LYASI LYA KUSAMBILILA LYA 3
LWIMBO 35 “Tuye Twainika Bintu Bikilile Kukindama”
Kwata Bupinguzi bwa Kumusansamusia Yehova
“Kumutiina Yehova i ntendeko ya mulangue, ni kumumana Olia Mutakatifu Sana i kwinika.”—TUS MAF. 9:10.
KIKATA KIINE
Tuli kumona vya kubombia buvinde bwa kumana, kwinika, kabili tuli kumana vya kukwata bupinguzi buweme.
1. Tuli twasangua twakabiile kukita ki kila busiku?
KILA BUSIKU, tuli twasangua twali ni bupinguzi bwa kukwata. Bupinguzi bunge buli bwasangua bwalengele kukwata, nga evelia bupinguzi palua kyakulia kya lukele-keele ni nsa ya kulaalilapo. Inzi, bupinguzi bunge buli bwasangua bwakolele sana kukwata. Belia bituli twapingula kunti byakumia bukose bwetu, nsansa yetu, bantu ba mu lupua lwetu, ni lupupo lwetu kuli Yehova. Tuli twatona bupinguzi butuli twakwata butuletele faida fwefue pamo ni bantu ba mu lupua lwetu. Ni kikililepo kuwama ni keki, tuswapiile nangue bupinguzi bwetu bwakaba kumusansamusia Yehova.—Bar. 12:1, 2.
2. Ni bintu ki bili kutukwasia kukwata bupinguzi buweme?
2 Pange wewe kunti wavinda kukwata bupinguzi buweme kine (1) wamana bisinka, (2) watontonkania mawazo akue Yehova palua bobo bupinguzi, ni (3) kutontonkania sana palua bupinguzi bobe. Mu leli lyasi, tuli kulandila palua bebio bintu bitatu, kabili tuli kumona vibili kutukwasia kumona vya kubelezia buvinde bwetu bwa kwinika.—Tus Maf. 2:11.
MANA BISINKA
3. Ni mufuano ki ulangilile nangue ntanzi ya kukwata bupinguzi tupalilenke kumana bisinka?
3 Kintu kya kwanza kya kukukwasia ukwate bupinguzi buweme ni keki: Kumana bisinka. Juu ya ki ni kintu kya mana kukita evio? Mona ozu mufuano, mulwele waya kumumona doktere pantu ali ni bulwele bumo bwaviizie. Eba, doktere kunti wapingula kutendeka kumutunza ozo mulwele ntanzi ya kumupima ao kumwipuzia bipuzio? Kulanda kisinka, takita evio. Ni wewe wakaba kukwata bupinguzi bwaweme kine wamananke bisinka palua bupinguzi buukebele kukwata. Kunti wakita syani evio?
4. Nga vilandile lilembo lya Tuswalo ni mafunde 18:13, kunti wakita syani evi umane bisinka? (mona ni foto.)
4 Lingi, kunti wamana bisinka kupitila kwipuzia bipuzio. Kwa mufuano, kunti wakita syani kine wakupua ku feti? Eba, kunti waitabila kuyako? Kine te umumanine olia wakaba kwimanina ezio feti ao mipango palua ezio feti, kunti wamwipuzia olia waakikukupa bipuzio nga bebi: “Ezio feti yakaba kukitilua pi, kabili na nsa ki? Kwakaba kwali bantu banga? Nani wakaba kwimanina ezio feti? Ni bani bakaba kusanguako? Kwakaba kwali misaapo ya syani? Kwakaba kwali ni bwalua?” Byasuko bya bebio bipuzio byakaba kukukwasia kukwata bupinguzi buweme.—Soma Tuswalo ni Mafunde 18:13.
