1. Kunti twakita ki evi kumusansamusia Yehova?

 TONTONKANIANKE palua keki: Wewe wamupeela muntu umo olia uutonene bupe bumo bwibeleele, buweme, kabili bwa mana. Wewe kunti waunvua syani kine ozo muntu wabiika sie bobo bupe mu karto ni kusuulako? Kulanda kisinka, uli kufipua! Ale wewe kunti waunvua syani kine ozo muntu wabombia bobo bupe, kisia wakutasia? Kakiine, uli kunvua makola. Eba, ozu mufuano wakeba kutusambilizia ki? Yehova waamutumine Mwana wakue evi eze atufwile. Tontonkania nsansa ili yaunvua Yehova lutuli twamutasia pantu waatupeele bobo bupe bwa mana sana. Kabili, tontonkania vyali waiunvua lutuli twamutasia palua ntono yakue, elia yaalengiizie afumie kilubula-mulandu!—Yoan. 3:16; Bar. 5:​7, 8.

2. Tuli kusambilila ki mu leli lyasi?

² Inzi, mu kupita kwa myaka, pange kunti twalekela kumona nangue kilubula-mulandu ni bupe bwa mana sana. Kukita evio, kuli nga kubiika bupe bwakue Leeza mu karto ni kusuulako, ata sie kine tubutonene. Evi kekio te kunti kikitike, lyonse tupalile kuya twatontonkania palua bintu byaatukitiile Leeza pamo ni Kristu. Leli lyasi, kunti lyatukwasia kukita evio. Tuli kusambilila faida ya kilubula-mulandu lonu ni vikyakaba kutuletela faida musita uli waiza. Kabili, tuli kumona bintu bitupalile kukita evi kumutasia Yehova palua ntono yakue, asa mu kenu kipindi kya Kibukisio.

FAIDA YA KILUBULA-MULANDU LONU

3. Kilubula-mulandu kili kyatuletela faida ki lonu?

³ Kilubula-mulandu kyakue Kristu kyaatendekele kale kutuletela faida. Kwa mufuano, Yehova ali waeleela mazambi etu. Wene tapatikiziiziwe kutweleela. Inzi, wene sie mwine i atonene kukita  evio. Kalemba wa malumbo waamutasiizie Yehova pantu ali watweleela. Wene walandile evi: “Pantu wewe, We Yehova, uweme kabili uleengele kweleela.”—Malum. 86:5; 103:​3, 10-13.

4. Yehova waabafumiziizie bani kilubula-mulandu? (Luka 5:32; 1 Timoteo 1:15)

⁴ Bamo kunti batontonkania nangue Yehova tapalile kutweleela. Inzi, kakiine te tuli na nsambu ya kweleelua. Mutumua Paulo waalandile nangue ‘tabanga wapalile kukuutua mutumua’ pantu abanga wakyuzia kilonghaano kyakue Leeza. Anzia evio, waalandile kabili evi: “Inzi, ndi mutumua kupitila mu buwame bwakue Leeza.” (1 Bakor. 15:​9, 10) Kulanda kisinka, kine twalapila mazambi etu, Yehova ali watweleela. Juu ya ki? Tezi kukita evio pantu tupalile kweleelua, inzi ali watweleela pantu atutonene. Kine wewe uli waema pantu uli watontonkania nangue Yehova tapalile kukweleela, languluka nangue taafumiizie kilubula-mulandu juu ya bantu bapwililikile, inzi waakifumiizie evi bantu ba mazambi baalia bali balapila banonkelemo.—Soma Luka 5:32; 1 Timoteo 1:15.

5. Eba, tuli ni nsambu ya kulanda nangue Yehova apalile kutweleela? Londolola.

⁵ Te tupalile kutontonkania ata kanini nangue Yehova apalile kutweleela pantu sie tetusyakitile myaka ingi twamubombela. Kakiine, wene tezi kulaba bintu byonse biweme bituli twamukitila. (Baeb. 6:10) Inzi, waatupeele Mwana wakue kwa bule, taamutumine evi kutulipa palua bintu biweme bituli twamukitila. Kine fwefue twatontonkania nangue wene apalile kutweleela pantu tuli twamubombela kwa mute, kili nga evelia fwe bali mukulanda nangue Kristu tabanga wapalile kutufwila.—Palania ni Bagalatia 2:21.

