LYASI LYA KUSAMBILILA LYA 43
LWIMBO 90 Tukoseleziane
Wewe, Kunti Wakita Syani Kine Uli ni Masyaka?
“Sininkizie bintu byonse.”—1 BAT. 5:21, NWT.
KIKATA KIINE
Tuli kumona vya kupwisia masyka alia ali kulengia pange te kunti tumubombele bwino Yehova.
1-2. (a) Babombi bakue Yehova kunti baiipuzia bipuzio ki? (b) Tuli kumona ki mu leli lyasi?
NSITA inge, fwe bonse, tuye twali banike ao bakulu, tuli twaaluka ni masyaka. a Kwa mufuano, tontonkania Kasininkizia, olia akili mulumendo, ali mukwiipuzia kine kakiine Yehova ali wamwemena. Kekio kunti kyalengia amone nangue pange taali wapalile kubatiziiwa. Mufuano unge ni ozu, musita lwakili mulumendo, lupua umo wasaakula kubiika pa fwasi ya kwanza miilo yakue Yehova kuliko kukeba sana bunonsi. Kisia kwaluka mukulu, wainika nangue akwete sie makuta a kukwasia bantu ba mu lupua lwakue mu belia bibakabiile. Pange ozo muntu kunti waiipuzia kine bolia bupinguzi bwaakwete ku bulumendo bubanga bwali sie bwino. Mufuano wa kupeleezia ni ozu, tontonkania palua nkazi umo akulile, olia asili kabili na maka engi. Pange ozo nkazi kunti watyoka mutima pantu takili na buvinde bwa kukita belia byabanga wakita lwa kale. Eba, wewe waaiipuziizie kale bebi bipuzio: ‘Yehova ali wangemena kakiine? Eba, kwipeela kwane pa lwakue Yehova ni kwa mana kakiine? Eba, kuli ni bintu binge bindi kuvinda kumukitila Yehova.’
2 Kine tetwizi kwikwinda kukeba byasuko bya bebio bipuzio, kunti twalekela kumuswapila Yehova, pange ni kulekela kumubombela. Mu leli lyasi, tuli kumona mafunde a Bibilia viali kutukwasia kine tuli twatontonkania nangue (1) Yehova tezi kutwemena, (2) nangue bupinguzi butwaakwete lwa kale te bubanga bwaweme, ao (3) nangue te tukili na bintu bya kumukitila Yehova.
KUNTI TWAKITA SYANI KINE TULI NI MASYAKA?
3. Ni nzila ki imo ili kuvinda kutukwasia kupwisia masyaka etu?
3 Nzila imo ya kutukwasia kupwisia masyaka atuli nao ni ezi: kukeba byasuko bya bipuzio byetu mu Bibilia. Kine twakita evio, kiketekelo kyetu kyakaba kuluma, twakaba kukula kimupasi, kabili twakaba kuvinda ‘kwimana sinta mu kiketekelo.’—1 Bakor. 16:13.
4. Kunti ‘twasininkizia syani bintu byonse”? (1 Batesalonika 5:21)
4 Soma 1 Batesalonika 5:21. Languluka nangue Bibilia ili yatulanda evi: “Sininkizie bintu byonse.” Kunti twakita syani evio? Kine tuli ni masyaka palua kintu kimo kituzumiine, tupalile kutoosia mu Bibilia evi kumona viili yalanda palua kekio kintu. Kwa mufuano, tontonkania palua musepuka umo olia ali mukwiipuzia kine Leeza ali wamwemena kakiine. Eba, apalile kwikala sie bila kukeba kyasuko kya kekio kipuzio? Ata, apalile ‘kusininkizia bintu byonse’ kupitila kukeba mawazo akue Yehova palua kekio kintu.
5. Tuli ‘twaunvua’ byasuko byakue Yehova ku bipuzio byetu mu nzila ki?
5 Musita utuli twasoma Mulandu Wakue Yehova Leeza, kili nga evelia fwe bali ‘baunvua’ wene wali mukutulanzia. Inzi, pa kunti tumane bwino mawazo akue palua kipuzio kituli nakio, kuli ni bintu binge bitupalile kukita. Tupalile kusoma Malembo alia ali kwasuka kipuzio kyetu. Tupalile kukebulula mpunda palua kekio kipuzio mu mpapulo yetu. (Tus Maf. 2:3-6) Tupalile kumulomba Yehova atutungulule musita wa kukebulula, kabili atukwasie tupate kyasuko kya kipuzio kyetu. Kisia, tupalile kukeba mafunde a Bibilia ni mpunda inge ya mana ya kutukwasia mu aali yetu. Kabili, kunti kyawama kusoma mpunda ili mu Bibilia palua bantu baalia baaisangile mu aali ipaleene ni yetu.
