1-2. Pantu Yehova waatubumbile twali ni buvinde bwa kupata nsansa ingi mu kupeelana kuliko mu kupeelua, kekio kili kyatuletela faida ki?

 MUSITA Yehova lwaababumbile bantu, waabapeele ni buvinde bwa kupata nsansa ingi ili yafuma mu kupeelana kuliko mu kupeelua. (Miil Bat. 20:35) Eba, kekio kilangiliile nangue tetwizi kupata nsansa ata kanini musita utuli twapeelua kintu? Ata, te evio. Fwe bonse tuli twaunvua nsansa musita utuli twapeelua bupe. Inzi, tuli twaunvua nsansa ingi musita utuli twapeelana. Kakiine Yehova waakitile bwino pa kutubumba evio. Juu ya ki?

² Pantu Yehova waatubumbile evio, fwefue kunti twakila kwaluka ni nsansa. Kunti twakila kwaluka ni nsansa kupitila kukeba fwasi inge ya kupeelana. Eba, te umwene nangue kiweme sana pantu Yehova waatubumbile evio?—Malum. 139:14.

3. Juu ya ki Yehova ali wakuutua nangue “Leeza wa nsansa”?

³ Bibilia ili yatusininkiziizia nangue kupeelana kuli kwaleta nsansa. Kansi, kileengele sie kumana juu ya ki Yehova ali wakuutua nangue “Leeza wa nsansa.” (1 Tim. 1:11, NWT) Wene i abanga wali wa kwanza kupeelana, kabili te kuli muntu unge ali wapeelana sana nga wene. Nga vyaalandile Paulo, kupitila Yehova, fwefue tuli ni ‘bukose, tuli twaenda kabili patuli.’ (Miil Bat. 17:28) Kulanda kisinka, ‘kubalua bupe buweme ni bupwililikile,” buli bwafuma kuli Yehova.—Yak. 1:17.

4. Kunti twakita syani evi tukile kwaluka ni nsansa?

⁴ Pange fwe bonse, kunti twatona kukila kwimwena nsansa ili yafuma mu kupeelana. Kunti twakita evio, kupitila kupala mibele yakue Yehova ya kupeelana. (Baef. 5:1) Mu leli lyasi, tuli kusambilila mufuano uweme wakue Yehova wa kupeelana. Kabili, tuli kumona vya kukita kine twainika nangue bange tebezi kutasia palua bintu bituli twabakitila. Kekio, kili kutusonsezia tutwalilile kuya twapeelana ni kukila kupata nsansa ili yafuma mu kukita evio.

PALA MIBELE YAKUE YEHOVA YA KUPEELANA

5. Ni bintu ki bya kimubili bili byatupeela Yehova?

⁵ Yehova ali watulangilila mibele ya kupeelana mu nzila ki? Tumone mifuano paleepale. Yehova ali watupeela bintu bya kimubili. Pange lunge tavinda kwalula bwikazi bwetu buwame sana. Inzi, ali wasininkizia nangue lyonse tuli mukupata bintu bitukabiile. Kwa mufuano, ali watukwasia kupata byakulia, maubo, ni mwa kwikala. (Malum. 4:8; Mat. 6:31-33; 1 Tim. 6:6-8) Eba, Yehova ali wapatikiziiwa sie pa kutupeela bintu bya kimubili? Ata! Ale juu ya ki Yehova ali watupeela bebio bintu?