6. Juu ya ki Paulo abanga wamubombela Yehova kwa mute?

⁶ Paulo abanga wamwene nangue Yehova tapalile kumweleela ata sie kine wene wamubombela syani. Ale ni kiki kyaalengiizie aye wamubombela kwa mute sana? Wene waakitile evio evi kumutasia Yehova palua buwame busipalilue bwaamulangiliile, kabili pantu waamweleele. (Baef. 3:7) Nga evelia sie Paulo, ni fwefue tuli twamubombela Yehova kwa mute, apana pantu tukebele wene atweleele, inzi pantu tuli twamutasia juu wene ali watulangilila buwame ni kutweleela.

7. Ni faida ki inge ituli twapata lonu kupitila kilubula-mulandu? (Baroma 5:1; Yakobo 2:23)

⁷ Faida inge ituli twapata lonu kupitila kilubula-mulandu ni ezi, kunti twaaluka ni burafiki bwa pepi, kabili bwa bunke pamo ni Yehova. a Nga vitwaakimona mu lyasi lyaakipita, lutwaavyelue, te tubanga twali ni burafiki pamo ni Yehova. Inzi, pantu kilubula-mulandu kyaafumiiziwe, kunti twaaluka ni “mutende” pamo ni Leeza, ni kekio kunti kyalengia tumupalame.—Soma Baroma 5:1; Yakobo 2:23.

8. Juu ya ki tupalile kumutasia Yehova palua kutupeela lisyuko lya kupepa kuli wene?

⁸ Kine tuli ni burafiki pamo ni Yehova, kunti twapepa kuli wene. Lelio ni lisyuko likata! Yehova tezi kutwilizia sie mapepo a babombi bakue musita ubali bapepa ntanzi ya kilonghaano, inzi ali watwilizia ni mapepo a kila muntu pa lwakue. Kine twapepa, tuli twateekamana ni kwaluka ni mutende mu mano. Kukila pa kako, lipepo lili lyatukwasia kulumia burafiki bwetu pamo ni Leeza. (Malum. 65:2; Yak. 4:8; 1 Yoan. 5:14) Musita lwabanga wali panu pa kyalo, Yesu abanga wapepa lingi pantu waali wamanine nangue Yehova abanga watwilizia, kabili nangue lipepo libanga lyamukwasia kutwalilila kuya wali ni burafiki bulumine pamo ni Baba wakue. (Luk. 5:16) Kakiine, tuli ni nsansa sana pantu kupitila kilubula-mulandu, kunti twaaluka ba rafiki bakue Yehova ni kulanda nakue mu lipepo!

 FAIDA YA KILUBULA-MULANDU MUSITA ULI WAIZA

9. Kilubula-mulandu kyakaba kubaletela faida ki babombi ba kisinka musita uli waiza?

⁹ Kilubula-mulandu kyakaba kubaletela faida ki babombi ba kisinka bakue Yehova musita uli waiza? Bakaba kupata bukose bwa muyayaya. Bantu bengi bali batontonkania nangue kekio tekikaba kukitika pantu bantu batwaliliile sie kuya bafua. Inzi, kutona kwakue Yehova ntangia sie ku ntendeko ni koku: Bantu bekale muyayaya. Kabenge Adamu taakitile lizambi, nga te kuli muntu ata umo waasiile kutontonkania nangue tekivindikana kwikala lonse. Bantu bonse nga baaikeele muyayaya. Kabili, ata sie kine kunti kyamoneka nangue tekivindikana kwikala muyayaya lonu, tuswapiile nangue kyakaba kuvindikana pantu tumanine nangue Yehova waalipile bei ikata sana, i kulanda, bukose bwa Mwana wakue mutonua evi kekio kikabe kukitika.—Bar. 8:32.

