LYASI LYA KUSAMBILILA LYA 40
LWIMBO 30 Leeza Wane, Mwinane ni Baba Wane
Yehova “Ali Wabakosia Baalia Batyokele Mutima”
“Ali wabakosia baalia batyokele mutima; ali wapambilila bilonda byabo.”—MALUM. 147:3.
KIKATA KIINE
Yehova ali wabemena sana baalia batyokele mutima. Mu leli lyasi, tuli kumona vyali watuteekia mutima ni kutukwasia evi ni fwefue tubateekie bange mutima.
1. Yehova ali waunvua syani palua babombi bakue?
YEHOVA ali wamona ki musita lwali wabakenta babombi bakue panu pa kyalo? Amanine bintu bili byatuletela nsansa, pamo ni belia bili byatuletela bulanda. (Malum. 37:18) Ali waunvua sana makola lwali watumona fwefue twamubombela kwa mute ata sie kine tuli ni bulanda! Kukila pa kako, ali watona sana kutukwasia ni kututeekia mutima.
2. Yehova ali wamukitila ki muntu atyokele mutima, kabili kunti twakita syani evi tunonkelemo musita lwali watwemena?
2 Lilembo lya Malumbo 147:3, lili lyalanda nangue Yehova ‘ali wapambilila bilonda’ bya baalia batyokele mutima. Leli lilembo lilangiliile bwino nangue Yehova ali wabemena baalia bali ni bulanda. Ale tupalile kukita ki evi tunonkelemo musita Yehova lwali watwemena? Tontonkania palua ozu mufuano. Doktere, olia ali ni bufundi, kunti waikwinda sana evi kumukwasia muntu olia ali ni kilonda akose. Inzi, pa kunti ozo muntu akose, apalile kukonka wapozeleko mano malaizio akue doktere. Mu leli lyasi, tuli kumona Yehova vyalandile mu Mulandu wakue ku baalia batyokele mutima, kabili tuli kumona vya kubombia masoke a ntono.
YEHOVA ATUMWENE KUYA TWALI BA MANA SANA
3. Juu ya ki bange bali baimona kuya bali ba bule-bule?
3 Mu kenu kyalo, bantu bengi te bali na ntono. Kya bulanda, kekio kili kyalengia bange bemone nangue te ba mana. Nkazi Helen a walanda evi: “Bavyazi bane te babanga bali na ntono. Baba wane abanga wali ni mutima wabipile. Kabili kila busiku, abanga wangana nangue ndi wa bule-bule.” Nga Helen, pange ni wewe waakitiilue kale mu nzila isili ya nsambu, kutukua, ni kulengiiwa wimone nangue uli wa bule-bule. Kine i evio, pange kunti wamona nangue te kuli muntu ata umo ali wakwemena kakiine.
4. Kukonkana ni lilembo lya Malumbo 34:18, Yehova watusininkiziizia ki?
4 Ata sie kine bange bakukitila mu nzila isili ya nsambu, uye wasininkiziizie nangue Yehova akutonene, kabili akumwene kuya wali wa mana. Wene “ali pepi ni baalia bali ni mitima ili ni bulanda.” (Soma Malumbo 34:18.) Kine wewe ‘usansikile mupasi,’ languluka nangue Yehova waamwene bintu biweme mu mutima obe, kabili ye mwine i waakukuliile kuli wene. (Yoan 6:44) Wene wakaba wakukwasia lyonse pantu akutonene sana.
