1. Yesu wakaba kukita ki lenu sie?

 TWIKEELE mu musita olia wakaba kukitikamo bupilibuko bukata! Lenu sie, Yesu wakaba kupingula kila muntu pa kyalo. Yesu watubwila nangue musita wa bobo bupinguzi uli mukuya wapalama. Wene waababwilile basambi bakue “tulangi” twa kulangilila kubaapo kwakue kusikamoneka ni tulangi twa “mpeleezio ya kyalo.” (Mat. 24:3, NWT) Toto tulangi tulandilue mu Mateo katue ka 24 ni 25, mu Marko katue ka 13, pamo ni mu Luka katue ka 21.

2. Tuli kusambilila ki mu leli lyasi, kabili juu ya ki kekio kyakaba kutukwasia?

² Yesu waatupeele masoke a kutukwasia kupitila kubombia mifuano itatu. Waabombiizie ezi mifuano: Mikooko ni mbuzi, ba bikira ba mano ni ba bikira ba bipuba, ni mufuano wa talanta. Kila mufuano, uli kutukwasia kwinika bwino nangue Yesu wakaba kumupingula kila muntu kukonkana ni bikitua byakue. Mu leli lyasi, tuli kusambilila palua ezio mifuano itatu, kabili tuli kumona masomo atuli kusambililako ni vya kuabombia. Ale tutendeke na mufuano wa mikooko ni mbuzi.

MIKOOKO NI MBUZI

3. Yesu wakapingula bantu musita ki?

³ Mu mufuano wa mikooko ni mbuzi, Yesu waalandile nangue wakapingula bantu kukonkana ni lwendo lwabo kisia kunvua mpunda iweme, ni kukonkana ni vibali babakitila ba lupua bakue baalia babiikilue mafuta. (Mat. 25:31-46) Pa musita wa “lyemo likata,” wene wakapingula kine ni bani bakaba bali mikooko ao mbuzi. Wakakita evio ntanzi ya Armagedoni. (Mat. 24:21) Nga evelia sie musungi vyali walekania mikooko ni mbuzi,  Yesu wakalekania baalia bali babakwasia ba lupua bakue babiikilue mafuta mu bu kisinka na baalia basizi kukita evio.

4. Nga vilandile Isaya 11:​3, 4, juu ya ki tusininkiziizie nangue Yesu wakapingula bantu mu nzila ilungheeme? (Mona ni ya kazeeti.)

⁴ Bukabika buli mu Bibilia bulangiliile nangue pantu Yesu i Mupinguzi olia asaakwilue na Yehova, wene wakapingula mu nzila ilungheeme. (Soma Isaya 11:3, 4.) Yesu ali watoosia lwendo, mawazo, ni bintu bili byalanda bantu, kubiika mukati ni vibali babakitila ba lupua bakue babiikilue mafuta. (Mat. 12:36, 37; 25:40) Wene wakamana baalia babanga babakwasia ba lupua bakue babiikilue mafuta pamo ni miilo yabo. a Nzila imo pakati ka nzila ingi ya mana sana ya kubakwasia ba lupua bakue Kristu baalia babiikilue mafuta, ni ezi: kubakwasia mu miilo ya kusimikila. Yesu wakabapingula baalia bali babakwasia ba lupua bakue nangue bene “balungheeme,” kabili bakaba ni lisyuko lya kupata “bukose bwa muyayaya” pa kyalo. (Mat. 25:46; Nfy. 7:16, 17) Kakiine, kekio ni kilambu kiweme sana ku baalia bonse bakatwalilila kuya bali ba kisinka! Kine basyala bali ba kisinka pa musita wa lyemo likata ni kisia papo, meena abo akasungua mu “kitabu kya bukose.”—Nfy. 20:15.

