LYASI LYA KUSAMBILILA LYA 29
LWIMBO 121 Tukosie Mibele ya Kwitiinia
Ilabukile evi te Kunti Uponene mu Bwezio
“Twalilile kukeesia ni kupepa lyonse, evi te kunti mwingile mu bwezio.”—MAT. 26:41, NWT.
KIKATA KIINE
Leli lyasi, lili kutukwasia tumane nangue tupalile kwikwinda sana evi te kunti tukite lizambi. Kabili, lili kutulangulusia nangue tupalile kuya twailabukiile evi te kunti tukite bintu bili kulengia tukite lizambi likata.
1-2. (a) Yesu waabasokele syani basambi bakue? (b) Juu ya ki basambi baamusiile Yesu? (Mona ni ma foto.)
“MUPASI utonene, inzi mubili ni utope.” a (Mat. 26:41b, NWT) Ezio milandu ilangiliile kakiine nangue Yesu abanga wamanine bwino nangue te tupwililikile, kabili nangue kunti twakita bilubo. Inzi kabili, waalandile ezio milandu juu ya kutusoka nangue te tupalile kuya twaiswapiile sana. Bwenka bolia busiku, ntanzi Mulopue wabo Yesu tanalande ezio milandu, basambi bakue baalandile nangue te bakaba kumusia ata kanini. (Mat. 26:35) Kulanda kisinka, baali batonene kakiine kukita kintu kiweme. Anzia evio, te baainikile nangue kunti baandua kukita kintu kiweme kine baisanga mu aali ikolele. Pa kako, Yesu waabasokele evi: “Twalilile kukeesia ni kupepa lyonse, evi te kunti mwingile mu bwezio.”—Mat. 26:41a, NWT.
2 Kya bulanda, basambi te batwaliliile kukesia. Inzi, eba musita Yesu lwaakwetue, baasyele pamo nakue ao baaunvwile mwenzo ni kubutuka? Nga vitumanine, pantu baandilue kukeesia, basambi baakitile kelia kyenka kintu kibaalandile nangue te bakakita ata kanini, i kulanda, baamusiile Yesu.—Mat. 26:56.
Yesu waabasokele basambi bakue batwalilile kukeesia ni kwilabukila evi te kunti bengile mu bwezio, inzi bene baamusiile (Mona lifungu lya 1-2)
3. (a) Evi tuvinde kusyala ba kisinka kuli Yehova, juu ya ki te tupalile kwiswapila sana? (b) Tuli kusambilila ki mu leli lyasi?
3 Te tupalile kwiswapila sana. Kulanda kisinka, tupingwile kusikita kintu kyokyonse kelia kili kulengia Yehova afipue. Inzi, pantu te tupwililikile, kunti twaponena mu bwezio bwa kukita kintu kibipile. (Bar. 5:12; 7:21-23) Kine te kuli muntu wa kutusoka, kunti twaisanga mu aali elia ili kulengia bintu bibipile bimoneke nga evelia biweme. Evi tuvinde kusyala ba kisinka kuli Yehova ni Mwana wakue, tupalile kukonka masoke akue Yesu a kwilabukila evi te kunti tuponene mu bwezio bwa kukita lizambi. Leli lyasi, kunti lyatukwasia tuvinde kukita evio. Kya kwanza, tuli kumona kine ni mu butope ki asa mutupalile kwilabukila. Kya bubili, tuli kumona vya kwilabukila evi te kunti tuponene mu bwezio. Ni kya butatu, tuli kumona vya kukita evi tutwalilile kuya twailabukiile.
UYE WAMANINE BUTOPE BOBE
4-5. Juu ya ki tupalile kwilabukila ata sie palua mazambi anini?
4 Ata sie mazambi alia amwenekele kuya ali anini, kunti anasia burafiki bwetu pamo ni Yehova. Kabili, kunti alengia tukite mazambi akata sana.
