LYASI LYA KUSAMBILILA LYA 4
LWIMBO 18 Twatasia Palua Kilubula Mulandu
Kilubula-Mulandu Kili Kyatusambilizia ki?
“Leeza waatulangisiizie ntono yakue.”—1 YOAN. 4:9.
KIKATA KIINE
Kupitila kilubula-mulandu, tuli kusambilila mibele iweme yakue Yehova Leeza ni yakue Yesu Kristu.
1. Juu ya ki kila mwaka tupalile kuya twasangua ku Kibukisio kya lufu lwakue Yesu?
KAKIINE, wewe umanine nangue kilubula-mulandu ni bupe bwa mana sana! (2 Bakor. 9:15) Pantu Yesu waapeele bukose bwakue, wewe kunti waaluka ni burafiki buweme pamo ni Yehova Leeza. Kukila pa kako, wewe kunti waaluka ni kiswapilo kya kupata bukose bwa lonse. Kansi, tuli ni nsambu ingi ya kumutasia Yehova, olia waakitile mupango wa kumufumia Yesu aaluke kilubula-mulandu, pantu atutonene sana! (Bar. 5:8) Evi kutukwasia te kunti tulabe kuya twamutasia Yehova ni Yesu palua kintu kibaatukitiile, Yesu waatupeele lifunde lya kuya twasangua ku Kibukisio kya lufu lwakue kila mwaka.—Luk. 22:19, 20.
2. Tuli kusambilila ki mu leli lyasi?
2 Mu onu mwaka, Kibukisio kyakaba kukitua ya Sita, pa Nsiku 12, Mwezi wa 04, 2025. Kulanda kisinka, fwe bonse tuli mukwiteania evi tukabe kusanguako. Mu kipindi kya Kibukisio, kunti kyawama sana kine kila umo pakati ketu wapanga musita wa kutontonkania a palua bintu byaatukitiile Yehova pamo ni Mwana wakue. Mu leli lyasi, tuli kumona bintu bituli twasambilila pa lwakue Yehova ni Mwana wakue kupitila kilubula-mulandu. Mu lyasi likonkelepo, twakaba kusambilila faida ya kilubula-mulandu ni bintu bitupalile kukita evi kumutasia Yehova.
KILUBULA-MULANDU KILI KYATUSAMBILIZIA KI PA LWAKUE YEHOVA?
3. Lufu lwa muntu umo kunti lwavinda syani kukombola ma milioni a bantu? (Mona ni foto.)
3 Kilubula-mulandu kili kyatusambilizia nangue Yehova ni wa nsambu. (Mal Miz. 32:4) Juu ya ki twalanda evio? Tontonkania kakanini: Pantu Adamu taamunakiile Yehova, fwefue twaapyene lizambi lelia lili lyalengia tuye twafua. (Bar. 5:12) Evi kutukombola mu lizambi ni lufu, Yehova waakwete mupango wa kumufumia Yesu evi aaluke kilubula-mulandu. Inzi, kunti twaiipuzia evi: Eba, ale muntu umo apwililikile kunti wavinda syani kukombola ma milioni a bantu? Mutumua Paulo walondolola evi: “Nga evelia bantu bonse vibali ba bibalo [mazambi] kukonkana ni kusinakila kwa muntu umo [Adamu], i vitulunghamikilue na Leeza kukonkana ni kunakila kwa muntu umo [Yesu].” (Bar. 5:19; 1 Tim. 2:6) Mu milandu inge, fwe bonse tuli ba mazambi, kabili tuli ba kufua pantu muntu umo olia abanga wapwililikile taamunakiile Leeza. Pa kako, pa kunti tukombolue mu lizambi ni lufu, kyaalombele muntu umo apwililikile amunakile Leeza.
