1. Enu nsiku, bantu bengi bali bapoza sana mano ku ki?

 PANGE wewe waakiinika nangue enu nsiku bantu bengi bali bapoza sana mano ku kwiwamiizia bo bene kuliko kuwamiizia bange. Kwa mufuano, bange bali babombia bitente bya Enternete bya kubwilana mpunda evi kwitanka ni kulandila palua bintu bibali mukukita. Kulanda kisinka, enu nsiku kuli sie bantu banini bali bamupeela Yehova Leeza bulumba. Mu leli lyasi, tuli kumona mana ya kumupeela Yehova bulumba, kabili juu ya ki tupalile kukita evio. Kukila pa kako, tuli kusambilila vya kumupeela bulumba bwapalile kupeelua, kupwako, tuli kumona Yehova ye mwine vyakaba kukindika liina lyakue lenu sie.

KUMUPEELA YEHOVA BULUMBA KULI NA MANA KI?

2. Yehova waalangiliile syani bulumba bwakue ku Lupili lwa Sinai? (Mona ni ili ku ntendeko ya kazeeti.)

² Bulumba i kiki? Mu Bibilia, mulandu “bulumba” kunti wabombiiwa palua kintu kyokyonse kili ni buvinde bwa kumulengia muntu aaluke wa kupapia sana. Yehova waabalangiliile Baisraeli bulumba bwakue musita unini kisia kubakombola mu buzia mu Misri. Ezia kutontonkania palua keki: Ma milioni a Baisraeli akolongheene pa muulu wa Lupili lwa Sinai evi kusaakaana ni Leeza wabo. Kisia, lolo lupili lwaviimbililua na lilezi lyafi. Mu kusitukila, kyunsi kyaviimba lupili lonse, ntensi yatendeka, kabili kwaaluka tumpenimpeni pamo ni bimbuluma, kisia kwaunvwika lizui likata sana lya baragumu. (Kuf. 19:​16-18; 24:17; Malum. 68:8) Tontonkania babo Baisraeli vibaapapile musita Yehova lwaabalangiliile bobo bulumba bukata.

3. Kunti twamupeela syani Yehova bulumba?

³ Ale fwe bantu? Eba, kunti twamupeela Yehova kakiine bulumba? Een, kunti twamupeela. Nzila imo ya kumupeela Yehova  bulumba ni ezi: Kubabwilako bange palua buvinde bwakue bwa kupapia ni palua mibele yakue iweme sana. Kabili, tuli twamupeela Leeza bulumba musita utuli twamutasia palua bintu bituli twakita kupitila maka akue. (Is. 26:12) Likolo Daudi waalangiliile mufuano uweme wa kumupeela Yehova bulumba. Mu lipepo lyaapepele ntanzi ya kilonghaano kya Israeli, Daudi waamulandile evi Leeza: “Ni byobe We Yehova, bukulu ni maka ni kufwanina ni kubengema ni bukata, pantu kila kintu kili mu myulu ni kili pa kyalo ni kyobe.” Kisia Daudi kupua lipepo lyakue, “kilonghaano kyonse kyaamutasiizie Yehova.”—1 Mil Nsi. 29:​11, 20.

4. Yesu waamupeele Yehova bulumba mu nzila ki?

⁴ Musita Yesu lwaali pa kyalo, waamupeele Baba wakue bulumba kupitila kubakwasia bange bamane nangue wene i waali Nsulo ya bimpezia mano byaali wakita. (Mark. 5:​18-20) Kabili, Yesu waali wamupeela Yehova bulumba kupitila bintu byabanga walanda pa lwakue Baba wakue ni kupitila bintu byabanga wabakitila bange. Lwendo lumo, Yesu waali wasambilizia mu sinagogi. Pakati ka bantu baalia baali batwiliziizie, pabanga pali mwanakazi umo olia waakitile myaka 18 waingiilue na kibanda. Kekio kyaalengiizie mubili wakue uye waikunzile ni kumulengia aye waandua kooloka. Lelio libanga lyali lyemo kakiine! Yesu waasonseziiziwe na nkumbu ni kumupalama ozo mwanakazi, kisia waamulandile evi mu nzila ifuukile: “We mwanakazi wakosiiwa malwele obe.” Waabiikile minue yakue pali wene. Bila kukokola, ozo mwanakazi waaimeene waolokele ni “kubamba kumutasia Leeza.” Bukose bwakue bwaalukile kabili bwino, ni mukinzi wakue waabwelele! (Luk. 13:​10-13) Ozo mwanakazi abanga wali ni nsambu iweme ya kumupeela Yehova bulumba, ni fwefue tuli ni nsambu ya kukita evio.

