1-2. Ni kiki kili kyalengia babombi bakue Yehova baye bali ni nsansa? (Yakobo 1:22-25)

 YEHOVA pamo ni Mwana wakue mutonua batonene tuye twali ni nsansa. Kalemba wa Malumbo 119:2 walanda evi: “Bali ni nsansa, ni baalia bali bakonka Malanguluzi akue, baalia bali bamukeba wene kwa mutima wabo onse.” Yesu waalandile evi: “Bali ni nsansa, ni baalia bali baunvua mulandu wakue Leeza ni kuubombia!”—Luk. 11:28, NWT.

² Babombi bakue Yehova bali basangua ni nsansa. Juu ya ki? Kuli nsambu ingi ili yalengia tuye twali evio, inzi nsambu ikata sana ni ezi: tuli twasoma Mulandu Wakue Leeza kila busiku ni kwikwinda kubombia belia bituli twasambilila.—Soma Yakobo 1:22-25.

3. Kubombia belia bituli twasoma mu Mulandu Wakue Leeza kuli kwatuletela faida ki?

³ ‘Kubombia mulandu,’ kuli kwatuletela faida mu nzila ingi. Kwa mufuano, tumanine nangue kekio i kintu kikata sana kitupalile kukita evi kumusansamusia Yehova. Kabili, kukita evio, kuli kwatuletela nsansa. (Kas. 12:13) Musita utuli twaikwinda kubombia belia bituli twasambilila mu Mulandu Wakue Leeza, bwikazi mu lupua lwetu buli bwakila kuwama, kabili tuli twalumia burafiki bwetu pamo ni ba lupua ni ba nkazi mu kilonghaano. Pange ni wewe waaimweneene kale nangue kekio ni kisinka. Kukila pa kako, bantu basizi kunakila mafunde akue Leeza, bali bapata maavia engi, inzi fwefue tetwizi kupata azo maavia. Kulanda kisinka, kili sie nga evelia vyaalandile Likolo Daudi. Mu lwimbo lwakue, kisia kuzimbula muzilo, malaizio, pamo ni bupinguzi  bwakue Yehova, wene waapwililiile na ezi milandu: ‘Mu kubikonka, muli kilambu kikata.’—Malum. 19:7-11.

4. Juu ya ki tekizi kusangua kyalengele kubombia belia bituli twasoma mu Mulandu Wakue Leeza?

⁴ Kulanda kisinka, tekizi kusangua kyalengele lyonse kusoma ni kubombia belia bituli twasambilila mu Mulandu Wakue Leeza. Inzi, ata sie kine tuli ni bintu bingi bya kukita, tupalile kupanga musita wa kusambilila Bibilia evi tumane belia bitonene Yehova fwefue tukite. Pa kako, tumone nzila paleepale elia ili kutukwasia evi tuvinde kuya twasoma Bibilia kila busiku. Kabili, tuli kumona kelia kili kutukwasia evi tuye twatontonkania palua belia bituli twasoma ni vya kubibombia mu bwikazi bwetu.

PANGA MUSITA WA KUSOMA MULANDU WAKUE LEEZA

5. Ni miilo ki ituli nayo elia ili yatutwamina musita wingi?

⁵ Fwe babombi bengi bakue Yehova, tuli ni bingi bya kukita. Tuli twapisia musita wingi twali mukwemena bintu belia bilandile Bibilia nangue ni bya mana. Kwa mufuano, fwe bengi tuli twabomba miilo paleepale evi tupate bintu bitukabiile pamo ni belia bikabiile bantu ba mu lupua lwetu. (1 Tim. 5:8) Bakristu bengi bali baemena balwele ao bantu ba mu lupua lwabo baalia bakotele. Kabili, fwe bonse tukabiile kwemena bukose bwetu. Kulanda kisinka, kukita evio, kuli kwatutwamina musita wingi. Kukila pa bebio bintu, tuli ni miilo inge mu kilonghaano. Miilo inge ikata sana ituli nayo ni ezi: kusimikila kwa mute mpunda iweme. Kine wewe watontonkania palua miilo yonse yuli nayo, eba kunti wakita syani evi upate musita wa kusoma Bibilia kila busiku, kutontonkania palua belia byuli wasoma, ni kubibombia?