5. Kunti twasambilila ki kupitila Yesu vyaabakitiile baalia babanga bamwenue nangue ni ba bule-bule?
5 Kunti twamana Yehova vyali waiunvua kupitila kusambilila mufuano wakue Yesu. Lwabanga panu pa kyalo, Yesu waabonvwiliile nkumbu baalia babanga bamwenue nangue ni ba bule-bule. (Mat. 9:9-12) Musita mwanakazi umo, olia banga waemiiwa na bulwele bumo bubipile lwaakumiizie ku ngubo yakue Yesu, ni koku waswapiile nangue ali kukosa, Yesu waamuteekiizie mutima ni kumutasia palua kiketekelo kyakue. (Mark. 5:25-34) Yesu ali walangilila mu nzila ipwililikile bumuntu bwakue Baba wakue. (Yoan. 14:9) Pa kako, uye wasininkiziizie nangue Yehova akutonene, kabili ali wamona mibele yobe iweme, kubiika mukati kiketekelo kyobe pamo ni ntono yobe kuli wene.
6. Wewe kunti wakita syani kine uli waimona nangue uli wa bule-bule?
6 Wewe kunti wakita syani kine utwaliliile sie kwimona kuya wali wa bule-bule? Soma malembo a kukusininkiziizia nangue Yehova akumwene kuya wali wa mana, kabili uye watontonkania sana palua azo malembo. b (Malum. 94:19) Kine wewe waandua kufikilizia mupango umo uuli nao, ao kine watyoka mutima pantu te uli na buvinde bwa kukita bintu nga bange, te kwimona nangue uli wa bule. Yehova takulombele ukite bintu byusili na buvinde bwa kukita. (Malum. 103:13, 14) Kine muntu umo waakuleele kwa maka lwa kale, kukukisia ao kukutyona mutima na bufue, kekio te kilubo kyobe! Languluka nangue Yehova takabapingula baalia bali bakyuziiwa, inzi wakabapingula baalia bali bakyuziana. (1 Pet. 3:12) Sandra, olia waakitiilue bintu bibipile musita lwabanga wakili mwanike, walanda evi: “Lyonse, ndi namulomba Yehova ankwasie kumona mibele iweme elia yali wamona muli nene.”
7. Aali itwaapitilemo kunti yatukwasia syani mu miilo yakue Yehova?
7 Uye wasininkiziizie lyonse nangue Yehova kunti wakubombia wewe evi kukwasia bange. Akupeele lisyuko lya kubomba nakue mu miilo ya kusimikila. (1 Bakor. 3:9) Aali ikolele elia iwaapitilemo, kunti yakukwasia kwibiika pa fwasi ya bange ni kwinika vibali mukwiunvua. Kabili, wewe kunti wakita bingi evi kubakwasia. Helen, olia utwazimbulanga, waakwasiiziwe, kabili lonu ni wene ali wavinda kubakwasia bange. Wene walanda evi: “Mbanga naimona nangue ndi wa bule-bule. Inzi, Yehova waankwasiizie ngiimone nangue ntonenue, kabili waambombiizie evi kukwasia bange.” Helen ali ni nsansa ya kumubombela Yehova wali painia wa lonse.
YEHOVA ATONENE TWITABILE KWELEELUA KUTULI TWALEELUA NA WENE
8. Yehova watusininkiziizia syani mu Isaya 1:18?
8 Bamo pakati ka babombi bakue Yehova bali baema pantu baakitile mazambi, ntanzi ao kisia kubatiziiwa. Inzi, tupalile kulanguluka nangue Yehova waapeele kilubula-mulandu pantu atutonene sana. Kulanda kisinka, atonene twitabile bupe bwakue. Yehova ali watusininkiziizia nangue kine ‘twaolola bintu’ c pamo nakue, wene ali watweleela kakiine. (Soma Isaya 1:18.) Tuli twamutasia sana Yehova, Baba wetu wa ntono, pantu ali walaba mazambi atwaakitile lwa kale! Mu wenka ozo musita, tezi kulaba ata kanini bintu biweme bituli twakita.—Malum. 103:9, 12; Baeb. 6:10.
