LYASI LYA KUSAMBILILA LYA 45
LWIMBO 138 Kufwanina kwa Mutue Uli Ni Ndale
Wewe Wasambilila ki Kupitila Milandu ya Kupeleezia ya Balalume ba Kisinka?
“Eba, mulangue tewizi kusangua abe mu bantu bakotele, ni kunvua tekwizi kwiza abe kupitila kwikala nsiku ingi?”—YOB. 12:12.
KIKATA KIINE
Tuli kusambilila nangue kine twamunakila Yehova Leeza, wene wakaba kutupaala lonu, ni musita uli mukwiza, wakaba kutupeela bukose bwa lonse.
1. Juu ya ki kunti twasambilila masomo paleepale kupitila bakotele?
FWE bonse tukabiile kutungululua evi tuvinde kukwata bupinguzi bwa mana mu bwikazi bwetu. Kunti twapata butunguluzi bwa evio kupitila bakote ba mu kilonghaano pamo ni Bakristu bange bali ni kibelezio. Kine bakulile kuliko fwefue, te tupalile kumona nangue masoke abo teasyapitilue na musita. Yehova atonene tusambilile kupitila bakulu pantu bali ni kibelezio, bamanine bwino bintu, kabili bali ni mulangue.—Yob. 12:12.
2. Tuli kulondolwela ki mu leli lyasi?
2 Lwa kale, Yehova waali wabombia bakotele ba kisinka evi kubakoselezia ni kubatungulula bantu bakue. Tulandile pa lwakue Musa, Daudi pamo ni Yoane. Nsita ni aali ibaaikeelemo yaali yapusene sana. Lubaali basyali pepi ni kufua, baabapeele bamisepuka masoke a mulangue. Babo balalume bonse ba kisinka baalandile sana palua faida ili yafuma mu kumunakila Leeza. Yehova waasungile milandu yabo ya mulangue evi tusambilileko ni fwefue lonu. Atasie kine tuli banike ao bakulu, kunti twapata faida kupitila kusambilila masoke abo. (Bar. 15:4; 2 Tim. 3:16) Mu leli lyasi, tuli kulondolwela milandu ya kupeleezia ya babo bakote batatu pamo ni masomo atuli kuvinda kusambilila kupitila milandu yabo.
“WEWE WAKABA KWIKALA MUSITA WALEPELE”
3. Musa waali wabomba miilo ki?
3 Musa waamubombeele sana Yehova mu bwikazi bwakue bonse. Abanga wali kabika, zuzi, katungulula, kabili abanga wali kalemba. Musa abanga wali ni kibelezio kikata mu bwikazi! Waabatunguluile Baisraeli musita ubaali bafuma mu Misri mu buzia, kabili waaimweneene bimpezia-mano byaakitile Yehova. Yehova waamubombiizie evi alembe bitabu bisano bya kwanza bya Bibilia, alembe Malumbo a 90, pange ni Malumbo a 91. Kabili, pange wenka wene i waalembele ni kitabu kya Yobu.
4. Musa waabakoseleziizie bani, kabili juu ya ki?
4 Lwabanga wali ni myaka 120, Musa waabakolonghaniizie Baisraeli musita unini ntanzi ya kufua. Waabalangulusiizie bintu byonse bibaamwene Yehova wabakitila. Bamo pakati ka ba katwilizia bakue, babanga bali ba misepuka, kabili baaimweneene tulangi twingi pamo ni bimpezia-mano byaakitile Yehova. Kabili, baaimweneene Yehova vyaabapingwile Bamisri. (Kuf. 7: 3, 4) Baaendele pakati menda akasanikile a Lyezi Lyakasi, kabili, baaimweneene Yehova vyaainoonene kisepe kya ba soda bakue Farao. (Kuf. 14:29-31) Lubabanga bali mu kaseba, baaimweneene Yehova vyaabasungile ni kubeemena. (Mal Miz. 8:3, 4) Baisraeli lubabanga bali peepi ni kwingila mu Kyalo kya Bulayo, Musa waamwene nangue tavinda kufua sie bila kusia wabakoselezia. a
5. Milandu ya kupeleezia yakue Musa elia ili mu Malanguluzi a Mizilo 30:19, 20 yaabapeele Baisraeli busininkizio ki?
5 Musa waabalandile ki Baisraeli? (Soma Malanguluzi a Mizilo 30:19, 20.) Waabalandile baswapile nangue bintu byakaba kuwama sana. Yehova waabalaile nangue bakekala musita walepele mu kyalo kya bulayo pantu wakabapaala. Kabili, kekio kyalo kibanga kyaweme sana, ni bulongo bubanga bwafukile evi kufumia mazabo engi! Musa waababwilile nangue mu kekio kyalo mubanga mwali ‘mizi ikata, kabili yaweme elia ibaasyakuulile, masesi ezuzimo bintu biweme bya misango yonse, belia bibaasyabombeelepo evi kubipata, bisima bibaasyaimbile, ni mizabibu pamo ni mizeituni belia bibaasyabyele.’—Mal Miz. 6:10, 11.