6. Kulonghaana kuli kwatukwasia syani kupwisia masyaka etu?
6 Kabili, musita utuli twasambilila Bibilia ku kulonghaana, kili nga evelia fwe bali ‘baunvua’ Yehova wali mukutulanzia. Kine tuli twalonghaana lyonse, kunti twaunvua muntu umo walanda mu lyasi ao mu kyasuko kyakue kintu kimo kitukabiile kakiine evi kupwisia masyaka etu. (Tus Maf. 27:17) Ale tumone vya kupwisia masyaka atuli nao palua bintu paleepale.
KINE ULI WATONTONKANIA NANGUE PANGE YEHOVA TEZI KUKWEMENA
7. Bange kunti baiipuzia kipuzio ki?
7 Eba, wewe waiipuziizie kale evi: ‘Eba, Yehova ali wangemena kakiine?’ Kine we mwine waimona nangue te uli wa mana, kunti watendeka kutontonkania nangue teuvinda kwaluka rafiki wakue Kabumba wa myulu ni kyalo. Pange ni Likolo Daudi i vyaatontonkaniizie. Wene waapapile sana kumona nangue Yehova ali waemena ata sie bantu. Pa kako waaipuziizie evi: “We Yehova, muntu ni kiki evi uye wamumwene, mwana mwina muntu olia ali wafua evi wewe uye wamupozeleko mano?” (Malum. 144:3) Wewe kunti wapata pi kyasuko kya keki kipuzio?
8. Kukonkana ni lilembo lya 1 Samweli 16:6, 7, 10-12, Yehova ali wamona ki mu bantu?
8 Bibilia ili yatusambilizia nangue Yehova ali wabamona baalia bali bamonua na bange kusia basili ba mana. Kwa mufuano, Yehova waamutumine Samweli ku nsesi yakue Yese evi amubiike mafuta mwana umo pakati ka baana bakue balalume evi akabe kwalula likolo mu Israeli. Pakati ka baana bakue munane, Yese waakutilepo baana saba, inzi taamukuutile Daudi, olia abanga wali mwanike sana pa bonse. b Inzi, Daudi i waasaakwilue na Yehova. (Soma 1 Samweli 16:6, 7, 10-12.) Yehova waamwene bwino bumuntu bwa mukati bwakue Daudi. Wene abanga wamanine nangue olia mulumendo abanga wamutonene sana.
9. Juu ya ki kunti wasininkizia nangue Yehova ali wakwemena? (Mona ni foto.)
9 Tontonkania palua bintu byaakitile kale Yehova evi kulangilila nangue akumwene. Ali wakupeela masoke aweme sana a kukukwasia mu aali yobe. (Malum. 32:8) Kekio kilangiliile nangue akumanine bwino. (Malum. 139:1) Kine wewe wabombia masoke akue Yehova ni kumona viali akukwasia, wakaba kusininkizia nangue Yehova ali wakwemena. (1 Mil Nsi. 28:9; Miil Bat. 17:26, 27) Yehova ali wamona wewe vyuli waikwinda kumubombela ni kumukindika. Kabili, wene ali wamona mibele yobe iweme. Kukila pa kako, atonene kwaluka Rafiki obe. (Yer. 17:10) Atonene ni wewe witabile kwaluka rafiki wakue.—1 Yoan. 4:19.
“Kine wewe wamukeba [Yehova], wene wakaba kwilekelela evi ukabe kumupata.”—1 Mil Nsi. 28:9 (Mona lifungu lya 9) c
KINE ULI WATONTONKANIA NANGUE PANGE BUPINGUZI BUWAAKWETE TE BUBANGA BWAWEME
10. Kine twatontonkania palua bupinguzi butwaakwete lwa kale, kunti twaiipuzia bipuzio ki?
10 Nsita inge mu bwikazi, bange kunti batendeka kutontonkania nangue bupinguzi bubaakwete lwa kale te bubanga bwaweme. Pange baapingwile kulekela miilo iweme, kabili ya kubakwasia kupata nfalanga ingi, ao pange baapingwile kusitendekezia busulu bumo evi bamubombele sana Yehova. Pange tekusyapitile myaka ingi tangia lubaapingwile evio. Pange kunti bamona benabo, baalia baakwete bupinguzi bupusene ni bwabo, bali ni bunonsi ni bwikazi bwaweme. Kekio kunti kyalengia batendeke kwiipuzia evi: ‘Eba, kwipeela kwane pa lwakue Yehova kubanga kwali kwa mana kakiine? Ao koko kwipeela kwaalengiizie mpusue bintu binge?’