5 Fwe bonse tuli twaeziiwa kukita lizambi. Inzi, kila umo pakati ketu ali ni butope bwakue. Unge kunti waeziiwa kukita lizambi likata, kwaluka ni lwendo lufiitile, ao kwaluka ni mawazo a mu kyalo. Kwa mufuano, pange muntu umo ali walwisia butope bwa kukita bukambue. Pange unge ali walwisia butope bwa kwisaapia biungo byakue bya buvyazi ao kumona porno. Kabili, pange unge ali walwisia butope bwa kutiina bantu, kwiswapila kupita mipaka, kufipua lubilo, ao kintu kinge. Kekio i kyaalengiizie Yakobo alande evi: “Kila muntu ali waeziiwa kupitila kulavikiziiwa ni kukwatua na lwinso lwakue mwine.”—Yak. 1:14, NWT.
6. Te tupalile kulaba ki?
6 Eba, umanine butope bobe? Te tupalile kulaba butope bwetu ao kutontonkania nangue tetuvinda kukita lizambi. (1 Yoan. 1:8) Languluka, Paulo waalandile nangue ata sie baalia bali ni “mibele ya kimupasi ipalile,” kunti bakita lizambi kine te batwaliliile kukeesia. (Bag. 6:1, NWT.) Te tupalile kwibepa, kabili tupalile kumana bwino butope bwetu.—2 Bakor. 13:5.
7. Ni kiki kitupalile kumana bwino? Londolola.
7 Ni kiki kitupalile kukita penka palia kine twainika butope bwetu? Tupalile kwikwinda sana evi tuvinde kubulwisia! Kwa mufuano, lwa kale, milyango ya muzi i ibanga yali fwasi itope sana. Pa kako, balinzi bengi babanga baikala ku milyango ya muzi evi kuusunga bwino. Evio vyenka ni fwefue, tupalile kupoza sana mano palia patumanine nangue i pali butope bwetu.—1 Bakor. 9:27.
VYA KWILABUKILA EVI TE KUNTI TUPONENE MU BWEZIO
8-9. Olia mulumendo alondolwelue mu lilembo lya Tuswalo ni Mafunde katue ka 7 taali wapalile kukita ki evi te kunti afikiile kukita lizambi likata? (Tuswalo ni Mafunde 7:8, 9, 13, 14, 21)
8 Eba, kunti twailabukila syani evi te kunti tuponene mu bwezio bwa kukita lizambi? Tontonkania masomo atuli kuvinda kusambilila kupitila olia mulumendo alondolwelue mu lilembo lya Tuswalo ni Mafunde katue ka 7. Waakitile bukambue pamo ni mwanakazi ndumba. Mulongo wa 22 watubwila nangue, “mu kusitukila,” ozo mulumendo waamukonkele olia mwanakazi. Inzi, nga vilangiliile milongo itangiile, olia mulumendo waakitile ni bintu binge ntanzi ya kumukonka olia mwanakazi, belia byaalengiizie, bukebuke, afikiile kukita lizambi likata.
9 Eba, waakitile ki ntanzi ya kufikiila kukita lizambi likata? Kya kwanza, mu nsita ya kyungulo, “waapitile mu musebo pepi ni katunfi [kakue olia mwanakazi ndumba].” Kisia kukita evio, waakonkele nzila ya kuya ku nsesi yakue olia mwanakazi. (Soma Tuswalo ni Mafunde 7:8, 9.) Kisia papo, musita olia mulumendo lwaamumwene ozo mwanakazi, waamukonkele, waamulekeleele amuume beze, kabili waamutwiliziizie musita lwabanga wali mukulanda palua ngeleelo ya mutende elia yaapeele. Pange waakitile evio evi olia mulumendo amone nangue tabanga wali mwanakazi abipile. (Soma Tuswalo ni Mafunde 7:13, 14, 21.) Kabenge olia mulumendo taakitile bebio bintu byonse bya bupuba, nga taaponeene mu bwezio, kabili nga taakitile lizambi likata.