6. Twasambilila ki mu lilembo lya Mateo 6:25, 26?

⁶ Yehova ali watupeela bintu bya kimubili wasonseziiziwe na ntono. Mona milandu yakue Yesu elia ili mu Mateo 6:25, 26. (Soma.) Yesu waabombiizie mifuano kufuma ku bintu byaabumbilue. Yesu waabombiizie mufuano wa toni, ni kulanda evi: “Toni te twizi kubyala ao kuzombola, kabili te twizi kuziba mu butala.” Inzi, mona vyaalandile kisia papo: “Sinue [ao baba wenu] wa mwiulu ali watuliisia.” Kabili Yesu waaipuziizie evi: “Eba mwemue te i bantu bakindeeme kukila toni?” Yesu waali wakeba kutusambilizia lisomo ki? Yehova abamwene baalia bali bamupupa kuya bali ba mana sana kuliko ba nama. Kansi, kine Yehova ali waemena bintu bikabiile ba nama, tuye twasininkiziizie nangue wakatupeela belia bitukabiile! Nga evelia baba vyali waemena baana bakue, Yehova ali waemena bintu bikabiile lupua lwakue wasonseziiziwe na ntono.—Malum. 145:16; Mat. 6:32.

7. Kunti twapala mibele yakue Yehova ya kupeelana mu nzila ki? (Mona ni foto.)

⁷ Nga evelia vili vyakita Yehova, kunti twabapeela bantu bintu bibakabiile twasonseziiziwe na ntono. Kwa mufuano, eba umanineko ni lupua ao nkazi akabiile kukwasiiwa byakulia ao maubo? Yehova kunti wakubombia wewe evi umupeele ozo lupua ao nkazi bintu byakabiile. Bantu bakue Yehova bali basangua baleengele sana kubakwasia bange mu nsita ya masanzo. Kwa mufuano, mu kipindi kya bulwele bwa korona (COVID-19), ba lupua ni ba nkazi baafumiizie byakulia, maubo ni bintu binge evi kukwasia baalia babanga bakabiile kukwasiiwa. Kabili, ba lupua ni ba nkazi bange baafumiizie nfalanga evi kukwasia miilo ya kyalo kyonse. Kekio kyaalengiizie tuvinde kukwasia ba lupua bengi mwaya kyalo, baalia babanga bakabiile kukwasiiwa mu kekio kipindi. Baabombiizie milandu ili mu Baebrania 13:16: “Tekulabe kukita biweme ni kukwasyania pantu ngeleelo ya ozu musango i ili yamuwamina Leeza.”

8. Yehova ali watupeela maka a kukita syani? (Bafilipi 2:13)

 ⁸ Yehova ali watupeela maka. Yehova akwete maka asili na mipaka, kabili ali watona kubapeela babombi bakue ba kisinka. (Soma Bafilipi 2:13.) Eba, wewe waapepelepo kale evi upate maka a kusipikizia bwezio ao bwavia bukata? Kabili pange waapepelepo kale evi upate maka a kukita bintu byuli wakita kila busiku. Musita lipepo lyobe lulyaasukilue, pange wewe waaitabiziizie milandu yaalandile mutumua Paulo, elia ilandile evi: “Mu bintu byonse ndi ni maka kupitila olia ali wampeela maka.”—Baf. 4:​13, NWT.

9. Kunti twamupala syani Yehova kukonkana ni vyali wabombia maka akue mu buwame? (Mona ni foto.)

⁹ Ata sie kine te tupwililikile, kunti twamupala Yehova kukonkana ni vyali wabombia maka akue mu buwame. Tetuvinda kubapeela bange maka etu a kimubili. Inzi, kunti twabombia maka etu evi kubakwasia. Kwa mufuano, kunti twabakwasia ba lupua ao ba nkazi kuwamia masesi abo ao kubakwasia kusita bintu bibakabiile ku nsoko. Kine kyavindikana, kunti twaipeela kukwasia kukita busaka ku Nsesi ya Bukolo ni kuitengenezia. Kubombia maka etu mu ezio nzila kuli kwabakwasia ba lupua ni ba nkazi betu.