JUU YA KI TULI TWAMUPEELA YEHOVA BULUMBA?

5. Ni nsambu ki ituli nayo ya kumukindika Yehova?

⁵ Tuli twamulumbania Yehova pantu tuli twamukindika sana. Tuli ni nsambu ingi ili yatusonsezia kumukindika wene. Yehova i wa maka onse, ali ni buvinde busili na mipaka. (Malum. 96:​4-7) Mulangue wakue ukata uli wamoneka bwino kupitila bintu byaakitile. Wene i Nsulo ya bukose bwetu, kabili ali watupeela byonse bitukabiile evi tutwalilile kuya twakosele. (Nfy. 4:11) Kabili, ali ni mibele ya kulamatilila. (Nfy. 15:4) Kila kintu kyali wakita tekizi kwanda, kabili lyonse ali wafikilizia bulayo bwakue. (Yosh. 23:14) Kekio i kyaalengele kabika Yeremia alande evi pa lwakue Yehova: “Pakati ka bantu bonse ba mu ntundu bali ni mulangue, ni pakati ka ma bukolo abo onse, te pali ata umo ali nga wewe”! (Yer. 10:​6, 7) Kulanda kisinka, tuli ni nsambu iweme ya kumukindika Baba wetu wa ku muulu. Te twizi kumukindika sie Yehova, inzi kabili tumutonene.

6. Juu ya ki tumutonene Yehova?

⁶ Tuli twamulumbania Yehova pantu tumutonene sana. Tontonkania palua mibele ingi yakue Yehova ili yalengia tumutone. Wene ali ni luse kabili ali ni nkumbu. (Malum. 103:13; Is. 49:15) Ali waibiika pa fwasi ya bange; kine twaunvua misa ni wene ali waunvua misa. (Zek. 2:8) Ali walengia tuye twalengeelue kumupalama ni kwaluka ba rafiki bakue. (Malum. 25:14; Miil Bat. 17:27) Kabili, ekefiizie; “Ali wafwinama evi akente ku muulu ni pa kyalo, ali wabalendula bantu ba pansi kufuma mu lufunko.” (Malum. 113:​6, 7) Ale muntu kunti waandua syani kutona kumupeela bulumba Leeza wetu mukulu?—Malum. 86:12.

7. Ni miilo ki iibeleele ituli nayo?

⁷ Tuli Twamulumbania Yehova pantu tutonene bange bamumane. Bengi te bamanine kisinka pa lwakue Yehova. Juu ya ki? Pantu  Sataana akakile mano abo kupitila kulanda bufi pa lwakue Yehova. (2 Bakor. 4:4) Sataana ali wabasininkiziizia bantu nangue Yehova ni Leeza wa kipuki, tezi kutwemena, kabili nangue wene i ali walengia maavia engi atuli twapata panu pa kyalo. Inzi, fwefue tumanine kisinka pa lwakue Leeza wetu! Pa kako, tuli ni miilo ya kubabwilako bange nangue wene ni Leeza aweme sana ni kubakwasia batendeke kumulumbania. (Is. 43:10) Malumbo a 96 ali alandila palua kumupeela Yehova bulumba. Kupitila aza malumbo, tuli kumona vya kumupeela Yehova bulumba bwapalile kupeelua.

