Ni Kiki Kili Kukukwasia evi Uye Wasambilila Kila Mulungu?
EBA, uli wamona kyakolele kusambilila Bibilia kila mulungu? Eba, lunge uli waunvua bukofu bwa kusambilila? Nsita inge fwe bonse tuli twaiunvua evio. Inzi, ezianke kutontonkania palua bintu bituli twakita lyonse, nga evelia kusamba pa mubili. Kusamba kuli kwatwama musita, kabili kuli kwalomba kwikwinda, inzi kisia kukita evio, tuli twaunvua bwino sana! Ni lisambililo lya Bibilia, kunti twalipalania na ‘kusamba menda, ni aza menda i keebo, ao mulandu wakue.’ (Baef. 5:26) Tontonkania palua bintu paleepale bili kuvinda kukukwasia:
Kita ntantiko. Lisambililo lya bunke lya Bibilia lili pakati ka “bintu bikilile kukindama.” Pa kako, Mukristu onse apalile kupozako sana mano. (Baf. 1:10) Evi te kunti uye walaba nsa yobe ya kusambilila, buula lipapie, ni kulembapo busiku ni nsa ya lisambililo lyobe, kisia lamika lelio lipapie pa fwasi iswetele evi uye wamonapo lingi. Ao kunti wabiika alarme ku kiombo kyobe kya kielektroniki musita unini ntanzi ya nsa yobe ya lisambililo.
Iipatanisie kukonkana ni aali yobe. Eba, uli wavinda kuya wapozele mano ku lisambililo kine wasambilila nsa yalingi ao uli wamona kyalengele kusambilila mu bipindi bifupi-bifupi? We mwine umanine bwino aali yobe. Kansi, uye watontonkania palua kekio musita luwakita ntantiko. Kine nsa yobe ya kusambilila yakumana, inzi waunvua bukofu, kunti wakita syani? Sambilila ata sie dakika likumi. Kili bwino kukita evio kuliko kwikala sie. Pange kunti waunvua lisambililo lyawama ni kupingula kuongeziako ni ma dakika ange.—Baf. 2:13.
Pangila mbela bintu bya kusambilila. Kine nsa ya kusambilila yakumana, kisia wewe watendeka kwiipuzia kine uli kusambilila ki, manake ‘te uli mukubombia bwino musita onse uuli nao.’ (Baef. 5:16) Kunti kyawama kine wakita liste ya maasi alia autonene kusambilila. Kwa mufuano, kine uli ni kipuzio kyuli waiipuzia, kunti wakiongezia ku liste. Kabili, lyonse kine wapua kusambilila, kunti waongeziako mawazo ange ku liste ya belia bintu byutonene kusambilila.
Uye waaluluka kine kyapala. Uye waalulula bintu bimo ku ntantiko yobe, kwa mufuano, musita uuli wapisia wali mukusambilila, ao bintu bya kusambilila. Kintu kya mana ni keki: Uye wasambilila kila mulungu.
Kulanda kisinka, kine tuli twasambilila kila mulungu, twakaba kupata faida ingi. Burafiki bwetu pamo ni Yehova bwakaba kuluma, twakaba kuya twavinda kukwata bupinguzi buweme, kabili twakaba kuya twali ni nsansa.—Yosh. 1:8.