Juu ya muntu umo, Adamu, fwe bantu bonse tuli ni lizambi, kabili tuli twafua. Inzi kabili, juu ya muntu umo, Yesu, fwe bonse kunti twakombolua mu lizambi ni lufu (Mona lifungu lya 3)
4. Juu ya ki Yehova taabapeele sie baana balungheeme bena Adamu buvinde bwa kwikala lonse?
4 Eba, kibanga kyalombele kakiine mpaka Yesu afue evi kutukombola? Juu ya ki Yehova taapingwile sie kubapeela baana balungheeme bena Adamu buvinde bwa kwikala lonse? Ku mawazo a bantu, pange nga kibanga kyali sie bwino Yehova akitenge evio. Inzi, pantu Yehova ni wa nsambu, wene waamwene nangue te kibanga kyapalile kukita evio. Akitenge evelia, nga kyaamwenekele nangue taapozele mano ku lizambi likata lyakue Adamu lya kusinakila.
5. Juu ya ki tusininkiziizie nangue Yehova wakaba wakita lyonse kintu kya nsambu?
5 Kabenge Yehova Leeza taakwete mupango wa kufumia kilubula-mulandu, kabili apingulenge kubiika nsambu yakue ku mbali kupitila kubapeela sie baana basipwililikile bakue Adamu buvinde bwa kwikala lonse, ni kiki kyaasiile kukitika? Pange nga bantu baatontonkaniizie nangue Leeza wakabiika kabili nsambu yakue ku mbali ni mu bintu binge, kabili nangue pange takavinda kufikilizia bulayo paleepale. Inzi, fwefue te tupalile kwema palua kekio. Juu ya ki? Yehova waakitile kintu kya nsambu ata sie kine kyaalombele epeele sana, i kulanda, waafumiizie Mwana wakue mutonua. Kumana evio, kwatusininkiziizia nangue lyonse wakaba wakita kintu kya nsambu.
6. Ni kiki kinge kyaalengiizie Yehova atume mwana wakue? (1 Yoane 4:9, 10)
6 Kilubula-mulandu kili kyatusambilizia nangue Yehova ni Leeza wa nsambu. Inzi, kintu kinge kyaalengiizie Yehova afumie kilubula-mulandu ni ntono. (Yoan. 3:16; soma 1 Yoane 4:9, 10.) Yehova waamutumine Yesu evi aaluke kilubula-mulandu pantu atonene tukekale lonse, kabili pantu atonene twingile mu lupua lwakue. Languluka nangue musita Adamu lwaakitile lizambi, Yehova waamukumbile mu lupua lwakue lwa babombi bakue. Pa kako, ni fwefue twaavyaliilue panze pa lupua lwakue Leeza. Inzi, pantu kilubula-mulandu kyaalipilue, bantu bonse baalia bali ni kiketekelo muli Leeza, kabili baalia bali bamunakila, busiku bumo kunti baingila mu lupua lwakue. Ata sie lonu, Yehova ali waeleela mazambi etu, kabili kunti twaaluka ni burafiki buweme pamo nakue ni pamo ni ba lupua ni ba nkazi. Kakiine, Yehova atutonene sana!—Bar. 5:10, 11.
7. Kukyuziiwa kwakue Yesu kwatukwasia syani kunvwiisia Yehova vyatutonene?
7 Kunti twaunvwisia Yehova vyatutonene kine twatontonkania wene vyaakisilue musita lwaamwene mwana wakue wali mukwemiiwa. Sataana ali walanda nangue te kuli mubombi wakue Leeza ata umo wa kuvinda kusyala wali wa kisinka ku Leeza kine kikolele kukita evio. Evi kulangilila nangue Sataana ni wa bufi, Yehova waalekeleele Yesu emiiwe ao akyuziiwe ntanzi ya kufua. (Yob. 2:1-5; 1 Pet. 2:21) Yehova waaimweneene musita balwani ba ma dini lubabanga bamuseka Yesu, ba soda lubabanga bamuuma, kisia ni kumutundika pa kimuti. Kukila pa kako, Yehova waimweneene mwana wakue mutonua wali mukufua waunvwile misa sana. (Mat. 27:28-31, 39) Yehova abanga wali ni buvinde bwa kwanzia bebio byonse te kunti bikitike. Kwa mufuano, balwani lubaalandile nangue: “Ale sasa [Leeza] amupususie kine amutonene,” Yehova abanga wali ni buvinde bwa kumupususia. (Mat. 27:42, 43) Inzi, Yehova akitenge evio, Yesu nga taapeele bukose bwakue evi bwaluke kilubula-mulandu, kabili nga twaasyele bila kiswapilo. Pa kako, Yehova waalekeleele Mwana wakue akyuziiwe mpaka lwaafwile.