VYA KUMUPEELA YEHOVA BULUMBA BWAPALILE KUPEELUA

8. Landa nzila imo ya kumulumbaniiziamo Yehova. (Malumbo 96:​1-3)

⁸ Soma Malumbo 96:​1-3. Kunti twamulumbania Yehova kupitila bintu bituli twalanda pa lwakue. Nga vilandile aza malumbo, tulombelue ‘kumwimbila Yehova,’ ‘kutasia liina lyakue, kupunda kila busiku mpunda iweme ya kupususia kwakue,’ ni ‘kupunda bulumba bwakue pakati ka ntundu.’ Ezio yonse ni nzila ya kumulumbaniiziamo Baba wetu wa ku muulu. Bayuda ba kisinka pamo ni Bakristu ba mu myaka mia ya ku ntendeko te baali baikeka, baali bababwila bange palua bintu byonse biweme bibaakitiilue na Yehova ni palua mibele yakue iweme. (Dan. 3:​16-18; Miil Bat. 4:29) Ni fwefue kunti twakita syani evio?

9-10. Wewe wasambilila ki kupitila mufuano wakue Angelena? (Mona ni foto.)

⁹ Tontonkania palua mufuano wakue nkazi Angelena, a olia ali waikala mu États-Unis. Waamusakiile Yehova bila kutiina ku fwasi kolia kwabanga wabombela. Wene abanga wali wa lenu ku ezio miilo. Pa kako, waakupilue ku kulonghaana kumo pamo ni bange baalia babanga bali ba lenu nga wene. Ku koko kulonghaana palua miilo, kila umo waalombelue ababwile babombi nakue palua bwikazi bwakue. Angelena waateaniizie ma foto evi kulondolola bwikazi bwakue vibuweme pantu wene ni Kasininkizia Wakue Yehova. Inzi, ntanzi sie ya kunti atendeke kulanda, mubombi nakue umo waatendekeziizie bulondolozi ni kulanda nangue waakuziiziwe na bavyazi babanga bali Bakasininkizia Bakue Yehova. Ozo mubombi nakue waatendekele kulanda bintu bibipile palua Bakasininkizia Bakue Yehova ni palua bintu bibazumiine. Angelena walanda evi: “Naaemene sana. Inzi, naaiipuziizie evi: ‘Eba, ndekelele  muntu alande bufi pa lwakue Yehova? Ao musakile Yehova?’”

¹⁰ Kisia sie ozo mwalalume kupwililila bulondolozi, Angelena waapepele lubilo-lubilo mu mutima. Kisia, mu nzila ya buwame, waamulandile evi ozo mwalalume: “Aali yobe ipaleene ni aali yane. Ni nene naakuziiziwe na Bakasininkizia Bakue Yehova, ni lonu ntwaliliile kuya nali Kasininkizia Wakue Yehova.” Ata sie kine aali ibanga yakolele, Angelena waasyele wateekameene. Waabalangiliile babombi nakue ma foto akue pamo ni ma foto a ba rafiki bakue bamwenekele bali ni nsansa mu miilo yakue Yehova. Kabili, waalondolwele mu nzila iweme bintu byazumiine. (1 Pet. 3:15) Ni biki byaafuminemo? Kisia Angelena kupua kulanda, ozo mwalalume waaikoosiizie ni kulanda bintu bimo biweme byaaimweneene musita lwabanga wakili mulumendo ni lwabanga walonghaana na Bakasininkizia Bakue Yehova. Angelena walanda evi: “Yehova apalile kusakilua. Ni lisyuko likata kulanda kisinka palua liina lyakue.” Ni fwefue tuli ni lisyuko likata lya kumutasia ni kumulumbania Yehova ata sie kine bange tebezi kukita evio.

