1-2. Ni “miilo ki iweme” ili yabomba mukote?

 KINE wewe uli mubombi ali wabombela, pange teusyaikwindile kwaluka ni mibele elia ilombelue pa kunti muntu aaluke mukote mu kilonghaano. Eba, utonene kubomba “miilo iweme” elia ili yabomba bakote?—1 Tim. 3:1.

² Eba, mukote ali wabomba miilo ki? Ali wabiika pa ntanzi miilo ya kusimikila, ali wabomba kwa mute miilo ya busungi pamo ni ya kusambilizia, kabili ali wabakoselezia ba lupua ni ba nkazi kupitila milandu ni mufuano wakue. Kuli nsambu ingi ili yalengia Bibilia ibakuute bakote baalia bali babomba kwa mute nangue, “bupe mu bantu.”—Baef. 4:8.

3. Ni biki bipalile kukita lupua evi aaluke mukote? (1 Timoteo 3:1-7; Tito 1:​5-9)

³ Wewe kunti wakita ki evi waluke mukote? Te bufundi ao buvinde buli na muntu mu miilo ya kimubili buli bwalangilila nangue apalile kwaluka mukote. Mu kenu kyalo, mukulu wa miilo kunti wakupeela miilo kine sie uli ni bufundi bolia bwali mukukeba. Inzi, kine utonene kwaluka mukote, te upalile kupeleela sie pa bufundi bobe mu kusimikila ni kusambilizia. Upalile kuya wali ni mibele ilombelue ku bakote, elia izimbwilue mu 1 Timoteo 3:1-7 ni Tito 1:5-9. (Soma.) Mu leli lyasi, tuli kulandila palua mibele ili mu azo malembo abili. Tuli kutonta sana pa bebi bintu bitatu bya mana: bintu bipalile kukita lupua evi aye wali ni sifa iweme mukati ni panze pa kilonghaano, bintu byapalile kukita evi aye wali mutue aweme wa lupua, ni bintu bya kumukwasia evi aye watonene kubombela kilonghaano.

 UYE WALI NI SIFA IWEME

4. Bulanzi, ‘te upalile kuya wali na kilubo,’ buli na mana ki?

⁴ Evi wewe waluke mukote, ‘te upalile kuya wali na kilubo,’ i kulanda, upalile kuya wali ni sifa iweme mu kilonghaano kupitila lwendo lobe luweme. Kukila pa kako, upalile kuya wali “muntu akindikilue na bantu basizumiine.” Kulanda kisinka, bantu basizumiine kunti balanda ovio palua bintu byuzumiine. Inzi, kine baaluka ni masyaka pa lobe, i kulanda, kine kuli bintu bisipalile byuli wakita, belia byalengia batendeke kwiipuzia kine kakiine wewe uli wa kisinka ao kine uli ni lwendo luweme, papo paaluka bwavia. (Dan. 6:4, 5) Iipuzie evi: ‘Eba, ndi ni sifa iweme mukati ni panze pa kilonghaano?’

5. Wewe kunti walangilila syani nangue ‘utonene biweme’?

⁵ Wewe kunti walangilila nangue ‘utonene biweme,’ kine uli wamona mibele iweme ili na bange ni kuya wabatasia palua ezio mibele. Kabili, kunti walangilila evio, kine uli wasangua ni nsansa ya kubakitila bintu biweme, ata sie belia bibasiswapiile nangue kunti wabakitila. (1 Bat. 2:8) Juu ya ki ezi mibele ni ya mana ku bakote? Pantu kine bali ni ezio mibele, bali kuya bali ni nsansa ya kubombia musita wabo evi kubasunga ni kubeemena ba lupua ni ba nkazi mu kilonghaano. (1 Pet. 5:1-3) Kulanda kisinka, nsansa ibali bapata musita ubali babombela bange, ili yasangua yali ikata sana kupita ni kwipeela kwabo.—Miil Bat. 20:35.

6. Wewe kunti walangilila mu nzila ki palepale nangue uli ‘wapokelelana’? (Baebrania 13:2, 16; mona ni foto.)

⁶ Wewe kunti walangilila nangue uli ‘wapokelelana’ kine uli wabakitila bange biweme, kubiika mukati ni baalia basili ba rafiki bobe ba pepi. (1 Pet. 4:9) Diksyonere imo ya Bibilia ili yalanda nangue muntu olia ali wapokelelana, ali wakita biweme ata sie ku bantu baasimanine, kabili ali watona kubapokelela ku nsesi yakue. Iipuzie evi, ‘eba nene manikile mu kilonghaano nangue ndi muntu ali wabapokelela baeni?’ (Soma Baebrania 13:2, 16.) Muntu olia ali wapokelelana, ali wabakitila bintu biweme baeni ba misango yonse. Kwa mufuano, wene kunti wakupa bapabi pamo ni babombi bali babomba kwa mute, nga evelia ba kangalila ni ba lupua bange bali baendela bilonghaano evi kulanda maasi.—Kut. 18:2-8; Tus Maf. 3:27; Luk. 14:13, 14; Miil Bat. 16:15; Bar. 12:13.

