Eba, waakisoma wapozeleko mano ma kazeeti a Lupungu Lwakue Kamwenenena a onu mwaka? Kine i evio, ale asuka bebi bipuzio:

Yehova abiikile mufuano ki ulangiliile vya kubakitila banakazi?

Yehova ali wabakitila bila kapatulula, kabili tatoneesie balalume kuliko banakazi. Leeza ali wabatwilizia banakazi, ali waemena vibali baiunvua ni maavia abali bapata. Leeza abapeele ba nkazi Bakristu bintu bya kukita mu miilo yakue.—w24.01, lub. 15-16.

Kunti twabombia syani lilembo lya Baefeso 5:7, lelia lilandile nangue: “Tekukite bintu pamo nabo”?

Mutumua Paulo waatusokele evi te kunti tukite burafiki pamo ni bantu baalia bali kulengia tumone kyakolele kukonka mafunde akue Leeza. Burafiki bwa evio kunti bwatendeka kine tuli twapisia musita pamo ni bantu ba evio twamoneene menso kwa menso ao kupitila bitente bya Enternete bya kubwilana mpunda.—w24.03, lub. 22-23.

Tupalile kwisunga kufuma ku maasi a bufi a syani?

Tupalile kuya twakengeele palua maasi asitosiiziwe afumine ku ba lupua ni ba nkazi, palua mpunda ituli twapokelela bila twaipuziizie kupitila biyombo bya kielektronike kufuma ku bantu batusimanine, ni kufuma ku ba bisanguka baalia bali basangua baifiikile ni kwilangilila nga evelia batonene mpunda yetu.—w24.04, lub. 12.

Ni biki bitumanine ni bitusimanine palua Yehova vyali wakaba kumupingula Likolo Sulemani, baalia baafwile mu Sodoma ni Gomora, ni baalia baafwile mu Kibunda kya nsita yakue Noa?

Tetuvinda kusininkizia nangue Yehova waapingwile kubenoona babo bantu lonse. Inzi, tumanine nangue amanine kila kantu, kabili ali ni luse sana.—w24.05, lub. 3-4.

Leeza ni “Mwamba.” Kekio kyatusininkiziizia ki? (Mal Miz. 32:4)

Kunti twafyamina muli Yehova. Wene aswapikikile, lyonse ali wafikilizia bulayo bwakue. Kabili, tezi kwaluluka, bumuntu bwakue pamo ni mupango wakue te bizi kwaluluka.—w24.06, lub. 26-28.

Ni biki bili kukukwasia kwipatanisia ni kilonghaano kinge?

Muswapile Yehova, olia ali kukukwasia nga evelia vyaakwasiizie babombi bakue mu nsita ya kale. Tekuba wapalania kilonghaano kyulimo na kelia kyubanga walimo. Uye wabomba sana mu kilonghaano kyulimo lonu, kabili ikwinde kukeba ba rafiki ba lenu.—w24.07, lub. 26-28.

Kunti twasambilila ki kupitila mifuano itatu ili mu Mateo katue ka 25?

Mufuano wa mikooko ni mbuzi uli watusambilizia palua kuya twali ba kisinka ni kuya twali ni mibele ya kulamatilila. Mufuano wa ba bikira ba mano ni ba bipuba uli watusambilizia palua kuya twaiteaniizie ni kuya twali menso. Mufuano wa talanta uli watusambilizia palua kuya twali ni mute.—w24.09, lub. 20-24.

Lukungu lwa ekalu yakue Sulemani lubanga lwalendukile syani?

Mu 2 Milandu ya Nsiku 3:4, malembo ange a kale ali alanda nangue “maboko 120.” Kekio kilangiliile nangue lubanga lwali na metre 53, mu kulenduka. Inzi, malembo ange alandile nangue “maboko 20,” ao metre 9 evi, mu kulenduka. Ezi mpendua ya kupeleezia yamoneka kuya yapateene ni kutikama kwa bibumba bya ekalu.—w24.10, lub. 31.

Mubombi ali wabombela apalile kuya ‘wali sie na mukazi umo.’ Kekio kili na mana ki? (1 Tim. 3:12)

Kekio kili na mana ya kulanda nangue apalile kuya waupile sie mukazi umo, kabili tapalile ata kanini kukita bukende. Kukila pa kako, tapalile kumulangilila ntono mu nzila isipalile mwanakazi unge asili mukazi wakue.—w24.11, lub. 19.

Juu ya ki kunti twalanda nangue milandu yakue Yesu ili mu Yoane 6:53 ipusene ni belia byaalandile pa Kyakulia kya Lyungulo Kyakue Mulopue?

Yoane 6:53 ilandiile nangue ni kintu kya mana kulia mubili wakue Yesu ni kumina milopa yakue. Yesu waalandile ezio milandu mu mwaka wa 32, mu Galilaya, ku Bayuda baalia babanga bapalile kulangilila kiketekelo muli wene. Inzi, Kyakulia kya Lyungulo Kyakue Mulopue kyaatendekeziiziwe mu Yerusalemu, mwaka umo kisia papo. Mu musita wa kekio kyakulia, Yesu waali walanda na baalia bali wakateeka nabo ku muulu.—w24.12, lub. 10-11.