5. Ni lisomo ki lili mu mufuano wa mikooko ni mbuzi, kabili ni bani bali banonkelamo?

⁵ Uye wali ni kiketekelo, kabili uye wali wa kisinka. Mufuano wakue Yesu wa mikooko ni mbuzi, ulandiile sana palua baalia bali ni kiswapilo kya kwikala pa kyalo. Babo bantu bali balangilila nangue bali ni kiketekelo. Bali balangilila evio kupitila kubakwasia mu miilo ya kusimikila ba lupua bakue Kristu baalia babiikilue mafuta. Kabili bali balangilila evio, kupitila kwitabila mu nzila ya kisinka kutungululua na kikundi kinini kya ba lupua babiikilue mafuta, baalia baasaakwilue na Yesu. (Mat. 24:45) Anzia evio, baalia bali ni kiswapilo kya kuya ku muulu, ni bene bapalile kutwilizia masoke alia ali mu ozu mufuano wa mikooko ni mbuzi. Juu ya ki? Pantu Yesu ali watoosia lwendo lwabo, mawazo, pamo ni bintu bibali balanda. Ni bene bapalile kuya bali ba kisinka. Kulanda kisinka, kuli mifuano inge ibili yaalandile Yesu, elia ilimo masoke alandiile sana palua baalia babiikilue mafuta. Ezio mifuano ili yasangua ni mu Mateo katue ka 25. Kansi, tulandile palua mufuano ukonkelepo wa ba bikira ba mano ni ba bikira ba bipuba.

BA BIKIRA BA MANO NI BA BIKIRA BA BIPUBA

6. Ba bikira basano baalangiliile syani nangue babanga bali ba mano? (Mateo 25:6-10)

⁶ Mu mufuano wa ba bikira, Yesu waalandiile palua ba bikira likumi baalia baaile kumusensekela sibwinga. (Mat. 25:1-4) Bonse babanga baswapiile kuya pamo ni sibwinga ku feti ya bwinga bwakue. Yesu waalandile nangue basano pakati kabo, babanga bali “ba mano,” inzi nangue baalia bange basano babanga bali ba “bipuba.” Baalia ba bikira ba mano baali baiteaniizie, kabili baali bakengeele. Baali baiteaniizie kumupembelela sibwinga nsa yonse, ata sie kine wafika busiku sana. Pa kako, baaizile ni mafuta a mu matala evi baye bali mu mwangaza mu nsita ya nfinzi. Kabili, baabiikile ni mafuta ange pa mbali evi kuabombia kine sibwinga wakokola. Kupitila kukita evio, baali baiteaniizie evi matala abo aye aleemene sie lyonse. (Soma Mateo 25:6-10.) Musita lwaafikile sibwinga, baalia ba bikira ba mano, baaile nakue ku feti. Enka evio ni Bakristu babiikilue mafuta, baalia bakaba baiteaniizie kupitila kutwalilila kuya bakengeele, ni kuya bali ba kisinka mpaka musita wakafikiilapo Kristu, bakapingulua nangue bapalile kuya pamo  ni Sibwinga, Yesu, mu Bukolo bwakue bwa ku muulu. b (Nfy. 7:1-3) Ale kyakaba syani palua baalia bange basano ba bipuba?

7. Ni kiki kyaabapatile baalia ba bikira basano ba bipuba, kabili juu ya ki?

⁷ Kupusana ni ba bikira ba mano, baalia bange basano ba bipuba, te baali baiteaniizie musita sibwinga lwaaizile. Matala abo, aali asyakeba kuzima, kabili te baali bateaniizie mafuta ange. Musita ubaapatile mpunda nangue sibwinga kwasyala afike, baaile kusita mafuta. Sibwinga waaizile kusanga tebanabwele. Pa ozo musita, “ba bikira baalia baali baiteaniizie, baaile pamo nakue ku feti ya bwinga. Kabili mulyango waaizeelue.” (Mat. 25:10, NWT) Ba bikira ba bipuba baabwelele. Kisia, batonene kwingila. Inzi, sibwinga waabalandile evi: “Nene nsimimanine.” (Mat. 25:11, 12) Babo ba bikira, te baali baiteaniizie palua kumupembelela sibwinga mu musita ulepele nga vikyaali kyapalile. Bakristu babiikilue mafuta kunti basambililapo ki?

