembo lya bobo busiku. Lileembo leelio lyali Mateo 12:50: “Olia onse ali wakita kutona kwakue Baba wane ali ku muulu, ozo i lupua wane, nkazi wane, ni mama wane (NWT).” Anzia kine mu ozo musita Robert waali musambi wa leenu wa Bibilia, mupasi wakue Yehova waamukwasiizie aasuke biipuzio paleepale byasibanga waketekeele. Kipalile Yehova waamwitoneene Robert! Kabili, Yehova kunti watwitoneena ni fwefue kine twamuswapila atupeele kusipa musita utupalile kufumia busininkizio mu aali ikolele.

20. Tupalile kupingula kukita ki? (Yoane 17:11, 15)

²⁰ Tuye twamwene kuya lyali lisyuko likata kuba seemu ya lupua lwa kimupasi luli ni ntono. Tuli ni Baba akilile kuwaama, kabili tuli ni balupua ni bankazi batutonene. Te tupalile kukwata leelio lisyuko na muleele. Sataana pamo ni bantu bakue babiipile, bali baezia kutulengia tutontonkanie nangue Baba weetu wa ku muulu tatutonene, kabili bali baezia kuvulungania buumo bwetu butuli twasekelela. Inzi, Yesu waapepele juu yeetu wamuloomba Baba weetu aye watulabukiile eevi lupua lwetu lutwalilile kuya lwali mu buumo. (Soma Yoane 17:11, 15.) Yehova ali mukwasuka leelio lipepo. Nga evelia vyaakitile Yesu, ni fwefue tekuti tutwisike ata kaniini palua ntono ni bukwasi bwakue Baba weetu wa ku muulu. Kansi, tupingule kutwalilila kuya twapaleeme ku lupua lwetu lwa kimupasi.