6. Juu ya ki Yehova waalekeleele bantu ba ntundu inge babavinde Baisraeli?
6 Kabili, Musa waabasokele Baisraeli. Waabalandile nangue evi batwalilile kwikala mu kyalo kyabo kiweme, baali bapalile kunakila malaizio akue Yehova. Musa waabakinkiziizie ‘basaakule bukose’ kupitila kumutwilizia Yehova ni kupitila ‘kulamatilila kuli wene.’ Inzi, Baisraeli baamukeene Yehova. Pa kako, Yehova waalekeleele Baashuru babavinde ni kubatwala mu buzia. Kabili kisia musita, Bababiloni ni bene baabavindile Baisraeli ni kubatwala mu buzia.—2 Mak. 17:6-8, 13, 14; 2 Mil Nsi. 36:15-17, 20.
7. Milandu yakue Musa kunti yatusambilizia lisomo ki? (Mona ni foto.)
7 Kekio kyatusambilizia ki? Kine twamunakila Yehova, twakaba kupata bukose bwa lonse. Nga evelia sie Baisraeli baalia babanga bali pepi sana ni kwingila mu Kyalo kya Bulayo, ni fwefue tuli pepi sana ni kyalo kya lenu kelia kilailue na Leeza. Twakaba kwimwena kyalo kyaaluka paradiso. (Is. 35:1; Luk. 23:43) Kibanda pamo ni bibanda byakue, te bakaba kuya balipo. (Nfy. 20:2, 3) Tekukaba kuya kwali ma dini akaba asambilizia bufi pa lwakue Yehova. (Nfy. 17:16) Buteeko bwa bantu tebukaba kuya bwaemia kabili bekala-kyalo. (Nfy. 19:19, 20) Mu Paradiso te mukaba fwasi ya ba bisanguka. (Malum. 37:10, 11) Bantu bonse ba mu kyalo bakaba kuya banakila sheria ya nsambu yakue Yehova elia ili yaleta buumo ni mutende. Pa kako, bakaba kuya batoneene ni kuswapilana. (Is. 11:9) Kakiine, bintu byakaba kuwama sana! Kukila pa kako, kine twamunakila Yehova, twakaba kwikala mu paradiso pa kyalo. Tetukaba kwikala sie ma mia a myaka, inzi twakaba kwikala lonse.—Malum. 37:29; Yoan. 3:16.
Kine twamunakila Yehova, twakaba kwikala mu paradiso pa kyalo. Tetukaba kwikala sie ma mia a myaka, inzi twakaba kwikala lonse (Mona lifungu lya 7)
8. Kiswapilo kya kwikala lonse kyaamukwasiizie syani lupua umo olia waakitile myaka ingi wali misyonere? (Yuda 20, 21)
8 Kine tubiikile mu mano bulayo bwakue Leeza bwa kutupeela bukose bwa lonse, twakaba kutwalilila kulamatilila kuli wene ata sie kine twapata maavia a syani. (Soma Yuda 20, 21.) Kabili, bobo bulayo kunti bwalengia tuvinde kulwisia butope bwetu. Lupua umo, waakitile myaka ingi wali misyonere mu Afrika. Lingi, abanga walwisia butope bwakue bwa kukeba kukita kintu kibipile. Walanda evi: “Kumana nangue ezio aali ibanga yaezia kiswapilo kyane kya kwikala lonse, kwaalengiizie nkile kupingula kulwisia bobo butope ni kumupapaata Yehova kwa mute evi ankwasie. Kakiine, Yehova waankwasiizie pantu naavindile kulwisia bobo butope.”
