LYASI LYA KUSAMBILILA LYA 28
LWIMBO 123 Tuye Twanakila Sana Mipango ya Kiteokrasi
Eba, Wewe Uli Wainika Kisinka?
“Imane mwaiteaniizie, kiine [ao kisinka] kyenu kiye kyali nga musipi ukakile mu kitungu kyenu.”—BAEF. 6:14.
KIKATA KIINE
Tuli kubeleziiwa vya kupusania kisinka kitwaasambiliziiziwe na Yehova ni bufi buli bwaletua na Sataana pamo ni baalia bali batupinga.
1. Wewe uli waiunvua syani palua kisinka?
FWE bantu bakue Yehova, tuli twatona kisinka kili mu Mulandu wakue. Kiketekelo kyetu kiswapiile wenka Mulandu wakue. (Bar. 10:17) Twitabiile nangue Yehova waabiikile kilonghaano kya Kikristu evi kiye kyali “lipumpu ni kintu kelia kikwatiliile kisinka.” (1 Tim. 3:15, NWT) Kabili, tuli twabanakila kwa nsansa baalia bali ‘batulombola’ pakati ketu musita ubali balondolola kisinka kili mu Bibilia ni kutupeela malaizio apateene ni kutona kwakue Yehova.—Baeb. 13:17.
2. Kukonkana ni lilembo lya Yakobo 5:19, kisia kuzumina kisinka, pange kunti twakitua syani?
2 Ata sie kisia kuzumina kisinka, ni kwitabila nangue tupalile kukonka butunguluzi buli bwaletua na kuteania kwakue Leeza, kunti twazeziiwa. (Soma Yakobo 5:19.) Kakiine, Sataana atonene tulekele kukonka butunguluzi buli bwafuma mu Bibilia ao malaizio atuli twapeelua na kuteania kwakue Leeza.—Baef. 4:14.
3. Juu ya ki tupalile kukwatisia kisinka? (Baefeso 6:13, 14)
3 Soma Baefeso 6:13, 14. Lenu sie, Kibanda wakaba kusalanghania bufi bukata evi kulengia ntundu yonse ikabe kumupinga Yehova. (Nfy. 16:13, 14) Kabili, tumanine nangue Sataana wakaba kukila kwikwinda evi kubazezia bantu bakue Yehova. (Nfy. 12:9) Kansi, ni kintu kya mana twibelezie fwe bene evi tuvinde kupusania kisinka ni bufi, kisia tukonke kisinka. (Bar. 6:17; 1 Pet. 1:22) Twakapusuka pa lyemo likata, kine sie tuli twanakila ao tuli twakonka kisinka!
4. Tuli kusambilila ki mu leli lyasi??
4 Mu leli lyasi, tuli kusambilila mibele ibili elia itupalile kukuzia evi itukwasie kwinika kisinka kili kyafuma mu Bibilia ni kwitabila malaizio atuli twapeelua na kuteania kwakue Leeza. Kisia, tuli kulondolwela masoke a kukonka evi tutwalilile kukwatisia kisinka.
MIBELE ITUPALILE KUKUZIA EVI TUVINDE KWINIKA KISINKA
5. Kumutiina Yehova kuli kwatukwasia syani kwinika kisinka?
5 Kumutiina Yehova. Kumutiina Yehova, kuli na mana ya kumutona sana wene ni kutiina sana kukita kintu kya kumulengia afipue. Tutonene kusambilila vya kupusania kiweme ni kibipile, ni kupusania kisinka ni bufi evi twitabilue na Yehova. (Tus Maf. 2:3-6; Baeb. 5:14) Tetupalile ata kanini kulekelela mwenzo wetu wa kutiina muntu utane sana kupita ni ntono yetu kuli Yehova, pantu lingi, belia bili byatona bantu tebizi kumusansamusia Yehova.