Mana bisinka kupitila kwipuzia bipuzio (Mona lifungu lya 4) a
5. Wewe upalile kukita ki kisia kupata bisinka byonse?
5 Kintu kya bubili ni keki: Kisia kumana bisinka, upalile kutontonkania sana palua bintu byonse byakaba kukitika. Kwa mufuano, kunti wakita syani kine wainika nangue bantu basizi kukonka Mafunde a Bibilia ni bene bakaba kusanguako ku ezio feti ao nangue kwakaba kwali bwalua, kabili nangue te kukaba kwali muntu wa kutoosia evi bantu te kunti bakabe kukolua? Eba, wewe watontonkania nangue ku ezio feti bantu kunti batendeka kumina sana ni kukita bintu bibipile mubatoneene? (1 Pet. 4:3) Kukila pa kako, eba, musita wa kukitilapo ezio feti wakaba kulengia te kunti ukabe kuya ku kulonghaana ao mu kusimikila? Kine watontonkania palua bisinka byonse palua ezio feti, kyakaba kyalengele kuli wewe kukwata bupinguzi buweme. Inzi, kuli ni kintu kinge kyupalile kukita. Kisia wewe kumana bintu byonse palua ezio feti, kunti waiipuzia evi: Ale Yehova wene amwenepo syani?—Tus Maf. 2:6.
TONTONKANIA MAWAZO AKUE YEHOVA
6. Nga vilandile Yakobo 1:5, juu ya ki tupalile kumulomba Yehova atukwasie?
6 Mulombe Yehova akukwasie evi winike mawazo akue palua bupinguzi buwakwata. Yehova alaile kutupeela mulangue evi tuvinde kwinika kine bupinguzi butwakwata kunti bwamusansamusia. Ali wapeela ozo mulangue “bantu bonse wawaminue.”—Soma Yakobo 1:5.
7. Kunti wainika syani mawazo akue Yehova? Leta mufuano.
7 Kisia kupepa evi Yehova akutungulule, poza sana mano ku kyasuko kyakue. Mona ozu mufuano: Kine wewe wazeza kuuli mukuya, uli kumwipuzia muntu ali waikala ku ezio fwasi akukwasie. Inzi, eba, uli kutwalilila ni lwendo ntanzi tanakwasuke? Kulanda kisinka, teukita evio. Uli kumutwilizia wapozeleko sana mano musita lwali mukukupeela adrese. Enka evio, kisia kumulomba Yehova akupeele mulangue, ezia kukeba ni kutwilizia kyasuko kyakue kupitila kukebulula mu Bibilia sheria ni mafunde akue a kunti ubombie mu ezio aali. Kwa mufuano, musita luuli mukukeba kukwata bupinguzi palua kuya ku feti, nga elia itwalandilangapo kale, upalile kutoosia vilandile Bibilia palua feti ili yayako bantu evi kumina sana ni kukita bintu bibipile mubatoneene. Kabili, upalile kutontonkania palua, ba rafiki babipile, ni juu ya ki ni kintu kya mana kubiika Bukolo Bwakue Leeza pa ntanzi kuliko belia byutonene.—Mat. 6:33; Bar. 13:13; 1 Bakor. 15:33.
8. Wewe kunti wakita syani evi upate mpunda palua belia byuli mukukeba? (Mona ni foto.)
8 Inzi, nsita inge wewe kunti waya wakabiile kupata mpunda palua belia byuli mukukeba. Kunti walomba masoke kuli lupua ao nkazi olia ali ni kibelezio. Anzia evio, wakaba kunonkelamo sana kine wakebulula we mwine bintu bya kukukwasia. Kuli biyombo bingi bya kutukwasia kukebulula, nga evelia Musaada wa Kutafuta Habari kwa Ajili ya Mashaidi wa Yehova, pamo ni Maandiko ya Kutusaidia mu Maisha ya Kikristo. Languluka nangue mupango obe ni ozu: Kukwata bupinguzi bwakaba kumusansamusia Yehova.