6. Upalile kukita syani evi uye wasoma Bibilia kila busiku? (Mona ni foto.)

⁶ Ku fwe Bakristu, kusoma Bibilia kuli pakati ka “bintu bikindeeme.” Pa kako, tupalile kuya twaisoma kila busiku. (Baf. 1:10) Malumbo a kwanza alandile evi palua muntu ali ni nsansa: “Ali wasansamukila muzilo wakue Yehova, kabili ali wasoma muzilo Wakue mu lizui lya pansi busiku ni koba.” (Malum. 1:1, 2) Kekio kilangiliile nangue tupalile kupisia musita twasoma  Bibilia. Ni musita ki uweme sana wa kusoma Bibilia? Kila umo pakati ketu ali ni kyasuko kyakue. Inzi, kintu kya mana ni keki: kusaakula musita olia uli kutukwasia kuvinda kusoma Bibilia kila busiku. Lupua umo olia ali wakuutua Victor walanda evi: “Nene ndi natona kusoma Bibilia lukele-keele. Ata sie kine nsizi kutona kubuuka lukele-keele, ozo i musita undi namona nangue tekwizi kusangua bintu bingi bya kumpuulula. Ndi nasangua natekameene mu mano, kabili ndi namona kyaleengele kupoza mano ku belia bindi mukusoma.” Eba, ni wewe uli wamona evio? Iipuzie evi: ‘Ni musita ki uweme sana kuli nene wa kusoma Bibilia?’

TONTONKANIA PALUA BELIA BYULI MUKUSOMA

7-8. Juu ya ki pange kunti twaandua kupata faida mu busomi bwetu bwa Bibilia? Leta mufuano.

⁷ Kisinka ni keki: pange kunti twasoma bintu bingi kila busiku, inzi bila kubibiikilila. Eba, wewe waasomenepo kale lyasi limo, inzi kisia sie musita unini waandua kulanguluka belia biwasomanga? Kekio kyaatufikiile kale fwe bonse. Kya bulanda, kekio kunti kyatufikiila ata sie musita utuli twasoma Bibilia. Kwa mufuano, wewe kunti wapingula kusoma milongo ingi ili mu Bibilia kila busiku. Upalile kutasiiwa kine uli wakita evio. Fwe bonse tupalile kwibiikila mipango ni kwikwinda kuikindika. (1 Bakor. 9:26) Inzi, kine tutonene kusoma Bibilia kutuletele faida sana, te tupalile kupeleela sie pa kuisoma. Kuli ni bintu binge bitupalile kukita.

⁸ Tontonkania palua keki kisinka: Mizua ili yasangua yakabiile menda evi te kunti yume. Inzi, kine mupondo wa nvula wanokelapo mu kipindi sie kifupi, bulongo kunti bwataatila sana. Pa kako, elia mizua kunti yainooneka. Inzi, kunti kyawama kine nvula ili yanokelamo inini-iniini evi menda aye aingila bukebuke mu bulongo ni kukwasia mizua ikule bwino bila kuuma. Enka evio ni fwefue, te tupalile kusoma Bibilia lubilo-lubilo bila kutontonkania, kulanguluka, ni kubombia belia bituli mukusoma.—Yak. 1:24.