9. Juu ya ki te tupalile kutwalilila kutontonkania palua mazambi atwaakitile lwa kale?
9 Kine wewe uli ni bulanda juu ya bintu biwaakitile lwa kale, ikwinde kupoza mano ku bintu byuli mukukita lonu, ni belia byuli ni buvinde bwa kukita musita uli waiza. Tontonkania mufuano wakue mutumua Paulo. Waaunvwile bulanda pantu waakyuziizie sana Bakristu lwa kale. Inzi, abanga wamanine nangue Yehova waamweleele. (1 Tim. 1:12-15) Eba, waatwaliliile kutontonkania palua mazambi akue a kale? Kulanda kisinka, taakitile evio. Kabili taatwaliliile kutontonkania ata sie palua bintu byaakitile evi aaluke Mufarisayo akindikilue. (Baf. 3:4-8, 13-15) Kuliko kukita evio, Paulo waatwaliliile kubomba kwa mute miilo ya kusimikila, kabili waapozele mano ku ntanzi. Nga Paulo, teuvinda kwalulula bintu byaakitikile kale. Inzi, uli ni buvinde bwa kumutasia Yehova lonu ni kumusansamusia. Kabili, uli ni buvinde bwa kutontonkania palua bintu biweme belia byalaile kutukitila mu musita uli waiza.
10. Tupalile kukita syani kine twaakibakisia bange kupitila bikitua byetu?
10 Pange wewe kunti waaluka ni bulanda pantu bintu bimo biwaakitile lwa kale byaabakisiizie bange. Kine i evio, eba, upalile kukita syani? Kita bintu bili kulengia beyunvue bwino, kubiika mukati kubalomba bakweleele. (2 Bakor. 7:11) Mulombe Yehova abakwasie baalia bawaakikisia kupitila bikitua byobe. Wene kunti wakukwasia wewe pamo ni baalia bawaakikisia evi mutwalilile kumubombela ni kwaluka ni mutende.
11. Mufuano wakue kabika Yona kunti watusambilizia ki? (Mona ni kazeeti.)
11 Sambilila kupitila bilubo biwaakitile lwa kale, kabili mulekele Yehova akubombie mwatoneene ye mwine. Tontonkania palua mufuano wakue Yona. Yehova waamwanine aye ku Ninawi. Inzi, wene waabutukiile ku fwasi inge. Yehova waamulapiziizie Yona, kabili Yona waasambiliile kupitila kilubo kyakue. (Yon. 1:1-4, 15-17; 2:7-10) Anzia evio, Yehova taalekeele kumubombia Yona mu miilo ya bukabika. Leeza waamutumine kabili ku Ninawi. Mu lolo lwendo, Yona waaitabiile kuya bila kukokola. Ata sie kine waaunvwile bulanda palua kilubo kyaakitile lwa ntanzi, taakeene miilo yaapeelue na Yehova.—Yon. 3:1-3.
Kisia kabika Yona kupusuka ku aali ikolele mu lusabi lukata sana, Yehova waamwanine kabili aye ku Ninawi ni kubwila bantu mpunda Yakue (Mona lifungu lya 11)
YEHOVA ALI WATUTEEKIA MUTIMA KUPITILA MUPASI WAKUE UTAKATIFU
12. Yehova ali watupeela syani mutende kine twapatua na kintu kibipile? (Bafilipi 4:6, 7)
12 Kupitila mupasi wakue, Yehova ali watuteekia mutima kine twapatua na kintu kimo kibipile. Tontonkania palua ba Ron ni Carol. Kya bulanda, mwana wabo waaiipaile. Balanda evi: “Kuli ni maavia ange atwaapatile lwa ntanzi, inzi bobu bwavia i bubanga bwabipile sana. Lingi, tubanga twapunga busiku. Pa kako twaapepele kuli Yehova. Kulanda kisinka, kukita evio kwaalengiizie tupate mutende olia uzimbwilue mu Bafilipi 4:6, 7.” (Soma.) Kine wewe uli ni bwavia bolia buli mukukutyona mutima, mupongwele Yehova byonse bili mu mutima obe kupitila kupepa kuli wene lingi ni nsa yonse yutonene. (Malum. 86:3; 88:1) Uye wamulomba Yehova lingi akupeele mupasi wakue.—Luk. 11:9-13.