Tontonkania palua mawazo akue Yehova (Mona lifungu lya 8) b
9. Kunti twasininkizia syani nangue bupinguzi bwetu bwakaba kumusansamusia Yehova? (Baefeso 5:17)
9 Kunti twasininkizia syani nangue bupinguzi bwetu bwakaba kumusansamusia Yehova? Kya kwanza, tupalile kumumana bwino wene. Bibilia ili yalanda nangue “kumumana Olia Mutakatifu Sana i kwinika.” (Tus Maf. 9:10) Kakiine, kumana kwa kisinka kuli kwafuma mu kumana mibele yakue Yehova, mupango wakue, pamo ni bintu byatonene ni byasitonene. Wewe iipuzie evi: ‘Kukonkana ni bintu bimanine pa lwakue Yehova, ni bupinguzi ki bumpalile kukwata bolia bwakaba kumusansamusia wene?’—Soma Baefeso 5:17.
10. Juu ya ki mafunde ali mu Bibilia ni a mana sana kuliko lupua ao tubelela twa ku fwasi kutuli twaikala?
10 Evi tumusansamusie Yehova, nsita imo kunti kyalomba tukwate bupinguzi bolia bwakaba kubatyona mutima bantu ba mu lupua lwetu. Kwa mufuano, bavyazi bange kunti bamupatikizia mwana wabo mwanakazi opue na mwalalume munonsi, i kulanda, olia wakaba kuvinda kulipa fwamba ingi ata sie kine talumine kimupasi. Kulanda kisinka, bali batona mwana wabo mwanakazi aye wasungilue kimubili. Inzi, eba nani wakaba kumukwasia wene kukita buyantanzi bwa kimupasi? Yehova amwene syani ezio aali? Kyasuko kili mu lilembo lya Mateo 6:33. Mu leli lilembo, Yesu waabakinkiziizie Bakristu batwalilile ‘kukebesianke Bukolo Bwakue Leeza.’ Ata sie kine tuli twabanakila bavyazi betu ni kubakindika bantu ba pa fwasi patuli twaikala, kintu kya mana sana kuli fwefue ni kumusansamusia Yehova.
TONTONKANIA SANA PALUA BUPINGUZI BOBE
11. Ni mibele ki izimbwilue mu Bafilipi 1:9, 10 yakaba kukukwasia kutontonkania sana palua bupinguzi bobe?
11 Kisia kwinika mafunde ali mu Bibilia a kukukwasia kukwata bupinguzi, upalile kutontonkaniapo sana palua bupinguzi buuli kukwata. (Soma Bafilipi 1:9, 10) Mibele ya kwinika yakaba kukukwasia kumana byakaba kufumamo mu bupinguzi bobe bonse. Nsita inge, bupinguzi kunti bwaya bwalengele sie kukwata. Inzi, te bupinguzi bonse bwakaba kuya bwalengele. Buvinde bwa kwinika bwakaba kukukwasia kukwata bupinguzi buweme ata sie mu aali yaviizie.
12-13. Buvinde bwa kwinika kunti bwakukwasia syani kukwata bupinguzi bwa mulangue palua miilo ya kimubili?
12 Mona ozu mufuano. Uli mukukeba miilo evi uvinde kwemena bantu ba mu lupua lobe. Fwasi ibili ya kubomba yamoneka. Wakebulula bisinka byonse, nga evelia aina ya miilo, ntantiko, ni nsa ya kukita pa kuya ku miilo, ni bingeko. Kisia wainika nangue Mukristu takaniiziwe kubomba ezio miilo yonse ibili. Pange wewe wasaakulapo miilo imo pantu i miilo yutonene, kabili pantu wakaba kuya walipua nfalanga ingi. Anzia evio, kuli ni bintu binge byupalile kutoosia ntanzi ya kukwata bupinguzi.
13 Kwa mufuano, eba ezio miilo kunti yainoona ntantiko yobe ya kuya ku kulonghaana? Ezio miilo yakaba kuya yatwama musita uukabiile evi kukwasia bantu ba mu lupua lobe beyunvue kuya basungilue, bali ni nsansa, ni kuya bali pepi ni Yehova? Kwiipuzia bebi bipuzio kwakaba kukukwasia kubiika pa ntanzi “bintu bikilile kukindama,” i kulanda, kubiika pa ntanzi lupupo lobe ni bintu bikabiile bantu ba mu lupua kuliko bintu bya kimubili. Kisia, wewe wakaba kukwata bupinguzi bolia bwakaba kupaalua na Yehova.