7. Mukote kunti walangilila syani nangue ‘tezi kutonesia nfalanga’?

 ⁷ ‘Asizi kutonesia nfalanga.’ Kekio kilangiliile nangue te upalile kutonesia bintu bya kimubili. Ata kine uli munonsi ao mupabi, upalile kubiika bintu bya Bukolo pa ntanzi mu semu yonse ya bwikazi bobe. (Mat. 6:33) Upalile kubombia musita obe, maka, pamo ni bintu binge bya kimubili evi kumupupa Yehova, kwemena bantu ba mu lupua lobe, ni kubombela kilonghaano. (Mat. 6:24; 1 Yoan. 2:15-17) Iipuzie evi: ‘Nene ndi namona syani makuta? Ndi nasangua narizikile palua bintu bya mana binkabiile mu bwikazi? Ao, eba ndi napoza sana mano ku kukeba kwaluka ni makuta ni bintu bingi sana bya kimubili?’—1 Tim. 6:6, 17-19.

8. Wewe kunti walangilila syani nangue uli ni “kiasi mu mibele” kabili nangue ‘uteekele mutima’?

⁸ Kine uli ni “kiasi mu mibele” (NWT) yobe, kabili kine ‘uteekele mutima,’ upalile kuya wali ni mawazo ateekameene mu semu yonse ya bwikazi bobe. Kwa mufuano, te upalile kuya walia ni kumina sana. Kabili, upalile kuvwala ngubo ni kuwamia misisi yobe mu nzila ya kiasi, ni kusaakula bwino misaapo. Te upalile kuya wapala mibele ya bantu basizi kumubombela Yehova. (Luk. 21:34; Yak. 4:4) Upalile kuya wateekameene ata sie kine bange bakusokozia. “Te kunti aye wali kyakolua.” Bobu bulanzi bulangiliile nangue te upalile kuya wamina sana bwalua, ao kuya wali mumini. Iipuzie evi: ‘Eba, bwikazi bwane bulangiliile nangue ndi ni kiasi mu mibele, kabili nangue nteekele mutima?’

9. Wewe kunti wainika syani muntu ‘ateekameene’ kabili ali ‘wapanga bwino bintu’?

⁹ Muntu ‘ateekameene,’ ali watoosia ni kutontonkania sana palua mafunde a Bibilia mu aali paleepale ya bwikazi bwakue. Kabili, kukita evio kupalile kumulengia aaluke ni buvinde bwa kumana ni kunvwisia sana bintu. Tezi kukwata sie bupinguzi bwa lubilo-lubilo. Kuliko kukita evio, ali wasininkizianke nangue ali ni mpunda yonse yakabiile ntanzi ya kukwata bupinguzi. (Tus Maf. 18:13) Kukita bebio byonse kuli kwamukwasia akwate bupinguzi bwa mulangue, bolia bupaleene ni mawazo akue Yehova. Muntu ali ‘wapanga bwino bintu,’ tezi kuya wali wa kinvulunghania, kabili wene ali wapua kukita bintu pa musita ulombelue. Kukila pa kako, ali wasangua waswapikikile, kabili ali wakonka butunguluzi. Kine wewe uli ni ezi mibele yonse, sifa yobe yakaba kukila kuwama. Ale tulandilenke palua mibele ili mu Bibilia, elia ipalile kuya yali na mukote evi aye wali mutue aweme wa lupua.

UYE WALI MUTUE AWEME WA LUPUA

10. Londolola vili vyakita mwalalume amanine ‘kusunga bwino lupua lwakue.’

¹⁰ Kine uli mulume, kabili kine utonene kwaluka mukote, bantu ba mu lupua lobe ni bene bapalile kuya bali ni sifa iweme. Pa kako, upalile ‘kuya wamanine kusunga [ao kwimanina] bwino lupua [lobe].” Upalile kuya wabatonene bantu ba mu lupua lobe ni kuya wakwata bupinguzi bupalile pa lwabo. Kukita evio kubiikile mu kati kutungulula lupupo lwa mu lupua, kubakwasia bantu ba mu lupua lobe evi baye basangua lyonse ku kulonghaana, ni mu kusimikila. Juu ya ki kukita evio ni kwa mana? Mutumua Paulo waaipuziizie evi: “Pantu kine muntu tamanine vya kusunga [ao kwimanina] lupua lwakue, ale kunti wasunga syani kilonghaano kyakue Leeza?”—1 Tim. 3:5.