13. Mupasi utakatifu kunti watukwasia syani kutwalilila kumubombela Yehova mu bukisinka? (Baefeso 3:16)
13 Eba, wewe waapatile kale bwezio bukata bolia bulengiizie ni lonu wiunvue kuya wanakile? Mupasi utakatifu kunti wakupeela maka a kutwalilila kumubombela Yehova mu kisinka. (Soma Baefeso 3:16.) Tontonkania palua mufuano wakue nkazi Flora. Wene pamo ni mulume wakue, babanga bali ba misyonere musita mulume wakue lwaakitile bukende, kabili baapwisiizie kyupo. Flora walanda evi: “Naaunvwile bulanda sana pantu tabanga wali kabili wa kisinka kuli nene, lyonse mbanga natontonkania sie palua kekio. Kisia, naamulombele Yehova ampeele mupasi wakue evi nvinde kusipikizia. Kya nsansa, Yehova waanteekiizie mutima. Kabili ata sie kine ku ntendeko mbanga namwene nangue nsivinda kusipikizia, kupitila kukwasiiwa na wene, naakilile kuluma, kabili naavindile kusipikizia.” Flora enikile nangue Yehova waamukwasiizie evi akile kumuswapila, kabili asininkiziizie nangue wene wakaba kumukwasia mu maavia akue onse. Flora walanda kabili nangue milandu ili mu Malumbo 119:32 ilangiliile bwino Yehova vyaamukwasiizie. Lelio lilembo, lili lyalanda evi: “Nakaba kukonka kwa mute nzila ya mafunde obe pantu uikitiile fwasi mu mutima wane.”
14. Kunti twakita syani evi mupasi wakue Leeza ubombe muli fwefue?
14 Kisia kumulomba Yehova akupeele mupasi wakue, upalile kukita ki? Upalile kukita bintu bili kulengia mupasi utakatifu ubombe muli wewe. Bebio bintu bibiikile mukati kulonghaana ni kusimikila bange. Uye wasoma Bibilia kila busiku evi mu mano obe mwizule mawazo akue Leeza. (Baf. 4:8, 9) Musita luuli waisoma, mona bantu bazimbwilue mu Bibilia baalia baapatile meezio, kabili tontonkania Yehova vyaabakwasiizie evi bavinde kusipikizia. Sandra, olia utwazimbulanga, waali waema pantu abanga wali ni maavia engi mu bwikazi. Wene walanda evi: “Lyasi lyakue Yosefu lyaanteekiizie sana mutima. Ata sie kine wene waapatile meezio, ni kukitilua bintu mu nzila isili ya nsambu, burafiki bwakue pamo ni Yehova te bwaakepele.”—Kut. 39:21-23.
YEHOVA ALI WATUTEEKIA MUTIMA KUPITILA BA LUPUA NI BA NKAZI BETU
15. Kunti twateekiiwa mutima na bani, kabili kunti batukwasia syani? (Mona ni foto.)
15 Musita utuli mukwema, ba lupua ni ba nkazi betu kunti ‘batukwasia sana.’ (Bakol. 4:11) Kulanda kisinka, Yehova ali wababombia ba lupua ni ba nkazi betu evi kulangilila nangue atutonene sana. Bene kunti batuteekia mutima kupitila kututwilizia bapozeleko mano, ao kunti batukwasia kupitila sie kuya bali pamo netu. Pange kunti batusomena lilembo lya kutukoselezia, ao kupepa pamo netu. d (Bar. 15:4) Nsita inge, lupua ao nkazi umo kunti watulangulusia mawazo akue Yehova, ni kekio kunti kyatukwasia tutwalilile kusipikizia. Kabili, ba lupua ni ba nkazi kunti batukwasia mu nzila inge, nga evelia kutuletela kyakulia musita utuli ni bulanda.