8. Juu ya ki kunti twalanda nangue Yehova waakisilue musita lwaamwene Mwana wakue wali mukukyuziiwa? Londolola. (Mona ni foto.)
8 Te tupalile kutontonkania nangue pantu Leeza ni wa maka onse, manake wene tezi kwiunvua nga fwefue. Yehova waatubumbile mu kipalo kyakue, waatubumbile twali ni isia ao kwiunvua. Pa kako, ni wene ali ni isia. Bibilia ili yalanda nangue wene ali ‘wakisika ku mutima.’ (Malum. 78:40, 41) Kabili, tontonkania palua mufuano wakue Abrahamu ni Isaka. Languluka nangue Yehova waamulandile Abrahamu afumie mwana wakue umo sie evi aaluke ngeleelo. (Kut. 22:9-12; Baeb. 11:17-19) Ezia kutontonkania bulanda ni misa yaaunvwile Abrahamu lwabanga wasyamusinza mwana wakue na kisu evi kumwipaya. Ale tontonkania ni bulanda bukata bwaaunwile Yehova lwaamwene Mwana wakue wali mukukyuziiwa ni kwipaiwa!—Mona ku jw.org video, Tuige Imani Yao—Abrahamu, Sehemu ya 2.
Yehova waakisikile ku mutima lwaamwene Mwana wakue wali mukukyuziiwa (Mona lifungu lya 8)
9. Lilembo lya Baroma 8:32, 38, 39 kunti lyakusambilizia ki palua ntono yakue Yehova?
9 Kilubula-mulandu kili kyatusambilizia nangue te kuli muntu ata umo, kibe ni mutonua wa mu lupua lwetu ao mwinetu wa pepi sana, atutonene nga Yehova. (Soma Baroma 8:32, 38, 39.) Tusininkiziizie kakiine nangue Yehova atutonene sana kupita ni vitwiitonene fwe bene. Eba, wewe utonene kwikala lonse? Yehova i atonene sana wewe ukekale lonse. Eba, wewe utonene mazambi obe eleelue? Yehova i atonene sana kukweleela mazambi. Kintu kyakebele sie fwefue tukite ni keki: Kumutasia palua kelia kyaatukitiile. Kunti twamutasia kupitila kumuketekela ni kumunakila. Kakiine, kilubula-mulandu ni bupe buweme sana bulangiliile nangue Yehova atutonene sana. Kabili, mu kyalo kya lenu, twakasambilila bingi sana palua ntono yakue.—Kas. 3:11.
KILUBULA-MULANDU KILI KYATUSAMBILIZIA KI PA LWAKUE YESU?
10. (a) Ni kiki asa kyaalengiizie Yesu onvue bulanda palua kufua kwakue? (b) Yesu waalangiliile syani nangue Sataana ni wa bufi? (Mona ni kisanduku kilandile nangue “ Bukisinka Bwakue Yesu Bwaalangiliile Nangue Sataana Ni wa Bufi.”)
10 Yesu ali waemena sana lulumbi ao sifa yakue Baba wakue. (Yoan. 14:31) Yesu waasitakilue nangue taamukindikile Yehova, kabili nangue abanga wali mubifi. Pa kako, Yesu waaunvwile bulanda palua kufua kwakue pantu kekio kyasiile kulengia bantu batontonkanie bintu bisipalile palua lulumbi lwakue Baba wakue. Pa kako, waapepele evi: “We Tawe, kine kunti kyavindikana, nfumiiziepo keki kikombe kya lyemo.” (Mat. 26:39) Pantu Yesu waasyele wali wa kisinka kuli Yehova mpaka lwaafwile, waalangiliile kakiine nangue Yehova ni Leeza wa nsambu.