10. Lonu, muntu kunti wakita syani kilubo nga kyakue olia mulumendo?
10 Kukonkana ni leli lyasi lyaalandilue na Sulemani, mubombi onse wakue Yehova, kunti wapatua na bintu paleepale. Kwa mufuano, kunti wakita lizambi likata ni kisia wamona nangue kila kintu kyaakikitika sie “mu kusitukila.” Ao wene kunti walanda evi: “Kyaakikitika sie. Nene naakiponena mu bwezio bila kumana.” Inzi, kine wene watontonkania palua lizambi lyaakikita, pange kunti wainika nangue kuli bintu bimo bya bupuba belia byaakikita, byaakilengia afikiile kukita lelio lizambi. Pange ali ni benakue babipile, ali wasaapa misaapo ibipile, ali waingila ku bitente bya Enternete bibipile, ao ali waya kwendela mu fwasi isipalile kuya Mukristu. Kukila pa kako, pange wene waalekeele kupepa, kusoma Bibilia, kulonghaana, ao kusimikila. Kulanda kisinka, nga evelia sie olia mulumendo alondolwelue mu lilembo lya Tuswalo ni Mafunde, tetuvinda kulanda nangue lizambi lyakue ni lya “kusitukila.”
11. Evi te kunti tukite lizambi, te tupalile kukita ki?
11 Twasambililapo ki? Tupalile kutiina lizambi; inzi kabili tupalile kutiina ni kukita bintu belia bili byalengia muntu akite lizambi. Sulemani waalangiliile bwino lelio lisomo kisia kulandila palua olia mulumendo pamo ni olia mwanakazi ndumba. Waalandile evi palua olia mwanakazi: “Te kuzeze nzila ni kukonka nzila yakue.” (Tus Maf. 7:25) Kabili, waalandile evi palua ozo mwanakazi wa lwendo lubipile: “Ikale kule nakue; te kuye pepi ni mulyango wa nsesi yakue.” (Tus Maf. 5:3, 8) Twasambilila nangue, evi te kunti tukite lizambi, te tupalile kukita bintu ao kwiingizia mu aali elia ili kututwala ku lelio lizambi. b I kulanda, ata sie kine fwe Bakristu te tukaniiziwe kukita bintu bimo, te tupalile kubikita kine tumanine nangue kunti byatwingizia mu bwezio ni kutulengia tukite lizambi.—Mat. 5:29, 30.
12. Yobu waakwete bupinguzi ki, kabili bobo bupinguzi bwaamukwasiizie syani evi te kunti aponene mu bwezio? (Yobu 31:1)
12 Evi te kunti tukite bintu bya kutulengia tukite lizambi, tupalile kukwata bupinguzi bulumine. Evio i vyaakitile Yobu. Wene ‘waakitile mapatano ni menso [akue]’ nangue takaba kumukenta ata kanini mwanakazi mu nzila isipalile. (Soma Yobu 31:1.) Kukonka bupinguzi bwakue kwaamukwasiizie te kunti aponene mu bwezio bwa kukita bukambue. Ni fwefue tupalile kukwata bupinguzi bwa kutukwasia evi te kunti tukite kintu kyokyonse kya kutulengia tuponene mu bwezio.
13. Juu ya ki tupalile kulabukila mawazo etu? (Mona ni ma foto.)
13 Kabili, tupalile kulabukila mawazo etu. (Kuf. 20:17) Bantu bamo bali balanda nangue te kibipile kine muntu ali ni mawazo abipile, inzi bila wakita belia byali mukutontonkania. Inzi, kulanda kisinka, kutontonkania evio kubipile. Kine muntu ali mukutontonkania palua kintu kibipile, kunti watonesia kukita kekio kintu. Kukita evio, kuli nga evelia kwipangila bwezio bolia buli kukola kulwisia. Kulanda kisinka, nsita inge, mawazo abipile kunti aiza mu mano etu. Kine kekio kyakitika, kintu kya mana sana kitupalile kukita ni keki: kufumia penka palia mu mano azo mawazo ni kubiikamo mawazo ange aweme. Kine twakita evio, mawazo abipile teakula mu kati ketu ni kutuletela nkulu ikata elia ili kutukolela kulwisia, kabili elia ili kulengia tukite lizambi likata.—Baf. 4:8; Bakol. 3:2; Yak. 1:13-15.