Ba rafiki baweme, baalia baswapikikile, kabili bamutonene Yehova kunti bakuteekia sana mutima ni kukukwasia (Mona lifungu lya 15)
16. Tupalile kukita ki evi bange batukwasie?
16 Nsita inge kunti kyawama kubalomba bange batukwasie. Ba lupua ni ba nkazi betu bali basangua batutonene, kabili batonene kutukwasia. (Tus Maf. 17:17) Inzi, tebavinda kumana vituli twaiunvua ni bintu bitukabiile. (Tus Maf. 14:10) Kine uli ni bulanda, landa ni ba rafiki bobe ba pepi, kabili babwile vyuli mukwiunvua. Babwile kintu kili kuvinda kukukwasia. Kunti wabwilako mukote umo ao babili baalia baumwene baleengele kulanda nabo. Ba nkazi bange bali bamona kyaweme kubwilako nkazi unge akulile kimupasi.
17. Ni aali ki ili yalengia nsita inge te kunti tukoseleziiwe, kabili kunti twalwisia syani ezio aali?
17 Uye wapisia musita pamo ni ba lupua ni ba nkazi. Nsita inge wewe kunti waema sana ni kumona nangue te kintu kya mana kupisia musita pamo ni bange. Nsita inge, ba lupua ni ba nkazi bobe kunti baandua kumana bwino viwiunvwile, ao kunti balanda milandu ya kukutyona mutima. (Yak. 3:2) Anzia evio, te upalile kubaseeluka ba lupua ni ba nkazi bobe. Yehova kunti wababombia evi kukukoselezia. Gavin, mukote wa mu kilonghaano, olia ali ni bulwele bwa kukooka mutima, walanda evi: “Lingi, nsizi kutona kulanda ao kupisia musita pamo ni ba rafiki bane.” Anzia evio, Gavin ali waikwinda kupisia musita pamo ni ba lupua bakue. Kukita evio, kuli kwamusansamusia. Nkazi Amy walanda evi: “Bintu byaampatile lwa kale bili byalengia ngie namwene kyakolele kubaswapila bantu. Inzi, ndi naikwinda kubatona ni kubaswapila ba lupua ni ba nkazi bane nga evelia Yehova vyali wakita. Manine nangue kukita evio kuli kwamusansamusia Yehova, kabili kuli kwansansamusia ni ne mwine.”
BULAYO BWAKUE YEHOVA PALUA MUSITA ULI WAIZA KUNTI BWATUTEEKIA MUTIMA
18. Ni biki byakaba kukitika musita uli waiza, kabili tupalile kukita ki lonu?
18 Lenu sie, Yehova wakaba kupwisia bintu byonse bili byatuletela bulanda ni misa yonse ituli twaunvua. (Nfy. 21:3, 4) Mu ozo musita, bintu bya kutukisia belia byaatupatile, ‘tebikeza mu mutima.’ (Is. 65:17) Nga vitwamona, Yehova ‘ali wakakilila bilonda byetu’ ata sie lonu. Kansi, nonkela mu nzila paleepale ili yabombia Yehova evi kututeekia mutima. Te kuya watontonkania ata kanini nangue wene ‘takulabukiile [ao tezi kukwemena].’—1 Pet. 5:7.
LWIMBO 7 Yehova I Maka Ane
a Meena alulwilue.
b Mona kisanduku kilandile, “ Yehova Akumwene Wewe Kuya Wali wa Mana.”
c Evi ‘toolole bintu’ pamo ni Yehova, tupalile kulangilila nangue twakilapila kupitila kumulomba wene atweleele mazambi etu ni kupitila kwalulula lwendo lwetu. Kine twakita lizambi likata, tupalile kubalomba bakote mu kilonghaano evi batukwasie.—Yak. 5:14, 15.
d Kwa mufuano, tontonkania palua malembo ali pa mutue ulandile, “Mahangaiko” ni “Kitulizo” mu kitabu, Maandiko ya Kutusaidia mu Maisha Yetu ya Kikristo.