11. Yesu waakitile ki evi kulangilila ntono ikata ku bantu? (Yoane 13:1)
11 Kabili, kilubula-mulandu kili kyatusambilizia nangue Yesu ali wabemena sana bantu, asa baalia bali bamukonka. (Tus Maf. 8:31; soma Yoane 13:1.) Kwa mufuano, Yesu abanga wamanine nangue bintu bimo byabanga wali wa kukita panu pa kyalo, bibanga byakolele. Kabili, kintu kibanga kyakolele sana kuli wene ni keki: Kufua lufu lwa misa. Anzia evio, wene waakitile byonse byabanga wapapile kukita, apana sie pantu Yehova i vyaali watonene akite, inzi pantu abanga wabatonene bantu. Yesu waalangiliile nangue abanga wabatonene bantu kupitila kubasimikila, kubasambilizia, ni kubakwasia. Ata sie busiku bwa kufua, wene waabasambile makasa batumua bakue, waabasambiliziizie, ni kulanda milandu ingi ya kubateekia mutima. (Yoan. 13:12-15) Kabili, Yesu lwabanga watundikilue pa kimuti, waamupeele kiswapilo kya Paradiso kipondo umo olia abanga wali ku mbali yakue. Kukila pa kako, waamwemeene mama wakue kupitila kumulanda Yoane akabe kusyala wamusunga bwino. (Luk. 23:42, 43; Yoan. 19:26, 27) Twamona nangue Yesu waalangiliile ntono ikata ku bantu kupitila kubafwila. Kabili, waakitile evio kupitila kubakitila bintu kwa ntono ni buwame mu bwikazi bwakue bonse.
12. Yesu ali mukutukitila ki lonu?
12 Nga vitumanine, Yesu Kristu waafwile sie “lwendo lumo.” Anzia evio, ni lonu akili mukutukitila bintu bingi. (Bar. 6:10) Ni biki byali mukutukitila? Ali mukubomba kwa mute evi kutukitila bintu bingi biweme belia bivindikeene pantu wene waatufwiliile. Kwa mufuano, ali mukubomba wali Likolo wetu, Koani Mukulu, ni mutue wa kilonghaano. (1 Bakor. 15:25; Baef. 5:23; Baeb. 2:17) Ali mukubomba miilo ya kukolonghania baalia babiikilue mafuta pamo ni libumba likata. Ezio miilo yakapwililila ntanzi lyemo likata telinapue. b (Mat. 25:32; Mark. 13:27) Kabili, ali mukubombia muzia wa kisinka evi kutupeela byakulia bya kimupasi bitukabiile mu enu nsiku ya mpeleezio. (Mat. 24:45) Kukila pa kako, mu Buteeko bwa Myaka Elufu, wene wakatwalilila kutukitila bintu bitwakaba twakabiile. Yehova waatupeele kakiine Mwana wakue evi atukitile bintu bingi sana!
TE KULEKELA ATA KANINI KUSAMBILILA
13. Wewe kunti wakita syani evi utwalilile kusambilila palua ntono yakue Yehova ni Kristu Yesu?
13 Wewe kunti walangilila nangue teunalekele kusambilila palua ntono yakue Yehova ni Kristu Yesu kine watwalilila kutontonkania sana palua bintu bibaatukitiile. Kwa mufuano, mu kipindi kya Kibukisio kya onu mwaka, kunti kyawama kine wewe wasoma wapozeleko mano kitabu kimo ao bitabu bingi bya Nsimiko. Te kuya wasoma bintu bingi sana penka palia. Uye wasoma kanini-kanini, kisia uye wakeba nsambu inge ya kutusonsezia tumutone Yehova ni Yesu. Kabili, uye wababwilako bange belia byuli mukusambilila.
14. Nga vilandile Malumbo 119:97 pamo ni bulondolozi bwa pensina, kukebulula kunti kwatukwasia syani kutwalilila kusambilila palua kilubula-mulandu ni palua masambilizio ange? (Mona ni foto.)