Te tupalile kukita kintu kyokyonse kelia kili kulengia tuponene mu bwezio (Mona lifungu lya 13)
14. Ni kiki kinge kili kutukwasia kwilabukila evi te kunti tuponene mu bwezio?
14 Ni kiki kinge kitupalile kukita evi te kunti tuponene mu bwezio? Tupalile kwisininkiziizia nangue lyonse kunakila mizilo yakue Yehova kwakaba kutuletela faida. Inzi nsita inge, kunti twamona kyakolele kupatanisia mawazo etu, ni bintu bitutonene kukita, na bintu bitonene Leeza. Anzia evio, kine twaikwinda kukita evio, twakaba kwaluka ni nsansa kakiine.
15. Kutona sana kukita bintu biweme kunti kwatukwasia syani evi te kunti tuponene mu bwezio?
15 Tupalile kutona sana kukita bintu biweme. Kine twaikwinda ‘kusuula bintu bibipile, ni kutona bintu biweme,’ twakaba kukila kupingula kukita bintu biweme ni kutina kwiingizia mu aali elia ili kulengia tufikiile kukita lizambi. (Amos. 5:15) Kabili, kutona sana kukita bintu biweme kunti kwatukwasia tusyale sinta kine twaeziiwa mu kusitukila.
16. Kukita bintu bya kimupasi kunti kwatukwasia syani kusyala twailabukiile? (Mona ni ma foto.)
16 Kunti twakita syani evi tutone sana kukita bintu biweme? Kunti twakita evio kupitila kukita bintu belia bili kulengia tumutone sana Yehova. Kine tuli ku kulonghaana ao kine tuli mukusimikila, tuli twakila kutona kumusansamusia Yehova, kabili, te kyasangua kyalengele kuponena mu bwezio bwa kukita kintu kibipile. (Mat. 28:19, 20; Baeb. 10:24, 25) Kusoma Mulandu wakue Leeza ni kutontonkania palua belia bitwasoma kuli kwatukwasia tutone sana bintu biweme ni kusuula sana bintu bibipile. (Yosh. 1:8; Malum. 1:2, 3; 119:97, 101) Languluka nangue Yesu waabalandile evi basambi bakue: ‘Muye mwapepa lyonse, evi te kunti mwingile mu bwezio.’ (Mat. 26:41) Kine twapepa kuli Baba wetu wa ku muulu, Wene ali kutukwasia, kabili tuli kukila kutona kumusansamusia.—Yak. 4:8.
Kukita lyonse bintu bya kimupasi kunti kwatukwasia evi te kunti tuponene mu bwezio (Mona lifungu lya 16) c
TWALILILA KWILABUKILA
17. Ni butope ki bwaalangiliile Petro mara ingi?
17 Pange, kunti twavinda kupwisia kakiine butope bumo butuli nabo. Inzi, kunti kyalomba tutwalilile kulwisia kwa musita ulepele butope bunge. Kwa mufuano, tutontonkanie pa lwakue mutumua Petro. Pantu waatiinine bantu, waamukeene Yesu mara itatu. (Mat. 26:69-75) Inzi, kimwenekele nangue Petro waapwisiizie mwenzo wakue pantu waavindile kusimikila wasipile pa lwakue Yesu, ntanzi ya Sanedrini. (Miil Bat. 5:27-29) Anzia evio, kisia myaka fulani, waalekeele kulia pamo ni bazima baalia baali bazumiine. Juu ya ki? Pantu “waatiinine baalia baali batonene bazima batetue yando.” (Bag. 2:11, 12) Kya bulanda, nsita imo, butope bwakue Petro bwaabwelele. Pange bwali tebunapue kakiine.
18. Ata sie kine twavinda kulwisia butope bumo, kunti kyaaluka syani ku butope bunge?
18 Ni fwefue aali ya evio kunti yatufikiila. Mu nzila ki? Pange butope bumo butumwene nangue tebusyapwile, kunti bwabwela kabili. Kwa mufuano, lupua umo walanda evi: “Naakitile myaka likumi bila namona kabili porno, kabili naasininkiziizie nangue bwavia bunaali nabo bwa kutona kumona porno bwaapwile kakiine. Inzi, naainikile nangue bwavia bwane bubanga bwali sie nga kinama kisasile kibanga kyafyeme, kyapembeele musita upalile wa kulyana.” Kunti twamutasia olia lupua pantu waatwaliliile kulwisia bwavia bwakue. Waainikile nangue waali wapalile kutwalilila kulwisia bobo bwavia kila busiku, pange mu bwikazi bwakue bonse. Kupitila kukwasiiwa na mukazi wakue pamo ni bakote ba mu kilonghaano, waakwete bupinguzi bulumine bwa kusimona porno.