14. Buvinde bwa kwinika pamo ni ntono byakaba kutukwasia syani kutiina kubakisia bange?
14 Kabili, buvinde bwa kwinika buli bwatukwasia tutontonkanie bange vibali kwiunvua palua bupinguzi bwetu evi te kunti tuye ‘twabakisia bange.’ (Baf. 1:10) Kekio ni kintu kya mana musita utuli twaikwatila bupinguzi palua maubo a kuvwala ni palua kwipenta. Kwa mufuano, kunti twatonesia aina imo ya ngubo ao ya kwipenta. Inzi, kunti twakita syani kine ba lupua ni ba nkazi ao bantu bange basili Bakasininkizia bamona nangue ngubo ni kwipenta kwetu te bipalile? Buvinde bwa kwinika bwakaba kutukwasia kukindika zamiri yabo. Ntono yakaba kutusonsezia tukebe faida ya “bange” ni kuya twali ni kiasi. (1 Bakor. 10:23, 24, 32; 1 Tim. 2:9, 10) Kukita evio kwakaba kutukwasia tukabe twakwata bupinguzi bwasonseziiziwe na ntono ni mukinzi ku bange.
15. Ni kiki kyupalile kutontonkania ntanzi ya kukwata bupinguzi bwa mana?
15 Kine ukebele kukwata bupinguzi bwa mana, tontonkania palua bintu byupalile kukita evi ukabe kuvinda kukwata bobo bupinguzi. Yesu waatusambiliziizie nangue tupalile kwikala ni “kupenda ili kupozuapo.” (Luka 14:28) Pa kako, tontonkania palua musita, makuta, ni palua maka aukabiile evi bobo bupinguzi bukabe kuvindikana. Mu aali inge, ilombele ulondolole ni lupua lobe evi kumana kipalile kukita kila umo juu ya kukukwasia uvinde kufikilizia mupango obe. Juu ya ki ni kintu kya mana kukita evio? Kukita evio kunti kwakukwasia kwinika kine kilombele kwalululako bintu bimo ku bupinguzi bobe ao kine kunti wakwata bupinguzi bunge bukilile kuwama. Kabili, kine wababwilako bantu ba mu lupua lobe ni kutwilizia mawazo abo, bakaba kuya baiteaniizie kukukwasia evi bupinguzi bobe bukabe kuvindikana.—Tus Maf. 15:22.
KWATA BUPINGUZI BWAKABA KUVINDIKANA
16. Upalile kukita ki evi uvinde kukwata bupinguzi bolia bwakaba kuvindikana? (Mona ni kisanduku kilandile nangue “ Vya Kukwata Bupinguzi bwa Mulangue.”)
16 Kine wakita bintu byonse bitwalanda papa pa muulu, wakaba kuvinda kukwata bupinguzi bwa mulangue. Kine waakipata bisinka ni kutoosia mafunde a kukukwasia kukwata bupinguzi bwa kumusansamusia Yehova, kunti wamulomba Yehova akukwasie evi bupinguzi bobe buvindikane.
17. Ni kintu ki kya mana sana kili kukukwasia kukwata bupinguzi buweme?
17 Anzia kine waakifikilizia kale bupinguzi bwingi musita waakipita, languluka nangue nzila iweme ya kukukwasia kukwata bupinguzi buweme, te kuswapila mulangue ao kibelezio kyobe we mwine, inzi ni kuswapila mulangue uli wafuma kuli Yehova. Wene sie bunke i ali ni buvinde bwa kukupeela kumana kwa kisinka, kwinika, pamo ni buvinde bwa kwinika, i kulanda, semu ya mana sana ya mulangue. (Tus Maf. 2:1-5) Yehova kunti wakukwasia kukwata bupinguzi bwa kumusansamusia wene.—Malum. 23:2, 3.
LWIMBO 28 We Yehova, Mwinobe Nani?