6. Kutiina muntu kwaalengiizie syani bakulu likumi ba mu Israeli bavulunghanie kisinka?
6 Kine tuli twatiina sana bantu kuliko vituli twamutiina Leeza, kunti twatendeka kuzumina kintu kisipateene ni kisinka kili kyafuma kuli Yehova. Tontonkania mufuano wa baalia bakulu 12, baalia baaile kupelelezia kyalo kelia kyaali kyalaile Yehova kubapeela Baisraeli. Bapelelezi likumi pakati kabo baabatiinine sana Bakanaani. Ozo mwenzo ubaali nao ubanga wali ukata sana kupita ni vibabanga bamutonene Yehova. Baabalandile evi Baisraeli benabo: “Tetuvinda kuya kulwana pamo ni babo bantu, pantu bali ni maka sana kuliko fwefue.” (Mpen. 13:27-31) Mu kumona kwa muntu, Bakanaani babanga bali ni maka sana kuliko Baisraeli. Inzi, baalia bonse baalandile nangue Baisraeli tebavinda kulwana na balwani babo, te baali bamubiikile Yehova mu mano abo. Babo bapelelezi likumi, baali bapalile kupoza mano ku belia byaali byatonene Yehova Baisraeli bakite. Kabili, baali bapalile kutontonkania palua belia bibaakitiilue na Yehova musita unini ntanzi ya papo. Baakitenge evio, baasiile kwinika nangue maka a Bakanaani abanga ali anini sana kine apalaniiwa na maka akata sana akue Yehova. Kupusana ni babo bapelelezi basyaali bamuketekeele Yehova, ba Yoshua ni Kalebu, bene babanga batonene kwitabilua na Yehova. Baabalandile evi bantu: “Kine Yehova atutonene, kakiine wakaba kututwala mu keki kyalo ni kutupeela kekio kyalo.”—Mpen. 14:6-9.
7. Kunti twakita syani evi tukile kumutiina Yehova? (Mona ni foto.)
7 Evi tukile kumutiina Yehova, tupalile kutontonkania palua kelia kili kumusansamusia wene musita onse utukebele kukwata bupinguzi. (Malum. 16:8) Musita luuli wasoma mpunda ili mu Bibilia, uye waiipuzia evi: ‘Mbenge nali mu ezi aali, nene nga naakwete bupinguzi ki?’ Kwa mufuano, ezia kutontonkania, ubengepo musita baalia bakulu Baisraeli lubaali baleta mpunda ibipile, eba wewe wasiile kwitabizia mpunda yabo ni kunvua mwenzo wa kutiina muntu? Ao, eba, kumutona Yehova ni kutona kumusansamusia, kwaasiile kukusonsezia te kunti utiine muntu? Baisraeli bange baandilue kwinika kisinka kelia kyaalandile Yoshua ni Kalebu. Kekio kyaalengiizie Yehova te kunti abengizie babo Baisraeli mu Kyalo kya Bulayo.—Mpen. 14:10, 22, 23.
Wewe nga waamuzumiine ni? (Mona lifungu lya 7)
8. Ni mibele ki itupalile kwikwinda sana kukuzia, kabili juu ya ki?
8 Kwikeefia. Yehova ali wabafiikwila kisinka baalia bekefiizie. (Mat. 11:25) Twaaitabiile twaikefiizie kukwasiiwa kusambilila kisinka. (Miil Bat. 8:30, 31) Inzi, tupalile kuya twakengeele evi te kunti twaluke ni kibuli. Kibuli kunti kyalengia tubambe kumona nangue mawazo etu aweme nga evelie sie viweme mawazo ali mu Bibilia, pamo ni malaizio alia ali aletua na kuteania kwakue Yehova.
9. Kunti twakita syani evi tutwalilile kuya twaikefiizie?
9 Evi tutwalilile kuya twaikefiizie, tupalile kulanguluka nangue fwefue tuli tu kantu tunini sana kine twapalaniiwa na Yehova. (Malum. 8:3, 4) Kabili, kunti twamulomba Yehova evi atukwasie kwaluka ni mutima uleengele kwitabila kusambiliziiwa. Yehova wakaba kutukwasia kubiika pa ntanzi mawazo akue, alia atuli twapeelua na wene kupitila Mulandu wakue ni kuteania kwakue, kuliko kubiika mawazo etu pa ntanzi. Musita luuli wasoma Bibilia, uye wakeba bintu bilangiliile nangue Yehova ali wabatona baalia bali balangilila mibele ya kwikeefia, kabili ali wasuula baalia bali balangilila kibuli, bali baitantamuna ni kwilendula. Kabili, ikwinde sana kutwalilila kulangilila mibele ya kwikeefia, asa kine wapeelua miilo elia ili kukulengia walukeko ni buvinde pa bantu bange.