19. Kunti twakita syani kine tuli ni butope butwaliliile?
19 Kunti twakita syani ntanzi butope butuli nabo tebunatulengie kukita kintu kibipile? Tupalile kukonka aza masoke akue Yesu: “Twalilile kukeesia.” Ata sie mu nsita iumwene nangue uli ni maka a kulwisia butope bobe, twalilila kutiina kwiingizia mu aali elia ili kukutwala mu bwezio. (1 Bakor. 10:12) Twalilila kubombia nzila elia yaakukwasiizie uvinde kulwisia butope bobe. Lilembo lya Tuswalo ni Mafunde 28:14 lyalanda evi: “Muntu ali ni nsansa ni olia ali wasangua wailabukiile lyonse.”—2 Pet. 3:14.
FAIDA YA KWILABUKILA
20-21. (a) Twakaba kupata faida ki kine twatwalilila kwilabukila evi te kunti tuponene mu bwezio? (b) Kine twakita semu yetu, ni kiki kyakaba kutukitila Yehova? (2 Bakorinto 4:7)
20 Tuye twasininkiziizie nangue ni kintu kya mana sana kuli fwefue kutwalilila kwilabukila evi te kunti tuponene mu bwezio. Kine twakita lizambi, kunti ‘twawaminua kwa musita unini.’ Inzi, kine twakonka mafunde akue Yehova, twakaba kwaluka ni nsansa sana ya musita ulepele. (Baeb. 11:25; Malum. 19:8) Kili evio pantu Yehova waatubumbile evi tuye twakonka nzila yakue. (Kut. 1:27) Kine twakita evio, tuli kwaluka ni zamiri iswetele, kabili twakapata bukose bwa muyayaya.—1 Tim. 6:12; 2 Tim. 1:3; Yud. 20, 21.
21 Kulanda kisinka, “mubili utopele.” Inzi, kekio te kilangiliile nangue tetuvinda kupwisia butope bwetu. Yehova eteaniizie evi kutupeela maka atukabiile. (Soma 2 Bakorinto 4:7.) Inzi, mana nangue aza maka akata ali afuma kuli Leeza. Anzia evio, fwe bene tupalile kubombia maka etu kila busiku evi te kunti tuponene mu bwezio. Kine twakita semu yetu, kunti twasininkizia nangue Yehova wakaba kwasuka mapepo etu ni kutongeziizia maka atukabiile. (1 Bakor. 10:13) Kulanda kisinka, kupitila kukwasiiwa na Yehova, kunti twavinda kwilabukila evi te kunti tuponene mu bwezio.
LWIMBO 47 Pepa Kuli Yehova Kila Busiku
a MILANDU ILONDOLWELUE: Mulandu “mupasi,” olia ulondolwelue mu lilembo lya Mateo 26:41, ni maka ali mukati ketu alia ali alengia twiunvue ao tukite bintu nga mutuli twakitila. Mulandu “Mubili,” ni aali yetu ya kusipwililika ya lizambi. Pa kako, kunti twasangua ni nia ya kukita bintu biweme. Inzi, kine te twilabukiile, aali yetu ya kusipwililika kunti yalengia tuponene mu bwezio ni kufikiila kukita lizambi.
b Kitabu Sekelela Buikazi Loonse! lisomo lya 57 nukta ya 1-3 ni lyasi lilandile “Kentasie ku Ntaanzi ku Musita Uli Waiza,” lelia lili mu Lupungu Lwakue Kamwenenena lwa Mwezi wa 11, 2020, lub. 27-29, lifu. 12-17 kunti byamukwasia muntu olia waakitile lizambi likata.
c BULONDOLOZI BWA FOTO: Lupua umo ali mukusoma lilembo lya kila busiku lukele-keele, kabili ali mukusoma Bibilia musita wa kyakulia kya pa midi, kabili mu nsita ya kyungulo, ali ku kulonghaana kwa mukati ka mulungu.