9. Tupalile kukita ki kine tuli twasoma Bibilia lubilo-lubilo?

⁹ Eba, nsita inge uli wasoma Bibilia lubilo-lubilo? Kine i evio, wewe kunti wakita syani?  Bamba kusoma bukebuke. Kita maka evi uye watontonkania palua belia byuli mukusoma ao biwafuma wasoma. Kukita evio, te kukolele. Kunti kyawama uye wapisia musita wingi wali mukusambilila evi uvinde kutontonkania palua belia byuli mukusoma. Ao kunti wasaakula kusoma sie milongo inini, ni kubombia olia musita wasyalako evi kutontonkania sana palua belia biwafuma wasoma. Victor, olia utwazimbulanga, walanda evi: “Nene nsizi kusoma bintu bingi sana mu Bibilia, lunge ndi nasoma sie katue kamo. Pantu ndi nasoma lukele-keele sana, ndi napata musita wa kutwalilila kutontonkania koba konse palua belia bindi nasoma.” Ata sie kine wewe uli wasoma bintu byavulile syani, kintu kya mana ni keki: uye wasoma bukebuke evi upate musita wa kutontonkania palua belia byuli mukusoma ni kumona vya kubibombia.—Malum. 119:97; mona kisanduku kilandile, “ Bipuzio bya Kutontonkaniapo.”

10. Leta mufuano ulangiliile vya kukita evi uvinde kubombia belia byuli wasambilila. (1 Batesalonika 5:17, 18)

¹⁰ Musita luuli wasoma milongo paleepale mu Bibilia, uye watontonkania vya kuibombia. Musita luuli kuya wasoma, uye waiipuzia evi: ‘Kunti nabombia syani ezi mpunda lonu ao mu musita uli mukwiza?’ Kwa mufuano, tulande wewe wasoma lilembo lya 1 Batesalonika 5:17, 18. (Soma.) Kisia kusoma ezio milongo ibili, kunti walekelanke kusoma kakanini, kisia kunti watendeka kutontonkania kine uli wapepa linga, kabili kine mapepo obe ali asangua ali syani. Kukila pa kako, kunti watontonkania vya kumutasia Yehova palua bintu bimo byaakukitiile. Pange kunti wapingula kumutasia Yehova palua bintu bitatu byuli kutona we mwine. Ata sie kine wewe wakita dakika inini watontonkania palua masomo awaakipata mu Bibilia, kekio kunti kyakukwasia utwilizie ni kubombia Mulandu Wakue Leeza. Kabili, kila busiku, kine wewe uli wabombia belia byuli wasoma mu Bibilia, wakaba kwaluka mubombi aweme wakue Yehova. Anzia evio, wewe kunti wakita syani kine wainika nangue kuli bintu bingi sana byupalile kubombelapo?

IBIIKILE MIPANGO ELIA YULI KUVINDA KUFIKILIZIA

11. Juu ya ki nsita inge wewe kunti watyoka mutima? Leta mufuano.

¹¹ Musita luuli wasoma Bibilia, nsita inge kunti watyoka mutima kine wainika nangue kuli bintu bingi sana byupalile kubombelapo. Kwa mufuano, tontonkania busiku bumo, wewe wasoma masoke amo palua kapaatulula. (Yak. 2:1-8) Kisia wainika nangue upalile kuwamia nzila yuli wabakitilamo bange. Pa kako, wewe wapingula kukita bupilibuko paleepale. Kili bwino kukita evio! Kisia, busiku bwakonkapo, wasoma semu ilangiliile nangue ni kintu kya  mana kutoosia milandu yobe ntanzi ya kulanda. (Yak. 3:1-12) Wewe wainika nangue nsinta inge uli walanda bintu bisipalile ao bya kutyona bange mutima. Pa kako, wapingula nangue wakaba kutendeka kubombia bulanzi bwa kukoselezia bange. Kisia, busiku bukonkelepo, wewe wasoma masoke alangiliile nangue te tupalile kukita burafiki pamo ni kenu kyalo. (Yak. 4:4-12) Kisia, wewe wainika nangue upalile kuya wakengeele palua bintu byuli wasoma, byuli wamona, ni byuli watwilizia. Busiku bwa buna, wewe kunti wamona nangue kyaviizie kukita bobo bupilibuko bonse.

12. Juu ya ki te upalile kutyoka mutima kine wainika, mu busomi bobe bwa Bibilia, nangue kuli ni bintu byupalile kuwamia? (Mona ni bulondolozi bwa pensina.)