VYA KUKITA EVI TUKWATISIE KISINKA
10. Ni bani baasaakwilue na Yehova evi baye babapeela bantu bakue malaizio pamo ni butunguluzi?
10 Twalilila kuswapila malaizio atuli twapeelua na kuteania kwakue Yehova. Mu Israeli ya kale, evi kubapeela bantu bakue malaizio, Yehova waamubombiizie Musa, kabili kisia musita, waamubombiizie ni Yoshua. (Yosh. 1:16, 17) Baisraeli baali bapaalua musita ubaali babamona babo balalume nangue batuminue na Yehova Leeza. Musita kilonghaano kya Kikristu lukyaaundilue lya kwanza kisia ma mia a myaka, batumua 12 i babanga batungulula. (Miil Bat. 8:14, 15) Kisia musita, mu kekio kikundi mwaabiikilue ni bakote bange mu Yerusalemu. Musita malaizio a babo balalume ba kiketekelo luaali akonkua, “bilonghaano byaali byakinkiziiwa kunti biye byaimeene sinta mu kiketekelo, ni bantu baali bakila kuvula kubalua busiku.” (Miil Bat. 16:4, 5) Mu nsiku yetu, ni fwefue tuli twapaalua musita utuli twakonka butunguluzi bwa kiteokrasi bolia butuli twapeelua na kuteania kwakue Yehova. Inzi, Yehova kunti waunvua syani kine twakaana kubanakila baalia basaakwilue na wene evi baye batungulula? Evi twasuke kekio kipuzio, tulondolwelenke bintu byaakitikile musita Baisraeli lubaali baya ku Kyalo kya Bulayo.
11. Mu Israeli ya kale, ni kiki kyaabapatile baalia baali bapinga mupango wakue Leeza wa kumusaakula Musa aye watungulula Baisraeli? (Mona ni foto.)
11 Musita Baisraeli lubabanga bali mu bulendo bwa kuya mu Kyalo kya Bulayo, balalume baalia baali bakindikilue baatendekele kumupuulula Musa pamo ni miilo ibaamupeele kuli Yehova. Baalandile nangue: “Libumba lyonse ni litakatifu [apana sie Musa], bonse, kabili Yehova ali pakati kabo.” (Mpen. 16:1-3) Ata sie kine ku menso akue Yehova Leeza, “libumba lyonse” libanga lyali litakatifu, Yehova waamusaakwile Musa, evi aye watungulula bantu bakue. (Mpen. 16:28) Lubaali bamwitendokela Musa, babanga bamwitendokela Yehova. Te baapozele mano ku belia byaali byatonene Yehova; inzi, baapozele mano ku belia bibaali batonene sie bene, i kulanda, baali batonene kupata buvinde bukata ni kukindikua sana. Leeza waabepaile baalia babanga basonsezia bukisanguka, ni baalia baaiungile pamo nabo. (Mpen. 16:30-35, 41, 49) Ni fwefue lonu, twinikile nangue Yehova tezi kubatona baalia bali bapinga mipango elia ili yaletua na kuteania kwakue.
Wewe nga waasyele wali wa kisinka kuli ni? (Mona lifungu lya 11)
12. Juu ya ki tutwaliliile kuswapila kuteania kwakue Yehova?
12 Tutwaliliile kuswapila kuteania kwakue Yehova. Kine kyamoneka paswetele nangue nzila yetu ya kunvwilamo kisinka kimo kya Bibilia ipalile kwalululua, ao nangue nzila ya kubombelamo miilo imo ya Bukolo ipalile kwalululua, baalia bali batungulula tebezi kutiina kwalulula kine kyapala kukita evio. (Tus Maf. 4:18) Bali bakita evio, pantu bali batona sana kumusansamusia Yehova kuliko muntu unge onse ao kintu kinge kyonse. Kabili, bali baikwinda sana evi bupinguzi bwabo buye bwaswapiile Mulandu Wakue Leeza, olia ulimo mafunde apalile kukonkua na bantu bonse bakue Yehova.
13. “Twebo twa kisinka” i kiki, kabili fwefue tupalile kukita syani palua toto twebo?
13 “Kwatisia twebo twa kisinka.” (2 Tim. 1:13) Papa, “twebo twa kisinka” tuli na mana ya masambilizio a Kikristu, alia ali asangua mu Bibilia. (Yoan. 17:17) Azo masambilizio, i musinzi wa kila kintu kituzumiine. Kuteania kwakue Yehova kuli kwatusambilizia kusininkizia nangue belia bituzumiine biswapiile mafunde a Bibilia. Kine twatwalilila kukita evio, twakaba kupaalua.