10. Bakristu babiikilue mafuta pamo ni mikooko inge bapembeleele ki?

¹⁰ Ata sie kine twakaba kupata bukose bwa muyayaya musita uli waiza, Yehova atonene tuye twatontonkaniapo kubambila lonu. Bakristu babiikilue mafuta bapembeleele kupata bukose bwa mana sana ku muulu musita ubakaba kuya bateeka kyalo pamo ni Kristu. (Nfy. 20:6) Mikooko inge ipembeleele kwikala mu paradiso, molia musikaba misa ni bulanda. (Nfy. 21:​3, 4) Eba, wewe uli pakati ka mikooko inge elia ili ni kiswapilo kya kwikala lonse pa kyalo? Kekio kilambu ni kya mana nga evelia sie vili kilambu kya kuya ku muulu! Yehova waabumbile bantu evi bekale pa kyalo. Pa kako, kwikala muyayaya pa kyalo kwakatuletela nsansa ikata sana!

11-12. Ni mpaalo ki itwakaba kupata mu Paradiso? (Mona ni ma foto.)

¹¹ Tontonkania viwakekala bwino mu Paradiso pa kyalo. Teukaba waema palua malwele ao kufua. (Is. 25:8; 33:24) Yehova wakakupeela bintu byonse biweme byutonene. Kwa mufuano, eba wewe utonene kusambilila palua ba nama? Utonene kusambilila vya kulizia kiyombo kimo kya muziki? Utonene kusambilila vya kuchanja ma foto? Kulanda kisinka, mu Paradiso mwakaba  kuya mwakabiilue bantu bamanine kukuula masesi, kulima, kubyala, kuteania byakulia, kutengenezia biyombo paleepale, kubyala tumuti pamo ni maua ni kubyemena. (Is. 35:1; 65:21) Luwakaba kupata bukose bwa muyayaya, wewe wakaba kukita bebio byonse pamo ni bintu binge bingi.

¹² Twakaba kuya twali sana ni nsansa ya kubapokelela baalia bakaba kutuntumunua! (Miil Bat. 24:15) Kabili, tontonkania viwakaba kusambilila bingi pa lwakue Yehova kupitila kutoosia bintu bingi belia byaabumbile. (Malum. 104:24; Is. 11:9) Kiweme pa byonse ni keki: Wewe wakaba kupwililika, pa kako wakaba wamubombela Yehova bwino sana bila kuya wakabiile kulomba kweleelua! Eba, wewe kunti watona kupusua ezio mpaalo yonse juu ya sie “kuwaminua na bibalo [ao mazambi] pa musita unini”? (Baeb. 11:25) Kulanda kisinka, te utonene kupusua! Ezio mpaalo iweme sana kukila kintu kyokyonse kituli kuvinda kupata lonu mu kenu kyalo. Languluka nangue Paradiso teikaba kuya yali sie lyonse kintu kituswapiile. Inzi, yakaba kwaluka kakiine fwasi itwakaba kwikalamo. Bebio byonse byakaba kukitika pantu Yehova atutonene sana. Nga vitumanine, ntono i yaalengiizie atume Mwana wakue evi atufwile!

BINTU BYA KUKITA EVI KUMUTASIA YEHOVA PALUA NTONO YAKUE

13. Kunti twakita ki evi kumutasia Yehova palua ntono yakue? (2 Bakorinto 6:1)

¹³ Kunti twakita ki evi kumutasia Yehova pantu waafumiizie kilubula-mulandu? Kupitila kubiika miilo yakue pa ntanzi mu bwikazi bwetu. (Mat. 6:33) Nga vitumanine, Yesu waafwile “evi balia bakosele te kuti baye baikoseele, inzi baye bakoseele olia waabafwiliile ni kutuntumunua pa mulandu wabo.” (2 Bakor. 5:15) Kulanda kisinka, te tutonene kupusua bintu biweme bili byafuma mu buwame busipalilue bwakue Yehova. Kupitila kumubombela kwa mute, tuli twalangilila nangue tuli twamutasia pantu ali watweleela ni kutukitila bintu binge biweme.—Soma 2 Bakorinto 6:1.