10. Kunti twabakoselezia syani bange kupitila milandu yetu?

¹⁰ Kabili te kulaba nangue milandu ituli twalanda ili yasangua ni maka. Eba, wewe kunti walangulukako muntu umo olia apalile kutasiiwa palua bintu byali wakita? Ao eba, umanineko muntu umo olia akabiile kuteekiiwa mutima? Kine evio, wamona syani kine wakwata mupango wa kulanda na ozo muntu? Wewe, kunti waya kumwendela, kumukuuta ku telefone, ao kumutumina karte ilipo milandu ya kumutasia ao ya kumuteekia mutima, kabili kunti wamulembela mpunda ku telefone. Apana kunvua mwenzo sana palua belia byukebele kulanda. Pange milandu inini, kabili ileengele sie elia ifumine ku mutima, kunti yaaluka kintu kikabiile sana ozo lupua ao nkazi evi atwalilile kuya wali wa kisinka mu busiku bukonkelepo ao kumukwasia eyunvue bwino.—Tus Maf. 12:25; Baef. 4:29.

11. Yehova ali wabombia syani mulangue wakue?

¹¹ Yehova ali wapeelana mulangue. Musambi Yakobo waalembele evi: “Kansi, kine muntu onse pakati kenu wabulua mulangue, atwalilile kumulomba Leeza, pantu ali wabapeela bonse mu buwame, kabili bila kukeba bilubo.” (Yak. 1:5) Nga vilangiliile ezio milandu, Yehova tezi kukakatila mulangue wakue. Ali wabapeelako ni bange. Kabili, languluka nangue musita Yehova lwali wapeelana mulangue, ali wakita evio “bila kukeba bilubo,” ao “bila kwitendooka.” Tezi kutona ata kanini, twiunvue ovio musita utuli twamulomba evi atutungulule. Kakiine  ali watusonsezia evi tuye twakeba mulangue.—Tus Maf. 2:1-6.

12. Kunti twabapeelako bange mulangue wetu mu nzila ki?

¹² Ale fwefue? Eba, kunti twamupala Yehova kupitila kubapeelako bange mulangue wetu? (Malum. 32:8) Bantu bakue Yehova bali ni fwasi ingi ya kubakwasiako bange belia bibaasambiliile. Kwa mufuano, lingi uye wababelezia mu miilo ya kusimikila baalia baakizumina lenu kisinka kya Bibilia. Mwe bakote, muye mwabakwasia babombi bali babombela mwasipikiziizie, ni ba lupua babatiziiziwe evi bamane vya kubomba miilo ibali bapeelua mu kilonghaano. Kabili, baalia bali ni bufundi mu miilo ya kukuula ni kutengenezia bikuulua, kunti bakwasia kubeleziako baalia basili na bufundi bukata evi bamane vya kubomba miilo mu bikuulua bya kiteokrasi.

13. Musita utuli twababelezia bange, kunti twapala syani Yehova vyali wakita musita lwali wapeelana mulangue wakue?

¹³ Baalia bali babelezyana, bapalile kupala Yehova vyali wakita musita lwali wapeelana mulangue wakue. Languluka nangue wene, ali wapeelana mulangue wakue mu buwame. Kansi ni fwefue, tupalile kubabwilako bila kutintua belia bitumanine, baalia bali mukusambilila. Te tupalile kutiina kubabwilako bange bintu binge bitumanine juu ya kutontonkania nangue pange bakaba kubiikua pa kifulo kyetu. Nsita inge bantu bali batontonkania nangue: ‘Nene nsyaabeleziiziwe na muntu! Ni wene apalile kwibeelezia mwine.’ Ezio aali te ipalile kusangua mu bantu bakue Yehova. Inzi, tupalile kubabwilako bange byonse bitumanine ni kwikwinda sana kubabelezia twatonene. (1 Bat. 2:8) Tutonene “ni bene, baye babasambiliziako bantu” bange. (2 Tim. 2:1, 2) Kine fwe bonse tuli twabapeelako bange mulangue wetu, fwe bonse tuli kukila kwaluka ni mulangue kabili ni nsansa.

