1-2. Yehova wabakupa bantu bakue bali bamupupa mu kisinka evi baaluke bani?

 ULI kwasuka syani kine muntu wakwipuzia evi, ‘Wewe pa lobe, umumwene Yehova kuya wali ni?’ Pange wewe kunti waasuka evi, ‘Yehova i Baba wane, i Leeza wane, kabili ni Mwinane.’ Kukila pa kako, pange wewe kunti wabombia meena ange a mukinzi pa lwakue Yehova. Inzi eba, umumwene Yehova kuya wali kabili nga muntu olia ali wakupokelela?

² Likolo Daudi waamupalaniizie Yehova na muntu olia ali wapokelelana. Kabili ni bantu bakue Yehova baalia bali bamupupa, waabapalaniizie na baeni bakue Yehova. Daudi waaipuziizie evi: “We Yehova, nani ali kuvinda kwaluka mweni mu liema lyobe? Nani ali kuvinda kwikala mu lupili lobe lutakatifu?” (Malum. 15:1) Kupitila ezio milandu itungulwilue na mupasi, twasambilila nangue kunti twaaluka baeni bakue Yehova, ao benakue. Kakiine, ozo ni mukupo wa mana sana!

YEHOVA ATONENE TWALUKE BAENI BAKUE

3. Nani waalukile mweni wa kwanza wakue Yehova, kabili Yehova pamo ni mweni wakue baaiunvwile syani kila umo palua mwinakue?

³ Ntanzi ya kutendeka kubumba bintu byonse, Yehova abanga wali sie bunke. Inzi pa musita umo, waamupokeleele Mwana wakue libeli, mu liema lyakue lya mufuano. Yehova waasekeleele sana miilo yakue ya lenu ya kupokelelana. Bibilia ili yalanda nangue Yehova waali ‘wamutonene [Mwana wakue] mu nzila iibeleele.” Mweni wakue wa kwanza, i kulanda Mwana wakue, ni wene ‘waasekeleele ntanzi yakue [Yehova] nsita yonse.’—Tus Maf. 8:30.

4. Kisia musita, Yehova waafikiile kukupa bani evi baaluke baeni bakue mu liema lyakue?

⁴ Yehova waabumbile ni ba malaika. Waabakupile, evi ni bene baaluke baeni bakue. Ba malaika bali bakuutua nangue “baana  . . . bakue Leeza,” kabili Bibilia ili yalanda nangue bali ni nsansa ya kuya bali pamo ni Yehova. (Yob. 38:7; Dan. 7:10) Mu musita umo, burafiki bwakue Leeza bubanga bwapeleele sie ku bibumbua byakue bya kimupasi, belia byali waikala nabio ku muulu. Kisia musita, waabumbile ni bantu pa kyalo, evi ni bene baaluke baeni bakue. Pakati ka babo baeni, pabanga pali, Enoko, Noa, Abrahamu, ni Yobu. Babo bantu ba kisinka, baalia babanga bamupupa Leeza, baakuutilue nangue benakue kwa Leeza, ao nangue baalia baaendele “pamo ni Leeza wa kisinka.”—Kut. 5:24; 6:9; Yob. 29:4; Is. 41:8.

5. Kunti twasambilila ki mu bukabika buli mu Ezekieli 37:26, 27?

⁵ Mu ma mia a myaka, Yehova waatwaliliile kubakupa benakue evi baaluke baeni bakue. (Soma Ezekieli 37:26, 27.) Kwa mufuano, kupitila bukabika bwakue Ezekieli, twasambilila nangue Leeza atonene bantu ba kisinka bali bamupupa, baye bali ni burafiki bwa pepi pamo nakue. Wene, alaile kukita “mapatano a mutende pamo nabo.” Bobo bukabika, bulandiile palua musita wa kukwataniiwa kwa baalia bali ni kiswapilo kya kuya ku muulu, pamo ni bantu bali ni kiswapilo kya kwikala pa kyalo. Bali mukukwataniiwa mu liema lyakue Leeza lya mufuano, ni kwaluka “kisepe kimo.” (Yoan. 10:16) Kekio, kili mukukitika lonu!