¹² Kine wewe wainika nangue kuli bintu bingi byupalile kwalulula ao kuwamia, te kutyoka mutima. Kekio kilangiliile nangue wewe wikefiizie. Kulanda kisinka, muntu ekefiizie ali wasoma Bibilia evi enike kine ni bintu ki byapalile kubombelapo. a Kabili, languluka nangue tupalile kutwalilila kuvwala “bumuntu bwa lenu.” (Bakol. 3:10) Ni kiki kili kukukwasia wewe uye watwilizia ni kubombia Mulandu Wakue Leeza?

13. Kunti waibiikila syani mipango elia yuli kuvinda kufikilizia? (Mona ni foto.)

¹³ Kuliko kwezia kubombia mara imo bintu byonse biwaakisoma mu Bibilia, ibiikile mipango elia yuli kuvinda kufikilizia. (Tus Maf. 11:2) Wewe kunti waezia kukita evi: Kita liste ya bintu byupalile kubombelapo, kabili saakulapo kintu kimo ao bibili byupalile kutendekelapo, kisia bebi binge byasyalapo, kunti wabibombelapo ata sie musita unge. Upalile kutendekela pi?

14. Kunti watendeka na mupango ki?

¹⁴ Wewe kunti wapingula kutendeka na kintu  kelia kyumwene nangue kileengele kufikilizia. Ao kunti wasaakula kubombela pa kintu kimo kelia kyukabiile sana kubombelapo kupita byonse. Kine wainika kelia kyupalile kubombelapo, kebulula mpunda mu mpapulo yetu. Pange kunti wabombia kitabu Fahirisi, ao kitabu Musaada wa Kutafuta Habari kwa Ajili ya Mashahidi wa Yehova. Pepa kuli Yehova, kabili mulombe akupeele “nkulu ni buvinde bwa kukita.” (Baf. 2:13, NWT) Kisia, bombia belia biwaakisambilila. Kine wavinda kubombela pa mupango obe wa kwanza, pange kekio kunti kya kusonsezia uvinde kubombela ni pa kintu kinge. Kulanda kisinka, kine wewe wainika nangue waakivinda kukita bupilibuko ao kulangilila mibele imo ya Kikristu, wakaba kumona kyaleengele kukita ni bupilibuko bunge.

LLEKELA MULANDU WAKUE LEEZA ‘UBOMBE MULI WEWE’

15. Bantu bakue Yehova bapusene syani ni bantu bali balanda nangue bali basoma Bibilia? (1 Batesalonika 2:13)

¹⁵ Bantu bange bali balanda nangue baasomene kale Bibilia mara ingi. Inzi eba, bazumiine kakiine belia bili byalandua mu Bibilia? Kabili eba, bali babombia belia bili byalanda Bibilia ni kuilekela yalulule lwendo lwabo? Kya bulanda, bantu bengi tebezi kukita evio. Inzi, bantu bakue Yehova bene i vibali bakita! Nga evelia sie Bakristu ba mu myaka mia ya ku ntendeko, tuli twamona Bibilia kuya yali ‘mpunda yakue Leeza, [kabili] i viili.’ Kabili, tuli twaikwinda kuilekela evi ibombe muli fwefue.—Soma 1 Batesalonika 2:13.

16. Ni kiki kili kutukwasia kuya twabombia Mulandu?

¹⁶ Lyonse, tekizi kusangua kyalengele kusoma ni kubombia Mulandu Wakue Leeza. Pange kunti twaandua kupata musita wa kusoma. Ao kunti twasoma lubilo-lubilo, inzi bila kutontonkania palua belia bituli twasoma. Ao kunti twatyoka mutima kine twainika nangue tuli ni bintu bingi sana bitupalile kubombelapo. Ata sie kine uli ni maavia a syani palua kusoma Bibilia, kunti wavinda kualwisia kupitila kukwasiiwa na Yehova. Kansi, tupingule kuya twaitabila lyonse kukwasiiwa na wene, ni kuya twabombia Mulandu wakue, apana kuutwilizia sie ni kulaba. Kulanda kisinka, kine tuli twasoma ni kubombia Mulandu Wakue Leeza mu bwikazi bwetu, tuli kukila kwaluka ni nsansa.—Yak. 1:25.