Bipuzio Kufuma ku Bakabelenga
Milandu ilandile nangue, “Wewe wakaba kubasunga,” elia ili mu Malumbo 12:7, ilandiile palua “baalia basanzilue” (mulongo wa 5) ao ilandiile “milandu yakue Yehova” (mulongo wa 6)?
Milandu izyungulukiile, ilangiliile nangue ozo mulongo ulandiile palua bantu.
Malumbo 12:1-4, alandile nangue “bantu ba kisinka baakizeza kufuma mukati ka bantu.” Ale mona vilandile Malumbo 12:5-7, mu milongo izimbwilue mu kipuzio kili pa muulu.
“‘Pantu baalia basanzilue batitikiilue,
Juu ya kutonga kwa bapabi,
Nakaba kwimana evi kukitapo kimo,’ i vyalanda Yehova.
‘Nakaba kubapususia kufuma ku baalia bali babazyelekania.’
Milandu yakue Yehova iswetele;
Ili nga mabue a nfalanga aswesiiziwe mu fulu ya bulongo, alia aswesiiziwe mara saba.
We Yehova, wakaba kubasunga bene;
Wakaba kumukingilila kila umo wabo lonse kufuma ku lolu luvyalo.”
Mulongo wa 5 walangilila belia byalanda Leeza palua baalia “basanzilue.” Wakaba kubasunga bene.
Mulongo wa 6 waongezia kulanda nangue “milandu yakue Yehova iswetele,” “nga mabue a nfalanga aswesiiziwe.” Evio i vili vyaiunvua kakiine ni Bakristu bepeele.—Malum. 18:30; 119:140.
Ale mona mulongo ukonkelepo vyulandile. Malumbo 12:7 alandile evi: “We Yehova, wakaba kubasunga bene; Wakaba kumukingilila kila umo wabo lonse kufuma ku lolu luvyalo.” Mulandu “bene” uli mukulandila palua ki?
Pantu mulongo wa 7 wizile kisia bulanzi bulandiile “milandu yakue Yehova,” bange kunti balanda nangue mulandu “bene,” ulandiile palua milandu yakue Leeza. Kabili, tumanine nangue Leeza asungile Bibilia anzia kine balwani bengi baaikwindile evi kuinoona ni kukaania tekunti iye yabombiiwa.—Is. 40:8; 1 Pet. 1:25.
Anzia evio, belia bilandilue mu mulongo wa 5 ni byene ni bya kisinka. Yehova ali wabakwasia, kabili wakaba kutwalilila kubakwasia ni kubasunga baalia “basanzilue” ni baalia “batitikiilue.”—Yob. 36:15; Malum. 6:4; 31:1, 2; 54:7; 145:20.
Ale mulandu “bene,” olia uli mu mulongo wa 7, ulandiile bani?
Milandu ili mu aza Malumbo ilangiliile nangue, mulandu “bene” ulandiile palua bantu.
Malumbo 12:1 alandile palua aali ya “bantu ba kisinka,” baalia balaalikilue. Kisia papo, twapata bulanzi bulangiliile nangue Yehova wakemana evi kulwisia baalia bali babombia ovio lulimi lwabo. Azo Malumbo atusininkiziizia nangue kunti twamuswapila akitepo kintu kimo, evi kukwasia bantu bakue pantu milandu yakue iswesiiziwe.
Pa kako, mulongo wa 7 uli mukulanda nangue Yehova wakaba kubasunga ni kubakingilila “bene,” i kulanda, baalia basanzilue na babifi.
Mulandu “bene” waabombiiziwe mu ozu mulongo mu ma kopi aswapikikile a Malembo a Kiebrania. Septuajinti ya Kigiriki ibombiizie mulandu “fwefue” mara ibili mu mulongo wa 7, kabili ozo mulandu ulangiliile bantu ba kisinka baalia basanzilue kabili batitikiilue. Kupwako, mulongo wa 7 ulandile nangue “kila umo wa” bantu ba kisinka wakakingililua “kufuma ku lonu luvyalo,” kufuma ku bantu bali bazyelekaniana. (Malum. 12:7, 8) Mu mpilibulo imo ya Malembo a Kiebrania ya mu lulimi lwa Kiaramu, semu ya kwanza ya mulongo wa 7, ni yene ibombiizie mulandu “bene.” Ezio semu ya mulongo ilandile evi: “Wewe, WE MULOPUE, wakaba kukingilila bantu ba nsambu, wakaba kubasunga bene lonse kufuma ku lolu luvyalo lwa bubifi.” Kekio kyakila kusininkizia nangue Malumbo 12:7, te ili mukulandila palua milandu yakue Leeza.
Pa kako, ozo mulongo waleta kiswapilo ku “bantu ba kisinka” kilangiliile nangue Leeza wakaba kukitapo kintu kimo.