WEWE “WAKABA KUVINDA”
9. Daudi waapatile meezio ki mu bwikazi bwakue?
9 Daudi abanga wali likolo wa bantu bakue Yehova, kabili abanga wali wa kisinka. Kukila pa kako, waali waomba miziki, abanga walemba milandu ipangilue bwino, abanga wali soda, kabili abanga wali kabika. Waapatile meezio engi. Mu myaka ingi, abanga wamubutuka Likolo Sauli, olia abanga waamunvwiliile bwivu. Kisia kwaluka likolo, Daudi abanga wapalile kabili kufyama pantu Absalomu mwana wakue, waali wakebele kwaluka likolo, kabili abanga wakeba kumwipaya. Anzia kine Daudi waapatile meezio, kabili ata sie kine waakitile bilubo bingi, wene waatwaliliile kuya wali wa kisinka mpaka ku mpela ya bwikazi bwakue. Yehova waamukuutile nangue “muntu unghwamiinuemo.” Kakiine, tupalile kukonka masoke akue Daudi!—Miil Bat. 13:22; 1 Mak. 15:5.
10. Juu ya ki Daudi waamusokele Sulemani mwana wakue, olia abanga wali wakwaluka likolo akonkelepo?
10 Kwa mufuano, tontonkania masoke akue Daudi, alia aamupeele Sulemani mwana wakue, olia abanga wali wakwaluka Likolo akonkelepo. Ozo mulumendo waasaakwilue na Yehova evi akwasie lupupo luswetele lutwalilile, kabili akuule ekalu evi kumuletela Leeza mukinzi. (1 Mil Nsi. 22:5) Sulemani abanga wali wa kusaakaana ni maavia. Daudi waali wapalile kumulanda ki? Ale tumone.
11. Nga vilandile 1 Makolo 2:2, 3, Daudi waamusokele syani Sulemani, kabili bintu byaalukile syani kisia wene kukonka azo masoke? (Mona ni foto.)
11 Daudi Waamulandile ki mwana wakue? (Soma 1 Makolo 2:2, 3.) Daudi waamwanine mwana wakue nangue kine wamunakila Yehova, wakaba kuya wali ntunguluzi aweme, kabili nangue Yehova wakaba kumupaala. Kabili, mu myaka ingi, Yehova waamupeele Sulemani bintu bingi biweme, ni kumukwasia mu nzila paleepale. (1 Mil Nsi. 29:23-25) Waakuulile ekalu yaweme sana, kabili waalembele bitabu paleepale bya Bibilia; kabili, milandu yakue paleepale ili mu fwasi ingi mu Bibilia. Waalukile muntu amanikile sana pantu abanga wali ni mulangue ni bunonsi. (1 Mak. 4:34) Inzi, nga vyaalondolwele Daudi, kintu kibanga kyapalile sie kukita Sulemani evi apaalue, ni keki: kumunakila Yehova Leeza. Kya bulanda, Sulemani lwaalukile mukulu, waatendekele kupupa ba leeza bange. Yehova waafipilue, pa kako, waalekeele kumupeela Sulemani mulangue wa kutungulula bantu mu nzila iweme.—1 Mak. 11:9, 10; 12:4.
Daudi waamulandile Sulemani mwana wakue milandu ya kupeleezia. Ezio milandu yatusambilizia nangue kine twamunakila Yehova, wakaba kutupeela mulangue evi tukabe kuvinda kukwata bupinguzi buweme (Mona lifungu lya 11-12) b
12. Milandu yakue Daudi kunti yatusambilizia lisomo ki?
12 Kekio kyatusambilizia ki? Kine twamunakila Yehova, wene wakaba kutupaala ni kutukwasia. (Malum. 1:1-3) Kulanda kisinka, Yehova talaile nangue wakaba kutupeela bunonsi ni kutulengia tumanike nga Sulemani. Inzi, kine twamunakila, wakaba kutupeela mulangue evi tukabe kuya twavinda kukwata bupinguzi buweme. (Tus Maf. 2:6, 7; Yak. 1:5) Mafunde akue Yehova kunti atutungulula musita utuli mukukwata bupinguzi palua miilo, masomo, kwisansamusia, pamo ni makuta. Kine twakonka masoke akue a mulangue, burafiki bwetu pamo nakue tebwinooneka, kabili twakapata bukose bwa lonse. (Tus Maf. 2:10, 11) Twakaba kupata barafiki baweme. Kukila pa kako, lupua lwetu lwakaba kwaluka ni nsansa.