11. Babombi ba kisinka bakue Yehova bali bakonka syani lifunde lili mu Malumbo 96:8?

¹¹ Soma Malumbo 96:8. Kunti twamulumbania Yehova kupitila bintu byetu bya mana. Lyonse, babombi ba kisinka bakue Yehova bali bamukindika kupitila kubombia bintu byabo bya kimubili. (Tus Maf. 3:9) Kwa mufuano, Baisraeli baafumiizie nfalanga pamo ni bintu binge bya mana evi kukwasia miilo ya kukuula ekalu ni kuisunga bwino. (2 Mak. 12:​4, 5; 1 Mil Nsi. 29:​3-9) Basambi bakue Kristu ba ntono baamukwasiizie wene pamo ni batumua bakue kupitila kubombia “mpango yabo.” (Luk. 8:​1-3) Kabili, Bibilia ili yalanda nangue musita Bakristu bamo lubaali mu nzala, ba lupua ni ba nkazi babo, baalia babanga baikala mu ma fwasi ange, baabatumiine nfalanga. (Miil Bat. 11:​27-29) Lonu, ni fwefue kunti twamulumbania Yehova kupitila bulongio bwetu bwa kwitonena.

12. Bulongio bwetu bwa kwitonena kunti bwamuletela syani Yehova bulumba? (Mona ni foto.)

¹² Tontonkania palua mufuano umo sie ulangiliile bulongio bwetu bwa kwitonena vibuli bwamuletela Yehova bulumba. Mu 2020, mu kyalo kya Zimbabwe mwaalukile likungulu lelia lyaakitile musita walepele. Bantu bengi sana babanga bali ba kufua na nzala, kubiika mukati nkazi Prisca. Anzia evio, nkazi Prisca waatwaliliile kukonka ntantiko yakue ya kusimikila kila nsiku ya Tatu ni ya Tano. Abanga wakita evio ata sie mu kipindi kya kulima. Bantu baalia babanga waikala nabo mu kazonga kamo babanga  bamuseka pantu abanga waya mu kusimikila kuliko kuya ku kulima; babanga bamulanda evi: “Wewe wakaba kufua na nzala.” Nkazi Prisca abanga wasininkiziizie nangue Yehova wakaba kumwemena, pa kako, lyonse abanga waasuka nangue: “Yehova tezi kubasia ata kanini babombi bakue.” Kisia musita unini, kuteania kwetu kwaamupeele nkazi Prisca byakulia pamo ni bintu binge byaali wakabiile. Kekio kyaavindikeene kupitila bulongio bwa kwitonena buli bwafumia kila umo pakati ketu. Baalia bantu babanga bamuseka nkazi Prisca baapalile sana ni kumulanda evi: “Twaimwena nangue Leeza taakikusia ata kanini, pa kako tutonene kusambilila bingi pa lwakue.” Bantu saba pakati kabo baatendekele kulonghaana.

13. Nga vilandile Malumbo 96:​9, tupalile kukita ki evi kumupeela Yehova bulumba?

¹³ Soma Malumbo 96:9. Kunti twamulumbania Yehova kine lwendo lwetu ‘lutakatifu’ ao luswetele. Ba makoani babanga babombela ku tabenakulo, kisia baatendekele kubombela ku ekalu yakue Yehova. Babo ba makoani babanga bapalile kuya baswetele kimubili. (Kuf. 40:​30-32) Ni fwefue tupalile kuya twaswetele kimubili ni kuya twali ni lwendo luweme. (Malum. 24:​3, 4; 1 Pet. 1:​15, 16) Tupalile kwikwinda sana kuvuula “bumuntu bwa kale,” i kulanda, mawazo ni bikitua bisipalile. Kabili, tupalile kuvwala “bumuntu bwa lenu,” i kulanda, kuya twatontonkania ni kukita bintu belia bilangiliile nangue tuli twamupala Yehova pamo ni mibele yakue iweme. (Bakol. 3:​9, 10) Yehova kunti wabakwasia ata sie baalia babanga bakita bintu bibipile sana baaluluke ni kuvwala bumuntu bwa lenu.