VYA KUKITA KINE BANGE TE BALI MUKUTASIA PALUA BELIA BITULI TWABAKITILA

14. Lingi, bantu bengi bali bakita syani musita utuli twabakitila bintu biweme?

¹⁴ Musita utuli twalangilila mibele ya kupeelana, asa ku ba lupua ni ba nkazi netu, lingi bali batutasia. Kunti batutumina karte ilipo milandu ya kutasia, ao kunti batasia mu nzila inge. (Bakol. 3:15) Musita utuli twatasiiwa evio, tuli twakila kusansamuka.

15. Tupalile kulanguluka ki kine bange te bali mukutasia palua bintu bituli twabakitila?

¹⁵ Inzi, nsita inge bange tebezi kutasia palua bintu binge bituli twabakitila. Lunge, kili kyamoneka nangue bantu te bali mukutasia palua bintu byonse bitwaakikita evi kubakwasia, nga evelia kwinika musita utwakipisia, maka pamo ni bintu bitwaakibombia pa kubakwasia. Kine kili evio, kunti twakita syani evi te kunti tuzeezie nsansa yetu ao evi te kunti tufipue? Tupalile kulanguluka milandu ili mu lilembo liimaniine leli lyasi: Miilo 20:35. Nsansa yetu ya kupeelana te iswapiile kutasia kuli kwatasia bantu batuli twakwasia. Inzi, kunti twatwalilila sie kupeelana kwa nsansa ata sie kine tumwene nangue bange te bali mukutasia. Ni kiki kili kutukwasia? Tumoneko bintu paleepale.

16. Ni kiki kili kutukwasia kutwalilila kupeelana kwa nsansa?

¹⁶ Twalilila kumupala Yehova. Wene, ali wabapeela bantu bintu biweme ibe batasie ao abe. (Mat. 5:43-48) Yehova atulaile nangue kine tuli twakita nga wene, kupitila kupeelana bila ‘kuketekela kubweziiziwa kantu,’ twakaba kupata “kilambu kikata.” (Luk. 6:35) “Kantu,” kaaka kazimbwilue mu leli lilembo, kunti kabiika mukati kutasia. Ibe baye batutasia ao abe, Yehova wene wakaba kuya watupaala sie lyonse, palua bintu biweme bituli twabakitila bange, pantu tuli “twapeelana twawamiinue.”—Tus Maf. 19:17; 2 Bakor. 9:7.

17. Ni nsambu ki ya mana sana ili yatulengia tuye twabapeela bange? (Luka 14:12-14)

 ¹⁷ Kintu kinge kituli kuvinda kukita evi kumupala Yehova musita utuli twapeelana ni keki: Kubombia belia byaalandile Yesu mu lilembo lya Luka 14:12-14. (Soma.) Te kibipile kubakupa ku kyakulia ao kubalangilila mibele ya buwame baalia bali ni buvinde bwa kutulangilila buwame. Inzi, ale kine twainika nangue tuli twabapeela bantu pantu sie tuswapiile nangue ni bene bakaba kutukitila enka evio? Kine i evio, tupalile kukita belia byaalandile Yesu. Kunti twaikwinda kumulangilila buwame muntu olia utumwene nangue tali na kantu ka kutupeela. Kine twakita evio, tuli kwaluka ni nsansa pantu tuli mukumupala Yehova. Kabili, kine tuli twapeelana bila twaswapiile kubweziiziwa, lyonse twakaba kuya twali ni nsansa musita utuli kuya twabapeela bange ata sie kine te batasiizie.