14 Kine tekusyapitile myaka ingi ntangia luwaasambiliile kisinka, pange kunti watontonkania nangue te kuli bintu binge bya lenu byupalile kusambilila palua nsambu ni ntono yakue Leeza ni palua kilubula-mulandu. Inzi, kisinka ni keki: Tetukalekela kusambilila palua bebi bintu pamo ni masambilizio ange. Pa kako, upalile kukita ki? Uye wasoma ni kusambilila mpunda ili mu mpapulo yetu. Kine wewe wasoma lilembo limo, inzi bila kulyunvwisia, kebulula. Kisia, mu koba konse, uye watontonkania sana palua belia biwavumbula, kabili uye watontonkania bebio bintu vibyakusambilizia pa lwakue Yehova, pa lwakue Mwana wakue ni palua bene vibakutonene.—Soma Malumbo 119:97 ni bulondolozi bwa pensina.
Ata sie kine tepasyapitile myaka ingi ntangia lutwaasambiliile kisinka, kunti twasambilila ni bintu binge bya lenu palua kilubula-mulandu, belia bili kulengia tukile kumutasia Yehova pamo ni Yesu (Mona lifungu lya 14)
15. Juu ya ki tupalile kutwalilila kukeba bintu bya lenu bili mu Bibilia?
15 Te kutyoka mutima kine tewizi kupata ata kintu kya lenu ao kya kukusansamusia nsa yuli wasoma Bibilia ao kukebulula. Ezia kwimona nga muntu ali wakeba oro. Lingi, muntu ali wakeba oro ali wapisia nsa ao nsiku ingi ntanzi ya kupata ata sie kipande kya oro. Anzia evio, ali watwalilila kukeba pantu amanine nangue ata sie kipande kya oro ni kya mana sana kuli wene. Pa kako, tupalile kulanguluka nangue kila kintu kya lenu kituli twasambilila mu Bibilia ni kya mana sana kupita ni oro! (Malum. 119:127; Tus Maf. 8:10) Pa kako, te kulekela kukeba bintu bya lenu, kabili twalilila kulamatilila ku ntantiko yobe ya busomi bwa Bibilia.—Malum. 1:2.
16. Kunti twakita ki evi kumupala Yehova ni Yesu?
16 Uye watontonkania vya kubombia belia byuli wasambilila. Kwa mufuano, pala mibele yakue Yehova ya nsambu kupitila kubakitila bange bila kapatulula. Pala Yesu vyamutonene Baba wakue ni vyabatonene bange kupitila kuya waiteaniizie kwemena liina lyakue Yehova ni kupitila kubakwasia ba lupua ni ba nkazi ata sie mu nsita ikolele kukita evio. Kukila pa kako, mupale Yesu kupitila kubasimikila bange evi ni bene bapate fwasi ya kwitabila ni kuketekela bupe bwa mana sana kufuma kuli Yehova.
17. Twakaba kusambilila ki mu lyasi likonkelepo?
17 Kine twatwalilila kusambilila palua kilubula-mulandu, twakaba kukila kumutona Yehova pamo ni Mwana wakue; ni bene bakaba kututona sana. (Yoan. 14:21; Yak. 4:8) Pa kako, tutwalilile kubombia Bibilia pamo ni mpapulo ituli twapata mu kuteania kwetu evi kutwalilila kusambilila palua kilubula-mulandu. Mu lyasi likonkelepo, twakaba kusambilila faida ya kilubula-mulandu ni bintu bitupalile kukita evi kumutasia Yehova palua ntono yakue.
LWIMBO 107 Leeza I Mufwano wa Ntono
a MULANDU ULONDOLWELUE: “Kutontonkania” kuli na mana ya kuwaza sana palua kintu kimo ni kukeba sana kukyunvwisia.
b Kukolonghaniiwa pamo kwa “bilengua [ao bintu] byonse bili mwiulu” kolia kwalanda Paulo mu Baefeso 1:10 kupusene ni kukolonghaniiwa kwa “bantu basaakwilue” kolia kwalanda Yesu mu Mateo 24:31 ni Marko 13:27. Paulo ali mukulandila palua musita Yehova lwali wasaakula baalia bakaba kuteeka pamo ni Yesu kupitila kubabiika mafuta kupitila mupasi utakatiifu. Inzi, Yesu ali mukulandila palua musita wa kukolonghaniiwa kwa babiikilue mafuta baalia bakili pa kyalo evi kuya ku muulu mu kipindi kya lyemo likata.