13. Carmen waakitile ki evi aye wali ni nsansa mu bwikazi?
13 Carmen, olia ali waikala mu Mozambike, waali watontonkania nangue kusoma myaka ingi sana i kuli kumukwasia aaluke ni bwikazi buweme. Pa kako, waailembesiizie ku iniversite, ni kutendeka kusambilila masomo a kukuula. Waalandile evi: “Mbanga natona belia binaali nasambilila, inzi azo masomo antwaamiine musita pamo ni maka engi sana. Mbanga nasangua ku masomo kutendekela 7:30 ya lukele-keele mpaka 6:00 ya kyungulo. Te kibanga kyalengele kusangua ku kulonghaana, ni burafiki bwane pamo ni Yehova bwaatendekele kukepa. Kabili, naainikile nangue mbanga naezia kubombela ba mulopue babili.” (Mat. 6:24) Carmen waapepele kuli Yehova palua aali yakue, kabili waakebulwile mpunda mu mpapulo yetu. Wene walanda kabili evi: “Kisia kupeelua masoke aweme na bakote pamo ni mama wane, naapingwile kulekela masomo ku iniversite evi mubombele Yehova mu miilo ya nsita yonse. Naamwene nangue naakwete bupinguzi buweme, kabili ndi ni nsansa sana pantu naakitile evio.”
14. Ni mpunda ki ya mana yaalandile ba Musa ni Daudi?
14 Musa pamo ni Daudi baali bamutonene Yehova, kabili baali bamanine nangue ni kintu kya mana sana kumunakila wene. Mu milandu yabo ya kupeleezia, baabakoseleziizie bantu bakonke mufuano wabo kupitila kulamatilila kuli Yehova Leeza wabo. Kabili, bonse babili baabasokele bange nangue kine bamusia Yehova, te bakaba kwaluka kabili na burafiki buweme pamo nakue ao kupaalua na wene. Masoke abo ni a mana ni kuli fwefue lonu. Kisia ma mia a myaka, mubombi unge wakue Yehova waalangiliile nangue ni kintu kya mana kuli fwefue kutwalilila kuya twali ba kisinka kuli Yehova.
“TE KULI NSANSA IKATA”
15. Mutumua Yoane waaimweneene ki mu bwikazi bwakue?
15 Yoane abanga wali rafiki wa pepi wakue Yesu Kristu kabili abanga wali mutumua wakue. (Mat. 10:2; Yoan. 19:26) Yoane waasimikiile sana pamo ni Yesu, waaimweneene bimpezia-mano byaakitile, abanga wali wa kisinka kuli wene mu kipindi kikolele. Waamwene musita Yesu lwaaipailue, kabili waamumwene kisia kutuntumunua. Kukila pa kako, Yoane waaimweneene kilonghaano kya Kikristu vikibanga kyakula. Wene waaikeele myaka ingi mpaka waimwena mpunda “viyaasimikiilue ku bibumbua byonse pansi pa muulu.’—Bakol. 1:23.
16. Mikanda yakue Yoane ili ni faida ku bani?
16 Musita lwabanga wasyakotele sana, Yoane waapatile lisyuko lya kulemba kitabu kya Nfyulo. (Nfy. 1:1) Yoane waalembele ni kitabu kimo kya Injili, kelia kili ni liina lyakue. Kabili, waalembele ni mikanda inge itatu, i kulanda, Yoane wa kwanza, wa bubili, ni wa butatu. Waamulembeele Gayo mukanda wa butatu. Wene abanga wamutonene Gayo nga evelia sie mwana. (3 Yoan. 1) Inzi, kipalile kubanga kwali ni bange bengi baalia baali batonenue na Yoane nga evelia sie baana. Bintu byaalembele ozu mukote wa kisinka, byaabakoseleziizie basambi bonse bakue Yesu, kabili bili byatukoselezia ni fwefue lonu.
17. Kukonkana ni 3 Yoane 4, ni kiki kili kyaleta nsansa ikata?
17 Yoane waalembele palua ki? (Soma 3 Yoane 4.) Yoane waalembele palua nsansa ili yapata muntu kine wamunakila Leeza. Mu kipindi kyaalembeelemo Yoane mukanda wakue wa butatu, bantu bamo babanga basalanghania masambilizio a bufi ni kulengia kwaluke kukasanika mu kilonghaano. Inzi, bange baatwaliliile “kwenda mu kisinka.” Baali bamukindika Yehova ni “kunakila mafunde akue.” (2 Yoan. 4, 6) Babo Bakristu ba kisinka baalukile ni nsansa, kabili baasansamusiizie ni mutima wakue Yehova.—Tus Maf. 27:11.