11-12. Juu ya ki lwendo lwa bantu ba mu lupua lwakue mukote ao mubombi ali wabombela lupalile kuya lwaweme? (Mona ni foto.)

¹¹ Kine wewe uli baba, baana bobe baalia bali ni myaka isinafike 18, baalia bakili pensina pa butunguluzi bobe, bapalile kuya “banakila ni kutwama bintu bafiniizie kakiine.” Upalile kubasambilizia ni kubabelezia kwa ntono. Kulanda kisinka, nga evelia sie baana bange, ni bene bapalile kuya baseka ni kusaapa. Inzi, kine wababelezia bwino, bakaba kuya bakunakila, kukukindika, ni kuya bali ni lwendo luweme. Kabili, upalile kukita maka obe onse evi kubakwasia baana bobe kukosia burafiki bwabo pamo ni Yehova, kukonka mafunde ali mu Bibilia, ni kufikiila kubatiziiwa.

 ¹² ‘Baana bakue baye bali bazumizi, mibele ibipile ao ya butaale te kunti byunvwike pakati kabo.’ Ale kine mukote ao mubombi ali wabombela ali ni mwana, olia ali pepi ni kubatiziiwa ao olia waabatiziiziwe kale, kisia ozo mwana wakita lizambi likata, kili kwaluka syani? Kine ozo baba taamubeleziizie bwino mwana wakue, pange kunti wazeziziapo miilo yakue mu kilonghaano.—Mona Lupungu Lwakue Kamwenenena lwa pa nsiku 15, Mwezi wa 10, 1996, lubali lwa 21, lifu. 6-7.

UYE WABOMBELA KILONGHAANO

13. Mukote, kunti walangilila syani nangue “aleengele kwaluluka,” kabili nangue ‘tali na kiitoni’?

¹³ Ba lupua baalia bali ni mibele iweme ya Kikristu, ni ba mana sana mu kilonghaano. Muntu olia “aleengele kwaluluka,” ali waleta mutende, ali wabatwilizia bange, kabili ali waitabizia mawazo abo. Iipuzie evi: Ale kine bakote bengi baitabiziana bupinguzi bumo, kabili kine te pali sheria ao lifunde ata limo lyatyonua, eba ni nene ndi kubwitabizia ata sie kine bupusene ni bwane? Bulanzi, ‘tapalile kuya wali na kiitoni’ bulangiliile nangue mukote tapalile kubapatikizia bange bakonke mawazo akue. Apalile kuya watwilizia ni mawazo a bange. (Kut. 13:8, 9; Tus Maf. 15:22) “Te kunti aye wali na mazibo” ao “kulenga kufiitua.” Kekio kilangiliile nangue tapalile kuya wababisia-bisia bange, inzi apalile kubakindika ni kubakitila bintu biweme. Muntu wa mutende ali wasangua wali wa kwanza kukita mutende ata sie mu aali ikolele sana. (Yak. 3:17, 18) Kine ali walanda mu nzila iweme, kekio kunti kyalengia bange bateekamane, ata sie baalia bali batupinga.—Bap. 8:1-3; Tus Maf. 20:3; 25:15; Mat. 5:23, 24.

14. Bulanzi, “tapalile kuya wali muntu waakizumina bulenu” ni bulanzi, “alamatiliile” buli na mana ki?

¹⁴ Mukote “tapalile kuya wali muntu waakizumina bulenu.” Kekio te kilangiliile nangue upalile kukita myaka ingi sana kisia kubatiziiwa, inzi upalile kuya wakosele kimupasi. Ntanzi ya kwaluka mukote, upalile kulangilila nga Yesu nangue wikeefiizie. Kabili, ata sie kine wakokola bila wapeelua miilo inge mu kilonghaano, te kwema, mupembelele sie Yehova akabe kukupeela ezio miilo pa musita upalile. (Mat. 20:23; Baf. 2:5-8) Wewe kunti wailangilila  kuya wali muntu “alamatiliile” kine uli wa kisinka kuli Yehova ni ku mafunde akue, pamo ni kukonka butunguluzi butuli twapata kupitila kuteania kwakue.—1 Tim. 4:15.