14. Kunti twamuswapila syani Yehova ni kukonka butunguluzi bwakue?

¹⁴ Kabili, kunti twamutasia Yehova palua ntono yakue kupitila kumuswapila ni kukonka butunguluzi bwakue. Kunti twakita syani evio? Kine tuli ni bupinguzi bwa kukwata, kwa mufuano bupinguzi palua masomo atutonene kusoma ao palua miilo itutonene kubomba, tupalile kutontonkania palua bintu byatonene tukite. (1 Bakor. 10:31; 2 Bakor. 5:7) Kine twakwata bupinguzi bulangiliile nangue tumuketekeele Yehova, kiketekelo kyetu muli wene pamo ni burafiki bwetu pamo nakue bili byakila kuluma. Kabili, kiswapilo kyetu kya kwikala muyayaya ni kyene kili kyaluma.—Bar. 5:​3-5; Yak. 2:​21, 22.

15. Kunti twakita ki evi kumutasia Yehova mu kipindi kya Kibukisio?

¹⁵ Kuli ni kintu kinge kitupalile kukita evi kumutasia Yehova palua ntono yakue. Kekio kintu ni keki: Kukita kila kintu kituli kuvinda mu kenu kipindi kya Kibukisio evi kumutasia Yehova pantu waafumiizie kilubula-mulandu.  Kukila pa kupanga kusangua ku Kibukisio, tupalile kubakupako ni bange. (1 Tim. 2:4) Kine wewe wamukupa muntu ku Kibukisio, mulondolwele bintu byakaba kukitika koko. Kunti kyawama kine wewe wamulangisia ku jw.org ma video alandile nangue: Sababu ya ki Yesu Wafuile? Pamo ni Languluka Lufu Lwakue Yesu. Bakote bapalile kubakupa baalia baalekeele kusimikila tekusyapitile myezi sita. Tontonkania nsansa ili kwaluka ku muulu ni pa kyalo kine mikooko yakue Yehova elia yaazezele yasonseziiwa kubwela mu libumba! (Luk. 15:​4-7) Ku Kibukisio, te kunti tuye twapoziana sie na baalia batumaneene nabo, inzi tuye twapozia asa baalia ba lenu ao baalia bapisia musita walepele bila balonghaana. Tutonene beyunvue bwino!—Bar. 12:13.

16. Juu ya ki tupalile kusimikila sana mu Kipindi kya Kibukisio?

¹⁶ Eba, wewe kunti wakizia mute obe mu miilo yakue Yehova mu kipindi kya Kibukisio? Ezio i nzila iweme ya kumutasia Leeza pamo ni Kristu palua bintu byonse bibali batukitila. Kine twasimikila sana, twakaba kukila kwimwena Yehova vyakaba kutukwasia, kabili kekio kyakaba kulengia tukabe kukila kumuswapila. (1 Bakor. 3:9) Kukila pa kusimikila sana, ikwinde kukonka ntantiko ya busomi bwa Bibilia palua Kibukisio, elia ili mu katabu Tutoosie Malembo Kila Busiku,​ ao elia ili mu semu imo ya mu libuku lya kulonghaana kwa mukati ka mulungu. Kine kyakitika, wewe kunti wabombia alia malembo auli mukusoma evi aye ali musinzi wa mupango obe wa lisambililo.

17. Ni kiki kili kyatona Yehova? (Mona kisanduku kilandile nangue “ Kunti Twamutasia Syani Yehova?”)

¹⁷ Kulanda kisinka, pange aali yobe kunti yalengia wandue kukita bintu byonse bitwalondolwela mu leli lyasi. Anzia evio, languluka nangue Yehova tezi kupalania miilo yobe na miilo ya bange; wene ali wamona kili mu mutima obe. Ali wamona vyuli wamutasia palua bupe bwakue bwa mana sana, i kulanda, kilubula-mulandu.—1 Sam. 16:7; Mark. 12:​41-44.

18. Juu ya ki tuli twamutasia Yehova pamo ni Yesu Kristu?

¹⁸ Kupitila sie kilubula-mulandu, mazambi etu kunti aeleelua, kabili kunti twaaluka ni burafiki pamo ni Yehova. Kukila pa kako, tuli ni kiswapilo kya kwikala muyayaya. Kansi, tuye twamutasia Yehova lyonse pantu ali ni ntono elia yaamusonseziizie ateanie ezio mpaalo yonse pa lwetu. (1 Yoan. 4:19) Kabili, tumutasie ni Yesu, olia waatutonene sana mpaka watufwila!—Yoan. 15:13.