8-9. Bakristu babiikilue mafuta kunti basambilila lisomo ki kupitila mufuano wa ba bikira? (Mona ni foto.)

⁸ Uye waiteaniizie kabili wali menso. Yesu taali wakeba kulanda nangue kwakaba kwali bikundi bibili bya Bakristu babiikilue mafuta, kabili nangue kimo kyakaba kyaiteaniizie kupembelela mpaka ku mpela ya kenu kyalo, ni kinge bila kyaiteaniizie. Inzi waali wakeba kulandila palua bintu byakabafikiila baalia babiikilue mafuta kine tebeteaniizie kusipikizia ni kusyala bali ba kisinka mpaka ku mpela. Kine bakita evio, te bakapata kilambu kyabo. (Yoan. 14:3, 4) Ozo musoko, ni wa mana sana! Ata sie kine tuswapiile kuya ku muulu ao kwikala pa kyalo, fwe bonse tupalile kutwama twafiniizie musoko olia uli mu mufuano wa ba bikira. Kila umo pakati ketu, apalile kusyala wakentele kabili waiteaniizie kusipikizia mpaka ku mpela.—Mat. 24:13.

⁹ Kisia kulondolwela mufuano wa ba bikira, evi kulangilila nangue ni kintu kya mana kuya  twaiteaniizie ni kuya twali menso, Yesu waalandiile palua mufuano wa talanta. Ozo mufuano, ulangiliile juu ya ki ni kintu kya mana kuya twali ni mute ukata.

TALANTA

10. Baalia bazia babili baalangiliile syani nangue babanga bali ba kisinka? (Mateo 25:19-23)

¹⁰ Mu mufuano wa talanta, Yesu waalandile palua bazia babili, baalia babanga bali ba kisinka kuli mulopue wabo. Inzi wa butatu, tabanga wali wa kisinka. (Mat. 25:14-18) Baalia bazia babili, baailangiliile kuya bali ba kisinka pantu baabombele kwa mute evi nfalanga yakue mulopue wabo yongezeke. Ntanzi ya kuya mu bulendo, mulopue wabo waabapeele talanta, ao nfalanga ingi. Baalia bazia babili, babanga bali ni mute kabili baabombiizie bwino nfalanga. Baapatile faida ki? Musita mulopue wabo lwaabwelele, waaizile kusanga nfalanga elia yaabasiliile yalimo mara ibili. Mulopue waabatasiizie, kabili baaingiile “mu nsansa yakue mulopue [wabo].” (Soma Mateo 25:19-23.) Ale kyaalukile syani palua olia muzia wa butatu? Wene waabombiizie syani nfalanga ibaamusiliile kuli mulopue wakue?

11. Ni biki byaamupatile olia muzia “munanghani,” kabili juu ya ki?

¹¹ Olia muzia wa butatu, waasiliilue talanta imo. Inzi, abanga wali “munanghani.” Mulopue wakue abanga waswapiile nangue ozo muzia ali kubombia bwino ezio talanta. Inzi, waaiziikile mu bulongo. Taaongeziiziepo talanta ata imo musita mulopue wakue lwaabwelele. Ozo muzia tabanga watontonkania bwino. Kuliko kupapaata pantu waandilue kongeziiziapo nfalanga ibaamusiliile kuli mulopue, ozu muzia waamwanine mulopue wakue bila nsambu nangue “aviizie sana.” Ozo muzia munanghani, waakeenue kuli mulopue wakue. Kukila pa kako, waapokelue ni elia talanta imo kisia waakumbilue kufuma ku nsesi yakue mulopue.—Mat. 25:24, 26-30.