LEEZA ALI WATWEMENA KONSE KUTULI KUSANGUA

6. Muntu kunti waaluka syani mweni mu liema lyakue Yehova, kabili lelio liema lili lyasangua pi?

⁶ Mu nsita ya kale, liema lya muntu libanga lyali fwasi ya kutuziiziamo, kabili ya kwikingililamo kufuma ku nvula, koba ni bingeko. Mweni olia abanga wapokelelua mu liema, waali waswapila nangue ali kwemenua bwino. Musita utwaaipeele kuli Yehova, twaalukile baeni bakue mu liema lyakue lya mufuano. (Malum. 61:4) Tuli ni byakulia bingi bya kimupasi. Kabili, tuli ni burafiki bwaweme pamo ni ba lupua ni ba nkazi baalia baalukile kale baeni bakue Yehova. Bantu ba mu byalo byonse, kunti baaluka baeni mu liema lyakue lya mufuano. Kwa mufuano, kine wewe waya ku kulonghaana kukata, mu kyalo kinge, uli kusaakaana pamo ni bantu bange bali ni nsansa ya kuya bali mu liema lyakue Leeza. Liema lyakue Yehova, lili lyasangua konse kuli babombi bakue ba kisinka.—Nfy. 21:3.

7. Juu ya ki kunti twalanda nangue bantu ba kisinka baalia baafwile, ni bene bakili sie baeni mu liema lyakue Yehova? (Mona ni foto.)

⁷ Ale kili syani palua bantu ba kisinka, baalia  baafwile? Eba, kunti twalanda nangue bakili sie baeni mu liema lyakue Yehova? Een! Juu ya ki kunti twalanda evio? Twalanda evio, pantu Yehova abalangulukile bwino, kabili ku menso akue bali nga evelia bakikosele sie. Yesu waalandile nangue: “Butuntumuko bwene kubuli. Musa ni ye, waasininkiziizie ozu mulandu mu Malembo azuuke alandile palua kinvuule kyaali kyaleema mulilo nangue, ‘Mulopue i Leeza wakue Abrahamu, i Leeza wakue Izaki, kabili i Leeza wakue Yakobo.’ Kansi, wene te Leeza wa bafwile, inzi ni Leeza wa bakosele. Kansi, baalia bali pamo ni Leeza, bakosele.”—Luk. 20:​37, 38.

NI FAIDA KI ITULI TWAPATA, KABILI NI BIKI BITUPALILE KUKITA?

8. Baeni bakue Yehova bali bapata faida ki kupitila kuya bali mu liema lyakue?

⁸ Liema line-liine, lili lyasangua lyali fwasi ya kutuziiziamo ni kwikingililamo kufuma ku koba, nvula ni bingeko. I vili ni liema lya mufuano lyakue Yehova. Lili lyabakingilila baeni bakue kufuma ku kintu kyonse kili kuvinda kwinoona burafiki bwabo bwa pepi pamo nakue ni kubapeela kiswapilo kya kisinka palua musita uli waiza. Kine tuli pepi ni Yehova, Sataana tavinda kutukitila kintu ata kimo kya kutukisia lonse. (Malum. 31:23; 1 Yoan. 3:8) Mu kyalo kya lenu, Yehova wakaba kutwalilila kubakingilila benakue ba kisinka apana sie mu bintu bya kubakisia kimupasi, inzi kabili wakaba kubakingilila ni ku lufu.—Nfy. 21:4.