11. Juu ya ki kalemba wa Malumbo a 73 waali waema?
11 Kine wewe waaiipuziizie kale bipuzio bya evio, mona vyaaiunvwile kalemba wa Malumbo a 73. Wene waamwene bantu basibanga bamubombela Yehova bali ni bukose bwaweme, bali ni bunonsi, kabili bamwenekele kusia basili na bwavia ata bumo. (Malum. 73:3-5, 12) Lwaamwene bwikazi bwabo bwamwenekele kusia buli bwino sana, waatendekele kutontonkania nangue kumubombela Yehova kubanga kwali kwa mpuni. Pantu abanga watontonkania evio, ‘waali waema koba konse.’ (Malum. 73:13, 14) Pa kako, waakitile syani evi alekele kwema?
12. Nga vilandile Malumbo 73:16-18, kalemba wa malumbo waakitile syani evi alekele kwema?
12 Soma Malumbo 73:16-18. Ozo kalemba wa Malumbo, waaile pa fwasi itakatifu yakue Yehova. Kusangua papo, kwamukwasiizie atendeke kutontonkania bwino. Waainikile nangue, ata sie kine bange babanga bali ni bwikazi buweme, te babanga bali na kiswapilo palua musita uli waiza. Pa kako, waalukile ni mutende mu mano, kabili waasininkiziizie nangue kumubiika Yehova pa ntanzi mu bwikazi, i bupinguzi bubanga bwaweme sana. Kupwako, waapingwile kutwalilila kumubombela Yehova.—Malum. 73:23-28.
13. Wewe kunti wakita syani evi waaluke ni mutende mu mano kine uli mukutontonkania nangue bupinguzi buwaakwete lwa kale te bubanga bwaweme? (Mona ni foto.)
13 Nga evelia vyaakitile kalemba wa Malumbo, ni wewe kunti waaluka ni mutende mu mano kupitila kukwasiiwa na Mulandu Wakue Leeza. Upalile kukita syani? Languluka bintu biweme byuli nabio, kubiika mukati bunonsi bwa ku muulu buuli nabo. Kabili, languluka nangue baalia basizi kumubombela Yehova tebezi kukwasiiwa na wene. Kuya bali ni miilo ni bwikazi buweme i bintu bya mana sana mu bwikazi bwabo pantu te bali na kiswapilo palua musita uli waiza. Inzi, Yehova alaile kukupeela wewe mpaalo ingi sana musita uli waiza. (Malum. 145:16) Kabili, tontonkania palua keki kintu kyusimanine bwino: Eba, bwikazi bobe nga buli syani lonu kabenge te waakwete bupinguzi bwa kumubombela Yehova? Inzi, kisinka kyumanine bwino ni keki: Kine muntu wakwata bupinguzi pantu amutonene Yehova pamo ni bantu bange, lyonse ali wapata bintu bya kulengia aaluke ni nsansa sana mu bwikazi.
Uye watontonkania lingi palua bintu biweme byakakukitila Yehova musita uli waiza (Mona lifungu lya 13) d
KINE ULI WATONTONKANIA NANGUE TE UKILI NA BINTU BYA KUMUKITILA YEHOVA
14. Juu ya ki bange bali baimona nangue te ba mana, kabili kunti baiipuzia kipuzio ki?
14 Babombi bange bakue Yehova bali baandua kukita byonse bibatonene mu miilo yakue pantu bakote, bali mukulwisia malwele abo, ao pantu bali ni butope. Kekio kunti kyalengia batontonkanie nangue Yehova tabamwene kuya bali ba mana. Pange kunti baiipuzia evi: ‘Eba kuli ni bintu bindi kuvinda kumukitila Yehova?’
15. Kalemba wa Malumbo a 71 abanga wasininkiziizie ki?
15 Kalemba wa Malumbo a 71 ni wene abanga watontonkania evio vyenka. Waapepele evi: “Te kunsia musita maka ane lwali mukupua.” (Malum. 71:9, 18) Inzi, ozo kalemba wa Malumbo abanga wasininkiziizie nangue kine watwalilila kumubombela Yehova mu bukisinka, wene wakaba kumutungulula ni kumukwasia. Ozo kalemba wa Malumbo waasambiliile nangue Yehova ali wabatona baalia bali baikwinda sana evi kumubombela, anzia kine te bali na buvinde bwa kukita byonse bibatonene mu miilo yakue.—Malum. 37:23-25.