15. Eba, ilombele mukote aye walanda bwino sana maasi a bantu bonse? Londolola.

¹⁵ Malembo ali alanda paswetele nangue kangalila apalile “kuya wamanine kusambilizia bwino.” Eba, kekio kilangiliile nangue upalile kuya walanda bwino sana maasi a bantu bonse? Ata, te evio. Kulanda kisinka, te bakote bonse bali balanda maasi aweme sana. Anzia evio, musita ubali basimikila ni kukita miilo ya busungi, bapalile kuya babombia bwino Bibilia evi kusambilizia ni kubakoselezia ba lupua ni ba nkazi. (palania ni 1 Bakorinto 12:28, 29 ni Baefeso 4:11.) Inzi, ata sie kine tewizi kulanda bwino sana maasi a bantu bonse, upalile kutwalilila kukita maka evi waluke mwalimu ali ni bufundi. Ni kiki kili kukukwasia?

16. Wewe kunti wakita syani evi waluke mwalimu ali ni bufundi? (Mona ni foto.)

¹⁶ Uye “waisimpile sana mu mpunda ya kisinka.” Kine utonene kwaluka mwalimu ali ni bufundi, bintu byuli wasambilizia ntanzi ya bantu bengi ni masoke auli wabapeela ba lupua ni ba nkazi kwa bunke, bipalile kuya byapateene ni Mulandu Wakue Leeza. Evi uvinde kukita evio, upalile kuya wasambilila sana Bibilia pamo ni mpapulo yetu. (Tus Maf. 15:28; 16:23) Musita uuli wasambilila, ikwinde kwinika mpapulo yetu viilondolwele Malembo evi umane vya kuambombia. Kabili, musita uuli mukusambilizia, uye waikwinda kukumia ku mutima wa baalia bakutwiliziizie. Kunti waaluka mwalimu ali ni bufundi kine uli wabalomba bakote baalia bali ni kibelezio bakukwasie, kabili kine uli wabombia masoke abali bakupeela. (1 Tim. 5:17) Bakote bapalile kuya bali ni “buvinde bwa kukoselezia” ba lupua ni ba nkazi babo; inzi nsita inge bapalile kubasoka ao ata sie “kubasasilila.” Anzia evio, bakote bapalile kukita bebio byonse mu nzila ya buwame. Kine wewe uli ni buwame ni ntono, kabili kine masambilizio obe ali asangua apateene ni Mulandu Wakue Leeza, wakaba kwaluka mwalimu ali ni bufundi pantu wakaba wamupala Yesu, Kasambilizia Mukulu.—Mat. 11:28-30; 2 Tim. 2:24.

 TWALILILA KWIKWINDA

17. (a) Mubombi ali wabombela kunti wakita syani evi atwalilile kwikwinda evi kwaluka mukote? (b) Ni kiki kipalile kulanguluka bakote musita ubali mukutoosia kine lupua kunti waaluka mukote ao abe? (Mona kisanduku kilandile, “ Muye Mwali ni Kiasi Musita Umuli Mukutoosia Kine Lupua Kunti Waaluka Mukote ao Abe.”)

¹⁷ Kisia kumona nangue kuli mibele ingi ilombelue evi lupua aaluke mukote, babombi bange bali babombela, kunti batontonkania nangue tebavinda ata kanini kwaluka bakote. Inzi, tupalile kulanguluka nangue Yehova ao kuteania kwakue te bakebele wewe ulangiliile ezi mibele mu nzila ipwililikile. (1 Pet. 2:21) Kabili, mana nangue, mupasi wakue Yehova olia uli ni buvinde, i uli kukukwasia kwaluka ni ezio mibele. (Baf. 2:13) Eba, wewe umwene nangue kuli ni mibele elia yupalile kukila kuwamia? Kine i evio, pepa kuli Yehova palua kako. Kebulula mpunda palua ezio mibele, kabili mulombe mukote umo akupeeleko masoke a kukukwasia kuwamia ezio mibele.

18. Mubombi ali wabombela wakoseleziiwa kutwalilila kukita ki evi afikiile kwaluka mukote?

¹⁸ Kansi, fwe bonse, kubiika mukati ni baalia bali mukubomba bali bakote lonu, tutwalilile kubombela pa mibele ezi yalondolwelua mu leli lyasi. (Baf. 3:16) Eba, wewe uli mubombi ali wabombela? Twalilila kukita buyantanzi! Mulombe Yehova akukwasie evi ukile kwaluka wa mana mu miilo yakue ni mu kilonghaano. (Is. 64:8) Kulanda kisinka, Yehova wakaba kukupaala sana kine waikwinda evi kwaluka ni mibele ilombelue juu ya kwaluka mukote.