9. Yehova atonene baeni bakue bakite ki?

⁹ Kakiine tuli ni lisyuko likata lya kuya twali baeni mu liema lyakue Yehova. Momo, kunti twasekelela kuya twali ni burafiki bwa bunke kabili bwa lonse pamo nakue. Tupalile kukita ki kine tutonene kuya twali baeni bakue? Kine wewe wakupua ku nsesi ya muntu umo, uli kutona kumana belia bili byatona ozo mwine nsesi. Kwa mufuano, pange mwine nsesi kunti watona wewe uvuule bilato byobe ntanzi ya kwingila mu nsesi yakue, kabili ni wewe uli kukita evio. Enka evio ni fwefue, tutonene kakiine kumana belia bikebele Yehova ku baalia batonene kutwalilila kuya bali baeni mu liema lyakue. Kumutona Yehova kuli kwatusonsezia tukite kila kintu kituli kuvinda evi kumulengia “asekelele sana.” (Bakol. 1:10) Kabili pantu tumumwene Yehova kuya wali Mwinetu, twinikile kabili nangue wene i Leeza wetu kabili Baba wetu, olia utupalile kupeela mukinzi. (Malum. 25:14) Te tupalile kulaba ata kanini bebio bintu, kabili lyonse tuye twamunakila sana wene. Kumunakila sana kwakaba kutukwasia tuye twatiina kukita bintu bya kumukisia. Kakiine, tutonene sana ‘kwenda . . . twaikoosiizie’ pamo ni Leeza wetu.—Mik. 6:8.

YEHOVA WAABAKITIILE BAISRAELI BILA KAPAATULULA

10-11. Yehova waabakitiile syani Baisraeli mu kaseeba ka Sinai, kabili kekio kyalangilila syani nangue wene tali na kapaatulula?

¹⁰ Yehova ali wabakitila baeni bakue bila kapaatulula. (Bar. 2:11) Kunti twamona ezio mibele kukonkana ni vyaabakitiile Baisraeli mu kaseeba ka Sinai.

¹¹ Kisia kubakombola bantu bakue mu buzia ku Misri, Yehova waasaakwile ba makoani evi baye babombela mu tabenakulo. Waasaakwile Balawi evi baye babomba miilo inge yaali yapalile kubombua mu lelio liema litakatifu. Baalia babanga babombela ku tabenakulo, ao baalia baali baikala pepi ni ezio tabenakulo, eba Yehova waali wabemena bwino sana kuliko vyaali waemena bange? Ata! Yehova tezi kusangua na kapaatulula.

12. Yehova waalangiliile syani nangue tabanga wali na kapaatulula ku ntundu ya Baisraeli? (Kufuma 40:38) (Mona ni foto.)

¹² Kila muntu mu nkambi abanga wali ni  lisyuko lya kwaluka ni burafiki bwa pepi pamo ni Yehova, ibe aye wali ni miilo iibeleele mu tabenakulo ao abe, ao ibe aye waikala pepi ni tabenakulo ao abe. Kwa mufuano, Yehova waali wasininkizia nangue ntundu yonse ya Israeli yamona lipumpu lya lilezi lya kupapia, ni lipumpu lya mulilo belia byaali byaimana pa muulu tabenakulo. (Soma Kufuma 40:38.) Musita lilezi lulyaali lyatendeka kubuuka ni kuya ku fwasi inge ya lenu, ata sie baalia babanga baikala kule ni tabenakulo, babanga bali ni buvinde bwa kumona lelio lilezi, kukaka bintu byabo, kutuuta liema lya lupua lwabo, ni kubamba kuya pamo ni bantu bange. (Mpen. 9:15-23) Bantu bonse mu nkambi baali baunvua lizui lya ma tarumbeta abili, alia abanga akitilue na mabue a nfalanga. Azo ma tarumbeta, abanga amupasia kila muntu nangue apalile kubamba kukuuka. (Mpen. 10:2) Kulanda kisinka, kwikala pepi ni tabenakulo, te kubanga kwalangiliile nangue muntu ali ni burafiki bwa pepi sana pamo ni Yehova. Inzi, kila Mwisraeli abanga wali ni lisyuko lya kwaluka mweni wakue Yehova, ni kuya wasininkiziizie nangue Yehova wakaba kumutungulula ni kumukingilila. I vikili ni lonu. Ata sie kine tuli twaikala kupi panu pa kyalo, Yehova atutonene, ali watwemena, kabili ali watukingilila.

