Te kuli nsambu ata imo ili kutulengia tutontonkanie nangue baalia basambi 70, baamusiile ao baatyokele mutima pantu sie te babanga balipo musita Yesu lwaatendekeziizie Kyakulia kya Lyungulo Kyakue Mulopue. Yesu waatonene sie kuya wali pamo ni batumua bakue pa ozo musita.

Yesu abanga wabetabiile baalia batumua 12 ni baalia basambi 70. Yesu waasaakwilenke balalume 12, kufuma mu basambi bakue bengi. Babo balalume waabakuutile nangue, batumua. (Luk. 6:12-16) Abanga wali mu Galilaya musita ‘lwaabakuutile basambi likumi na babili’ ni ‘kubatuma kuya kusimikila Bukolo Bwakue Leeza ni kukosia balwele.’ (Luk. 9:1-6) Kisia musita kupita, Yesu lwabanga wali mu Yudea, “waasaakwile basambi bange 70 ni kubatuma babili-babili.” (Luk. 9:51; 10:1, NWT) Pa kako, Yesu abanga wali ni basambi mu fwasi paleepale baalia babanga basimikila palwakue.

Kipalile Bayuda baalia baalukile basambi bakue Yesu, baali bakitwaliliile sie kuya bakita Pasaka kila mwaka, pange bali pamo ni lupua lwabo. (Kut. 12:6-11, 17-20) Musita Yesu lwaali wasyali pepi ni kufua, wene pamo ni batumua bakue baaile ku Yerusalemu. Inzi, taakuutile basambi bakue bonse, i kulanda, ba ku Yudea, ku Galilaya, pamo ni ba ku Perea. Kimonekele paswetele nangue Yesu waatonene kuya wali pamo ni batumua bakue mu kekio kipindi. Wene waabalandile evi: “Nakiba natonene sana kulia bilio bya Pasaka pamo ni mwemue pansinatendeke kwemiiwa.”—Luk. 22:15.

Yesu abanga wali ni nsambu iweme ya kukita evio. Kubanga kwasyele sie musita unini wene afue nga “Mwana-mukooko wakue Leeza ali wafumia bibalo bya bantu.” (Yoan. 1:29) Waali wapalile kufwila mu Yerusalemu. Momo, i mubanga mwafumiizia bantu ngeleelo kuli Leeza tangia kale. Mwana-mukooko wa ku Pasaka, waali wabalangulusia Baisraeli nangue Yehova waabakombwele kufuma mu Misri. Inzi, kupitila ngeleelo yakue, Yesu wene wakakita bintu bingi bikilile papo. Wakalengia bantu bonse baaluke uru kufuma mu lizambi ni lufu. (1 Bakor. 5:7, 8) Kelia kyaakitile Yesu, kyaalengiizie baalia batumua likumi na babili baaluke musinzi wa kilonghaano kya Kikristu. (Baef. 2:20-22) Kya nsansa, muzi utakatifu wa Yerusalemu ubanga wali ni “mabue likumi na abili a musinzi.” Pa azo mabue, pabanga palembelue “meena likumi na abili a batumua likumi na babili bakue Mwana-mukooko.” (Nfy. 21:10-14, NWT) Kakiine, babo batumua ba kisinka i babanga bali ni semu ya mana sana mu kufikiliziiwa kwa mupango wakue Leeza. Pa kako, twainika kelia kyaalengiizie Yesu atone kuya wali pamo nabo evi kukita ezio Pasaka ya kupeleezia, ni penka palia kukita kintu kinge, i kulanda, Kyakulia kya Lyungulo Kyakue Mulopue.

Baalia basambi 70 pamo ni basambi bange, te babanga bali pamo ni Yesu musita wa kekio kyakulia. Inzi, basambi bonse baalia babanga bali ba kisinka, baanonkeelemo mu kelia kyaatendekeziizie Yesu, i kulanda, mu Kyakulia kya Lyungulo Kyakue Mulopue. Basambi bonse, baalia baafikiile kwaluka Bakristu babiikilue mafuta, baaingiile mu bulayo bwa bukolo, bolia bwaalandile Yesu ku batumua bakue mu kekio kyungulo.—Luk. 22:29, 30.