16. Bantu bakotele ni ba mana kuli Yehova mu nzila ki? (Malum 92:12-15)
16 Kine ni wewe teusyakotele, tontonkania Yehova vyali wakumona. Wene kunti wakukwasia evi uvinde kumubombela wali wa kisinka ata sie kine te uli na buvinde bwa kukita byonse byutonene. (Soma Malumbo 92:12-15.) Kuliko kupoza mano ku bintu byusili na buvinde bwa kukita, tontonkania palua bintu byuli kuvinda kukita. Kwa mufuano, kunti walumia kiketekelo kya bange kupitila mufuano obe wa bukisinka ni kupitila kubapozako mano. Kunti wababwila bange Yehova vyaakukwasiizie mu myaka ingi, kabili kunti wababwila palua bulayo buli mu Bibilia bolia buuswapiile sana nangue bwakaba kufikiliziiwa. Kabili, te kulaba ata kanini nangue mapepo obe palua bange ni a mana sana. (1 Pet. 3:12) Ata sie kine tuli mu aali ki, fwe bonse tuli ni kintu kya kumupeela Yehova pamo ni bange.
17. Juu ya ki te tupalile kuya twaipalania na bange?
17 Kine wewe uli mukwema pantu te uli na buvinde bwa kukita bingi mu miilo yakue Yehova, uye wasininkiziizie nangue wene ali wamona kila kintu kyuli wakita kuya kyali kya mana. Pange wewe kunti watendeka kupalania belia byuli wakita na belia bili byakita bange. Kulanda kisinka, te bwino kukita evio! Juu ya ki? Pantu Yehova tezi kukita evio. (Bag. 6:4) Kwa mufuano, Maria waamupeele Yesu mafuta ali anunkila bwino, kabili a bei sana. (Yoan. 12:3-5) Inzi, olia mukanfwilua, kabili mupabi, wene waafumiizie bingolongolo bibili binini mu ekalu, i kulanda nfalanga inini sana. (Luk. 21:1-4) Kya kupapia, Yesu waamwene nangue babo banakazi bonse babili, baalangiliile kiketekelo, taabapalaniizie. Evio vyenka i vili vyakita ni Yehova, Baba wakue. Kakiine, wene ali wamona kintu kyonse kelia kyuli wamukitila wasonseziiziwe na kiketekelo ni ntono, kuya kyali kya mana, ata sie kine wewe umwene kyakepele sana.
18. Ni kiki kyakaba kutukwasia kupwisia masyaka etu? (Mona ni kisanduku kilandile, “ Mulandu Wakue Yehova Kunti Wakukwasia Kupwisia Masyaka.”)
18 Nsita imo, fwe bonse tuli twaaluka ni masyaka. Inzi, nga vitwamona, Mulandu Wakue Leeza kunti watukwasia kuapwisia. Pa kako, uye waikwinda kupwisia masyaka ao kukeba byasuko bya bipuzio belia bili byakwemia. Kukita evio kuli kukukwasia uye wali ni kiswapilo kuliko kuya waema. Kulanda kisinka, Yehova akumanine wewe bwino sana. Ali wamona kwipeela kobe pa lwakue kuya kwali kwa mana sana, kabili uye waswapiile nangue wakakupeela kilambu. Uye wasininkiziizie nangue Yehova abatonene babombi bakue bonse ba kisinka, kabili ali wabemena.
LWIMBO 111 Bintu Bili Byalengia Tuye Twali Ni Nsansa
a MULANDU ULONDOLWELUE: Mu leli lyasi, tuli mukulondolwela palua masyaka alia ali alengia twimone nangue te tuli ba mana kuli Yehova, ao ali alengia tutontonkanie nangue pange bupinguzi butwaakwete lwa kale, te bubanga bwaweme. Aza te masyaka alia ali alandua mu Bibilia, alia ali alangilila nangue muntu tamuswapiile Yehova pamo ni bulayo bwakue.
b Ata sie kine Bibilia te ilandile kine Daudi abanga wali na myaka inga musita Yehova lwaamusaakwile, kimwenekele nangue pange abanga wakili sie mulumendo.—Mona Lupungu Lwakue Kamwenenena lwa pa busiku 01, Mwezi wa 09/2011, lubali lwa. 29, lifu. 2.
c BULONDOLOZI BWA FOTO: Kasininkizia umo mulumendo ali mukumukeba Yehova kupitila kusoma Malembo evi apate masoke ali kumukwasia mu aali yakue.
d BULONDOLOZI BWA FOTO: Musita lupua umo lwali mukubomba miilo ya kusamba dirisia evi bamulipe makuta a kukwasia bantu ba mu lupua lwakue, ali mukutontonkania bwikazi vibwakaba mu Paradiso.