14. Bakristu bange baalekeele syani kukwatisia “twebo twa kisinka”?
14 Kunti kyaaluka syani kine twalekela kukwatisia “twebo twa kisinka”? Tumone mufuano umo. Mu myaka mia ya ku ntendeko, Bakristu bamo babanga basalangania lyasi lya bufi; baali balanda nangue busiku bwakue Yehova bwaaizile kale. Pange babanga batontonkania nangue kubanga kwali mukanda waalembele Paulo, olia waalandile evio. Kuliko kutendeka kutoosia evi bamone kine lelio lyasi libanga lyali lya kisinka, Bakristu bamo bazumiine bobo bufi. Kabili, baatendekele kubusalangania. Baalangulukenge bintu belia bibaasambiliziiziwe na Paulo musita lwabanga wakili nabo, nga te baabepelue. (2 Bat. 2:1-5) Paulo waabasokele ba lupua bakue te kunti baye bazumina kila kintu kibaali baunvua. Kabili, evi kubakwasia mu musita uli waiza, Paulo waapwililiile mukanda wakue wa bubili ku Batesalonika na ezi milandu: “Nene Paulo namipozia. Evi i vindinasyusyuta kubalua lupapulo [ao mukanda]. Evi i vindinalemba.”—2 Bat. 3:17.
15. Kunti twaikingilila syani ku bufi bolia bumwenekele nga evelia bwa kisinka? Leta mufuano. (Mona ni ma foto.)
15 Kunti twasambilila ki kupitila milandu yaalembele Paulo ku Batesalonika? Kine twaunvua lyasi limo lelia lisipateene na belia bituli twasabilila mu Bibilia, ao kine twaunvua lyasi lya bufi lya kutupapia, tupalile kubombia mulangue ao buvinde bwa kwinika. Kwa mufuano, mu Buumo bwa Sovyieti ya kale, musita umo, balwani betu baasalanganiizie mukanda umo olia ubaatontonkaniizie nangue waafumine ku kitente kikata kya Bakasininkizia bakue Yehova. Ozo mukanda waabakoseleziizie bamo pakati ka ba lupua baunde kuteania kwa namuna inge, i kulanda, baye baitungulula bo bene. Mukanda wine waali wamwenekele sie kusia wa kisinka. Anzia evio, ba lupua ba kisinka te babepelue. Baainikile nangue milandu ibanga yali mu ozo mukanda te ibanga yapateene ni bintu bibaasambiliziiziwe. Ni lonu, nsita inge, balwani baalia bali balwisia kisinka, kunti babombia teknolojia ya lenu evi batuvulunghanie mu mano ni kutukasania. Kuliko ‘kuvulunghana mu mitima yetu,’ kunti twavinda kwikingilila fwe bene kupitila kutoosia kine belia bitwaakyunvua ao kusoma bipateene ao abe ni bisinka belia bitwaasambiliile kale.—2 Bat. 2:2; 1 Yoan. 4:1.
Te kubepua na maasi a bufi, alia amwenekele nga evelia a kisinka (Mona lifungu lya 15) a
16. Nga vilandile Baroma 16:17, 18, kunti twakita syani kine bange balekela kukwatisia kisinka?
16 Syale mu buumo pamo ni bantu ba kisinka kuli Yehova. Leeza atonene tuye twamupupa mu buumo. Twakaba kusyala mu buumo nsita yonse itwakaba kuya twakwatiisie kisinka. Olia onse asizi kukwatisia kisinka, kunti walengia kilonghaano kikasanike. Pa kako, Leeza watusoka nangue, “labuke.” Kine te tukitile evio, kunti twatendeka kuzumina maasi a bufi ni kufikiila kulekela bukisinka bwetu kuli Yehova.—Soma Baroma 16:17, 18.
17. Kine twainika kisinka ni kukikwatisia, twakaba kupata faida ki?
17 Kine twainika kisinka ni kukikwatisia, twakaba kuya twali pepi ni Yehova, kabili kiketekelo kyetu kyakaba kutwalilila kuya kyakosele. (Baef. 4:15, 16) Tetukaba kuzumina masambilizio a bufi pamo ni propaganda yakue Sataana. Kukila pa kako, Yehova wakatukingilila musita wa lyemo likata. Kansi, tutwalilile kukwatisia kisinka. Kine twakita evio, ‘Leeza wa mutende wakaba kuya wali pamo netu.’—Baf. 4:8, 9.
LWIMBO 122 Twimane Sinta, Bila Kutenta!
a BULONDOLOZI BWA FOTO: Foto ilangiliile musita ba lupua, mu myaka ingi yaapitile, mu Buumo bwa Sovyeti ya kale, lubapokeleele mukanda olia waamwenekele nga evelia waafumine ku Kitente Kikata kya Bakasininkizia bakue Yehova. Inzi, kulanda kisinka, ozo mukanda waafumine ku balwani betu. Enu nsiku, balwani betu kunti babombia Enternete juu ya kusalangania lyasi limo lya bufi palua kuteania kwakue Yehova.