LONU YEHOVA TALI MUKULANGILILA KAPAATULULA

13. Juu ya ki kunti twalanda nangue Yehova tali mukulangilila kapaatulula lonu?

¹³ Bantu bange bakue Leeza, bali baikala pepi ni kitente kikata kya Bakasininkizia Bakue Yehova, ao pepi ni biro ya musambo ya Bakasininkizia Bakue Yehova. Ni bange bali babombela mu bebio bikuulua. Kekio, kili kyalengia bange baye bakwasia kubomba miilo ingi ili yakitua mu ezio fwasi, ni kubomba pamo ni baalia bali batungulula miilo mu kuteania. Kabili, bange bali babomba bali ba kangalila ba muputule, ao mu miilo inge iibeleele ya nsita yonse. Kine wewe uli pakati ka ba lupua ni ba nkazi bengi basili mu aali ezi itwaafuma mukuzimbula, uye wasininkiziizie nangue  ni wewe uli mweni wakue Yehova, akutonene kabili akwitabiile. Akumanine bwino sana, kabili ali wakupeela belia byukabiile. (1 Pet. 5:7) Bantu bonse bakue Leeza, bali bapata kyakulia kya kimupasi, ali wabatungulula ni kubakingilila nga vibakabiile.

14. Ni mufuano ki unge ulangiliile nangue Yehova tali na kapaatulula?

¹⁴ Mufuano unge ulangiliile nangue Yehova tali na kapaatulula ni ozu: Lonu, ali mukukwasia bantu bonse bapate Bibilia mwaya kyalo. Lwa ntanzi, Malembo Atakatifu a Bibilia abanga alembelue sie mu ndimi itatu: Kiebrania, Kiaramu, ni Kigiriki. Eba, baalia bali ni buvinde bwa kusoma Bibilia mu ezio ndimi ya ntanzi, i bali ni burafiki bwa pepi pamo ni Yehova kuliko baalia basili na buvinde bwa kusoma Bibilia mu ezio ndimi? Ata, te evio.—Mat. 11:25.

15. Ni kiki kilangiliile bwino nangue Yehova tali na kapaatulula? (Mona ni foto.)

¹⁵ Kwitabilua na Yehova, te kuswapiile kuya twasomene masomo a ku kyalo, ao kuya twamanine ndimi ya kale, elia yaalembeeluemo Bibilia lwa ntanzi. Kuliko kubapeela mulangue wakue baalia sie basomene sana, Yehova ali wakwasia bantu bonse mwaya kyalo evi baaluke nao, ibe baye basomene sana ao abe. Mulandu wakue, Bibilia, upilibwilue mu ma elufu a ndimi. Kekio, kili kyakwasia bantu mwaya kyalo banonkele mu masambilizio akue Leeza, ni kumana belia bibapalile kukita evi baaluke benakue.—2 Tim. 3:16, 17.

TWALILILA KUYA WALI MWENI WAKUE YEHOVA

16. Kukonkana ni lilembo lya Miilo 10:34, 35, kunti twakita syani evi twitabilue na Yehova?

¹⁶ Kakiine tuli ni lisyuko likata sana lya kukupua na Yehova evi tuye twali baeni bakue mu liema lyakue lya mufuano. Kuliko muntu unge onse, wene ali ni buwame sana, ali ni ntono sana, kabili ali ni mibele ya kupokelelana sana. Kukila pa kako, wene tali na kapaatulula. Ali wapokelela bantu bonse, ibe baye baikala ku fwasi ki, ibe baakuliile mu aali ki, ibe baye basomene ao abe, ibe baye bali ba rangi ki ya mpapa, ibe baye bali ba mu kabila ki, ao ibe baye bali balalume ao banakazi. Inzi, Yehova ali wapokelela baalia bonse bali bamunakila wene, kabili ali wabaalula baeni bakue.—Soma Miilo 10:34, 35.

17. Ni kupi kutwakaba kupata mpunda inge palua kusyala twali baeni mu liema lyakue Yehova?

¹⁷ Nga vilandile Malumbo 15:1, Daudi waaipuziizie evi: “We Yehova, nani ali kuvinda kwaluka mweni mu liema lyobe? Nani ali kuvinda kwikala mu lupili lobe lutakatifu?” Daudi waatungulwilue na mupasi evi kwasuka bebio bipuzio. Lyasi likonkelepo lyakaba kulondolwela bintu paleepale bitupalile kukita evi tusyale twaitabiilue na Yehova.