12. Baalia bazia babili ba kisinka bapalaniizie bani lonu?

¹² Baalia bazia babili ba kisinka bapalaniizie Bakristu ba kisinka babiikilue mafuta. Mulopue, Yesu, waabakupile evi ‘bengile mu nsansa yakue mulopue [wabo].’ Bali bapata kilambu  kyabo kya kuya ku muulu, mu butuntumuko bwa kwanza. (Mat. 25:21, 23, NWT; Nfy. 20:5b) Inzi, mufuano ubiipile wakue olia muzia munanghani uletele musoko ku baalia babiikilue mafuta. Musoko ki?

13-14. Ni lisomo ki lyasambilila baalia babiikilue mafuta kupitila mufuano wa talanta? (Mona ni foto.)

¹³ Uye wali ni mute. Mu mufuano wa talanta ni mu olia wa ba bikira, Yesu taalandile nangue Bakristu babiikilue mafuta baakaaluka bananghani. Inzi, waali walandila palua bintu byakabapata kine bazeezia mute wabo. Bakandua kusininkizia nangue ‘baasaakwilue ni kukuutua’ kabili te baketabiziiwa kwingila mu Bukolo bwa ku muulu.—2 Pet. 1:10.

¹⁴ Mufuano wakue Yesu palua ba bikira ni palua talanta, walangilila paswetele nangue Bakristu bonse babiikilue mafuta, bapalile kuya baiteaniizie, bali menso, kabili bali ni mute. Inzi eba, kuli ni musoko unge waalandile Yesu wa kukwasia baalia babiikilue mafuta? Een, kuuli! Milandu yakue Yesu, elia ili mu Mateo 24:40, 41 ilandile kabili palua bupinguzi bwa kupeleezia bwa baalia babiikilue mafuta.

NI BANI “BAKATWAMUA”?

15-16. Mateo 24:40, 41 ilangiliile syani nangue ni kintu kya mana sana ku baalia babiikilue mafuta kuya bailabukiile?

¹⁵ Ntanzi ya kulandila palua mifuano itatu, Yesu waalandiile palua bupinguzi bwa kupeleezia bwa baalia babiikilue mafuta. Bobo bupinguzi, i bwakalangilila kine nani abanga waitabiilue. Yesu waalandiile palua balalume babili baalia babanga babomba mu bukaba, ni banakazi babili baalia babanga batwisyania. Mu kila mufuano, bantu babili bali mukubomba miilo imonke. Inzi, Yesu waalandile nangue ‘umo wakatwamua, ni unge kusiiwa.’ (Soma Mateo 24:40, 41.) Kisia, waabasokele evi basambi bakue: “Iilabukile pantu te mumanine busiku bwakeza Mulopue wenu.” (Mat. 24:42) Yesu waalandile milandu ipaleene ni ezio kisia kulondolwela mufuano wa ba bikira. (Mat. 25:13) Eba, ezio milandu ikwateene? Kimonekele evio. Bantu ba kisinka baalia babiikilue mafuta kakiine, i “bakatwamua” na Yesu mu Bukolo bwa ku muulu.—Yoan. 14:3.

¹⁶ Uye wailabukiile. Mukristu onse abiikilue mafuta, olia asiilabukiile takaya pamo ni “baalia basaakwilue.” (Mat. 24:31) Kukila pa kako, bantu bonse bakue Leeza, baye bali ba kuya ku muulu ao abe, bapalile kumona milandu yakue Yesu kuya yali musoko wa kutwalilila kwilabukila ni kuya bali ba kisinka.

17. Juu ya ki te tupalile kwema mu mano, kine Yehova wapingula kubabiika mafuta Bakristu bamo kupitila mupasi wakue utakatifu mu enu nsiku yetu?