18. Ni kiki kitupalile sana kutiina kukita, kabili juu ya ki?

¹⁸ Apana kupingula nangue bange te bezi kutasia. (1 Bakor. 13:7) Kine bange te batutasiizie, kunti twaiipuzia evi: ‘Eba, kakiine te bezi kutasia, ao eba, balabanga sie kutasia?’ Pange kuli ni nsambu inge ilengiizie te kunti bakite nga vituswapiile. Pange kunti batasia sana mu mutima, inzi kuya baandilue sie kulanda. Pange kunti baunvua busoni bwa kukwasiiwa, asa kine lwa ntanzi bene i babanga bakwasia bange. Inzi, kine tubatonene kakiine ba lupua ni ba nkazi betu, tetuya twatontonkania ovio pa lwabo, kabili tuli kutwalilila kubapeela kwa nsansa.—Baef. 4:2.

19-20. Juu ya ki kili bwino kupembelela kine bange te batasiizie palia penka? (Mona ni foto.)

¹⁹ Uye walangilila mibele ya kupembelela. Likolo Sulemani wa mulangue, waalembele evi: “Poza mukate obe pa menda, pantu kisia nsiku ingi wewe wakaba kuupata kabili.” (Kas. 11:1) Ezio milandu yatusambilizia nangue, nsita inge, pange bantu kunti batasia “kisia nsiku ingi” kupita. Kekio, i vikyaakitikile kuli nkazi umo.

²⁰ Kisia myaka ingi kupita, muka kangalila umo wa muputule, waalembele mukanda evi kumukoselezia nkazi umo, olia waali wabatiziiziwe sie lenu. Mu ozo mukanda, waalangiliile  juu ya ki ni kintu kya mana kutwalilila kulangilila bukisinka kuli Yehova. Kisia myaka munane evi kupita, ozo nkazi waasukile kupitila mukanda ni kulanda evi: “Ata sie kine te umanine, ntonene kukubwila nangue wewe waakinkwasia sana mu ezi myaka ingi yaakipita.” Wene, waatwaliliile kulanda evi: “Milandu iwaalembele yaali yasansamusiizie sana, kabili nsikalabapo lelia lilembo liwaazimbwile.” a Kisia kulondolwela maavia paleepale aasaakeene nao, ozo nkazi waalandile evi: “Nsita inge mbanga nasyatonene sie kulekela kila kintu, ni kulekela kumubombela Yehova. Inzi lyonse naali nalanguluka lelia lilembo liwaandembeele, kabili lyaali lyampeela maka a kusyala nali wa kisinka.” Wene, waaongeziizie kulanda evi: “Mu ezio myaka yonse munane, te kuli kintu kinge kyaankoseleziizie nga olia mukanda uwaandembeele pamo ni lilembo liwaabombiizie.” Ezia kutontonkania nsansa yaaunvwile muka kangalila lwaapatile ozo mukanda wa kutasia, “kisia nsiku ingi” kupita! Ni fwefue, lutuli twabakitila bange bintu biweme, pange kunti batutasia kisia musita walepele kupitapo.

21. Juu ya ki wewe upingwile kutwalilila kupala mibele yakue Yehova ya kupeelana?

²¹ Nga vitwamonanga, Yehova waatubumbile twali ni buvinde bwibeleele. Ata sie kine tuli twasekelela musita utuli twapeelua kintu, tuli twapata nsansa ikata musita utuli twabapeela bange bintu. Kabili tuli twaunvua bwino kine tuli ni buvinde bwa kubakwasia ba lupua ni ba nkazi netu. Kukila pa kako, tuli twasekelela musita ubali batasia. Inzi, ibe olia utwapeelanga kintu watasia ao abe, tupalile kusansamuka pantu twakitanga kintu kiweme. Te kulaba nangue “Yehova ali ni buvinde bwa kukupeela bingi sana,” kupita ni belia byonse byuli kupeelana. (2 Mil Nsi. 25:9) Pa kako, Yehova wakaba kukupaala kupitila kukupeela bintu bingi bikililepo! Kabili mpaalo ili yafuma kuli Yehova, yene ili yasangua yaweme sana. Kansi, tuye twapingwile kutwalilila kumupala Baba wetu wa ku muulu, olia ali wapeelana.