14. Wewe, wasambilila ki kupitila mufuano wakue Jack? (Mona ni foto.)

¹⁴ Ale tulandilenke pa lwakue Jack. Wene abanga wali kipondo abipile sana, kabili bantu babanga bamukuuta nangue Kibanda. Pantu abanga wakita bintu bibipile sana, tribinali yaapingwile kumwipaya. Inzi, musita Jack lwaali wapembeleele kwipaiwa, lupua umo waaendeele mu prizo molia mwabanga wali. Kisia, waamwipuziizie kine kunti watona kusambilila Bibilia. Kya nsansa, Jack waaitabiile. Ata sie kine Jack abanga wakita bintu bingi bibipile sana, waavuulile bumuntu bwakue bwa kale, kabili wafikiile kubatiziiwa. Jack waalulukile sana. Pa kako, busiku bwa kumwipaya, bantu bamo pakati ka ba kamwenenena ba prizo baakolosiizie ni mensozi musita ubabanga balayana nakue. Soda umo, olia abanga wabomba mu ezio prizo, waalandile evi: “Panu, nsita imo, Jack i abanga wabipile kukila bantu bonse. Inzi, lonu wene i aweme kupita bonse.” Mulungu umo kisia Jack  kwipaiwa, ba lupua baalia baabwelele ku prizo evi kutungulula kulonghaana kwa mukati ka mulungu, baamwene muntu umo olia waasangilue ku kulonghaana lya kwanza. Juu ya ki ozo muntu watonene kusangua ku kulonghaana? Pantu waapapile sana kumona Jack vyaalulwile lwendo lwakue, kabili waatonene kumana bintu byaali wapalile kukita evi atendeke kumupupa Yehova. Kulanda kisinka, lwendo lwetu kunti lwamuleetela bulumba Baba wetu wa ku muulu!—1 Pet. 2:12.

YEHOVA WAKABA KULUMBANIA SYANI LIINA LYAKUE LENU SIE?

15. Yehova wakaba kulangilila syani lenu sie nangue bantu bonse bapalile kumupupa wene sie bunke? (Malumbo 96:​10-13)

¹⁵ Soma Malumbo 96:​10-13. Ezi milongo ya kupeleezia ya lilembo lya Malumbo a 96 ilangiliile nangue Yehova i Mupinguzi ni Likolo alungheeme. Eba, ale wene wakaba kulumbania syani liina lyakue lenu sie? Wakaba kuleta nsambu. Lenu sie, wene wakaba kwinoona Babiloni Mukulu pantu i ali wafiisia liina lyakue litakatifu. (Nfy. 17:​5, 16; 19:​1, 2) Bantu bamo baalia bakaba kwimwena Babiloni Mukulu wainoonua kunti bapingula kwiunga ni fwefue evi kumupupa Yehova. Kupwako, pa Armagedoni, Yehova wakaba kwinoona kenu kyalo kyonse kili kyateekua na Sataana, i kulanda, wakaba kubenoona baalia bonse basimutonene ni baalia bali balanda bya bufi palua liina lyakue. Inzi, wakaba kubapususia baalia bamutonene ni kumukindika, kabili baalia bali batona kumupeela wene bulumba. (Mark. 8:38; 2 Bat. 1:​6-10) Kisia bwezio bwa kupeleezia, bolia bwakakitika kisia Buteeko bwa Myaka Elufu Bwakue Kristu, Yehova wakaba kulangilila nangue bantu bonse bapalile kumupupa wene sie bunke. (Nfy. 20:​7-10) Ozo musita, “pa kyalo pakaba kwizula kumana kwa bulumba bwakue Yehova nga menda viali aviimba lyezi.”—Hab. 2:14.

16. Wewe, wapingula kukita ki? (Mona ni foto.)

¹⁶ Kyakaba kuya kyali kintu kya kusansamusia sana musita kila muntu lwakaba kuya wamupeela Yehova bulumba bupalile kupeelua liina lyakue! Ntanzi bobo busiku tebunafike, kunti twakita byonse bituli kuvinda evi kumulumbania Leeza wetu mu kila fwasi ili yamoneka. Evi kutukwasia tupoze sana mano ku ezio miilo ya mana ituli nayo, Kabungue Kali Katungulula kaakisaakula lilembo lya Malumbo 96:8 evi liye lyali lilembo lyetu lya mwaka wa 2025: “Mupeele Yehova bulumba bupalile kupeelua liina lyakue.”