¹⁷ Tumumanine bwino Yehova. Pa kako, tuswapiile nangue kila kintu kyali wakita, kili kyasangua kyapalile. Te twizi kwema mu mano, musita utuli twamona Yehova wapingula kubabiika mafuta Bakristu bamo mu myaka ya bulenu. c Tulangulukile milandu yaalandile Yesu palua baalia babombi baizile kubomba na senkere (5:00), mu mufuano wakue wa bukaba bwa mizabibu. (Mat. 20:1-16) Baalia baakuutilue sie nyuma mu bobo busiku, evi beze babombe mu bukaba bwa mizabibu, baapatile malipo amo sie pamo ni baalia baatendekele kubomba ntanzi. I vikili ni palua baalia babiikilue mafuta. Ata sie kine basaakulua musita ki, bakapokelela kilambu kya ku muulu, kine sie batwalilila kuya bali ba kisinka.

POZA MANO KU MASOKE

18-19. Twasambilila ki kupitila ezi mifuano yakue Yesu?

¹⁸ Twasambilila ki mu leli lyasi? Twasambilila nangue, ku baalia bali ni kiswapilo kya kwikala pa kyalo, mufuano wa mikooko ni mbuzi ulangiliile nangue bapalile kusyala bali ba kisinka  kabili balamatiliile kuli Yehova, kubambila lonu ni mu musita wa lyemo likata lelia lili mukwiza. Pa ozo musita, Yesu wakaba kubapingula bantu ba kisinka kuya bapalile kwingila “mu bukose bwa muyayaya.”—Mat. 25:46.

¹⁹ Kabili twamona mifuano inge ibili elia iletele masoke ku baalia babiikilue mafuta. Mufuano wakue Yesu wa ba bikira ba mano ni ba bikira ba bipuba, basano pakati kabo baailangiliile nangue babanga bali ni mulangue. Baali baiteaniizie kabili babanga bali menso, baamupembeleele sibwinga mu musita walepele nga vikyaali kyapalile. Inzi, baalia ba bikira babipuba, te babanga baiteaniizie. Pa kaako sibwinga waakeene kubengizia mu feti yakue ya bwinga. Ata sie kine pakabe kukokola siani, ni fwefue tupalile kuya twaiteaniizie ni koku twapembeleele mpaka Yesu akabe kwinoona kenu kyalo. Kabili mu mufuano wa talanta, twalondolwelanga palua bazia babili, baalia babanga bali ni mute. Baamubombeele mulopue wabo kwa mute, kekio kyalengiizie abetabile. Inzi, muzia munanghani waakumbilue. Twasambililapo ki? Tupalile kuya twali ni bingi bya kukita mu miilo yakue Yehova mpaka ku mpela. Kupwako, twamonanga nangue baalia babikilue mafuta, bapalile kusyala bailabukiile evi ‘bakatwamue’ na Yesu ni kupata kilambu kyabo ku muulu. Bene, bapembeleele kwa nkulu ‘kukolonghaniiwa’ pamo ni Yesu ku muulu. Kisia vita ya Armagedoni, bakaba bali ba nabwinga bakue Yesu mu bwinga bwakue Mwana Mukooko.—2 Bat. 2:1; Nfy. 19:9.

20. Yehova wakaba kubakitila ki baalia bali bakonka masoke akue?

²⁰ Anzia kine busiku bwa bupinguzi bwapalama sana, te tuli na nsambu ya kutiina sana. Kine twatwalilila kuya twali bakisinka, Baba wetu wantono wa ku mulu, wakaba kutupeela “maka akata” evi tukabe ‘kuvinda . . . kwimana ntanzi yakue Mwana mwina muntu.’ (2 Bakor. 4:7; Luk. 21:36) Atasie kine tuswapiile kwikala ku muulu ao pa kyalo, twakaba kumusansamusia Baba wetu kine twakonka masoke ali mu mifuano yakue Yesu. Kupitila buwame busipalilue, meena etu ‘akapatua alembelue mu kitabu’ kya bukose.—Dan. 12:1; Nfy. 3:5.