18. Milandu yakue Yoane yatusambilizia lisomo ki?
18 Kekio kyatusambilizia ki? Kine tuli ba kisinka kuli Yehova, twakaba kwaluka ni nsansa, kabili twakaba kusansamusia ni bange. (1 Yoan. 5:3) Kwa mufuano, tuli kwaluka ni nsansa pantu twamusansamusia Yehova. Ali watona kine twatiina kukita bintu bibipile bya mu kenu kyalo, ni kwitabila kisinka kya Bibilia. (Tus Maf. 23:15) Ni ba malaika bali basekelela. (Luk. 15:10) Ni fwe bene kunti twasekelela kine twamona ba lupua ao ba nkazi batwaliliile kuya bali ba kisinka, asa kine bali mukukyuziiwa ao kweziiwa kukita bibipile. (2 Bat. 1:4) Kukila pa kako, musita kenu kyalo lukyakaba kupita, twakaba kunvua makola a kumana nangue tubanga twali ba kisinka kuli Yehova ata sie mu kyalo kiteekelue na Sataana.
19. Nkazi Rachel walanda ki palua kubasambilizia bange kisinka? (Mona ni foto.)
19 Tuli twaaluka ni nsansa, asa musita utuli twabasambilizia bange kisinka pa lwakue Yehova. Rachel, olia ali waikala mu kyalo kya Dominika, ali wamona nangue ni lisyuko likata sana kubasambilizia bange pa lwakue Leeza wetu aweme sana, olia utuli twabombela. Wene waakwasiizie bantu bengi batendeke kumubombela Yehova. Walanda evi: “Kikolele kulondolola nsansa indi naunvua musita undi namona baalia bandi nasambilizia batendeka kumutona Yehova, kumuswapila sana, ni kwalulula bintu mu bwikazi bwabo evi bamusansamusie. Ezio nsansa, ni ikata sana kupita kwikwinda kokonse ni kwipeela konse kundi nakita evi kubasambilizia.”
Tuli twapata nsansa kupitila kusambilizia bange bamutone ni kumukindika Yehova (Mona lifungu lya 19)
LEKELA MILANDU YA KUPELEEZIA YA BALALUME BA KISINKA IKULETELE FAIDA
20. Fwefue tupaleene ni ba Musa, Daudi, ni Yoane mu nzila ki?
20 Ba Musa, Daudi, ni Yoane baaikeele mu nsita ni aali elia ipusene ni yetu. Inzi, tupaleene nabo mu bintu bingi. Bene babanga bamubombela Yehova, ni fwefue tuli twamubombela. Nga evelia vibaakitile, ni fwefue tuli twapepa kuli Yehova, tumuswapiile, kabili tuli twamulomba atutungulule. Kukila pa kako, ni fwefue tusininkiziizie nangue Yehova ali wabapaala sana baalia bali bamunakila wene nga evelia vyaali vyamwene babo balalume.
21. Ni mpaalo ki yakaba kupata baalia bali bakonka milandu ya balalume ba kisinka, nga evelia Musa, Daudi, ni Yoane?
21 Kansi, tuye twakonka milandu ya kupeleezia ya babo balalume ni kunakila mafunde akue Yehova. Kine twakita evio, Yehova wakaba kutukwasia ni kutupaala mu byonse bituli twakita. Twakaba kupata bukose, kabili ‘twakaba kusipikizia musita walepele,’ i kulanda, twakaba kupata bukose bwa lonse! (Mal Miz. 30:20) Kupwako, twakaba kupata nsansa ili yafuma mu kumusansamusia Baba wetu wa ku muulu kabili wa ntono, olia ali wafikilizia byonse byali walaya mu nzila ya kupapia, kabili pange itusizi kutontonkaniapo ata limo.—Baef. 3:20.
LWIMBO 129 Twakaba Kutwalilila Kusipikizia
a Bengi sana pakati ka Baisraeli, baalia baamwene bimpezia-mano belia byaakitile Yehova pa Lyezi Lyakasi, baafwile bila kumona Kyalo kya Bulayo. (Mpen. 14:22, 23) Yehova waalandile nangue muntu onse ali ni myaka 20 ao ikilile papo, olia abanga walembesiiziwe, wakaba kufwila mu kaseeba. (Mpen. 14:29) Inzi, Yoshua, Kalebu, ni bange bengi baalia babanga bali ni myaka pansi pa 20, pamo ni bantu ba mu kabila yakue Lawi, bene te baafwile; baabukile Mwenzi wa Yordani ni kwingila mu Kanaani.—Mal Miz. 1:24-40.
b BULONDOLOZI BWA FOT: Kuso: Daudi ali mukumulanda Sulemani mwana wakue milandu ya mulangue ya kupeleezia. Kulio: Banafunzi bali mukunonkela mu mulangue wakue Yehova ku Masomo a ba Painia.
